البر التانى بقلم / لولو_محمد (كامله )

الحلقه ٤٩

((((((( البر التانى ))))))))
#لولو_محمد
الحلقه ٤٩
فى المطبخ
فاطمه بتعلق على قدره فول على البوتجاز و انتصار بتقلى طعميه هند تدخل
هند / صباح الخير
انتصار / صباح الفل حالا الفطار هيكون جاهز
هند / ما انا جايه اساعد
هند تفتح فى التقفيل و تدور على حله صغيره
انتصار / يا حبيبتي ارتاحى
فاطمه / سبيها هى ضيفه و لا ايه
.................................
انتصار / طب روحى صحى مامتك عشان الصلاه
هند / عبد الله هيصحيها
هند تفقش خمس بيضات فى الحله و تربهم
فاطمه / بتعملى ايه
هند / ايجز رولز ... بعمل البيض اومليت و طاسه تيفال و اللفه فى الطاسه بالاسباتيولا و بيتقطع شرايح زى السويسرول كدا
فاطمه / و الخمس بيضات دول هيكفوا دا فى جيش بره
انتصار / يا وليه قولى ما شاء الله ما يحسد المال الا صحابه
فاطمه تفقش كرتونه بيض كامله و هند مصدومه
فاطمه / ما شاء الله ... قوليلى بقي بتعمليها ازاى و انا هساعدك
فاتن تدخل
فاتن / صباح الخير ايه ده اتارى المطبخ نور
هند تبتسم
فاطمه / هند النهرده هتدوقنا فطار من ايديها الحلوه
انتصار / صحيتي العيال يا فاتن
فاتن / طابور على الحمامات بيتوضوا و هيطلعوا على المسجد
انتصار / تمام ... طلعى الطماطم و اعملى جبنه بطماطم
هند تساعد فاتن و تقطع الطماطم صغيره اوى
فاطمه / ربيت البيض و بعدين
هند / تحط الطاسه و تدهنها سمنه و تحط شويه طماطم و تحط كبشه بيض و بالاسباتيولا تلفه و الكل متابعها
فاتن / شوفتها على النت الطريقه دى
هند تكرر الموضوع
فاطمه / مش هنخلص كدا انا هعمل بيض عيون جنبيه الناس اللى بره لو نزلوا ما لقيوش اكل هياكلونا
مريم و سماح يدخلوا
انتصار / رتبي المكان بره يا سماح و روحى يا مريم صحي الست ام عبد الله
البنتين يمشوا و اتنين ستات تانين يدخلوا و الكل مشغول فى المطبخ
....................
فى الجنينه
الرجاله و الشباب راجعين من صلاه الفجر
ناصر / مفيش حاجه تجيب البركه قد الصحيان بدرى و صلاه الفجر الواحد يصحى يصلى و ياكل لقمه و يروح يشوف اللى وراه
عبد الله / احنا بنعمل كدا يوم الجمعه بنصحى نفطر و نصلى الجمعه و كل واحد يشوف هيعمل ايه بس غالبا بنام تانى
الكل يضحك
ناصر / ههههههههههه الله يحظك يا عبد الله
عبد الله / و دا غالبا يا عموا اللى هعمله النهرده بعد الفطار لانى مطبق من امبارح
مختار / كلنا هذا الرجل
عباده / فاكر لما عملنا مسابقه مين هيسهر اكتر ... مختار نام اول واحد اتاريه اللقيم كان بيسهرنا عشان ننام كلنا الصبح و يبقي الوحيد اللى فايق تانى يوم
مختار / كنا عاملين مسابقه نشان و الهبل جريو ورا مسابقه سهر و فضلوا يشربوا فى شاى و قهوه طول الليل
عباده / من يومها عرفت انه لقيم و ما بقيتش اسلمله دماغى
ناصر / الحرب خدعه و انت مش عيل و المفروض انك عارف مصلحتك فين
عباده / بس ما تنسوش انى كسبت و كنت اخر واحد نايم
مختار يحط ايده على كتف عباده
مختار / و خد المركز التالت كمان يعني ما طلعش من الترتيب
عباده / و لو كنت فايق كنت خدت الاول و انت عارف
مختار / عارف يلا ناكل بقي
الرجاله يدخلوا جوه و عبد الله يشد مختار ياخره
عبد الله / ما طلعتش سهل انت
مختار / و ياما فى الجراب يا حاوى
عبد الله / هههههههههههههههههه
مختار ياخد عبد الله تحت باطه و يدخلوا يلاقوا الستات بترص سفره كبيره
مختار / انا شامم ريحه هند فى الفطار ده
مختار يشاور على طبق الايج رولز فاطمه تدخل شايله طبقين فول كبار
فاطمه / انا ساعدتها يلا افطروا الف هنا يلا يا جماعه نسيبهم يفطروا
الستات كلها تسيب المكان و الرجاله تقعد
......................
فى المحل عند محمود
محمود يدى لكل واحد من اخواته ظرف و ياخد منه الشيك
محمود / ربنا يطرحلكوا فيهم البركه
حمدى / هتعمل ايه مع هند
محمود / هعمل ايه يعني اللى ياكل على درسه ينفع نفسه
حامد / هستاذن انا عشان ورايا
حمدى / اقعد يا حامد احنا بنتكلم فى موضوع مهم
حامد / اشوفوا انتوا هتعملوا ايه و القرار اللى هتاخدوه انا معاكوا فيه عن اذنكوا
حامد يمشي
حمدى / يا ساتر عليك ... هتعمل ايه يا محمود ما ينفعش تتعامل كانك ما عملتش حاجه دى بنت اخوك برده
محمود / شور عليا قولى اعمل ايه و انا اعمله انت بنفسك روحتلهم انت و يوسف عملوا معاكوا ايه مش طردوكوا
حمدى / الموضوع كان سخن و الست معزوره
محمود / عاوز تروح تانى روح لكن انا مش رايح
حمدى / انت بتعاند مين
محمود / مهو موافقه على الجوازه دى مش هوافق و دا اخر كلام عندى
محمود يسيب المكان و يقوم حمدى يقوم وراه
حمدى / مهو الجواز مش بالعافيه يا محمود
محمود / يا سيدى انا مش عاوزها تتجوز يوسف يوسف خطب و عروسته بنت حلال انما الواد البلطجى ده ما ينفعناش
حمدى / تقوم تبعتلها واد نصاب
محمود / غلطت و مش هعمل كدا تانى عندك انت فكره احسن قولها
حمدى / ما عنديش
محمود/ ما عندكش يبقي تنقطنى بسكاتك
حمدى يبص لمحمود و يسيبه و يمشي
...................
فى السرايا
هند بتتفرج على الحاجات اللى نقوها
هند / والله كلها حاجات حلوه اوى
فاطمه تمسك طقم سرير
فاطمه / انا اللى منقيه ده
هند / يسلم زوقك حلو اوى
عيل صغير يدخل
العيل / ست هند ست هند سى مختار عاوزك فى الجنينه
البنات يتغامزوا و يضحكوا و هند عينها رايحه جايه بينهم و محرجه
انتصار / قومى يا هند شوفى عاوزك فى ايه
هند / هخلص الحاجه دى و اروحله امبارح ما شوفتش حاجه
شيري / قومى يا هند الحاجه مش هتطير ما تلطعيهوش
فاطمه / تلاقيكي وحشتيه و مش قادر على بعادك
هند تبصلهم و تقوم تطلع بره تلاقيه ساند على العربيه يشوفها يتعدل
هند / نعم
مختار / ايه نعم دى ؟ فى ايه مالك ؟ كانك بتتجنبيني
هند / انا فعلا بتجنبك كل ما طنط فاطمه تشوفنا مع بعض ترميلى كلمتين انت مش عارف قالتلى ايه امبارح
مختار / انا قولتلك طبعها هى كدا دخلى من هنا و طلعى من الناحيه التانيه
هند / ما انت لو تعرف قالتلى ايه
مختار / ما يفرقش معايا اعرف رايها لا انا و لا انتى بنعمل حاجه غلط
هند / دى كانت بتلمح امبارح انى هجيلك الاوضه تخيل
مختار / ما كنتش بايت فيها اصلا
هند / انت هتشلنى ايه البرود ده
مختار / هههههههههههههههههههه ممكن تهدى
هند / بحاول بس اعمل ايه مش سيبانى فى حالى
مختار/ و لا هتسيبك فى كل عيله واحد منغص عليهم عيشتهم هى دى اللى فى عيلتنا
هند / و العمل
مختار / اتانحى و اتباردى اللى زى دى بتتغذى و تنموا على انها تحرق دمك و لو عرفتيها ايه اللى بيحرق دمك مش هتخلصي
هند / انت شايف ان ده الحل
مختار / دا حل ناجح جدا و انا مجربه بنفسي المهم شوفتى الاوضه بتاعتنا
هند / شوفتها كبيره اوى بفكر احط فيها ميني بار صغير و ميكرويف
مختار / من العين دى قبل العين دى ايه تانى
هند / ما دام ما فيش وقت نفصل فاتفقنا انى هنزل يوم ههههه طنط انتصار بتقول يوم بعياله
مختار يبتسم
هند / ننقى عفش جاهز بس انا و ماما قولنا هنقيه من مصر
مختار / زى ما تحبي ننقى من مصر
هند / احنا مش هينفع ننزل هنا كل شويه طنط انتصار قالت بعد الجواز غيرى اللى مش عاجبك
مختار / براحتك
هند / لو ما فيش حاجه تانى ادخل عشان لو اتاخرت مش هيعتقونى تلسين و تنبيط
مختار / طب ايه رايك انك مش دخلالهم جوه تاني بالعند بقي
هند / يا مختار بقي
مختار/ وحشاني
هند تبتسم
مختار / تعالى معايا نروح مشوار صغير قبل ما نسافر
هند / انا رايى تطلع ترتاح انت هتسوق ازاى و انت مطبق و ناجل المشوار ده لبعدين يلا اطلع نام
مختار / هند لو سمحتى
هند / و لا كلمه اطلع نام بدل ما اوريك وشي التانى
مختار / وحش الوش التانى ده ؟
هند / انا كيوت فى كل الاحوال
مختار / ههههههههههههههههه
هند / يلا تصبح سورى تتمسي بالخير عن اذنك
هند تدخل السرايا و مختار واقف مضايق يدخل وراها
مختار / السلام عليكم
مختار يعدى و يطلع فوق و هند تقعد
فاطمه / ما قدرش ينام الا اما يتكلم معاكى يا عيني على الحب يا عينى
هند تبتسم و تقوم
هند / هستاذنكوا اروح اريح شويه انا مطبقه ... الحاجات حلوه كلها ما شاء الله شكرا عن اذنكوا
هند تروح المضيفه و ترمى نفسها على السرير
....................
فى سرايا الجوارحه
شاهين يدخل يسلم على ناصر شاهين يقعد
شاهين / السرايا نورت
ناصر / منوره باهلها امال فين مغاورى
شاهين / و انا اللى كنت فاكرك جاى تشرب معايا الشاى
ناصر / و ماله نشرب الشاى و نتكلم فى اللى حصل امبارح هو ما حكالاكش و لا ايه
شاهين / ابدا خير
ناصر / الصراحه مش خير ابدا
مغاورى يدخل يسلم
مغاورى / السلام عليكم ازيك يا حج ناصر
ناصر / الحمد لله تعال اقعد
شاهين / مزعل عمك ليه يا مغاورى بقي ده اسمه كلام برده
مغاورى / والله يا ابا ما عارف مين له حق يزعل دا انا حتى ما اتكلمتش و عملت حساب للعشره
ناصر / و هى العشره بتقول تغلط فى حريمنا و ترفع السلاح على نسايبنا
مغاورى / و من امتى حريمكوا بتشتم الرجاله
ناصر / ان كانت هند غلطت فانت نهيت الموضوع مع راجلها و اتكلمتوا ليه تروح تغلط فيها قدام اخوها
مغاورى / و هو كان راجلها جابلى حقى منها
ناصر / و ايه حقك اللى انت عاوزه من حرمه يا مغاورى يا كبير الجوارحه
مغاورى يبص فى الارض
ناصر / يرضيك يا حج شهين مريم بنتى و سماح بنت عمى شاكر و هند خطيبه مختار اخويا يرجعوا السرايا امبارح غرقانين فى طينهم من سواقه مغاورى
مغاورى / مهو ما كانش يصح يخرجوا لوحدهم و يقعدوا فى حته زى دى
ناصر / حته ايه يا مغاورى غلطوا لما تعبوا من المشي و قعدوا ياخدوا نفسهم كانوا رايحين اسطبل الخيل و معاهم الغفير عباس ايه يا مغاورى مشوفتوش و انت نازل تتخانق مع الحريم
شاهين / الكلام ده حصل يا مغاورى
ناصر / الرجاله كانوا واخدين على خاطرهم منك اوى يا مغاورى خصوصا مختار انت احرجته وسط نسايبه
مغاورى / بتيجي عليا جامد يا حج ناصر
ناصر / انت ابني زيك زيهم كلهم عشان كدا جتلك لحد عندك اللى حصل كانه ما كانش و اللى فات مات اتفقنا
شاهين / انا محرج منك اوى يا حج ناصر دايما تحرجنى بكرم اخلاقك
ناصر / سنهم يا حج شاهين و دورنا نوجهم و نوعيهم
شاهين / والله و انا كنت فاكرك جايبلى البشري اتارى
ناصر / بخصوص الموضوع ده يا حج شاهين انت اخويا و مغاورى ابنى و لو لفيت الدنيا لمريم مش هلاقيلها احسن منكوا بس الجواز قسمه و نصيب و مريم عاوزه تكمل تعليمها
مغاورى / و هو انا كنت رفضت انها تكمل تعليمها ما تكمل
ناصر / الجواز هيعطلها يا مغاورى و انت عارف كل شئ بالخناق الا الجواز بالاتفاق
مغاورى / تلاقي مختار هو اللى ملا دماغها بالكلام ده و مش بعيد بكره
شاهين / مغاورى
ناصر / مختار عمها و يهمه مصلحتها
مغاورى / يعني فعلا هو اللى مشجعها
ناصر / شيل مختار من دماغك يا مغاورى مريم بنتى انا و انا اللى بتكلم معاك
مغاورى / هتفضل تحميه و تغطى عليه لحد امتى
ناصر يبتسم
ناصر / ان كنت بغطى عليه فدا عشان احميك انت يا مغاورى بالاذن يا حج شاهين
شاهين و ناصر يقفوا
شاهين / انا محرج منك اوى يا حج ناصر بس هو كان معشم نفسه بيها
ناصر / انا هسيبك تتكلم معاه لو له نصيب فى حاجه هياخدها و لو ما لوش يبقي اكيد ربنا شايله حاجه احسن
شاهين / و هو فى احسن من مريم
ناصر / يسلم اصلك يا حج عن اذنك
شاهين / اخص عليك يا حج ناصر علاطول مستعجل كدا يا راجل اشرب حاجه على الاقل
ناصر / المره الجايه نيجي فى حاجه احسن من كدا و نشرب شربات بدل شاى
شاهين / ان شاء الله و ما تاخذناش فى اللى حصل
ناصر / ما حصلش حاجه يا حج عن اذنك
ناصر يمشي و شاهين يرجع لمغاورى
شاهين / خليت رقبتى قد السمسمه قدام الراجل
مغاورى/ دا بدل ما تقف جنبى و تدافع عنى شايف مختار بيعمل معايا ايه شايف
شاهين / ان كنت انت و لا مختار لازم تتعلموا تدفنوا خلافاتكوا فى الارض و تدوسوا عليها و تحطوا اديكوا فى ايدين بعض عشان لو ما عملتوش كدا البلد دى هتبقي بحر دم ما لوش قرار و هتبقوا انتوا السبب
شاهين يسيب مغاورى و يمشي
مغاورى / ماشي يا سي مختار قال بيحميني منك قال
..................
فى عربيه مختار
مختار مركز فى السواقه و هند جنبه بتلعب فى الموبايل و مامتها و عبد الله و ياسمينا نايمين ورا
هند / هو مفيش ريست قريب
مختار / فى هانت اهى
هند / طب بليز تقف فيها
مختار / حاضر و هى فرصه اشرب فنجان قهوه
هند / انا كمان عاوزه واحد ضرورى دماغى هتنفجر من الصداع
مختار / انتى ما نمتيش و لا ايه
هند / ابدا ما عرفتش انام
مختار / اللى واخد عقلك لو انا اتهنا به لو غيرى
هند / ههههههههههههه انت طبعا ما فيش غيرك
مختار / يبقي اتهنى به
هند / امين
مختار / الاستراحه اهى .... عبد الله.. عبد الله
عبد الله يفتح نص عين
مختار / استراحه لو حد عاوز يخش الحمام او يشرب حاجه صحيهم
عبد الله يهز راسه و يدعك فى عنيه و يصحي مامته و مختار يركن هند تفتح الباب و تنزل تدخل جوه مختار ينزل وراها
شيري / كانت خدت ياسمينا فى ايدها ركبى بتوجعنى مش قادره انزل
عبد الله / خليكي انا هاخدها اوديهالها اجبلك حاجه و انا جاى
شيري / لا يا حبيبي تسلم
عبد الله ينزل و يشيل ياسمينا و يروح ورا هند و مختار
.......................
على قهوه
حامد قاعد مع راجل بيديله فلوس و الراجل بيعدها
الراجل / ايه دول يا حامد
حامد / انت مش قولت اجيب اللى اقدر عليه
الراجل / ايوه بس مش كدا دول ما يجوش تمن عربيه واحده
حامد / والله دول اللى معايا
الراجل / يا حامد القرش صياد و كل ما حطيت فلوس اكتر كل ما حسيت بالمكسب انما دول هيجيبولك شويه فكه و ملاليم و هتيجي تقولى انى ورطتك
حامد / يا سيدي يجيبوا اللى يجيبوه اهو احسن من ركنتهم
الراجل / براحتك بس زى ما قولت المكسب هنا هيبقي نسبته قليل غير لما تحط مبلغ محترم
حامد / حطيت الف اكسب عشره حطيت الفين اكسب عشرين
الراجل / لا حطيت الف تكسب خمسه حطيت الفين تكسب عشرين حطيت تلاته تكسب خمسين حطيت ميه تكسب متين
حامد / انت بتقول ايه
الراجل / امال انت فاكر ايه حطيت شويه هنتاجر فى عربيات صيني تعبانه حطيت كتير هنجيب اليابانى و الالمانى و دول بقي مش هقولك
حامد / على العموم انا برده مش ساكت خد دول دلوقت و يومين تلاته كدا هكون اتصرفتلك فى غيرهم
الراجل / تمام استني بقي اما اكتبلك وصل بالفلوس
الراجل يطلع دفتر و يكتب
.......................
فى الاستراحه
مختار بيشترى شيكولاتات من اللى هند بتحبها و يحطها فى باسكت صغير هند تدخل تروحله
هند / دا انا شكلى هدلع النهرده
مختار / النهرده بس ؟
هند / هتدلعنى يعني
مختار / زى القطط
هند / ههههههههههههههههه عبد الله رجع بياسمينا العربيه نايمه خالص هنجبله بقي كابوتشينو معانا هو و ماما
مختار / نجبلهم و انتى عاوزه ايه
هند / اى حاجه نسكافيه كابوتشينو قهوه شاى اى كافيين و خلاص
مختار / حاضر خدى دول شوفى عاوزه ايه كمان و هاتيه و انا هقوله على الكابتشينو
هند تبتسم و تاخد الباسكيت و تروح ناحيه تلاجه العصير و تنقي مختار يرجعلها
مختار / عبد الله حكالك عملنا ايه امبارح
هند / للاسف لا ما كانش فى فرصه انت عارف رجع من الصلاه نام و صحيناه و احنا ماشين و اهو نايم دلوقت برده اهو
مختار / كان بيتعلم يفك السلاح و يركبه
هند / المره اللى فاتت كان بيتمرن على النشان و النهرده بيفك السلاح و يركبه انا مش عاجبنى الكلام ده
مختار / ليه
هند / ممكن ياذى نفسه ممكن ياذى حد
مختار / لا مهو عبد الله مش صغير و انا معاه
هند / مهو انت اهم حد عندى يا مختار ممكن من غير ما يقصد ياذيك
مختار يبتسم
مختار / انتى مكبره الموضوع هو انتى يعني ما بتتعامليش مع السكاكين فى الطبيخ ما انتى ممكن تعورى نفسك او تعورى حد افرضي دخل شرطه و بقي ظابط هتقوليله ما تشيلش سلاح هتقوليله تاذى نفسك و تاذى حد هند انا بشيل سلاح من و انا عيل قد كدا
هند / انا خسرت بابا و ما عدليش غيركوا مش هقدر اشوفكوا بتتاذوا يا مختار
مختار / مش هيحصل السلاح بتاعنا مش هياذينا دا عشان يحمينا
هند تبص الناحيه التانيه و تتنهد
هند / ممكن نحاسب على الشيكولاته دى عشان اخد حته عشان هبطت باين
مختار ياخد منها الباسكت و يروح يحاسب و كل شويه يبصلها بحزن تبتسمله يبتسم و يبص للراجل و يديله فلوس
.......................
فى شقه حامد
حامد بيتكلم مع مراته
الست / قولتلك الفلوس دى لا هتشفع و لا تنفع
حامد / و هو انا كنت لقيت غيرها و قولت لا
الست / يا سلام و هى دى ورثك يعني دا انت لو كنت حطيتها فى اعفن بنك
حامد / كانت هتطلعلى الفوايد اللى كنا عايشين عليها و بناخدها من محمود ارباح و لما كنت هسحبها فوايدها كانت هتتقطع انما دلوقت راس المال فى جيبي و فايدته لسه شغاله
الست / انت شايف كدا
حامد / عندك كلمه عدله قوليها ما عندكيش سبيني افكر
الست / ايه رايك تكلم حمدى و تقوله بدل ما مراته و عياله يفرتكوا الفلوس فى الهيافه و انا ليك عليا اكلم اسراء و اقنعها تشاركنا
حامد / بقولك ايه
الست / قول
حامد / ما تشاركينى انتى
الست / منين يا حسره
حامد / هاتى حتتين الصيغه بتوعك ابيعهم و اشغلهم
الست / دا انا عيناهم لجهاز العيال
حامد / زى ما اخدتهم جرامات هرجعهم جرامات و فوقيهم بوسه
الست / مش عارفه يا حامد كدا مش هيبقي حيلتنا حاجه نتسند عليها للزمن
حامد / يا وليه المشروع مضمون و كمان مرتبى موجود و من بعده معاشي على المكسب من المحل دا احنا هنتنغنغ يا بت
الست / اللى تشوفه
حامد / بكره الصبح اخدهم افصلهم فى الصاغه و اشوف يقطعوا كام
.....................
فى السرايا
انتصار / الحمد لله انك حليت الموضوع قبل ما يكبر و الحمد لله اكتر انك نهيت موضوع مريم انا ما كنتش متخيله بنتى هتعيش مع واحد زى ده ازاى
ناصر / لو مريم فى ربع شطاره فاطمه هتعرف تغيره انتى ناسيه عمى شاكر ده كان ازاى ايام عزه
انتصار / لا يا ناصر فرق كبير فاطمه اتجوزت عمك على كبر و حملت علاطول فى العيل اللى كان هيموت عليه دا اللى خلاه يلين لها و ان كان هدى دلوقت فدا حكم السن
ناصر / معاكى حق برده
انتصار / انا عارفه انت كنت بتفكر فى ايه بس مريم مش هى الحل
ناصر / الرجاله ما بيتفقوش يا انتصار مختار و مغاورى كدا كدا نارهم ما بتنطفيش و دلوقت عباده و امين و الباقين كمان دخلوا فى الخط
انتصار / عباده مش سهل و هيعرف يلم الليله و يبلفه تانى تحت باطه و بكره تشوف
ناصر / مختار و عباده و مغاورى التلاته اقوى و اجمد من بعض بس لو ما حطوش ايدهم فى ايد بعض هيدمروا بعض
انتصار / مختار و عباده يتنافسوا اه انما وقت الجد يساندوا بعض قبل اى حد ولاد الزيني ما يعضوش فى بعض ابدا
ناصر / الزمن غير الزمن
انتصار / الزمن ما يغيرش الرجاله اطمن
ناصر يبص لانتصار و يبتسم تمسك ايده و تطبطب عليها
......................