البر التانى بقلم / لولو_محمد (كامله )

الحلقه ١٨٩

((((((( البر التانى )))))))
#لولو_محمد
الحلقه ١٨٩
فى المستشفى تانى يوم
فى مكتب المدير الدكتور بيتخانق مع المدير
الدكتور / يا دكتور حضرتك لازم تبلغنى ان فى حد هيكشف على الحاله و بعدين ما دام هم مش شايفين اننا عارفين نشوف شغلنا بيجيبوه عندنا ليه
المدير / انا ما كنتش اعرف ان فى دكتور تانى هيشوف الحاله دول جم وقت الزياره و بعدين انا مش فاهم فين المشكله اصلا
الدكتور / يا دكتور المريض ده بتاعى
............................
المدير / يا دكتور حضرتك دكتور شاطر و لازم تبقي واثق فى تشخيصك اكتر من كدا
الدكتور / حضرتك شايف كدا تمام عن اذنك
الدكتور يطلع بره و هو بيتكلم فى التليفون
الدكتور / بقولك ايه يا شكرى احنا ما اتفقناش على كدا ..  ما اهداش .. الجدع بتاعك اللى جبتهولى ... اه محمود الجمل ... اهله مش ساكتين و انا مش ناقص روشه ... اما نشوف
.......................
فى شقه يوسف
العيله كلها مجتمعه
يوسف / و هو انا معترض ما ننقله فى احسن مستشفى بس للاسف الحكايه دى محتاجه فلوس و انا شخصيا لحد دلوقت لسه باخد مصروفى من امى
اسراء / ان كان على الفلوس امرها محلول
يوسف/ منين هى حكايه يوم و لا اتنين و بعدين المستشفيات الخاصه اليوم فيها بيقف بالشئ الفلانى يعني فتوحه ما لهاش اول من اخر
امل / نتصرف ناخد قرض نستلف نعمل اى حاجه
يوسف / والله انا شخصيا ما حلتيش اى حاجه ابيعها زى ما انتوا عارفين ابويا كان واخد اللى ورايا و اللى قدامى و حاطتهم فى المحل شوفى بقي جوز اختك لسه ابويا شاريله عربيه جديده و لا ايه يا معتز
معتز / ايوه بس انا كنت بدفعله اقساطها
بنت / معتز شغال ليل نهار عشان يدفع لبابا الاقساط دى
يوسف / و دهبكوا ايه هتستخسروه فى ابوكوا
شاب / و تبيع اخواتك دهبهم ليه ما الحج كان عنده فلوس تعالج بلد
يوسف / عنده بس ما نقدرش نتصرف فى جنيه منها
حامد / الا اذا
امل / الا اذا ايه
حامد / يوسف يحجر على ابوه
يوسف / انت بتقول ايه يا عمى ازاى يعني ما ينفعش طبعا
حامد / ده الحل الوحيد كدا تقدر تتصرف فى فلوس ابوك و تنقله احسن مستشفى و لما ربنا يشفيه ان شاء الله كل حاجه هترجع لطبيعتها
يوسف / بس انا ما اقدرش امشي فى حاجه زى دى لوحدى انا ما اعرفش اتصرف فى الحكايه دى
الشاب / يا سيدى نشوفلك محامى و نمشي معاك فيها
يوسف / انا على اخر الزمن هحجر على ابويا
حامد / غمه و تنزاح يا يوسف يا ابنى و بعدين مش الضرورات تبيح المحظورات
يوسف / انتوا شايفين كدا
يوسف يبصلهم ساكتين
يوسف / على بركه الله شوفلنا محامى يا عمى
حامد يهز راسه و يوسف يقعد على كرسي و يعمل متاثر
......................
فى اوضه هند
هند بتصرخ و تتلوى و تعيط و مختار حاضنها
هند / ابوس ايدك مش قادره
مختار / انتى وعدتيني خلاص والله هانت
هند / ما بيقلش والله ما بيقل بيزيد مش قادره يا مش قادره
مختار / لو مش عشانى عشان امك و اخواتك عشان كل اللى بتحبيهم و يحبوكى و الله هتعدى
هند / بموت يا مختار مش قادره ارحمنى بقي ارحمنى ابوس ايدك ارحمنى و موتنى بقي
مختار / هتعدى يا هند الدكتور تلاقيه بس راح لعباده الاول المرادى معلش استحملى خمس دقايق بس
هند / بيريحكوا انتوا مش بيريحنى انا دكتوركوا بيرحيكوا منى بس وجعى ما بيروحش انا مش قادره والله ما قادره
مختار يحضنها اوى و الدموع ماليه عنيه
مختار / حقك عليا والله كان غصب عنى والله كان غصب عنى كنت فاكر انى هلحقه ما كنتش اعرف انى بسيبك لوحدك حقك عليا سامحيني سامحيني
الدموع تنزل من عنين مختار يبص على هند فاقده الوعى يجس نبضها الباب يتفتح و شيري تدخل
شيري/ الدكتور بره عباده ما كانوش عارفين يثبتوه و شرح دراعه بالابره لحد ما نيموه ... هى مالها جرالها ايه
مختار صوابعه على رقبتها و مختار واضح عليه التعب
مختار / نايمه
شيري / نامت لوحدها من غير الحقنه ؟ طب امشي الدكتور و لا ادخله و لا اعمل ايه
مختار ساكت و هند فى حضنه
شيري / طب تروح ترتاح و انا افضل جنبها شويه
مختار يهز راسه لا
شيري / انت ما اكلتش حاجه و لا ارتحت
مختار / انا مرتاح هنا روحى حضرتك ارتاحى
شيري تبصلهم بحزن
شيري / اخليني جنبكوا
مختار / لا انا هنام جنبها شويه لما ... لما تصحى هنادى حضرتك تقعدى معانا حبه
مختار يبص لشيري و يبص على هند شيري تبص فى الارض تطلع بره و تقفل الباب و تنهار من العياط انتصار تجرى عليها
انتصار/ فى ايه البت جرالها حاجه فى ايه
شيري تمسح دموعها
شيري / نيمها ... معرفش ازاى بس نايمه فى حضنه جوه
شيري مش قادره تاخد نفسها
عبد الله / انتى كويسه يا ماما
شيري / بنتى بتروح منى يا عبد الله  ... بنتى ... انا كويسه كويسه... عن اذنكوا هروح ارتاح شويه
عبد الله/ تعالى اوصلك اوضتك
شيري / لا يا حبيبي كتر خيرك خليك هنا جنب اختك يمكن اخوك يحتاجك فى حاجه عن اذنكوا
شيري تسيب المكان و تمشي
فاطمه / انا هخليني معاها
انتصار / على الهادى يا ام عباده
فاطمه تبصلها و تهز راسها و تمشي
......................
فى اوضه عباده
عباده نايم و خديجه بتلزق بلاستر على ايديه هى بتعيط و سماح بتساعدها
سماح / مغاورى بيقول اننا فى عنق الزجاجه و ان لما هند و عباده يقوموا على رجليهم كل حاجه هترجع زى ما كانت  فى البلد
خديجه / ما عدتش قادره يا سماح هو اللى واخد الحبايه و انا اللى بتوجع و لا قادره اخد لا منوم و لا مسكن بسبب اللى فى بطنى ... حتى ابنه موجوع عليه بيخبط فى بطنى
سماح / بجد بدا يتحرك
خديجه / مش اول مره بس من ساعه ما عباده بقي فى اللى هو فيه و الخبط زاد
سماح / ما تروحى تكشفى يا خديجه بدل لا قدر الله اللى بيحصل حوالينا يكون اثر عليكي و لا حاجه
خديجه / هروح لما يقوم بالسلامه مش هقدر اسيبه لوحده موجوع مش هقدر ابعد عنه
سماح / مهو بيبقي نايم مش حاسس بحاجه
خديجه / سامعنى يا سماح بيبقي سامعنى بيحس بيا
خديجه تمسح دموعها
خديجه / يارب اشفيه و اشفي هند و كل الناس يارب ما لناش غيرك
خديجه تعيط سماح تاخدها فى حضنها
........................
فى القسم
وسام / ايوه حضرتك انا الخلاف اللى بينى و بين هشام كان اخره القسم لكن انا لا دخلت بيته و لا ليا علاقه بموته
الظابط / تفتكرى كان ليه اعداء غيرك
وسام / يعني هو ما نصبش غير عليا ما اكيد له اعداء غيرى
الظابط / و انتى طبعا ما تعرفيش عنهم حاجه
وسام/ انا الضحيه هنا حضرتك انا اللى اتنصب عليا فهمنى انه ابن ناس و خد كل اللى ورايا و اللى قدامى و كل اللى عرفته عنه طلع كدب اهو
الظابط / ايوه بس حضرتك لازم تعرفى ان كل الناس اللى يعرفوه لما حققنا معاهم كلهم ادونا اوصافك انتى
وسام / حضرتك انا كنت فى البيت مع ماما و البواب و الجيران عندى يشهدوا و بعدين انا بنت حضرتك يعني لا هعرف اكسر باب الشقه و لا اقتل هشام بالبساطه دى هو برده راجل و مش هيتقتل بالساهل يعني و بعدين ما اكيد القاتل ده حد شافه كاميره جابته فى سلاح للجريمه اى كانت الطريقه اللى مات بيها بصمات فى المكان اكيد مش انا اللى هعرف حضرتك شغلك يعني
الظابط متابعها و حاط ايده على خده و رافع حجبه
الظابط / بس واضح انك بتفهمى فى شغلنا اهو
وسام / ما فيش اكتر من الافلام فى التليفزيون عربى و اجنبى يعني و دى بديهيات مش قانون يعني
الظابط يهز راسه و هو مبتسم
................................
قدام المحكمه بعد فتره
امل / النهرده باذن الله هكلم المستشفى ننقل بابا خلاص المحكمه حكمت و ما عدش فى اى سبب اننا ناجل انا فعلا مش مبسوطه من المستشفى دى
اسراء / معاها حق يا يوسف كذا مره اروح فى مواعيد الزياره و يمنعونى و كل مره بحجه شكل و كمان الدكتور مش مريحنى خالص
يوسف / باذن الله النهرده هروح المكتب و اشوف الوضع المالى و انقله فى احسن مستشفى
حمدى / انا مجهزلك كل حاجه جرد لكل البضاعه اللى فى المحل و كمان لقيت مشترى بسعر كويس بسبب الظروف هو صحيح هياخدها بجملتها بس اهو نسيل اى حاجه
يوسف / حتى لو بخساره انا ما عنديش مشكله اهم حاجه عندى السرعه
حامد / ما تنسوش اتعاب المحامى يا جماعه الناس دى ما بتشتغلش لله و للوطن
يوسف / ما تقلقش يا عمى كل واحد حقه محفوظ ... بقولك ايه يا معتز معلش توصلهم البيت عشان انا ورايا شغل كتير
معتز / عنيا
حامد / خدنى فى طريقك يا يوسف
يوسف يبص لحامد
حامد / اصل العربيه عملتها معايا تانى و دا وقت خروج موظفين و مش هلاقى لا مواصلات و لا توكسه
يوسف / على راسي يا عمى اتفضل
حامد و يوسف يمشوا فى اتجاه و الباقين يمشوا فى اتجاه تانى خالص
.........................
فى اوضه هند
هند بتغسل وشها و مختار مسندها
مختار / تحبى اشغلك السخان تستحمى
هند تهز راسها لا
هند / شويه كدا فعلا مش قادره يا مختار
مختار / براحتك ما تضغيش على نفسك احنا كنا فين
هند / انا مش قادره اقف
مختار يسندها لحد ما يوصل للسرير الباب يخبط
مختار / ارتاحى انتى تلاقى ام فاتن جيبالك لقمه و لا حاجه
هند / ابوس ايدكوا تعبت معدتى مش قابله اى اكل يا مختار
مختار يفتح الباب و هو بيتكلم
مختار / مهو من كتر الترجيع لازم تاكلى عشان
مختار يلاقى عباده واقف بعيد الاتنين يبصوا لبعض و يبتسموا
مختار / ثوانى يا هند
مختار يطلع و يقفل الباب
عباده / نايمه و لا ايه
مختار / لا صاحيه الحمد لله فرحت اوى انى شوفتك عامل ايه
عباده / احسن كتير وجع خفيف اعبط حبايه مسكن تضيعه
مختار / هند لسه تعبانه شويه بس طبعا احسن كتير
عباده / ان شاء الله تخف خالص و ترجع احسن من الاول
مختار/ ان شاء الله
عباده / انا جيت اطمن عليها قبل ما انزل هتعوزوا حاجه اجبهالكوا و انا راجع
مختار / استنى شويه يا عباده ما ينفعش الناس تشوفك تعبان
عباده / و ما ينفعش الناس ما تشوفنيش كل ده و بعدين انا مش هتاخر لفه بالعربيه و راجع علاطول و ما تقلقش يا سيدى مش هطلع لوحدى و هبقى اخلى امين هو اللى يسوق مرتاح كدا
مختار / يا عم انا بتكلم من خوفى عليك بس انما انت اكيد عارف بتعمل ايه
عباده يخبط مختار على كتفه و هو مبتسم و يمشى مختار يدخل الاوضه تانى
........................
على قهوه
يوسف / انت مستعجل على ايه انا لسه مسكت جنيه فى ايدى
حامد / مهو بعد العيد ما بيتفتش الكحك يا ابن اخويا
يوسف / يا عمى هو انا هروح منك فين بس و بعدين قدامك انا لسه قايل لعمى يبيع و يصفى البضاعه
حامد / ايوه بس البضاعه دى ما تجبش مقدم عربيتين و مصاريف علاج ابوك
يوسف/ علاج ابويا ايه هو ابويا كان عيان لا سمح الله
حامد / لا بس لازم يفضل باين عيان يعني اى كان المستشفى اللى هيتنقلها محتاجه رشه حلوه
يوسف / ما تقلقش محلوله ان شاء الله انت بس اهدى عليا انا قولتلك شهرين واهى الدنيا مشيت اسرع مما كنا حاسبين و الدنيا سالكه اهى مش هيبقي ما شوفوهمش و هم بيسرقوا شافوهم و هم بيتقاسموا يا عمى
حامد / ماشي هديك اسبوعين بحالهم محبه منى على ما العربيتين يوصلوا
يوسف / انا اتفقت انى هدفع مقدم عربيتين بس لا مؤاخذه لازم ابقي فى الصوره دى فى الاول و الاخر هتشتغل اوبر يعني مش عربيه المحافظ هى
حامد / دا كلام جديد ده
يوسف / ما انا مش اهبل انت مش ليك العربيات تكون موديل السنادى
حامد / تقوم تروح تجبلى عربيتين صيني
يوسف / و لا صيني بس حاجه فى المعقول اصلى من غير زعل عارفك تخصص ابو بلاش كتر منه
حامد / يبقي رجلى على رجلك
يوسف / ماشي بس زى ما اتفقنا ما شوفوهمش و هم بيسرقوا ما ينفعش يتخانقوا و هم بيتقاسموا تبوظ عليا و عليك
حامد يبص ليوسف يوسف يقوم يقف
يوسف/ عن اذنك انا بقي عشان اللحق المحل صحيح لو عندك مشترى للمخروبه دى بسعر كويس هات
حامد / انت هتبيع المحل
يوسف/ لو لقيت سعر حلو و كاش هبيع ما لقيتش هوضبه و اقلبه كافيه
حامد / بس انت كدا هتقلب الكل عليك
يوسف / من حكم فى ماله ما ظلم و المحاكم موجوده يلا سلام انا بقي
يوسف يمشي و حامد متابعه و بيفكر
...........................
فى سرايا الزنايته
فاطمه تدخل مسنده خديجه و مغاورى وراهم فاطمه تزرغط الكل يطلع
انتصار / خير يا ام عباده الدكتور قالكوا ايه فرحينا معاكى
فاطمه / بت زي القمر يسموها زى ما يسموها بس دلعها بطه انا بقول اهو
الكل يحضن خديجه
سماح / قولتى لعباده
مغاورى/ كلمته فى التليفون و جاى فى الطريق
مريم / الف مبروك يا خديجه ربنا يتملك على خير
خديجه / عقبالك
مغاورى / انا بقول بقي ما دام عباده قام بالسلامه و نزل يبقي نخلى الفرحه فرحتين و سماح تروح معايا و لا ايه يا ام عباده
فاطمه / هترجعها كدا كتيمي يا كبير الجوارحه
مغاورى/ و انا مش هردلك كلمه هفرشلها الطريق من هنا للبيت رمل
سماح / رمل !!!
مغاورى / ورد ؟ هفرشهالها ورد و هندبح حلاوه عباده و هند و سماح و اى ترضيه هتقولوا عليها هعملها بس خلاص بقي يا جماعه
فاطمه / ههههههههههههههههه و انا مش هكسر بخاطرك اتفق انت و مراتك و قول الكبير و شوف هيقولك ايه
عباده يدخل شايل شنطه من جواهرجى
عباده / يقولى على ايه
مغاورى / هروح سماح
عباده/ و ماله مصلحه
عباده يفتح الكيس و يطلع علبه قطيفه يفتحها جواها طقم دهب كبير يديه لخديجه و يبوس راسها
عباده / ربنا ما يقطع للكبير عاده ... الف مبروك يا ست الستات ربنا يتملك على خير
خديجه / يخليك ليا
مختار ينزل و هو مسند هند و شيرى مسنداها من الناحيه التانيه فاطمه تشوفها تزرغط و انتصار تجرى تسندها معاهم
مريم / ايوه كدا طب والله لازرغط انا كمان
مريم تزرغط
عباده / عامله ايه
هند / والله مش هكدب تعبانه اوى بس اتخنقت من الاوضه
فاطمه / ايوه اخرجى اقعدى فى الجنينه شويه و سط الزرع و الخضره و خلى الشمس و الهوا يدخلوا جسمك و يردوا فيكي الروح كدا
انتصار / هسلقلك فرخه بلدى ترم عضمك لحسن دا انتى اتمقتى يا ضنايا
فاطمه / فرخه ايه اسلقي فردتين كوارع و اسقيها شوربتها خلى الدم يرد فى وشها شويه
هند / طلعنى تانى طلعنى
سماح / هو دخول الحمام زى خروجه و لا ايه خلاص
مريم / قومى قومى اما نروح نقعد فى الجنينه ورا شويه قومى
هند / انا نازله ابارك لخديجه و اطلع الف مبروك يا خوخه ربنا يتملك على خير
خديجه / يا حبيبتي كنت طلعتلك بنفسي
مختار / بس يا بنتى ما صدقنا خرجت من الاوضه
هند / ربنا ما يكتب عليك ابدا اللى انا فيه لا انت و لا اى حد
عباده / امين من كل قلبي
هند تبصله و تبتسم
عباده / قومى اقعدى فى الجنينه شويه جسمك محتاج الشمس هتفرق معاكى
هند تهز راسها و تبص لمختار الكل يتسابق على انه يسندها
.....................
فى القسم
وسام قاعده و البلطجى واقف قدامها
الظابط / انتى لسه هتنكرى احنا جبنا صوركوا سوا فى الكافيه اللى تم فيه الاتفاق و مكالمه التليفون
وسام / ما حصلش ما حصلش انا ما قولتلوش يقتله والله ما قولتله يقتله انا كل اللى كنت عوزاه انه يخليه يرجعلى فلوسي انا ما قتلتوش و لا كنت هستفيد حاجه من موته
الظابط / انصحك تشوفى محامى يمسكلك القضيه
وسام / محامى ايه انا ما ليش دعوه بكل ده انا بريئه انا عمرى ما دبحت فرخه هقتل ازاى بس
الظابط / خدوهم على الحجز
وسام تصرخ
وسام / ما قتلتوش بريئه و الله العظيم ما قتلته و الله ما ليا دعوه دا هو اللى نصب عليا ما قتلتوش و الله ما قتلته
العسكرى يشدها و يوديها الحجز و هى عماله تصرخ
وسام / والله ما قتلته اقسم بالله ما قتلته
ست تقوم من على البورش
الست / ايه الدوشه دى مش هنعرف ننام و لا ايه ... جرا ايه يا بت مالك عامله بوليكه كدا ليه اترزعى هناك مش فيقالك
الست تشد وسام و تزقها فى جنب وسام تقعد ساكته و هى حاطه ايديها على بقها من الصدمه
.........................
فى المضيفه
عبد الله قاعد بيزاكر باب المضيفه يتفتح و هند تدخل مسندينها عبد الله يقوم يجرى عليها و الفرحه مش سيعاه
عبد الله / الله الله الله ايه المفاجاه الحلوه دى يا قلبي
هند / عامل ايه فى المذاكرة
عبد الله / عندى امتحان الصبح
هند / على خير مش هعطلك انا بس حبيت اطمن عليك و اطمنك عليا
مختار / هنقعدها فى الجنينه الورانيه شويه تتهوى لو حبيت تريح حبه
عبد الله / احب جدا
هند / مش عاوزه اعطلك
عبد الله / ما جتش من عشر دقايق اشم هوا انا كمان
تعالى يا قلبي تعالى
عبد الله يسندها و يروح معاها الجنينه و سماح و مغاورى واقفين فى جنب تحت شجره
مغاورى / وحشتيني ايه بس طب قسما بالله سريرك نار و انتى مش فيه
سماح / على عيني والله بس خلاص ناكل لقمه و اجى معاك
مغاورى / طب و الورد
سماح / ابقي عوضنى بطريقتك بقي
مغاورى / عيني
سماح تبتسم
........................
فى شقه يوسف بعد فتره
اسراء/ محل ايه اللى تبيعه يا يوسف امال ناكل منين
يوسف / يا امى انا صفيت كل الشغل اللى فى المحل هدفع مرتبات على ايه بقي فمشيت كل اللى كانو فيه و بعدين انا مش مقرر انى ابيع يعني الا لو جاب مبلغ محترم انما غير كدا هاجره او اغير النشاط
اسراء / ايوه بس المحل ده مش بتاعك لوحدك عشان تتصرف فيه لازم تلم اخواتك و تتكلم معاهم
يوسف / اخواتى مين يا ماما صلى على النبى اخواتى مش حاسين بحاجه دول عاوزين ينقلوا بابا فى مستشفى خاص من غير ما واحده فيهم تطلع جنيه من جيبها ما كل واحده عندها دهب يسد عين الشمس هو مين اللى جايبه مش بابا
اسراء / ايوه يا حبيبي بس انا مش عوزاك تدخل فى مشاكل معاهم
يوسف / ما تشغليش انتى بس بالك و انا ان شاء الله هعرف اتعامل معاهم كويس
اسراء / امرى لله هنعمل ايه بس
يوسف يبتسم و يبوس ايد مامته
.....................
فى سرايا الزنايته
الكل متجمع على الغدى
عبد الله / احنا نطلع نايل كروز كام يوم ننسي فيهم كل اللى عشناه و لا انتوا ناويين تضيعوا عليا اجازه نص السنه
هند / على فكره انا نفسي فيها اوى
فاطمه / ايوه بس خديجه و فاتن ما يستحملوش
فاتن / انا لا ما ينفعش انتوا خدوا العيال و انا سيبولى السرير اخد و ادى معاه فى موضوعاتنا الحيويه
خديجه / انا نفسي اعرف بتجيبيه منين النوم ده دا انا مش لاقيه وضع يوحد ربنا ارتاح عليه فاضلى تكه و انام واقفه زى الخيل
الكل يضحك
عباده / يا ستى هانت اولدى انتى بس و انا اخدك و نطلع نعمل عمره و لا حج احنا ما سافرناش شهر عسل
هند / لا بقي يا كبير انا عسلى ما يتحسبش و لا نسيتوا
فاطمه / انتى يا بنتى راشقه فى اى حاجه كدا مش كنتى لسه نفسك فى الكروز دى بتاعه عبد الله
مختار / ما ليها حق برده يا كبير احنا بقالنا كتير مضغوطين دا الواحد لسه مش مصدق انه فاق اقسم بالله
عباده / اتكلم عن نفسك و اسال امين احنا طالع روحنا ازاى و المجهود اللى بنعمله عشان بس نرجع البلد زى ما كانت ايام الكبير
مختار / و اسال امين ليه ما انا عايش معاكوا و شايف بس برده على الاقل بنام و نشبع نوم مش زى الاول يا اخى دا انا لسه امبارح هند مصحيانى مش عارفه تنام من شخير
الكل يضحك
هند / مش للدرجادى يعني
مختار / يا ستى سبيني افرح نمت و شخرت يا ناس دا انا كنت نسيت طعمه
عبد الله / رغى رغى و مفيش فايده ما تقول كلمتك يا كبير الاجازه عمرها قصير
عباده / يا سيدى هو انا قافل بوابه السرايا بالجنازير شوفوا مين عاوز يطلع و اتوكلوا على الله
عبد الله / استبينا طب بالنسبه لكتب الكتاب بقي
عباده / طب بالنسبه للمهر بقي
عبد الله / الاجازه الجايه يعني ماشي ما روحناش بعيد يعني
عباده / و الله الكبير الله يرحمه كان شارط التقدير
عبد الله / و انا اللى كنت فاكرك بتحبني
مختار / لو لا قدر الله الترم ده زنج منه نعمل اعتبار للظروف اللى مرينا بيها و نديله فرصه تانيه
انتصار / لا هيزنج و لا هيحتاج فرصه تانيه ان شاء الله و بعدين الدخله مش هتم غير بعد التخرج انما كتب الكتاب بشوقهم
عبد الله / حتى انتى يا ست الكل امال مين بيحبنى هنا يا جدعان
فاطمه / يا خويا كفايا عليك عروستك هتنهب
عبد الله / طب ما احنا بنحب بعض جوزونا بقي
الكل يضحك
عباده / يا اخى ارحمنى دا انت زنان و لا زن الحريم
عبد الله / ما ضاع حق ورائه مطالب
عباده / خلاص يا سيدى اخر كلام كتب الكتاب فى الاجازه الكبيره و الدخله لما تستلم الشهاده الكبيره و دا اخر كلام
عبد الله / ماشي كلامك يا كبيرنا
انتصار / اعمل حسابى معاك فى الكروز دى يا عبد الله محتاجه اغير جو انا كمان
عبد الله / دا الرحله دى طالعه عشانك انتى فى الاصل يا ست الكل
انتصار / الواد ده طالع بكاش لمين
الكل يضحك و يكملوا اكل
......................
فى شقه يوسف
يوسف بيتخانق مع ممدوح
يوسف / و انت محموق كدا ليه انت مالك اصلا
ممدوح / يعني ايه انا مالى ما انا مش فاهمك انت بتقول كلام و تعمل حاجات تانيه خالص
يوسف / انت مالك برده اقول ايه و اعمل ايه انت حياله جوز اختى و ابن عمى انما المحل ده بتاعى انا و اخواتى
ممدوح / اديك قولتها بتاعك انت واخواتك و انا جوز اختك يبقي ليا فيه زى ما ليك بالظبط
يوسف / ليه هو ابويا مات و بتقسموا الورث
ممدوح / و ما دام انت لسه فاكر ان ابوك عايش بتضيع شقاه و تعبه ليه
يوسف / انا شورت امى و هى وافقت انت مالك بقي
ممدوح / انا مش موافق و اختك مش موافقه و لا هى و لا باقي اخواتك
يوسف / لموا بعض و تعالوا اعملوا اعتصام تحت البيت و اكتبوا شعارات على الحيطان و جرافيتي و انا ان شاء الله هشكل لجنه تدرس مشاكلكوا
ممدوح / انت بتهزر و لا بتستظرف و لا انت ايه حكايتك بالظبط
يوسف / بقولك ايه يا ممدوح انت كنت بتشتغل فى المحل و صفيت حسابك وانا يا سيدي مش هبيعه و لا هاجره انا هوضبه و افتحه كافيه ايه رايك تمسك معايا شيفت و هديك ضعف المرتب اللى كنت بتاخده فى المحل
ممدوح / شيفت ايه يا ابنى حرام عليك تعب ابوك طول السنين دى كلها ترميه و تبدا من الصفر
يوسف / بص انا تعبان و مصدع و مش قادر للكلام الكتير ده روح و اتكلم مع اختى و اجواز اخواتى و بالمره زى ما بتحاسبني بقي روح حاسب معتز على اللى عليه و لا هو حلال لناس و حرام لناس تانيه
ممدوح يبص ليوسف و يمشي
.........................
فى اوضه هند بعد فتره
هند بتلبس الطرحه مختار يدخل الاوضه و فى ايده شنطه هدايا
هند / انت ايه اللى طلعك انا كنت هلبس الطرحه و انزل اهو
مختار/ يا بنتى براحتك انا اساس لسه هغير هدومى
هند / سماح كل شويه تكلمنى تستعجلنا
مختار / البنطلون اتوسخ من الطين فى الغيط و بعدين لسه ما جهزوش و بعدين ما تقعديش ترغى و تنسينى انا كنت جايبلك ايه
مختار يطلع طقم الماظ
هند / الله ايه الجمال ده
مختار / مش احلى منك تسمحيلى اللبسهولك
هند/ اكيد
هند تلف و مختار يلبسها و يبوسها من رقبتها تبتسم
مختار / حلاوه سلامتك كان المفروض اجيبه بدرى بس كنت مستني ابيع المحصول و اخد نصيبي عشان اجبلك حاجه عليها القيمه
هند تلف و تعلق ايديها حوالين رقبته
هند/ انا مش عاوزه غير وجودك جنبى هو ده اللى بيسعدنى و يفرق معايا
مختار / و ماله زياده الخير خيرين
هند / على العموم انا كمان جيبالك هديه
مختار / هديه ايه دى
هند / ثانيه واحده
هند تروح تفتح الدرج و تطلع منديل قماش جواه تيست حمل و تروح تحطه فى ايد مختار
مختار / ايه ده ... الله اكبر .. الله اكبر بتتكلمى جد يا بت
هند / ههههههههههههه و هى الحاجات دى فيها هزار
مختار / يامنت كريم يارب طب انتى كدا لازم ترتاحى ما ينفعش ليكي تعب
هند / عارفه و هاخد بالى جدا من نفسي و كلمت الدكتوره و حجزت لبكره
مختار / و ليه بكره النهرده كان اولى
هند / ههههههههههههههه و هيفرق اليوم ده يعني
تليفون مختار يرن مختار يطلعه من جيبه يبص فيه
مختار / بيستعجلونا هغير بسرعه عشان نمشي ...هند انتى قولتى لحد
هند / لا انت اول واحد
مختار / و اخر واحد لحد بكره و بعدين نبقي نقول على الضيق
هند/ انت من بتوع دارى على شمعتك تايد و لا ايه
مختار / انا من بتوع الحسد ادخل الرجل القبر يلا يلا عشان اللحق اغير
مختار يفتح الدولاب و يطلع بنطلون
....................