البر التانى بقلم / لولو_محمد (كامله )

الحلقه ١٨٨

((((((( البر التانى ))))))
#لولو_محمد
الحلقه ١٨٨

فيرا / هم اتاخروا كدا ليه يكونوا تاهو
الرجاله تضحك وادواردو يبص مش فاهم
فيرا / كل الرجاله تفتح عنيها
راجل قدام الشاشات
الراجل / فى درونز جايه على هنا
فيرا / يبقوا وراها ... طلعوا الدرونز بتاعتنا تضربها فى الجو
رجاله قدامهم اجهزه يشتغلوا عليها و فيرا باصه فى الشاشات على كميه العربيات اللى بتتحرك بسرعه
فيرا / فجر قنبله من اللى على الطريق
كذا عربيه تعدى و عربيه تتقلب العربيات الل وراها تقف و الرجاله تنزل تطلع الرجاله من العربيه و يزقوا العربيه كلهم و يوسعوا الطريق و باقي العربيات تعدى
فيرا / دول سابوهم لوحدهم عادى ... فجر قنبله تانيه ..  اخبار الدرونز ايه
شاب / عددهم كبير جدا و بينفجروا اول ما بنقرب منهم
فيرا/ قول مش عارف اتعامل عشان اجيب غيرك
.................................
الشاب يشتغل و هو ساكت فيرا تبص للشاشه تانى نفس المشاهد بتتكرر و الرجاله اللى اتسابت بتجرى على رجليها و السلاح على ضهرها و العربيات ما بتقفش لحد
شاب ٢  / الدرونز دى حديثه جدا و قدرتها على المراوغه عاليه
فيرا / الزنايته ما عندهمش الامكانيات دى جابوها منين
صوت انفجارات بره ورا بعض
شاب ٣يدخل يجرى
شاب ٣/ الدرونز فجرت الهليكوبترين اللى بره
شاب ١ / ابراج المراقبه اتعطلت مش قادر اتحكم فى الاجهزه
فيرا تضربه بالنار و تبص للشاب اللى جنبه يحاول يشتغل
فيرا / كل واحد عارف مكانه مليون جنيه على كل قتيل منهم اتحركوا ... ادواردو ... اتز شو تايم ( وقت العرض )
ادواردو ياخد مسدسين من جنبه و يتحرك على بره
الراجل على الكاميرات باصص على فيرا
فيرا / فى ايه تانى
الراجل / كل العربيات انفجرت
فيرا تبص على الكاميرات حمام السباحه و الجنينه كلهم قايدين نار و فجاه البوابه تنفجر و العربيات تدخل وسط النار و الرجاله بتنط منها و تشتبك مع رجالتها فيرا تسيب المكان و تجرى
....................
بره فى الجنينه
الكل مشتبك و بيتحركوا و ينتشروا مختار بيزعق فيهم
مختار  / غطوا بعض غطوا بعض
مغاورى / رصاصات فى الدماغ ما تسيبوش حد حى
الكل يتفرق و الدرونز عماله تنفجر فى المدافع اللى على سطح الفيلا
عباده / اتحركوا
الرجاله تجرى على جوه كل واحد فى اتجاه
...................
فيرا فى ممر بتتكلم فى الموبايل
فيرا / الهليكوبتر فين
راجل / فى الطريق
فيرا/ حالا يعني حالا
فيرا تقفل و تفتح باب و تدخل مخزن مليان بنات اعمار مختلفه
فيرا / اللى عاوزه تعيش تجرى على بره
فيرا تنشن عليهم كلهم يجروا على بره و فيرا مبتسمه
فيرا / ابقي اقتلهم بقي يا مختار هههههههه
فيرا تروح تفتح باب تانى فيه اطفال
فيرا / اهربوا يلا اهربوا
العيال تطلع تجرى على بره تعدى فى الممر و تطلع سلم يوديها فيلا تانيه فيها رجاله تبعها
.......................
فى هول الفيلا الاولى
مختار داخل و مشتبك مع رجاله فيرا يلاقى بنات طالعين يجروا مختار يزعق
مختار / احموا الحريم احموا الحريم
امين يعدى مختار و يدخل على جوه و مختار يطلع على فوق و الرجاله تنتشر و رجاله فيرا بتضرب عشوائي و فى بنات بتقع و الزنايته و الجوارحه بيحاولوا يسحبوهم فى حتت امان يلاقوا اطفال تانين طالعين يجروا يبصوا لبعض و يقوموا امين يصرخ
امين / كلو فى الارض كلو ينام فى الارض
فى عيال تنام و فى عيال بتجرى و الزنايته فاتحين النار مغاورى يدخل و وراه رجاله
مغاورى / انقلوا الناس دى للامان بعيد ... امين مختار فين
امين/ طلع فوق
مغاورى/ احنا ندور تحت
مغاورى و امين يروحوا يفتشوا الاوض و اللى يقابلهم يقتلوه
......................
فى الفيلا التانيه
فى اشتباك عنيف بين الزنايته و رجاله فيرا و فى جرحى و قتلى بين الاتنين فيرا تشوف الوضع كدا تسيب المكان و ترجع الممر و تروح فيلا تالته مفيش ضرب نار و رجاله كتير ميته تبص على خزن سلاحها و تطلع بره تحس بحركه وراها عباده جاى وراها و مبتسم و منشن عليها تنشن عليه فيرا تبتسم و هى بتتحرك لورا و عباده بيتحرك ناحيتها
عباده / هند فين بدل ما اضربك بالنار
فيرا / كنت متاكده انك هتستسلم ... من غيرى مش هتلاقى حبوب لا ليك و لا لهند فوق
عباده / اقولك هدور عليها بنفسي احسن
فجاه صوت طلقه و التانيه وراها علاطول عباده يبص وراه يلاقي راجل ميت و واحد من الجوارحه بيجرى عليه
الراجل / انت كويس
عباده يحط ايده على كتفه يلاقى دم يبص على فيرا ما يلاقيهاش يطلع يجرى وراها و الراجل وراه
....................
فى اوضه فى الممر
امين و مغاورى بيفتحوها باب و را التانى و اى حد بيطلع عليهم بيقتلوه و فجاه يفتحوا باب يلاقوا دكتور و هند متعلقلها دم و مش فى كامل وعيها و الولد الصغير نايم فى سرير جنبها
مغاورى / عملتوا فيها ايه يا ولاد الكلب
الدكتور / لو ما اتنقلتش مستشفى حالا فى خطوره على حياتها و على الرحم انا عملت كل اللى اقدر عليه بس الامكانيات هنا محدوده انا هنا غصب عنى
مغاورى يحاول يشيل هند تحاول تقاوم مش قادره على اكتر من صوت انين
مغاورى / ما تخافيش يا بنت الناس هروحك بيتك
هند تسكت مغاورى يشيلها امين يشيل الولد على كتف و ماسك المسدس على الكتف التانى و يطلعوا يجروا فى الممر
......................
فوق
مختار عمال يفتح باب ورا التانى هو و مجموعه رجاله يفتح اوضه منهم يلاقى رشيد و سمر نايمين على سرير و هدومهم غرقانه دم يدخل يجس النبض و الحزن يملا وشه
مختار / سامحنى يا صاحبى
صوت طلقه مختار يبص وراه يلاقى واحد واقع فى الارض و واحد من رجالته يدخل بيجرى عليه
الراجل / خد بالك يا مختار
الراجل يجرى يدور فى باقي الاوض و مختار يطلع الدور اللى فوقيه يلاقيه سطح وادواردوا واقف مستنيه و الاتنين منشنين على بعض
ادواردو / يو ديدنت فايند هير رايت ( ما لقيتهاش صح )
مختار / اى جيس اى كان تيل وات هابند تو يور اى ( بيتهيالي اقدر اخمن اللى حصى لعينك )
ادواردو / ذات ليتل ثينج ايز ناثينج ... يو نو ..  وات ابوت اريماتش ... اى نو ايجايبشن مين اند زير اونر زى دونت كيل ارمليس مين ( دى حاجه بسيطه .. انت عارف .. ايه رايك نعيد الماتش .. انا عارف المصرين و شرفهم ما بيقتلوش رجاله عزل )
ادواردو يرمى سلاحه مختار يضربه بالنار فى عينه التانيه ادواردو يقع ميت
مختار / انت فاكره فيلم اجنبى بروح امك
..............................
فى جنينه الفيلا
هليكوبتر طايره تنزل الجنينه و فيرا بتجرى عليها و فى راجل ماسك رشاش جواها بيامن ضهر فيرا و عباده و الراجل اللى معاه فاتحين النار طلقه تيجي تموت الراجل يقع جنب عباده عباده يجس نبضه فيرا تركب الطياره تطلع درون يخبط فيها تنفجر و فيرا تنط منها فى حمام السباحه و جزء من الانفجار يقع فى الميه يولع فى البنزين اللى على السطح عباده يروح يبص يلاقي فيرا طالعه من المايه و النار ماسكه فيها يضرب عليها نار ما بتموتش مغاورى و امين يدخلوا و كل واحد شايل على ايده فيرا تشوفهم تجرى عليهم و النار ماسكه فى جسمها عباده يجرى عليها يزقها بكتفه فى الميه و يقعوا سوا
مغاورى / عباده
مغاورى يحط هند و امين يحط الولد و يجروا النار مغطيه الميه مش شايفين حاجه امين يجرى يجيب خرطوم الميه بتاع الجنينه و مغاورى يجيب مشمع تغطيه حمام السباحه
مغاورى/ امين امين ساعدني
امين يمسك طرف و مغاورى يمسك طرف و كل واحد واقف على جنب و يعدوا على وش الميه بالراحه النار تتكتم لحد ما يغطوا الحمام كله و يسحبوا المشمع لاخر الحمام اول المايه تبان النار مطفيه امين ينط فى الميه يطلع عباده و يبدا يضغط على صدره واحد اتنين تلاته و لسه هينفخ فى بقه عباده يفتح
امين / عباده
عباده / انت كنت هتعمل ايه
مغاورى / انتوا هتحكوا لازم نلحق هند على المستشفي
مغاورى يقوم يجرى يشيل هند من على الارض و يجرى امين يقوم عباده
امين / كويس قادر
عباده / انا مش حاسس باى حاجه اساسا امشوا انتوا انا هستنى هنا
امين / ليه
عباده / لازم اتاكد انها ماتت
امين و عباده يروحوا ناحيه حمام السباحه و يضربوا نار ناحيه الجثه امين يطلع ولاعه من جيبه و يولعها و يرميها فى الميه النار تمسك فى الحمام
امين / لو لسه عايشه بعد كل ده يبقي تضربنى انا بالنار ارحم
عباده يبتسم و يطلع الموبايل و يتصل بحد
عباده / لقيناها
مختار / فيرا
عباده / شبعت موت
مختار / اخلى
عباده / انا الكبير و انا اللى اقول اخلى ... اخلى
امين ماسك نفسه من الضحك عباده يبصله
عباده / ايه ؟
امين / اقولك ايه بس يا كبير
امين يجرى يشيل الولد
امين / محتاج يروح المستشفي
امين و عباده يتحركوا
...................
فى المستشفى
قلق و زحمه كبيره جدا زياد يدخل يقابل عباده قاعد و ممرضه بتعالجله الحرق فى كتفه و دكتور بيطلع الطلقه من كتفه التانى و هو قاعد مش حاسس باى حاجه
زياد / ممكن افهم ايه اللى حصل ده
عباده / مبروك الترقيه يا زياد باشا
زياد / نعم
عباده / انت ما وصلتلكش البشاره و لا ما بتشوفش الاخبار
زياد يبص على التليفزيون مكان ما عباده مشاور و يقرب
المذيعه / كما تمكنت الشرطه المصريه من اللقاء القبض على عشرين فردا من افراد التنظيم بعد اشتباكات عنيفه و كان بحوزتهم كميات من البى كاى و جارى التحقيق معهم و معانا معالى المحافظ فى مداخله هاتفيه نستفسر منه عن العمليه الو معالى الوزير المحافظ
زياد يبص على عباده عباده مبتسم
...........................
قدام اوضه العمليات
الكل واقف متجمع و بيقرا قران و فاطمه ماسكه الخاتم فى ايدها و بتبصله ممرضه تطلع من جوه الكل يجرى عليها
مختار / ايه الاخبار
الممرضه / بقت احسن بس ربنا يعوض عليكوا فى الجنين بقي
مختار / فداها المهم تقوم بالسلامه
الممرضه تبتسم و تمشي و عبد الله يسجد فى الارض و شيري تعيط من الفرحة انتصار تاخدها فى حضنها ثوانى و هند تطلع على ترولى و هى فاقده الوعى فاطمه تجرى جنبها و تلبسها الخاتم تانى و تطبطب على ايدها و تبتسم
........................
فى اوضه تانيه
امين قاعد جنب الولد عباده يفتح الباب امين يقف
عباده / كلمتوا امه
امين / النهرده باذن الله هنوصلها عملت ايه فى رشيد و سمر
عباده / وعدت مختار اننا هندفنهم فى المقابر بتاعتنا يتغسلوا و نطلع طلعه واحده
مغاورى يدخل
مغاورى / السلام عليكم
عباده / طمنى على المصابين بتوعنا
مغاورى / مش قليلين و فيهم اصابات حرجه و فى ناس ما لحقناهاش للاسف
عباده الحزن يبان على وشه
مغاورى / بس بيقولوا هند فاقت و هينقلوها البيت مش فاهم ليه السربعه مش كانت استنت لما نطمن عليها
عباده / هند واخده بى كاى زيي
مغاورى / يا ليله مطينه بطين
عباده / مغاورى ... كلم سماح و شوف ان كانت تحب تروح معاك
مغاورى يبتسم
عباده / خد بالك منها المرادى
مغاورى / فى عيني
عباده يهز راسه
..................
على الطريق فى البلد
خليفه و مراته و عياله بيعبوا عفشهم على عربيه نص نقل عربيات الزنايته تعدى خليفه يبص مختار يفتح الشباك و يبصله باحتقار و يقفل الشباك تانى و خليفه باصص فى الارض
عباده / انت هتعدى اللى عمله بالساهل
امين / دا يستاهل الدبح
مختار / اكراما للميتين كان غالي عليهم
هند / كان غصب عنه
مختار / كان قالنا ما كناش اديناله ضهرنا
عباده/ سالته بدل المره الف كان بيكدب عليا فى وشي
مختار / واهو عمل الصح و مشي قبل ما الناس تعرف اللى عمله سوق سوق خلينا نروح
امين يكمل سواقه و الكل مضايق
...................
فى المستشفى
محمود نايم فى السرير و امل و ممدوح واقفين بيتكلموا مع دكتور
امل / بس معقول كل ده فى يوم و ليله
الدكتور / واضح ان بقاله فتره طويله بيتعرض لضغوطات نفسيه قويه و واضح انه كان بيكتمها جواه بدليل انكوا ما تعرفوش عنها حاجه اهو و دا اكيد ضاعف من تاثيرها على صحته النفسيه
امل / بس هو علاطول نايم كدا
الدكتور / دا تأثير المهدئات اللى بياخدها
ممدوح / طب هو لما بيفوق وضعه بيبقي عامل ازاى
الدكتور / احيانا تايه و احيانا عنيف
امل / عنيف !!
الدكتور / حضرتك دا مريض نفسي يعنى فاقد للاهليه يعني تتوقعى منه اى حاجه
امل تبص لممدوح بحزن
ممدوح/ احنا اسفين جدا على ازعاج حضرتك
الدكتور / ابدا بالعكس انا رايي ان وجودكوا و متابعتكوا للحاله اكيد هتفرق معاه جدا
ممدوح / اكيد
الدكتور / عن اذنكوا عشان عندى مرور على المرضي
ممدوح/ طبعا اتفضل و اسفين مره تانيه
الدكتور يمشي امل تمسك ممدوح من دراعه
امل / ما فيش مستشفي اعفن من دى نحط فيها ابويا و بعدين انا مش مرتاحه خالص الدكتور ده و مش فاهمه منه اى حاجه
ممدوح / و لا انا
امل / طب ما نسال عن دكتور شاطر يبص عليه حتى لو على حسابنا
ممدوح / انا ما اعرفش حد بس اللى يسأل ما يتوهش تعالى اروحك بقي و اللحق الشغل و نبقي نشوف الموضوع ده لما ارجع بالليل بقي
امل / تمام
امل تمشي و هى زعلانه و ممدوح جنبها
.....................
فى اوضه هند
مختار شايل هند يحطها على السرير و الكل حواليها هند تبص لفاطمه
هند / خاتم انقذنى يا بطه
فاطمه /  ما كدبتش لما قولت هتطلعى عنيهم
مختار / بقولكوا ايه يا جماعه انتوا منورين و كل حاجه بس انا مطبق و محتاج ارتاح ساعتين
انتصار / حقكوا ... لو احتاجتوا اى حاجه نادونى انا فى اوضتى
هند تبتسم و الكل يطلع بره و شيرى واقفه مختار باصصلها تبتسم و تمشي
هند / ليه كدا يا مختار
مختار / محتاج اتكلم معاكى
هند / انا عارفه هتقول ايه انا عارفه انى واخده البى كاى و عارفه انا داخله على ايه
مختار / انا عارف انك قدها اللى خلاكى تعدى من كل ده عارف انك هتقدرى ان شاء الله تعدى من دى كمان
هند / ان كان وجعى فى البى كاى فكل اللى فى السرايا موجوعين و كل واحد و وجعه كل واحد واقف عشان يسند التانى مع انه محتاج لاى حد يسنده ام فاتن و اختك  كل واحده خسرت اخوها و جوزها فى يوم واحد امين اللى خسر ابوه و خاله مريم و انت و عباده و كلكوا
مختار / كل دول غيرك كل دول عايشين فى الهم ده من يوم ما وعيوا على الدنيا بس انتى شوفتى عباده
هند / هتبقي جنبى صح
مختار / اكيد
هند / يبقي هنعديها ان شاء الله
مختار / حاولى ترتاحى شويه تمام
هند تهز راسها و تفرد نفسها و مختار ياخدها فى حضنه و نظرات الحزن ماليه عنيها
...................
فى اوضه مريم
انتصار تدخل تلاقي مريم قاعده على السرير بتزاكر
انتصار / هعطلك ؟
مريم / ابدا تعالى اتفضلي ..  انا بس كنت بحاول ... يعني اشغل نفسي بحاجه مفيده
انتصار / خير ما عملتى
انتصار تقعد جنب مريم و باصه فى الارض و مريم بصالها
انتصار / انتى عامله ايه
مريم / حاسه ان فى حاجه كبيره اوى نقصانى
انتصار / خدنا بتاره و بردنا ناره
مريم / بس ابويا ما رجعش ما حدش من اللى راحوا رجعوا
انتصار / هند رجعت
مريم تبص لانتصار
انتصار / ابوكى كان بيحبك اوى يا مريم اخر العنقود سكر معقود كان مامنى لو ربنا ما كانش كاتبله يحضر فرحك تتعملك ليله و لا الف ليله
مريم / و دى هتبقي ليله من غيره ياما
انتصار عنيها تتملى دموع مريم تعيط
مريم/ انا مش مصبرنى على فراقه غير انى متاكده انه ان شاء الله فى مكان احسن
انتصار / ان شاء الله مش شهيد يا بنتى
انتصار تمسح دموع مريم
انتصار / ابوكى كان نفسه يشوفك احسن حاجه فى الدنيا و انتى قدها
مريم / انا بعمل كل اللى اقدر عليه
انتصار/ انا كنت حالفه انى ادبح لما هند قالتلى انها حامل هخليهم يدبحوا و ياكلوا رحمه و نور و كمان عشان سلامه هند و الرجاله و انتى زاكرى و اعرفى انك فى اى وقت تحتاجى تتكلمى فيه انا لسه باقي فى عمرى اسمعلك
مريم / ربنا يديكى الصحه و طوله العمر
انتصار تقوم تبوس راس مريم
انتصار / ركزى فى دروسك و ارفعى راسنا
انتصار تمشي و مريم متبعاها بحزن
.........................
فى شقه هشام
هشام نايم البلطجى يدخل يتسحب و الدنيا ضلمه و فى ايده مسدس كاتم للصوت ينغز بيه هشام يصحى
هشام / ايه ده فى ايه مين انت مين
البلطجى / اصحالى كدا يا حيلتها بدل ما اصبغلك الملايه البيضه دى احمر
هشام / انت دخلت ازاى و عاوز منى ايه
البلطجى / فين الفلوس اللى سرقتها من وسام
هشام / وسام مين انا ما سرقتش حد
البلطجى ينغزه بالمسدس مرتين
البلطجى / ما تستهبلش ما تخلينيش ازعلك
هشام / يا عم الشقه عندك فتشها انت تاعبك قلبك معايا ليه
البلطجى / تصدق معاك حق
البلطجة يضرب هشام طلقه فى رجله هشام يصرخ البلطجى يشد مخده و يكتم نفسه بيها
البلطجى / فين الفلوس يا ابن الكلب انطق بدل ما اقتلك فين الفلوس
البلطجى يشيل المخده هشام مفتح عنيه و ما بيتحركش يهزه جامد اكتر من مره و يتخض و يفتح الدولاب ينزل الهدوم فى الارض و يفتش فى الشقه و يقلبها ما يلاقيش الفلوس يطلع يجرى
..............................
فى شقه يوسف
امل و يوسف بيتخانقوا و اسراء و ممدوح و حمدى قاعدين بيتابعوا
يوسف/ و انتى نمتى قومتى اكتشفتى ان المستشفى دى مش مناسبه لبابا
امل / انا مش قادره اقتنع ان بابا فجاه كدا يدخل مستشفى المجانين
يوسف / مهو جهلك ده اللى جايبنا لورا
امل /  انا اتكلمت مع تلت دكاتره النهرده
يوسف / افندم تلاته !! و عرفتيهم منين دول كنتى بتتعالجى من ورانا
امل / عشان ابويا اعمل اى حاجه
يوسف / بتتكلمى كانى مقصر
امل / طب ليه رافض الدكاتره دول يشوفوا بابا
يوسف / عشان دول نصابين ابوكى كشف عليه دكاتره المستشفي يبقي ايه لزمتها الفضايح
امل / فضايح ايه
يوسف / مهو لو مستشفي خاص كنت قولت حجزوه عشان يسحبوا مننا فلوس انما دى مستشفي حكومى هيستفيدوا ايه بس من كل ده
امل / يا يوسف نطمن و خلاص
اسراء / و فيها ايه اما تريح اختك و اهو زياده اطمئنان مش أكتر
يوسف / اعملوا اللى يريحكم انا طول النهار واقف فى المحل و راجع تعبان مش فايقلكوا
يوسف يدخل الاوضه و يرزع الباب وراه
...................
قدام اوضه هند
الكل واقف عباده يدخل متسند على خديجه و باين عليه التعب فاطمه تشوفه تجرى عليه
فاطمه / حد عاقل يعمل كدا مش كفايا اللى جوه هتبقي خديجه كمان ... رجع عباده اوضته يا امين
عباده / هى عامله ايه
باب الاوضه يتفتح و صوت صريخ شديد لهند يخرج معاه و يروح لما الدكتور يقفل الباب الكل باصص للدكتور
عباده / هى وضعها صعب للدرجادى
الدكتور/ انا مش هقدر اخبى عليكوا مدام هند خسرت دم كتير و جسمها ضعيف جدا
انتصار / مش فاهمه يعني ايه
الدكتور / يعني الحاله صعبه و احتمال انها تعدى منها قليل اوى
فاطمه / تف من بقك يا دكتور دى بت جبل بميت راجل هى بس اللى تبان من بره خرعه و ما لهاش فى حاجه
الدكتور / على العموم انا اديتها حقنه منوم هستاذنكوا اروح ارتاح شويه و ياريتك يا كبير انت كمان ترتاح
عباده / هرتاح تشكر يا دكتور
الدكتور يمشي فاطمه تفتح الباب و تدخل صمت شيرى تفتح الباب و تدخل تلاقى السرير فاضي
فاطمه / مختار ... هند
مختار يرد من جوه الحمام
مختار / احنا فى الحمام سبونا لوحدنا
فاطمه / جايه اساعدك
مختار / تسلمى بس انا مش محتاج مساعده
شيرى تروح تحط ايدها على السرير تلاقيه مبلول و مبهدل ترجيع تشيل الملايه و تبدا تنضف فاطمه تجرى عليها و تساعدها شيرى بتعيط
فاطمه / بتعيطي ليه بس دلوقت
شيري / صغيره اوى على كل ده
فاطمه / والله انتى ما عارفه بنتك دى بت بمليون راجل و باذنك يارب هتعدى منها
شيري / يارب بقي يارب
فاطمه / خلصي بسرعه قبل ما يطلعوا
فاطمه تروح تخبط على باب الحمام
فاطمه / احنا بنضف السرير ..  محتاج غيار ؟
مختار / معايا شكرا
فاطمه تروح تساعد شيرى
.....................
فى المستشفى تانى يوم
فى مكتب المدير الدكتور بيتخانق مع المدير
الدكتور / يا دكتور حضرتك لازم تبلغنى ان فى حد هيكشف على الحاله و بعدين ما دام هم مش شايفين اننا عارفين نشوف شغلنا بيجيبوه عندنا ليه
المدير / انا ما كنتش اعرف ان فى دكتور تانى هيشوف الحاله دول جم وقت الزياره و بعدين انا مش فاهم فين المشكله اصلا
الدكتور / يا دكتور المريض ده بتاعى
.......................