البر التانى بقلم / لولو_محمد (كامله )

الحلقه ٣٥

(((((((( البر التانى ))))))))
#لولو_محمد
الحلقه ٣٥
على / عليك و على معرفتك يا يوسف ادى اللى خدناه من وراك
يس / الا ما كلف نفسه و رن علينا حتى يطمن عملنا ايه
على / اااااه يا رجلى مش قادر
يس / انا مش عارف هدخل على ابويا بمنظرى دع ازاى
على / دا لو هيعلقني فى المروحه هيبقي اهون من اللى شوفناه
العربيه تقطع و تقف
يس / فى ايه !!!
السواق / ثوانى يا بيه اشوف فى ايه
السواق ينزل يفتح الكبوت و يس و على يبصوا لبعض السواق يرجعلهم
السواق / العربيه بينها عطلت هتصل بحد يجي يسحبها
على / كان قلبي حاسس انى مش هشوف امى تانى
.........................
فى الحجز
مختار قاعد على الارض يدخل تلاته من رجالته مختار يبتسم الرجاله يتفقدوا المكان يلاقوا تلاته قاعدين واحد فيهم ماسك مناخيره و اتنين عنيهم وارمه يروحوا يقعدوا جنب مختار
راجل ١ / شكلنا جينا متاخر
مختار / و داخلين بايديكوا فاضيه الا ما فى لقمه ناشفه حتى
الرجاله تضحك و تقعد
راجل ٢ / ما تقلقش الجدع اللى اسمه محمود بره بيتنازل
مختار / لتكونوا فكرتوه بالفيديوهات
راجل ١ / و احنا اللى هنعيده نزيده و لا ايه لا احنا لمينا عيلته كلها
مختار / لتكونوا جيتوا على الحريم
راجل ٢ / عيب يا سي مختار احنا رجالتك
مختار / حد اطمن على عمى فى المستشفي
راجل ٢ / محمدين معاهم
مختار يهز راسه باب الزنزانه يتفتح و عسكرى ينادى
العسكرى / مختار عمران الزيني
مختار يبص للرجاله و يبتسم و يقوم ينفض هدومه
..........................
فى المستشفي
هند / والله هو ده اللى حصل مختار كان بيدافع عنى
عبد الله / فى حياتى ما شوفتش بجاحه كدا دا ما فيش دم خالص امال اقرار عدم التعرض ده لازمه امه ايه انا بقول نسرع موضوع الفرح ده و نقفل عليهم السكه
شيري / ازاى يعني انت بتقول ايه
هند / اصلا مختار كان ناوى يكلم بابا فى حوار كتب الكتاب
شيري / يا جماعه انا بتكلم عن ابوكوا اللى راقد جوه ده
عبد الله / هو مش الدكتور قال انه كويس نجهز كل حاجه
شيري / لما مختار يطلع من الحبس ابقى قول له تعال بسرعه اتجوز اختي عشان احنا مش عارفين نحميها انتوا عايزين تشلوني انا رايحه اشوف ليمون ولا كركدي ولا اي حاجه تهديني بدل ما اقع منكم انا روخره
شيرى تسيب المكان و تمشي
عبد الله / انتى عارفه ان ملهاش حل تانى صح
شيري تبص لعبد الله بحزن و تبص فى الارض
.......................

فى شقه يوسف
اسراء / يارب خدنى بقى و ريحنى من الهم ده
يوسف / اقسم بالله يا ماما كانت خايفه عليا
اسراء / يا ابنى فوق لنفسك بقى هى مش خايفه عليك هى مش عاوزاله مشاكل
يوسف / يا ماما انتى ليه مش قادره تفهمى
اسراء / يا ابنى اتقى ربنا فى بنت الناس اللى انت رابطها جنبك
يوسف / يوووووووه بقى يا ماما وسام مش زى ما انتى فاكره
اسراء / بقولك ايه يا يوسف افتكر يا حبيبى كلام ابوك ليك لما قالك تصبر على حكايه الخطوبه دى و انت اللى صممت يا ابنى دخول البيوت مش لعبه
يوسف / الحوار كله اصلا كان لعبه
اسراء / سحرالك والله سحرالك
يوسف / مش هنخلص احنا صح
اسراء / حالا اكلم الشيخ يجي يقرالك و يفكلك العمل ده
يوسف / اقولك انا سيبهالك خالص و ماشى
يوسف يمشى و يرزع الباب وراه و اسراء ما تقدرش تمنعه
.............................
فى المستشفى
هند قاعده قدام باب الاوضه مع عبد الله و مربعين ايديهم و باصيين قدامهم بحزن مختار يدخل
مختار / وحدووووه
هند تبص تشوفه تبتسم جدا و تقوم تجرى عليه و تلم نفسها قبل ما توصله بخطوتين تقف و هما الاتنين مبتسمين
هند / انت جيت !!!
مختار / لا لسه جاى فى السكه استنينى
هند تبوز
مختار / ههههههههههههههههههههه
عبد الله / نقول كفاره و لا ايه
مختار / عمى عامل ايه
هند / تعبان قالوا هيروح بس لما فاق و ما لقاكش تعب
مختار / طب ممكن ادخله و لا ايه
عبد الله / ايوه تعال يا ريت
عبد الله يخبط يفتح الباب
عبد الله / مختار عاوزك يا بابا
محمد يهز راسه مختار يدخل شيرى تقوم تقعد بعيد
محمد / بقولكوا ايه مش قادر للزحمه سيبوا مختار معايا شويه
الكل يبص لبعضه
شيرى / هروح الكافتريا اجبلك حاجه معايا
محمد يهز راسه لا الكل يطلع بره و مختار يشد الكرسى و يقعد جنب محمد
محمد / عامل ايه
مختار / الحمد لله طمنى عليك يا عمى مش تجمد كدا
محمد / اسمع يا مختار انا برفع عنك الحرج
مختار / من غير ما تكمل انا قتيل الجوازه دى
محمد يبتسم بتعب
محمد / توعدنى يا مختار تاخد بالك منها
مختار / فى عينى والله يا عمى
محمد / خلاص يا مختار كلم
الباب يتفتح و محمود و اخواته يدخلوا
مختار / الدكتور مانع الزياره
محمود / امال انت هنا بتهبب ايه
محمد / بيحدد معاد الفرح
محمود / شايفين اخوكوا اللى جيتوا جرى تطمنوا عليه ما سالش حتى كنتوا فين
مختار يبتسم
محمود / ما تقول لعمك يا مختار باشا اخواتى كانوا فين
مختار / على فكره اللى راقد ده اخوك
محمد / ما تشغلش بالك يا مختار انا مش مستنى منه غير كدا ما عادش بيفرق معايا اصلا
حمدى / و احنا كمان مش فارقين معاك يا محمد الجدع ده كان خاطفنا
مختار / انا كنت فى الحجز
حامد / يا اخى اتقى الله
مختار / تانى بقولها الراقد ده اخوكوا عاوزين تتخانقوا معايا يبقى بره
محمود / انت ما تخصناش من اساسه
مختار / يبقى اعملوا حساب للراقد ده و اجلوا خناقكوا و استفزازكوا لما يقوم على رجله و لا انت استحليت انك ترقده
محمود / لم نفسك يا جدع انت انت جاى توقع بيني و بين اخويا تعرف ايه انت عن اللى بينا قوله يا محمد قوله مين اللى رباك و وقف جنبك و جوزك
محمد / حصل لحد ما ابنك شرف
محمود / يا ادى ابنى اللى شايله على راسك و زاعق
مختار يبص الناحيه التانيه
محمود / عملك ايه ابنى عملكوا ايه يا جدعان
مختار يبتسم و يغطى بقه
محمود / انت اللى ضربت يوسف الاول و لا هو اللى ضربك
مختار يبص الناحيه التانيه
محمود / رد عليا
مختار / عاوزنا نتحاسب بجد انت قد اللى بتطلبه
محمود / هددنى هددنى زى ما اخوك الكبير جاب بلطجيته و جم هددونى
مختار / اللى جولك ما كانوش بلطجيه دول اهلى و ناسى جم يكلموك بالزوق بعد ما ابنك جاب صحابوا و جم يتخانقوا معايا فى بيتي و اه بما انك جبت سيرتهم زمانهم فى الطريق جايين يقوموا بالواجب و يزوروا العيان مش يخلصوا عليه
محمود / انت قليل الادب
مختار / لو كنت قليل الادب كنت رديت عليك رد تانى
الجهاز يزمر الكل يبص على الجهاز محمد مش قادر ياخد نفسه
.........................
فى شقه يس
يوسف / انا مش مصدق
يس / يا عم لو مش مصدق بقى صدق عينيك دا احنا اتبهدلنا و طلعت روحنا انا لحد دلوقت مش مصدق نفسى انى روحت
يوسف / بس مش غريبه دى و بعدين هما شافوا بطايقكوا
يس / شافوا بطايقنا و كارنيهاتنا و كل حاجه ما كانش ناقص غير يفتشونا زاتيا
يوسف / طب ما انتوا اغبيه ما اكيد كشفوكوا و كلموا مختار و وصاهم عليكوا انا متاكد ان كل ده حصلكوا بسبب مختار
يس / بقولك ايه انا اوت انا مش هعتب البلد دى تانى العمر مش بعزقه عاوز تروح روح بنفسك و بالمناسبه اللى فهمته ان البلد كلها عارفه بعض و بيعرفوا الغريب عنهم بمجرد النظر فا انا لو منك ما امشيش فى السكه دى تانى
يوسف / يعنى ايه
يس / يعنى احنا عندنا امتحانات بلاش عندك يضيع علينا كلنا السنه و اه مختار شكله واصل اوى نص البلد تقريبا بتاعتهم ان ما كانش اكتر و كل من هب و دب بيعملهم الف حساب
يوسف / على نفسه
يس / بقولك ايه يا يوسف لمصلحتك تفكر فى موضوع هند تانى
يوسف / انت ما شوفتش كانت بتبصلى ازاى يا يس والله كانت خايفه عليا
يس / يا يوسف فوق لنفسك هند مش بتحبك
يوسف / لو كنت شوفتها كنت اتاكدت بنفسك هى مجبوره عليه
يس / و ايه اللى جابرها دا انتوا العيله كلها فى ضهرها ضد الجوازه هى بس تقول لا
يوسف / ما اعرفش بقي مورط عبد الله فى بلوه و لا ماسك عليهم ايه
يس / ما يمكن يعني فى لحظه شيطان
يوسف / اقفل بقك يا يس هند اشرف من الشرف
يس / مهو ما فيش واحده عاقله ترمى كل الفلوس دى ورا ضهرها دا شبكتها لوحدها تسد ديون مصر
يوسف يبصله و يرجع يبص قدامهو
يوسف / انا مش هسكت مسيرى هعرف
يس / طب اجلها لبعد الامتحانات لو سمحت لانى خلصت و حججى خلصت دا كفايا الكلام اللى اخدته النهرده لما شافني بمنظرى ده
يوسف / انا ماشي
يوسف يقوم و يمشي
..........................
فى المستشفى
شيري قاعده قدام باب العنايه المركزه بتعيط و جنبها هند فى دنيا تانيه و عبد الله مقرفص قدام ركب مامته و مختار شايل ياسمينا و واقف جنبهم و بعيد شويه قاعد عمام عبد الله كلهم
عبد الله / قومى روحى يا ماما ارتاحى
شيري تهز راسها لا
عبد الله / انا هخليني جنبه يا ماما قومى خدى اخواتى و روحى
شيري تعيط
شيري / مش هقدر اسيبه انا ما ليش فى الدنيا غيره مش هقدر
عبد الله / يا ماما كدا كدا الزياره ممنوعه هتقعدى تعملى ايه
شيري / مش هقدر ادخل البيت و هو مش فيه خد اخواتك و روحوا شوف مزاكرتك الامتحانات قربت يا عبد الله ابوك حلمه الوحيد انه يشوفك دكتور يا ابني
عبد الله / طب قومى روحى معانا و بكره الصبح
شيري / قلبي واجعنى اوى يا عبد الله
عبد الله / حسبي الله و نعم الوكيل فيهم ربنا ينتقم منهم
مختار يبص على ياسمينا يلاقيها نايمه على كتفه
مختار / ياسمينا نامت و هند بتسقط هى كمان اهى تعال يا عبد الله نروحهم
عبد الله / تعالى يا ماما
مختار / قومى يا امى قعادك هنا لا هيقدم و لا ياخر كدا كدا الزياره ممنوعه
عبد الله / قومى يا هند روحى
هند مش بترد محمود يدخل
محمود / حمدى هيوصلكوا بالعربيه و انا هخليني هنا للصبح يمكن يطلبوا حاجه
شيري / تقتلوا القتيل و تمشوا فى جنازته
محمود / مش هرد عليكوا لا دا وقته و لا مكانه
عبد الله / و ما دام بتعرف الوقت و المكان ما كنتش قادر تستني اما يطلع من المستشفي و تتخانق معاه
محمود / كلم عمك بادب
عبد الله / بناقص ام دى قرابه يا اخى
مختار / كفايا يا عبد الله احنا فى مستشفي
محمود / اتمسكن يا اخويا اتمسكن اوى كمان
مختار / قومى يا امى اروحكوا قومى ارتاحى
عباده و ناصر داخلين بيجروا و وراهم شاكر و سليمان و امين و كذا راجل
محمود / اهى باقي العصابه شرفت
مختار / بشوقك يقوم بالسلامه و نقعد و نتحاسب
ناصر / ماله الحج محمد سالت فى الاوضه اللى قولت عليها قالولى نقلوه العنايه
شاكر / ربنا يقومهولكوا بالسلامه يا ست ام عبد الله
شيري / امين
مختار / انا هاخدهم اروحهم
ناصر / اعمل كدا و انا هخليني هنا جنبه يمكن يحتاج حاجه
محمود / و انت تخليك جنبه بصفتك ايه ان شاء الله و لا احنا مش مالين عينك
ناصر / قومى يا حجه ارتاحى و ان شاء الله خير دا العروسه الصغيره نامت يا عيني من التعب قولها حاجه يا دكتور عبد الله
حمدى يدخل يسحب اخوه
حمدى / انا اتكلمت مع حامد انا شايف ان وجودنا معاهم فى مكان واحد فكره مش كويسه
محمود / ما دا اللى بقوله من الصبح عاملين زى الخفافيش لازقين بغرا لا فى دم و لا خشا
حمدى / انا هقولهم اننا هنبات معاه مرضيوش و صمموا نمشى و يبقي عدانا العيب و ازح
محمود / اسيب اخويا ليهم و هو فى رقدته و امشي
حامد يدخل
حامد / اخوك اللى اخترهم و بلا نفسه و بلانا بيهم و دا مش مكان نعمل فيه مشاكل و وجودنا معاهم فى مكان بعينه يعني المشاكل بعينها
شيري تعدى هى و هند متسندين على بعض متحاوطين بالرجاله و عباده و ناصر قاعدين عند باب العنايه
حمدى / استني
حمدى يروح لناصر ناصر يقوم يقف
حمدى / احنا مقدرين تعبك و مجيك لحد هنا بس اللى راقد هنا اخونا و احنا اولى بيه
ناصر / و اخويا انا كمان و ابو بنتى اللى وعدتها انى مش هتحرك من هنا لحد ما تيجي
حمدى / دا اخر كلام عندك
ناصر / انا مش هتحرك من هنا عاوزين تتفضلوا اتفضلوا
حمدى / براحتك
حمدى يمشي و يروح لاخواته
عباده / يا مين يديني الاذن و انا
ناصر / مش وقته لسه اوانهم ماجاش
ناصر بيبص على محمود بيبصله بغل و اخواته بيتكلموا معاه
........................
فى شقه هند
مختار يدخل اوضه هند و يحط ياسمينا على السرير و هند واقفه على الباب و الحزن مالى وشها مختار يبصلها
مختار/ ارتاحى و ان ما جالكيش نوم و حبيتي تتكلمى مع حد انا صاحي جوه
هند تبص فى الارض مختار يطلع بره و يقفل الباب وراه شيري قاعده على الكنبه بتعيط و عبد الله بيطبطب عليها
عبد الله / ان شاء الله هيخف انا متفائل هيكلمونا فى اى وقت يقولوا رجع اوضته و لا كتبوله خروج كمان
شيري / حاسه انى مش هشوفه تانى
مختار ينزل على ركبه
مختار/ ليه كدا بس يا امى ان شاء الله خير
شيري / مش قادره اصدق انى سمعت كلامكوا و سبته لوحده وسطيهم و جيت
مختار / مش لوحديه الكبير معاه و مش هيسيبه و لو عوزانى اروح
شيري / لا ما تروحش طول ما هم هناك ما تروحش مش هيسيبوك فى حالك و مش هيعملوا حساب للى راقد ... حسبي الله و نعم الوكيل
مختار / اهدى بس يا امى و قومى كدا اغسلى وشك و صليلك ركعتين و خشي خدى بناتك فى حضنك
شيري تبص فى الارض و تعيط عبد الله يسندها تقوم معاه مختار يروح يخبط على باب هند مفيش صوت يبص على شيري فى الحمام و عبد الله مسندها و بيغسلها وشها
.........................
فى شقه مختار
امين / يعني الراجل كدا كدا ميت
شاكر / ما كلنا هنموت يا امين
سليمان / كان نفسه يفرح بعياله يلا ربنا يصبرهم على مصابهم
امين / انا مش فاهم حاجه امال هم ليه حطينه فى العنايه
سليمان / يا غبى افهم الراجل متوصل باجهزه هى اللى بتخليه بيتنفس لو انطفت هيموت
شاكر / ما ده اللى بقوله ما كانوش عشموا اهل بيته بقي انه ممكن يرجع كانوا قالوا الحقيقه بقي مره واحده و خلاص و قطمه احسن من نحته
سليمان / اجله كدا هيفضلوا يطولوا فى عمره لحد ما يجي اجله و هيموت فى الساعه اللى محددهاله ربنا
شاكر / على الاقل كانوا سمحوا الزياره و خلوا اهله يقضوا الوقت ده معاه يشبعوا منه
امين / و هو فى حد بيشبع من ابوه برده يا عمى
شاكر / على رايك
سليمان / هو احنا مش المفروض كنا جبنا انتصار معانا تطيب بخاطر الحريم اللى جوه دول و لا حاجه
.....................
فى شقه هند
عبد الله خارج من اوضه هند مختار يقوم يقف عبد الله يقفل الباب و يروح يقعد جنب مختار
مختار / ناموا
عبد الله / ايوه امى خدتهم فى حضنها و ناموا مع بعض
مختار / مش عارف دا وقته و لا لا بس فى حاجه عاوز اكلمك فيها
عبد الله / انا عارف ان ابويا هيموت يا مختار
مختار / امال ليه قولت انه هيخف
عبد الله يبص لمختار و عنيه كلها دموع
عبد الله / مش عاوزها تروح منى هى كمان
عبد الله يعيط مختار ياخده فى حضنه
عبد الله / لحد وقت قريب ما كانش بيشتكى من حاجه ابدا فضلوا يضغطوا عليه لما قتلوه
مختار / لكل اجل كتاب يا عبد الله اجله كدا و البركه فيك
عبد الله يبعد و يمسح دموعه
عبد الله / هو انت ممكن تقولى كان عاوزك فى ايه
مختار / كان بيوصيني عليكوا و لولا دخول عمك كان حدد معاد كتب الكتاب
عبد الله / انت بجد لسه عاوز تكمل فى الجوازه دى يا مختار بعد كل اللى جرالك من تحت راسنا
مختار / انتوا ايه حكايتكوا النهرده انا اساسا قتيل الجوازه دى و لولا الظروف انا كنت جبت الماذون و كتبت حالا
عبد الله يبص فى الارض و مختار عينه على باب اوضه هند
مختار / المكان اللى انا قاعد فيه ده مش صح لو حد خرج يخش الحمام و لا حاجه
عبد الله / تحب نقعد فى اوضتى
مختار / احب قوم معايا تفرد ضهرك شويه و لا تزاكرلك كلمتين
عبد الله / كان نفسي يعيش لما يشوفني دكتور
مختار / و انا كان نفسي يعيش لما يفرح بعيالك بس هاه النصيب هنعمل ايه يعني قوم يا عبد الله قوم نتوضي و نصلى ركعتين و نقراله شويه قران لو مش هتزاكر
عبد الله يهز راسه و يقوم مع مختار
...........................

فى المستشفى
ناصر قاعد جنب عباده و بعيد شويه قاعد حمدى و محمود و حامد مختار يدخل يعدى من غير ما يبص لحد و يروح لناصر
ناصر / ايه اللى جابك
مختار / فضلت معاهم لحد ما ناموا هفضل فى البيت اعمل ايه
ناصر يهز راسه بحزن
عباده / اتكلمت معاهم
مختار / اتكلمت مع عبد الله لقيته فاهم
ناصر / ربنا يصبرهم
مختار يبص بعيد يلاقى يوسف داخل يجرى على ابوه
يوسف / ايه اللى حصل يا بابا ليه ما حدش قالى
محمود / اقعد يا يوسف ارتاح
يوسف / امال هند فين ازاى تسيب ابوها فى حاله زى دى بقى دول يقعدوا و هى تروح
حمدى / عمك اتوفى اكلينيكيا احنا ما قولنالهمش حاجه هما فاكرينه تعبان شويه و خلاص
يوسف / و دا ينفع
حامد / والله انا لسه عند كلمتى اكرام الميت دفنه الدكتور قال مساله وقت مش اكتر انت اللى مصمم يفضل يتعذب على الجهاز ده
محمود / عاوزنى اقولهم افصلوا الجهاز عن اخويا عاوزنى اقولهم اقتلوا اخويا يا حامد
حامد / بتتكلم كانى عاوزه يموت دا اخويا يا محمود انا بس عاوزه يرتاح اتعذب كتير فى حياته يرتاح بقى
محمود / عاوزه يرتاح برده على العموم يا حامد ما تقلقش مصاريف علاجه اللى مخلياك قاعد تفرك من امبارح انا اللى هشيلها
حمدى / انت بتقول ايه يا محمود احنا ولاد اصول برده مش كدا ي حامد و لا ايه
حامد / هو انا قولت حاجه هو اللى بيتهياله حاجات غريبه
حمدى / بس يا حامد عيب مش كدا كلنا متوترين و متاثرين باللى حصل
يوسف يبص لمختار بيتكلم مع عباده
ناصر / كدا كدا انتصار هتيجي النهرده الباقى يجوا يعزوا علاطول مش عاوزين زحمه و لبخه على الفاضى
عباده / انا كنت بس بتكلم انهم ما يحسوش انهم لوحدهم وقت الخبر نبقى كتير حواليهم نخفف عنهم
ناصر يبص على محمود بيبص عليه
ناصر / يا ترى مستوعب ان هو اللى قتل اخوه بعنده و تخلفه
مختار / لا الناس دى ما بتغلطش كل اللى حواليهم غلط و هم اللى صح
عباده / بكره زى ما اتفقوا على اخوهم بكره ياكلوا بعض
مختار / بعيد عننا عشان انا جبت اخرى قسما بالله لولا حرمه الراجل اللى جوه ما كنت سبت واحد فيهم على رجله
ناصر / اعقل يا مختار و اهدى لا وقته و لا مكانه
مختار / عارف و ده اللى مكتفنى
مختار و يوسف بيبصوا لبعض بغل
..................................
فى شقه هند
هند تفتح باب اوضتها و تروح الحمام عبد الله يفتح باب اوضته و يقف قدام الباب هند تطلع تبصله تلاقيه حزين
هند / ماما بتلبس ياسمينا هنروح لبابا هتيجي معايا
عبد الله يهز راسه اه هند تحضنه
هند / بابا هيعيش يا عبد الله مش كدا بابا هيروح معانا صح
عبد الله الدموع تنزل من عنيه هند تسيبه و تبصله
هند / اكدب عليا حتى لو مش هيرجع انا مش قادره استوعب و لا اقبلها
عبد الله / هيروح مكان احسن وسط ناس احسن هيفضل معانا فى قلوبنا هندعيله هنبقى الولد الصالح اللى بندعيله يا هند
هند / ياسمينا صغيره اوى انها تتيتم
عبد الله / اجله و نصيبنا لازم نقبله
هند تتنهد شيرى تطلع من الاوضه
شيرى / كويس انك صحيت يا عبد الله يلا خش البس عشان ما نتاخرش على ابوك
عبد الله يهز راسه و يدخل اوضته
شيرى / انت بتعيطي ليه يلا خشى البسى
هند تهز راسها و تدخل اوضتها و شيرى تمسح دموعها
...........................