البر التانى بقلم / لولو_محمد (كامله )

الحلقه ٤٣

((((((( البر التانى )))))))
#لولو_محمد
الحلقه ٤٣

شيري / اهلا و سهلا خير اؤمر
ممدوح / انا الحقيقه كان نفسي اقابل حضرتك فى ظروف احسن من دى لانى لما سالت للاسف عرفت ان زوج حضرتك توفى
شيري / سالت !!
ممدوح / انا قابلت الانسه هند اكتر من مره و الحقيقه مش هنكر انها لفتت انتباهى و سالت عليكوا و
شيري / و انت لما سالت ما قالولكش انها مخطوبه
ممدوح / مخطوبه !!
شيري / انا بنتى مخطوبه يا دكتور ممدوح و كتب كتابها الشهر الجاى
ممدوح / غريبه اوى دى
شيري / هو حضرتك سالت مين بالظبط
.........................................
ممدوح / على العموم بعتزر عن سوء التفاهم ده و هكون قليل الزوق و اقولك انى مش هفقد الامل عن اذنك
ممدوح يمشي
شيري / مجنون دا و لا ايه
فاروق / فى حاجه يا ست الكل
شيري / اهى بلاوى بتتحدف
فاروق يشاور لعيسي يجرى ورا ممدوح و فاروق يقعد مكانه و شيرى تقعد و هى بتضرب كف على كف
.........................
فى شقه هند
جرس الباب يضرب تروح تبص من العين تلاقي مختار مبتسم تفتح و هى مبتسمه
مختار / ما تديني موبايلك اعمل منه مكالمه
هند/ ثوانى اجيبهولك
هند تدخل تجيبه و تديه له مختار يتصل بحد
هند / اتفضل... هو انت موبايلك فصل ؟
مختار / الو
ممدوح / مين !!
مختار / حضرتك الدكتور ممدوح
هند تحط ايدها على بقها
ممدوح / انا مين معايا
مختار / معاك مختار الزيني خطيب الباشمهندسه هند الجمل بحاول اكلمك من رقمى بس حضرتك بتكنسل و غالبا عاملى بلوك يعنى
ممدوح / اهلا و سهلا خير اؤمر
مختار / لا ازاى حضرتك اللى تؤمر خير بتسال عن خطيبتي فقولت بدل ما تغلب نفسك فى السؤال اجاوبك انا
ممدوح / خطيبها !! انا ما كنتش اعرف انها مخطوبه
مختار / طب الحمد لله اديك عرفت
هند تروح تفتح الباسكت و توريله الورد
مختار / و شكرا على الورد كلفت نفسك على الفاضي
ممدوح / انا اسف على الازعاج انا فعلا ما اخدتش بالى و لا هى قالتلى اى حاجه عن انها مخطوبه
مختار / و هى تعرفك عشان تقولك و لا حتى تحكى معاك دا حياله مرتين صدفه مره منهم ما شافتكش اساسا
ممدوح / على العموم بعتزر مره تانيه على اللبس اللى حصل
مختار/  لا يا سيدى ما حصلش حاجه ... سلام
مختار يقفل و يرجع البلوك و يدى الموبايل لهند و هو مبتسم و هى ساكته يوسف يطلع هند تشوفه عنيها توسع مختار يلف يشوفه
يوسف / جميله وقفه السلم دى حلوه اوى
مختار / اؤمر
يوسف / كنت عاوز بنت عمى فى حوار عائلي ليك فيه
هند / مختار من العيله يا يوسف دا خطيبي
يوسف / نتكلم فى الموضوع بعدين وسعى خليني ادخل
هند / انا لوحدى
يوسف / من انبهار لانبهار انقح منه انتى فاتحاله الباب و انتى لوحدك
مختار / هههههههههههههههههههههه
يوسف / صبرنى يارب
مختار / يصبرك انت
يوسف / بقولك ايه يا جدع انت انا مش فايقلك لو سمحت عاوز اتكلم مع بنت عمى كلمتين و لعلمك بخصوص وسام
هند / مالها وسام
يوسف / ولدتها كانت تعبانه اوى الفتره اللى فاتت و ماثر فى نفسيتها انها لوحدها انتوا صحاب من سنين و
هند / هبقي اكلمها اطمن عليها حاجه تانى
يوسف / مره تانيه طنط تبقي موجوده ... ادخلى
هند تبص لمختار يهز راسه تدخل و تقفل الباب
يوسف / هى تلاقيح جتت احنا مش فضيناها سيره و فسخنا الخطوبه دى
مختار / اهرى مع نفسك
مختار يدخل و يقفل الباب و يوسف مضايق يتوف فى الارض و يمشي
...........................
فى شقه حمدى
حمدى بياكل مع مراته
الست / لا ليه هم يعني هيزيدو عند اخوك
حمدى / اهم قرشين للزمن
الست / كنت اكل من الكلام ده زمان انما دلوقت لا يشفعوا و لا ينفعوا لو كنت خدتهم زمان و عمتلك مشروع لوحدك كان زمانك بقيت حاجه تانيه
حمدى / و احنا يعني ناقصنا حاجه
الست / هو احنا يعني لازم يبقي ناقصنا ما ينفعش نعيش عيشه احسن
حمدى / اهو هيجيبهم اما نشوف هتصرفيهم فى قد ايه
الست / تقولش بصرف على نفسي
حمدى / بقولك ايه خلينا ناكل اللقمه فى هدوء مش قادر لخناق
الست / بقولك ايه ما تشارك حامد
حمدى / اشارك حامد فى ايه
الست / فى العربيات انت عارف حامد طول عمره دقرم ما بيحطش جنيه فى حاجه الا اذا كان متاكد منها مليون فى الميه
حمدى / هو احنا بنفهم فى العربيات
الست / يا خويا هو احنا بنفهم فى حاجه خالص
حمدى يبصلها و يحط معلقه رز كبيره فى بقه و يمضغ
..............................
فى شقه مختار
عيسي / انا صورته من بعيد و عرفت عنوانه بس ما اعرفش كان بيكلمها فى ايه
مختار / تمام ..  اخبار الشغل ايه
عيسي / والله مريح ادينا بلغنا كل البوابين فى المنطقه و علقنا ورق فى مداخل العمارات بس اهو ادينا مستنين
مختار / و تستني ليه اشترى انت و الرجاله بس من غير ما تاخد بالها
عيسي / هو احنا عيال و لا ايه ما تقلقش يومين و هتلاقي المحل على البلاطه
مختار / شوفت بقي ... ركز و اهدى ... بالهداوه كل يوم توصيله اتنين تلاته ما تكترش عشان الموضوع يتبلع
عيسي / ههههههههههههههعه فاتتنى دى تمام حاضر
مختار / اه صحيح الشاى بتاعك انت و فاروق انا عارفكوا
عيسي / اقسم بالله ما رضيت قولنا نشترى باكو الشاى و كيس السكر ما رضيتش و حلفت لتزعل حتى فاروق قالها هنجيب من القهوه ما رضيتش و قامت عملت الشاى بنفسيها
مختار / تمام روح ارتاح انت تلاقيك تعبان طول النهار
عيسي / تعبك راحه يا سي مختار
مختار / عشت
عيسي يمشي و مختار يقفل وراه الباب و يطلع البلكونه يلاقي هند بتنشر الغسيل كلو اسود
مختار / احم احم
هند تبصله و تبتسم
مختار / عامله ايه
هند / انا تمام تحب تيجي تزاكر معايا
مختار / احب اوى مش هتعمليلى قهوه من ايديكي الحلوه
هند / اعملك
هند تكمل نشير
هند / بقيت بغسل و بنشر كل يوم بفكر بكره انزل اشترى كام طقم اسود ابدل فيهم
مختار / ننزل نجيب و بالمره نبص على الشوار بتاعك
هند تبصله باستغراب
مختار / ايه انتوا ما عنكوش شوار هنا
هند / اسمه سيشوار و بعدين انا مش بستخدم الحاجات دى على فكره شعرى ناعم
مختار / هههههههههههههههههههههه اولا عارف ثانيا الشوار ده الجهاز بتاعك اللبس و الفرش مش بتاع الشعر
هند / قول والله
مختار / هههههههههههههههههه والله
هند / ايه ده استنى انت شوفت شعرى فين
مختار / قالولى ايه دا الحريم ما بتتوصاش فى الحاجات دى
هند تكمل نشير
هند / يلا ربنا يباركلهم ما ادونيش فرصه ابهرك 
مختار / ههههههههههههههههههه لا ما تقلقيش مش شويه الشعر اللى هيبهرونى
هند تحط تسند على السور و تبصله
هند / امال ايه اللى يبهرك بقي كدا بالصلاه على النبي
مختار / عليه الصلاه و السلام
هند / قول ايه يبهرك
مختار / موقف الجيم حقيقي انبهرت و كنت مبسوط جدا
هند / شكلك بتحب الضرب
مختار/ ضرب مين تضربيني !!! كان غيرك اشطر يا ست الكل و بعدين انا انسان مسالم ما ليش فى العنف و لا المشاكل
هند / لا يا شيخ
مختار / عمرك شوفتيني بدئت مشكله انا دايما رد فعل بحل امورى بالتفاهم بس دا ما يمنعش ان اللى يهوب نحيتي او ناحيه اهلى ادافع عنهم و لا ايه يا ست البنات
هند / معاك حق
مختار / اه بالمناسبه يعني بصي يا هند انا و انتى بيني و بين بعض دنيا و قدام الناس دنيا تانيه خالص
هند / ازاى
مختار / يعني مثلا زى حوار الكلام اللى قولتيه فى الملاهى انا مش معترض عليه بس بيني و بينك انما قدام الناس لا
هند / برده مش فاهمه سورى وضح
مختار / احنا صعايده الراجل عندنا له هيبه و الست معروفه يعني انها بسكوتايه كدا البسكوت لما بينشف بيبقي بقسماط تحبي تبقي بسكوته و لا بقسماط
هند / اااااااه يعني ابان قدام الناس ضعيفه و منكسره و نظام سى السيد و امينه صح
مختار / ههههههههههههههههه لا مش للدرجادى انا اقصد الناس مش هتفهمك هيقولوا جايه تقومى حريمنا علينا و هياكلوا دماغى انت مدلعها مراتك مش عشان قهراويه هتيجي تغير الدنيا و كلام من ده
هند / انا قولت ايه لكل ده
مختار / ما قولتيش اتكمتى فى الشرع و ده حق ربنا لا خلاف عليه الفكره فى التوقيت و الاسلوب و الاقرار
هند / مختار كلمنى كلام افهمه ابوس ايدك
مختار / لا اله الا الله بصي يا بنت الناس الحياه بين الست و جوزها و اهله مش لوى دراع بيني و بينك بالحب تاخدى عنيا انما تقفى قدام اهلى و تقولى انا ما اعملكش و مش مطالبه و الكلام ده بتحرجيني قدامهم و تخلى شكلى وحش و اقسم بالله ما عندى ابسط من كدا يارب تكونى فهمتى
هند / فهمت طبعا انا مش غبيه
مختار / العفو استغفر الله
هند / انت عاوزنى ارسمك وسط اهلك حاضر
مختار / تعرفي ام عباده مرات عمى
هند / اه فاطمه
مختار / اه هى دى بقي استاذه بصراحه هههههههههههه بتعجبنى
هند / افندم
مختار / لا اله الا الله يا بنتى افهمى بصي قدام الناس الخدومه اللى تديكي عنيها انما فى الحقيقه وقت الجد شويه ملح اترموا فى البحر و اختفوا
هند / ااااااه
مختار / و عندها بدل الحجه مليون و دكر ابن دكر امسك عليا غلطه و بالنسبه لعمى بقي معيشاه فى دنيا تانيه خالص ما بيرفضلهاش طلب و لا بيعاتبها على حاجه مش عشان هو مش راجل بس عشان هى حرفيا ما بيتمسكش عليها غلطه
هند / سورى يا مختار لو هسال بس هو ازاى فرق السن الكبير اوى بينهم ده
مختار/ انا وعيت على الدنيا لقيت الوضع كدا و ما ليش انى اسال الحاجات دى اكيد كانت وقتها عادى و الا ما كانتش حصلت و اعتراضي عليها او سؤالى عنها مش هيغير فى الوضع انا و عباده من دور بعض ما لهاش عندى غير الاحترام
هند تهز راسها
مختار / واحده واحده هتفهمى و تاخدى على الجو و فى الاول اكيد هتبقي فى حاجات كدا هنعديها سوا و نتعلم منها ما تقلقيش
هند تبتسم
هند / انا خلصت تعال بقي اعملك القهوه
مختار / تمام يلا
مختار و هند يدخلوا و يقفلوا البلكونات
..........................
فى السرايا
فى اوضه ناصر
انتصار / بس مريم لسه صغيره
ناصر / هو انا قولتلك وافقت انا بقولك البت جايلها عريس انا ما رديتش على الراجل و قولت هصلى استخاره و افكر 
انتصار / ايوه بس مغاورى صعب و عصبي و مريم صغيره و بعدين مريم عاوزه تكمل تعليمها البت شاطره و مغاورى تعليمه على قده
ناصر / ههههههههههههههههههههه هو بالعلام مغاورى راجل كسيب و له هيبته فى البلد و بعدين فاتحيها فى الموضوع و شوفي رايها و هى مياله لايه
انتصار / لا يا اخويا افتح عنيها على الحاجات دى
ناصر / هههههههههههههههههه تفتحى عنيها دا ايه جرا ايه يا انتصار هى فاتن مش اتخطبت و هى قدها و اتجوزت بنت تمنتاشر
انتصار / يا ناصر يا خويا فاتن حاجه و مريم حاجه تانيه و بعدين انت ناوى تفتح على نفسك فتوحه اقولك انا مش هتكلم اتصل بمختار كدا و قوله مغاورى عاوز مريم
ناصر / و هو انا اللى ابوها و لا مختار انا بجد بقيت بغير من مختار يا انتصار ما يصحش كدا
انتصار / هههههههههههههههههه بطل هزارك ده احنا بنتكلم جد انت نسيت كان مضايق ازاى فى جوازه فاتن و انها سابت المدرسه مريم حاجه تانيه
ناصر / ماشي مش عاوزه تكلمى البت ناديها و اكلمها انا
انتصار / يا لهوى هو ما عدش في صبر هكلمها بس مش دلوقت اصبر اما الاجازه تيجي
ناصر / يعني ارد على الراجل اقوله اصبر اما البت تخلص امتحانات اما نشوف هتوافق لسه و لا لا ما يا اه يا لا و خلصنا
انتصار / حاضر حاضر هكلمها حاضر على الله تنبسط
ناصر / هههههههههههههههه مبسوط كتر خيرك
انتصار / يارب دايما
........................
تانى يوم فى مول كبير
مختار قاعد مع ياسمينا فى كافيه الوايتر يدخل يحط طبق ايسكريم كبير و فنجان قهوه
مختار / شكرا
مختار يبص على ياسمينا بتفرد المنديل و تحطه على صدرها و تفرد التانى على رجليها مختار يبتسم و يتابعها ياسمينا تاكل بالراحه خالص
مختار / انتى شطوره خالص فى اكل الايسكريم
ياسمينا تبتسم
ياسمينا / تاخد حته
مختار / لا انا هشرب قهوه شكرا كلى انتى بس نو نو عشان زورك
ياسمينا تهز راسها و تاكل مختار تليفونه يرن يرد
مختار / السلام عليكم
عبد الله / انا وصلت المول اهو
مختار / انا فى الكافيه اللى فى الوش
عبد الله يبان من بعيد مختار يرفع ايده
مختار / انا قدامك بالظبط
عبد الله/ شوفتك جايلك اهو
مختار يقفل و ثوانى و عبد الله يدخل يسحب كرسي و يقعد
عبد الله / ايه يا جدعان المشوار ده ... اعتقى
ياسمينا تشاورله ابعد
مختار / و الله ما اعرف قالوا المكان هنا عامل عروض و فيه حاجات حلوه قولت تمام انتوا ادرى
مختار يبص بعنيه على المحلات
مختار / بس ما انكرش ان فى محلات كتير يعني ممكن ننجز النهرده
عبد الله / هههههههههههههههه طيب اوى دول مش بعيد يقلبوا المول فوقانى تحتانى و ما بشتروش شراب حتى
مختار / ههههههههههههههههههه يا سيدى واخد على كدا الحريم كلهم واحد على فكره الا من رحم ربي يعني
عبد الله / امال هم فين كدا
مختار / والله ما اعرف هما فى مكان ما هنا احنا بقالنا كتير قاعدين الصراحه المهم تاكل حاجه و لا تشرب حاجه و لا ايه
عبد الله / والله مش عارف انا جيت من الدرس على هنا علاطول
ياسمينا / انا كلت بيتزا
عبد الله / حلوه ... انتى اى بيتزا بالنسبالك حلوه اصلا
ياسمينا تطلعله لسانها
عبد الله / احلى حاجه فى الدنيا احترام الناس والله
مختار / ههههههههههههههههههههه
مختار يشاور للوايتر يدخل
مختار / منيو الاكل لو سمحت
عبد الله / من غير منيو بيتزا سوبر سوبريم وسط لو سمحت و كول سلو كبير و فرايز و بيبس
الوايتر يهز راسه و يكتب و يمشي
عبد الله / شوفت السرعه
مختار يشرب القهوه و هو مبتسم
عبد الله / جايين يشتروا هدوم سوده
مختار يبص لعبد الله
عبد الله / بابا الله يرحمه ما كانش بيحبهم يلبسوا اسود الكام حته اللى عندهم اللى كانوا بيبدلوا فيهم الفتره اللى فاتت دول كانت كل حته منهم بفيلم
مختار / الله يرحمه
عبد الله / الله يرحمه بس تعرف انا كان عندى اسود كتير و عمره ما اتكلم
مختار / الاسود ملك الالوان هيبه برده انا بحبه و بحب اللبسه بس ما انكرش انى من نوعيه الله يرحمه الحج محمد بضايق لما بشوف اهل بيتي لبسينه
عبد الله / مع ان معظم لبسكوا اسود عبايات و كدا
مختار / دى حاجه و دى حاجه ههههههههههه بص يا عبد الله لبس الحريم عندنا تلت حاجات لبس بيتي اللى هو زى بتاعكوا فى البيت و كدا بجامات بقي و كدا دا فى اوضهم انما بره الاوضه زى ما شوفت كدا بتبقي عبايات ملونه و خرز و لميع و كل الدلع اللى البنات بتحبه ده انما بره سور السرايا دى عبايات تانيه خالص لازم تبقي حشمه فهمت
عبد الله / فهمت
الوايتر يدخل بالاكل
مختار / بقولك ايه انا قاعد بقالى كتير هقوم اخد لفه كدا على ما تاكل انت و ياسمينا و ارجعلك التليفون فى جيبي لو احتجت حاجه رنلى
عبد الله / تمام خد راحتك
مختار يقوم يتمشي
ياسمينا / هات حته
عبد الله / بيتزا على ايسكريم ايه العك ده و بعدين انتى مش لسه واكله
ياسمينا / ادوق
عبد الله يديها حته
ياسمينا / حلوه هات حته كمان
عبد الله / يا ساتر تعالى كلينى
ياسمينا تضحك و عبد الله ياكلها حته تانيه 
............................
فى محل
هند تطلع من البروفه لابسه طقم اسود تدور على مامتها واقفه عند كونتر مش بعيد بتبص فى كتالوج لانجيريهات
هند / ماما
شيري تبص
شيري / حلو اوى غيرى و تعالى
هند تدخل و شيرى تشاور للبنت اللى بتبيع
شيري / هو الموديلات اللى هنا كلها موجوده
البنت / معظمها حضرتك نقى الموديل و اللون و انا اشوفه لحضرتك
شيري / طب شوفيلى الاتنين دول كدا نفس اللون
البنت / ثوانى
البنت تروح و هند تطلع من البروفه شايله الطقم على ايدها و تروح ناحيه مامتها و وراها بياعه
شيري / تمام هناخد ده كمان هنشوف كام حاجه هنا و نحاسب
البنت / تمام حضرتك
البنت تاخد الطقم و تروح عند الكاشير
هند / بتتفرجى على ايه يا ماما
شيري / اهو ما دام جينا نستلقط اى حاجه من جهازك
هند تبص فى الكتالوج و تبص لمامتها
شيري / ما تعرفيش زوقه ايه فى الحاجات دى
هند / ايه يا ماما السؤال ده احنا عمرنا ما اتكلمنا فى الحاجات دى اصلا
شيري / و لا حتى الالوان اللى بيحبها بوجه عام يعني
هند / لا ما اعرفش و مش هساله
شيري / هو انا قولتلك اساليه نبقي نشكل
البياعه التانيه تدخل و معاها علبتين تفتحهم و هند تتفرج و هى مبتسمه و تشاور على موديل تالت فى الكتالوح
هند / دول حلوين اوى يا ماما  ... لو سمحتى دا موجود عوزاه احمر لو فى
البنت / موجود ثانيه واحده
البنت تروح و شيري بتفتح القمصان اللى فى العلب هند تمنعها
هند / الناس يا ماما
شيري تبص حواليها
شيري / كلهم بنات و ستات اهو فى ايه مالك مش لازم اتفرج و اشوف الخامه
هند / بس مش كدا
البنت ترجع بعلبه هند تفتحها و تبص فيها
شيري / بكام دول يا حبيبتي
البنت / دا ٧٥٠ و دا ٤٢٠ و دا ٥٣٠
شيري / هى الحاجات دى غاليه كدا ليه هى ما عليهاش سيل هى كمان
البنت / لا يا فندم و بعدين الموديلات دى تركى مستورده و رخيصه جدا حضرتك هتلاقيها بره اغلى كتير صدقيني
شيري / برده هى حد هيشوفها لبسه و لا اتنين و تترمي فى الدولاب
شيري تبص لهند متبعاها
شيري / انا هاخد الاحمر ده بس و شكرا معلش تعبناكى
هند / مش لازم
شيري / انا مش هجوزك كل يوم مش عاجبك
هند تبتسم
هند / بصراحه اه اوى
شيري / خلاص تتهنى بيه يارب و الله لو معايا كنت جبتلك التانين كمان بس ملحوقه نستلقطهم حته بحته
هند تبتسم
شيري / يلا نحاسب بقي زمان ياسمينا طلعت عين مختار
هند / يلا
.........................
فى محل تانى
مختار يدخل يتفرج بنت تروحله
البنت / حضرتك بتدور على حاجه معينه
مختار / جهاز عروسه
البنت / فى حاجه معينه فى دماغ حضرتك
مختار / خلينا فى الاحمرات مثلا
البنت / و المقاس
مختار / تقريبا زيك يعني
البنت / تمام اتفضل معايا
مختار يروح مع البنت خطوتين يشوف عبايه استقبال حمره كلها تطريز
مختار / عاوز من دى لو سمحتى
البنت / حاضر
مختار يمشي ورا البنت لحد كاونتر و يبص على المانيكانات حواليه البنت تجبله عبايات كتير منهم العبايه اللى اختارها و تفرد و مختار ينقي
مختار / بصي شكلى يعني مش كله لون واحد هاتى من كله ... حلوه دى هاتيها مع الحمره
البنت تفضل تطلع و هو ينقي
مختار / حلو الازرق ده هى بتليق فيه اوى هاخدها ... فى بجامات عرايسي
البنت / فى كل حاجه حضرتك
البنت تديله تلت كتالوجات
البنت / لانجيري و بيجامات و عبايات نقى حضرتك و انا اجبلك على ما اطبق دول
مختار يركن كتالوج اللانجيرى و يبص فى البجامات صورتين و يقفله
مختار / انا مش هعرف انقى من الصور دى نقيلى تشكيله حلوه و مش مهم السعر شكلى بقي اللوان و مقاسات شورتات بناطيل كت نص كم كلو عادى يعني و الداخلى شكلى برده

...................................