البر التانى بقلم / لولو_محمد (كامله )

الحلقه ٣٢

((((((( البر التانى )))))))
#لولو_محمد
الحلقه ٣٢
مختار / طب انت قولت قاعه اتنين صح
الراجل / ايوه اتفضلوا
مختار / لا احنا هنجرى شويه فى الاول اتفضول انتوا الاول
هند تاخد شنطتها و تروح القاعه هى و دينا
عبد الله / امال انا مين هيمرنى
الراجل / والله كان نفسي اقولك جوز اختك يمرنك بس هتصعب عليا تعال معايا
عبد الله / بقي دى تمرن هند و انت تمرنى ليه يا عم هو انتوا فاكريني من كفار قريش انا هتمرن فيتنس
مختار / ههههههههههههههه تعال هنا يا مجرم والله لا انا اللى همرنك تعال
الراجل / قاعه اربعه فاضيه
مختار / تمام
مختار ياخد عبد الله تحت باطه و يدخلوا قاعه اربعه
عبد الله / طب مش هنطمن على اختى ... اودعها حتى
مختار / امشي بقي يا عبد الله ههههههههههههههههههههه
عبد الله / يا هند
عبد الله يدخل القاعه و مختار يقفل الباب
.......................
فى شقه وسام
اسراء / هو انا يعني مش عاوزه افرح بيوسف طب دا انا الود ودى اخليها النهرده قبل بكره
الست / ان كان على الشقه فالشقه فاضيه و انا لوحدى
اسراء / شقه ايه بس دا يوسف شقته يرمح فيها الخيل و متشطبه فاضلها بس وش بياض نضافه و تتفرش من بكره انا بتكلم عن الدراسه
الست / ما انا قولت كدا لقيتهم بيعطلوا بعض
اسراء / ازاى بس طب دا يوسف مستواه اتحسن خالص و التفت لمزاكرته و دروسه و البركه فى عروستنا الحلوه فتحت نفسه على المزاكره
الست/ خلاص اللى تشوفوه بس الفتره الجايه بقي هنركز فى المزاكره و نخف الخروجات شويه و على رايك مش فاضل كتير على الامتحانات
اسراء / اللى تشوفوه و اهو بالمره نستغل الشهر ده اننا ننجز فى الحاجات اللى ورانا و لا ايه يا عروستنا
وسام تبصلها و تبتسم
......................
فى عربيه مختار
عبد الله / طب والله انت كنت قاصد
مختار / يا عم حقك عليا اعتزرتلك مليون مره
هند / الا ما جبتليش سيره دينا خالص يعني يا عبد الله لما كنت بتيجي مع مختار
عبد الله / و انا لو كنت شفتها قبل كدا كنت سكت دا انا كنت اعتكفت فى الجيم لما بقيت و لا مازنجر صاحبك اللى هناك ده
مختار / ما تتلم يا له فى ايه مالك اول مره تشوف حريم
عبد الله / بصراحه اه يا عم انت مش شايف حياتي ناشفه ازاى مفيهاش غير امى و هند دا لو اعتبرناهم حريم يعني
هند تزغده من ورا
عبد الله / ااااه بس بقي جسمي مفشفش
هند / احسن ... بس عبد الله اول مره يشوف انما انت ايه نظامك يا مختار بيه
مختار يبص على هند فى المرايه رافعه حاجبها
هند / رايح الجيم جاى من الجيم لا ليك حق طبعا
مختار / قسما بالله اول مره اشوفها
هند / بس هى بتشوفك كتير يعني
مختار / انا بروح اتمرن و بس
هند / لا يا شيخ
مختار / و بعدين انا بروح متاخر خالص بتكون الحريم كلها روحت يعني و بعدين انا هبص لدى يعني
عبد الله / ما لها دى هاه مالها اوعى تغلط اوعى اغلط فى هند انما دينا لا
هند تزغده تانى
عبد الله / ارحمى امى بقي مكسر
هند / انت لسه شوفت تكسير دا انا هطبق فيكوا انتوا الاتنين كل اللى اتعلمته النهرده
مختار / و انا مالى هو اللى بيعاكس اهو انا كويس
هند / الجيم ده ما تعتبوش تانى
مختار / هشترى مشايه فى البيت
هند / ان شالله تربي كرش حتى مش مشكلتى
عبد الله / طب ممكن اروحه انا عادى
هند تزغده
عبد الله / بس بقي بس والله لو كنت قادرلك
مختار / لم نفسك و عدى اليوم الحريم لما بيغيروا الشياطين بتقعد تاخد دروس تقويه و دى فاضلها تكه و تتحول لتنين و تولع فينا
هند / مين دى اللى غيرانه و اغير من مين يعني من دى
عبد الله / يا شيخه اتقى الله دى صاروخ
هند / اضربك فين دا انت واكل علقه موت
عبد الله / و مين اللى علمك تضربي مش دينا ربنا يخليكي لينا يا دينا
مختار / هههههههههههههههههههههه
هند / عجبتك اوى مش كدا
مختار / و الله ما عاجبنى غيرك
هند تتلم و تتكسف و تبص من الشباك و عبد الله متابعها فى المرايه اللى جنبه
عبد الله / تفتكر دينا بتعمل ايه دلوقت
مختار / ما تتلم بقي يا عم خلينا نروح سلام فى ليلتنا
هند تبتسم و مختار و عبد الله متابعينها
.........................
فى شقه فى البلد
على / سبنا اللى ورانا و اللى قدامنا و اتشحطتنا كل المسافه دى و طلعت عينا لحد ما لقينا مكان نبات فيه هنعمل ايه بقي دلوقت
يس / هنسال بقي
على / حلو جدا هنسال مين و فيه و هنقوله ايه
يس / يا ابني انت ما فيش ابتكار خالص كدا احنا الاول هنلف البلد و نتفرج على الدنيا و لما نوصل لحاجه تخصهم هنتكلم مع الفلاحين و الناس و نتصاحب عليهم و هما اول ما ياخدوا عليك هيقولوا كل حاجه
على / يا سلام بالبساطه دى
يس / و ابسط مما انت متخيل الفلاحين دول اعبط خلق الله لا بيعرفوا يقروا و لا يكتبوا اخرهم يمسكوا الفاس و يزرعوا
على / طب و ان ما لقيناش حاجه
يس / اهو نبقي اتفسحنا
على / و دى تبقي فسحه دى
يس / يا عم انت كئيب كدا ليه ما انت راكب اكل شارب نايم ببلاش ما تعيش اللحظه و تنبسط
على / يا خوفى يا عم تقلب بغم
يس / مقطع اغنيه جديد ده و لا ايه نام يا على نام
على / هنام يا خويا انا اساسا مش قادر
......................
فى شقه هند الفجر
هند نايمه فى السرير عبد الله يفتح الباب و يدخل يقعد جنبها تفتح عينها
هند / فى حاجة يا عبد الله
عبد الله/ ما لقيش معاكى هيموكلار
هند / لا ما افتكرش شوف عند ماما ممكن تلاقي
عبد الله / طب معكيش رقم دينا اطمن عليها
هند تزقه من على السرير عبد الله يضحك
عبد الله / ههههههههههههههههههه بهزر معاكى
هند / ما تهزرش مختار يقول عنك ايه
عبد الله / مختار عارف انى بهزر ما تكبريش المواضيع
هند تتعدل و تقعد و عبد الله يقعد قدامها
عبد الله / على فكره بيحبك اوى
هند تبتسم
هند / عرفت ازاى
عبد الله / مهو اللى تبقي قدامه دينا و يبصلك
هند تشد المخده و تنزل فوق عبد الله و هو بيضحك
عبد الله / هههههههههههه بس بقي مش قادرلك
هند / احسن ما انت اللى مستفز خليها تنفعكوا اصلا ايدها تقيله خليها تصبحك بعلقه و تمسيك بعلقه
عبد الله / ضرب الحبيب زى اكل الزبيب دينا تعمل اللى هى عوزاه
هند / اطلع بره ياله انت مصحيني تستفزنى
تليفون هند يرن "مختار" عبد الله يشد الموبايل
عبد الله / اوعى
هند / هات يا عبد الله بلاش رخامه
عبد الله / استني استني اما ارخم عليه شويه
عبد الله يرد و هند بتحاول تاخد منه الموبايل
مختار / السلام عليكم
عبد الله / و عليكم السلام يا مختار ازيك عامل ايه
مختار / انا كويس يا عبد الله انت عامل ايه
عبد الله / انا كويس بس هند مش كويسه خالص
هند تبرق لعبد الله يشاورلها تسكت تحاول تاخد الموبايل يطلع بره الاوضه تطلع وراه
عبد الله / مش قادره تتحرك خالص لتكون دينا كسرتلها ضهرها و لا حاجه
مختار / فى زراق و لا حاجه
عبد الله / دا جسمها كله ازرق يا ابني انا بقول ناخدها المستشفي
هند / انا كويسه يا مختار بيرخم علينا
عبد الله / يا جزمه
مختار / والله لبست يا عبد الله
عبد الله / هههههههههههههههه لحقت
مختار / اقسم بالله كنت بزرر القميص اهو مش طريقه هزار دى يا عم وقعت قلبي
هند تشد الموبايل و تدخل اوضتها و عبد الله وراها
هند / انا كويسه يا مختار بيهزر معاك
هند تقفل باب الاوضه فى وش عبد الله و تروح تقعد على السرير
هند / ازيك ايه اللى مصحيك دلوقت
مختار / كنت بصحيكي تصلى الفجر هياذن اهو او بتلكك يعني عشان اكلمك ما كلمتكيش من إمبارح
هند / نمت زى القتيله و الله لولا عبد الله دخل صحاني ما كنت حسيت بحاجه جسمي مفشفش
مختار / عشان اول مره تتمرني بس
هند / و اخر مره
مختار / ليه كدا من اولها
هند / فعلا مش قادره و بعدين ما انت موجود بقي ربنا يباركلى فيك
مختار / يعني هنروح انا و عبد الله لوحدينا يعني
هند / و لا انت هتهوب هناك تانى انت فاهم
مختار / اشمعن عبد الله يعني يروح و انا لا
هند / روح يا حبيبي روح و انا اطلع كل اللى اتعلمته عليك
مختار / كنت بشوف غيره الحريم خنيقه بس طلعت حلوه
هند / هى ايه دى اللى حلوه
مختار / احساس ان حد يغير عليك يعني بيحبك مش كدا
هند / طب ما انا بحبك ايه الجديد يعني و بعدين لو الوضع كان معكوس مش كنت هتغير عليا
مختار / دا انا كنت حرقت الدنيا باللى فيها
هند / ههههههههه امال بقي
اذان الفجر
مختار / روحى خلي اخوكى يلبس ما دام صاحي هينزل يصلى معايا الفجر
هند / حاضر
هند تفتح باب الاوضه تلاقي عبد الله خارج من الحمام
هند / اتوضيت ؟
عبد الله / اه
محمد يفتح باب يشوفهم يتخض
هند / صباح الخير يا بابا
محمد / مش بعاده يعني
عبد الله / انا اتوضيت نازل معاك
هند / عن اذنكوا
هند تدخل الاوضه
هند / بابا صحي هروح اعمله شاي
مختار / اجبلك حاجه معايا و انا راجع
هند / لا هعمل حسابك فى الفطار ما تجبش حاجه
مختار / تمام سلام
هند / مختار
مختار / نعم
هند / ما تنساش تدعيلى
مختار / حاضر سلام
هند / سلام
هند تقفل و تطلع تلاقي عبد الله بيلبس الجزمه
عبد الله / نزل ؟
صوت باب شقه مختار بيتقفل عبد الله يزعق
عبد الله / انا جاى استني
هند تدخل الاوضه و عبد الله يفتح الباب و يجري يقفله وراه محمد يطلع من الحمام
محمد / بركاتك يا مختار
شيري تطلع من الاوضه تلاقي محمد و هند مبتسمين
هند / هحضر الفطار
هند تدخل المطبخ
محمد / بركاتك يا مختار تانى
شيري تضحك و تدخل الحمام
.......................
فى البلد
يس و على بيتمشوا فى وسط اراضي زراعيه يلاقوا ناس بيشربوا شاى تحت شجره يس يزغد على و يشاورله عليهم يروحوا يقعدوا معاهم
يس / صباح الخير يا رجاله
راجل ١ / صباح النور
يس / ممكن نقعد و لا نبقي بنتطفل
راجل ١ / اتفضل يا محترم ... تشرب شاى
يس / ياريت والله الواحد بيتمشي من الصبح لما ورم
الراجل يصب كبايتين شاى
راجل ٢ / انتوا مش من البلد صح
على / لا احنا طلاب فى كليه زراعه و بنعمل بحث
راجل ١ / اهلا بالباشمهندسين نورتوا بتعملوا بحث عن ايه بقي ان شاء الله
يس / الزراعه و الفلاحين فى الصعيد و المشاكل اللى بتقابلكوا
راجل ٢ / الحمد لله احنا ما عندناش اى مشاكل خالص
يس / معقول يا حج هو فى حاجه فى الدنيا ما فيهاش مشاكل
راجل ١ / الحمد لله ربنا بيعين
على / التقاوى التوزيع العمال الميه
راجل ١ / كلو زى الفل الحمد لله
يس / طب توزيع الريات مشاكل بين الفلاحين و بعضهم دا كل الاماكن اللى روحناها سمعنا مشاكل بالهبل
راجل ٢ / النظام ما فيش احسن منه
على / عندك حق هى الارض دى بتاعتكوا و لا ماجرينها
راجل ١ / لا ده و لا ده الارض دى كلها بتاعه عيله الزيني و احنا بنشتغل فيها
يس / الارض دى كلها
راجل ٢ / البر كله بكل اللى فيه بتاعهم
اتنين غفر يدخلوا يقعدوا
غفير واحد / السلام عليكم يا رجاله
راجل ٢ / و عليكم السلام تعال اشرب شاى
غفير ٢ / مره تانيه شكل معاكوا ضيوف
راجل ١ / دول مش ضيوف دول باشمهندسين بيسالوا عن احوالنا
الغفر يبصوا لبعض و يروحوا يقعدوا كل واحد جنب واحد
الغفير ٢ / و البهوات منين ان شاء الله
يس / من مصر
الغفير ١ / يااااه مصر و ضاربين المشوار ده كله لحد هنا
يس / بحث
الغفير ٢ / معاكوا بطايق
على / بطايق !! ليه
الغفر يبصوا لبعض و يقفوا و كل واحد فى ايده سلاحه يعدله على كتفه
يس / معانا بطايق معانا اتفضل
يس يطلع بطاقته و يبص لعلى يقوم يطلع بطاقته
غفير ١ / اتفضلوا معانا
يس / على فين
غفير ٢ / مش عاوزين تعملوا بحث احنا هنوديكوا للكبير و هو هيساعدكم اتحركوا
يس و على يبصوا لبعض
غفير ٢ / اتحرك يا هندسه
يس يهز راسه و يمشي و على وراه
غفير ١ / مش قولنا نفتح عنينا على اى غريب حسابكوا مع الكبير
غفير ١ يمشي ورا يس و على و الرجاله بتبص لبعضها
........................
فى عربيه مختار
مختار ماسك الباب لهند تبتسمله و تركب يقفل الباب و يروح يركب
هند / الفطار كفا
مختار / و اتبقي تسلم ايدك
هند / الف هنا
مختار / بس عبد الله بيقول ان دى مستحيل تكون عمايل ايديكي
هند / ماما ساعدتني
مختار / ههههههههههههههههههه ماشي تسلم ايديكوا انتوا الاتنين
هند / وراك حاجه النهرده
مختار / كان فى مشوار صغير كدا بس لو عوزانى فى حاجه ممكن اللغيه عادى
هند / ما تيجي تزاكر معايا
مختار / عندكوا فى البيت
هند / اها ايه رايك على فكره انا قولت لماما و قالت تنور
مختار / ربنا يحفظها ... تمام نجرب مره بس لو ما زاكرناش
هند / ما تكررهاش تانى وعد هنزاكر و نركز
مختار / ماشي
هند تبتسم و تبص قدامها
...................
على الطريق
يوسف سايق العربيه عربيه فاميه تكسر عليه يحود بسرعه و يفرمل و ينزل يتخانق بعصبيه و العربيه التانيه راكنه على بعد كام خطوه يوسف يخبط على باب السواق
يوسف / انت عبيط و لا شارب حاجه على الصبح
الراجل يفتح الازاز و المسدس متوجه على يوسف يوسف يتخض
الراجل / اركب
يوسف يرجع خطوه لورا يلاقي راجل تانى في ضهره
الراجل ٢ / اركب يا حيلتها
باب العربيه اللى ورا يتفتح يوسف يشوف راجل تالت قاعد ورا و معاه مسدس يوسف يركب العربيه تطير و راجل ٢ يروح ياخد عربيه يوسف و يمشي وراهم
..................
فى المضيفه
على رايح جاى متوتر و يس قاعد
يس / ما تقعد يا ابني خيلتنى
على / احنا فى بيته يا يس فى بيته
يس يقوم يخبط على الباب واحد من الغفر يفتح
الغفير / ناقصكوا حاجه يا بهوات
يس / هو احنا هنفضل هنا كتير
الغفير / الكبير خرج يطل على الارض و زمانه راجع
يس / ايوه يعنى ما كنتوا سبتونا نتكلم مع الناس و نخلص اللى ورانا لحد ما هو يفضي
الغفير / مش لما الكبير ياذن تتكلموا مع الناس و لا انتوا فاكرين الدنيا سايبه
يس / يا عم دا بحث للكليه مش حوار يعني
الغفير / الاوامر اللى عندى اننا نضايفكوا لحد ما الكبير يديكوا الاذن اكتر من كدا ما عنديش
غفير ٢ يدخل شايل صينيه اكل
الغفير / و ادى الفطار وصل اهو ... الف هنا
الغفر يطلعوا و يقفلوا الباب
على / انا مش فاهم حاجه
يس / مش عارف
يس و على يبصوا لبعض
........................
فى الكليه
هند قاعده جنب يمنى بيضحكوا و مختار قاعد جنب هشام و ماجد
ماجد / يا برودك يا اخى دا ما فيش اتنين فى الدفعه ما بيتكلموش عن الصور دى
مختار / يا عم السيط و لا الغنا خليهم يتكلموا
هشام / مهو سكوتك هيطمعه فيك كدا مش هتعرف تلمه بعدين
مختار /انتوا ليه محسسيني انى كنت متصور عريان يا جدعان هههههههههههههههههه
ماجد / بارد اقسم بالله ... لا و تنح كدا
مختار / لا اله الا الله هعمله ايه يعني هضربه يلا جزاءه عند ربنا بقي
هشام / انت متاكد انك صعيدي ياله
مختار / هههههههههههههههه عن اذنكوا
مختار يلم حاجته و يروح يقعد جنب هند
هند / الله مش قولت هتقعد جنبهم
مختار / صحيح قاعده الراجل بميت ست و ان جت الست يغور الميه راجل
هند / ههههههههههههههههههههههه
مختار / ضحكتك يا بت
هند تحط ايدها على بقها و مختار يبص قدامه الدكتور يدخل الكل يلم نفسه
........................
فى صحرا
عربيه راكنه العربيه اللى اخدت يوسف تركن جنبها و الرجاله ينزلوا منها و يوسف واقف وسطيهم
يوسف / انتوا فاكرين اللى حصل ده هيعدى بالساهل انا هوديكوا فى داهيه
راجل / اقلع
يوسف / ايه !!!
الراجل / اقلع ياله
يوسف / انت عبيط و لا حصل فى مخك حاجه
الرجاله تطلع المسدسات و يضربوا فى الارض و يوسف بيتنطت فى النص
الراجل / اخر طلقه اقلع لو عاوز تروح لامك
الراجل ينشن على دماغ يوسف يوسف يلف حوالين نفسه الكل منشن عليه يوسف يقلع هدومه الرجاله تاخد الهدوم و تسيبه بالاندر وير و يمشوا و يوسف واقف عمال يلف حوالين نفسه مفيش اى حد يمشي ورا العربيات و هو عمال يتلفت و يدارى نفسه بايديه
......................
فى الكليه
مختار خارج من المدرج و جنبه هند مختار يطلع موبايله
مختار / اتناشر ميسد ليه
هند / فى حاجه و لا ايه
مختار / مش عارف ناصر كلمنى كتير و انا عامل الموبايل صامت جوه ثوانى هكلمه و ارجعلك
هند تهز راسها و تقف فى جنب و مختار يروح بعيد شويه و يتكلم فى التليفون و هند متبعاه بيضحك على اخره و باصصلها تبتسمله يقفل و يرجعلها و هو مبتسم اوى
هند / شكل فى حاجه حلوه
مختار / جدا جدا تعالي اجبلك ساقع
هند / ههههههههههههههه طب ايه فرحنى
مختار / كان فى حاجه بتنخور فى اوضتي فى السرايا و طلع فار و قفشوه خلاص
هند / انت بتهزر صح
مختار / هههههههههههههههههه تعالى تعالى
هند / انت بتتكلم جد كان فى فار فى اوضتك بجد
مختار / مقفوله بقي و ما حدش بيخشها نصيبه ساب الدنيا كلها و جالى دا هيتظبط
.................................