البر التانى بقلم / لولو_محمد (كامله )

الحلقه ٩٥

(((((( البر التانى ))))))))
#لولو_محمد
الحلقه ٩٥
عباده / قولنا كدا و ادى النتيجه
مختار / انت يعنى مش عارفه جعجاع و بيقول اى كلام و بعدين بيهدى
عباده يبص الناحيه التانيه
مختار / تعال نرجع السرايا نهدى و نفكر
عباده يبص ورا مختار يلاقى عربيه مغاورى جايه بسرعه تفرمل قبلهم و ينزل منها
مغاورى / خدوهم بالصوت مش كدا
عباده / انا قولت اللى عندى يا مغاورى انا قريت فتحه الحيه دى و اختار هتقف فين يا معانا يا معاها
مغاورى / روح يا عباده روح و خد الرجاله كلهم معاك و ما تقلقش انا هاخد بالى كويس من حريمكوا
عباده يمسك فى مغاورى مختار يفصل بينهم
مغاورى / هتموتوا كلكوا قبل حتى ما توصلوا لبوابه بيتها هتموتوا قبل حتى ما تلمسوا منها شعره
مختار / اتكلم عدل يا مغاورى
.............................
مغاورى / انا بتكلم عدل انتوا اللى الغرور عاميكوا انتوا عارفين انا خسرت سلاح قد ايه انتوا عارفين باقى عندى فى المخازن قد ايه
عباده / برده بيقول اللى اتحرق
مغاورى / انا دخلت مخزن السلاح بتاعها شوفت السلاح اللى عندها شوفت نوعيه السلاح اللى بتستخدمه هتصطادنا و توقعنا واحد ورا التانى زى الناموس .
مختار يبص لعباده
مغاورى / انا معاكوا بس عشان نعرف نحاربها لازم نغير قوانين اللعبه يا ولاد الزنايته لازم نجيب سلاح من اياه مش شويه بنادق و مسدسات
عباده يبص لمختار
عباده / محلوله
عباده يروح يركب عربيته و يمشى
مغاورى / انا ما قولتش ان انتوا اللى عملتوا فينا كدا بس برده مش متاكد ان هى اللى عملت فيا كدا
مختار / هى ... بس احنا ممكن نستغل ده لمصلحتنا
مغاورى / سامحنى يا ابن عمى
مختار يضرب مغاورى بوكس فى وشه مغاورى يبرق و يبصله
مختار / كدا خد راحتك
مختار و مغاورى يمسكوا فى بعض
............................
فى اسكندريه
وسام قاعده على كاشير بتحاسب زبونه
وسام / نورتى ان شاء الله قريب هيجي كولكشن جديد
الزبونه / ان شاء الله اجى تانى
وسام / تنوري
الزبونه تبتسم و تمشي يوسف يدخل وسام تبصله باستغراب
وسام / اهلا
يوسف / ازيك
وسام / انا كويسه الحمد لله اؤمر
يوسف يبص على المحل
يوسف / مبروك
وسام / خير يا يوسف ايه اللى فكرك بيا ايه اللى جابك
يوسف / انا عارف انك زعلانه منى و عشان كدا ما سمعتش كلامهم و مشيتها رسمى
وسام / هى ايه دى
يوسف / الشبكه بتاعتى
وسام / شبكه ايه انا مش قولتلك هاخدها و انت وافقت ايه اللى غير كلامك دلوقت
يوسف / انتى عارفه اللى حصل معانا و انا محتاجها
وسام/ و انا بعتها انت لسه فاكر تيجي تكلمنى عنها
يوسف / انا معايا الفواتير
وسام / انا مش فاهماك بصراحه انت فاكرنى هقعد استناك كل ده يا عالم هترجع فى كلامك و لا لا انا حطيت كل اللى معايا فى المحل ده و باكل منه انا و امى و لو وقفت على راسي مش هعرف اجبلك الشبكه تانى على الاقل مش دلوقت عاوز تحبسنى احبسنى انا اصلا الغلطانه انى ورطت نفسي معاك
يوسف / وسام انا عمرى ما هاذيكي انا
وسام / انت اذيتني خلاص انا ما فيش حد اذانى زيك مديتاك ايدي و ضحيت بكرامتى عشانك انت بقي عملت عشانى ايه
يوسف / احنا كان فى بينا اتفاق
وسام / و اديك بترجع فيه لما اتزنقت اشمعن انت بتحللها لنفسك و تحرمها عليا لو كنت حبيتني ربع ما انا حبيتك ما كانش ربنا عمل فيك كدا بس انا ما مليتش عينك روح بقي لست هند بتاعتك
يوسف يبص فى الارض
وسام / انت اصلا مش جاى عشانى انت جاى للدهب مفيش دهب
زبونه تدخل المحل
وسام / لو سمحت دا مكان اكل عيشي
يوسف يطلع بره يلاقى حامد واقف
حامد / ها عملت ايه
يوسف / باعت الدهب و فتحت المحل
حامد / يعني ايه
يوسف / يعني ربنا يعوض عليا هعمل ايه يعني
حامد / هو ايه اللى تعمل ايه دا حقك و معاك الفواتير تطلع على القسم و تطلع عينها
يوسف / و بعدين هستفيد ايه لو اتحبست يعني
حامد / يا سيدى تديك المحل تديك نسبه من الارباح تتصرف تتشقلب دا مش شغلك
يوسف / كفايا بقي يا عمى كفايا
حامد / كفايا انا مالى انسي بقي حوار الكافيه ده
يوسف / مهى حتى لو ادتنى المحل او شاركتنى مش هعرف اللم الفلوس مره واحده و افتح الكافيه مهو اذا اردت ان تطلع فامر بما يستطاع هتعمل ايه هى يعني
حامد / انا مش فاهمك بصراحه
يوسف / تعال نقعد ناكل لقمه فى حته و نتكلم بهدوء و نفكر فى حل
حامد / الحل جوه المحل شغال الحمد لله و ستات داخله و ستات خارجه و دا حقك
يوسف / اتاخرنا اوى يا عمى اتاخرنا
حامد / و لا اتاخرنا و لا حاجه انت بس اللى مش عاوز
يوسف / يعني اعمل ايه
حامد / احنا فعلا هناكل لقمه و ننزل على مصر نطلع على المحامى و هو اللى هيعمل
يوسف / طب اجرب معاها لاخر مره
حامد / بشوقك بقي انا زهقت
حامد يمشي يوسف يجرى وراه
يوسف / على فين يا عمى
حامد / على المحطه هرجع هقعد هنا يتحرق دمى
يوسف / طب استنى هاجى معاك
حامد / تيجي بقي و لا ما تجيش
حامد يمشي و يوسف بيحاول يحصله
........................
فى شقه محمود
اسراء / لا بس ما تنكرش يوسف حاله انصلح على الاخر
محمود / انصلح !
اسراء / والله انت بس لو تخف عنه شويه الواد مش واخد على المعامله دى و قال على راى المثل ان كبر ابنك خاويه
محمود / خاويته و دلعته لما بوظته ياريتني كنت شديت عليه شويه و هو صغير ما كانش كل ده حصل
اسراء / ابنك برده لو ما ادلعش على حسك هيدلع على مين
محمود / كل حاجه راحت يا اسراء ببدء من الصفر
اسراء / حرام عليك ما تقولش كدا الحمد لله الحال بيتحسن و ان كان على اللى راح ربنا يديك الصحه و تعوضه
محمود / اللى بيروح ما بيرجعش اخواتى و عيلتى و شقى عمرى كل ده راح يا اسراء
اسراء / انت لسه متخانق مع حامد
محمود / ما فكرش يراضيني ما فكرش يعتزر ان شالله حتى يهلفط باى كلام و انا والله كنت هصدقه و اسامحه
اسراء / الله يعينه برده ظروفه صعبه و تلاقيه عمل كدا من الضغط اللى عليه
محمود / يقول كدا يقول و لو مره يجي بس و انا مش هستنى منه اعتزار
اسراء / ما تزعلش نفسك بكره ربنا يهديه و اهو اعتبر انك بتشد عليه زى ما بتشد على يوسف
محمود / ربنا يهدى
.......................
فى سرايا الجوارحه
عباده داخل بالعربيه يلاقي مختار راكن جنب السور و قاعد جوه العربيه يستغرب و يركن و ينزل يروح يخبط على الازاز مختار ينزل الازاز يلاقي مختار مضروب
عباده / نهاره اسود هو اللى عمل فيك كدا
مختار / اركب
عباده / اركب ايه وانت سكتله ما كلمتنيش ليه
مختار / اركب بقي مش ناقص جنانك اركب
عباده يبص لمختار و يلف يركب و مختار يقفل الازاز
عباده / ايه اللى حصل
مختار / روحت فين
عباده / لفيت حوالين المكان من بعيد سيبك منى خلينا فيك
مختار / الجزمه كان بيضرب بغل هههههههههههه
عباده / انت بتهزر صح ... و مبسوط اوى
مختار / روح شوف وشه الاول و بعدين اتكلم
عباده / دا اللى كنت عامل حسابه
مختار / اهدى دا تمثيل
عباده / امال لو كان جد بقي كان ضربك بالنار و لا ايه
مختار / ما حدش هيعرف كلنا هنهيج و نثور و نعمل قعدات عرب و هنكبر الموضوع
عباده / و دى هتخيل عليها
مختار / لازم تخيل احنا هنسبوكها حتى على حريمنا
عباده يبصله و يرفع حاجبه و يبص الناحيه التانيه
عباده / انت عارف انت بتطلب منى ايه
مختار / انت عارف انا راكن هنا بقالى قد ايه مش عارف ادخل
عباده يبتسم و يبص الناحيه التانيه
مختار / هتعدى فتره و هتعدى بس لحد ما نعرف مين اللى بينقل اخبارنا مش هنقول الحقيقه غير فى اضيق الحدود حتى مش كل الرجاله هتعرف
عباده / هقولها ايه
مختار / ما تقولهاش فتره و هتعدى تزعل دلوقت شويه احسن ما تشوف اللى شوفته انا فى شهر عسلي
عباده يبص الناحيه التانيه مختار يبتسم
مختار/ حبيتها؟
عباده / يا خويا فكر فى اللى انت داخل عليه و لا تخليك هنا يومين تلاته اهونلك
مختار / هههههههههههههههههههه
مختار يبص فى المرايه
مختار / و لا اسبوع حتى
عباده / على رايك ... انت متاكد انه كان بيمثل
مختار / ههههههههههههههههههههه
مختار يسوق و يتحرك
عباده / استعنا على الشقا بالله
.......................
فى سرايا الجواحه
خديجه بتضمد جروح مغاورى و الحزن ماليها و الغضب مالى المكان و الكل بيتشال و يتهبد
ام مغاورى / و انت هتسكت على اللى حصل ده يا حج
شاب ١ / اديني الاذن و انا اجيب عليها واطيها
شاب ٢ / له كبير يترد عليه
شاب ١ / و هو كان عمل حساب لكبير باللى عمله
مغاورى / و انا لقمه سهله و لا ايه دا انا طلعت عينه
ام مغاورى / انت ساكت ليه يا حج
شاهين / و هو حد عملى حساب و ادانى فرصه اتكلم
ام مغاورى تحط ايدها على بقها
شاهين / خلصتى يا خديجه
خديجه تلم الحاجه و تهز راسها و هى باصه فى الارض
شاهين / خشي ساعدى امك و اعملولنا لقمه ناكلها
ام مغاورى / ليك نفس تاكل و ابنك راجع بالشكل ده
شاهين / مش طافح
شاهين يسيب المكان و يمشي مغاورى يشاور للرجاله و يقوم يحصله
ام مغاورى / حسبى الله و نعم الوكيل فيك يا مختار انت و كل الزنايته
خديجه تبص لمامتها
ام مغاورى / الحمد لله اننا ما اتسرعناش و ربنا كشفهم لينا داهيه تاخدهم واحد ورا التانى
ست / ما يمكن عباده ما لوش ذنب و يغلطوا مختار
ام مغاورى / انا حق ابنى هيجى حتى لو على رقبه الطخين
شاب ١ / هيجي يا ام مغاورى هيجي يا ست الكل ما يكونش عندك فكر
ام مغاورى تبص لخديجه واقفه باصه فى الارض تتنهد و تروح ناحيه المطبخ
..................
فى سرايا الزنايته
مختار يدخل و معاه عباده الستات تقوم تتنفض و انتصار تجرى عليه و هند تبصله و ما بتتحركش
انتصار / مين اللى عمل فيك كدا
مختار / مفيش حاجه يا ام فاتن الكبير فين
انتصار / لسه ماجاش ... فى ايه يا عباده
فاطمه / مغاورى صح اتخانقتوا مع مغاورى صح ... و انت كنت فين يا زينه الرجاله
عباده / ما كنتش معاهم
انتصار / انتوا مش طالعين سوا و راجعين سوا
عباده/ اللى حصل يا ام فاتن سيبوه يطلع يرتاح دلوقت و نتكلم بعدين اهدوا على الراجل
مختار / عن اذنكوا
مختار يعدى يمسك هند من ايدها و يطلع معاها فوق
فاطمه / ايه اللى حصل يا عباده ضربوكوا هناك و لا ايه
عباده / لا اتخانقوا بره احنا مشينا و مغورى حصلنا و اتكلمنا عادى و بعدين مشيت انا و قابلت مختار على البوابه اتخانقوا بعد ما مشيت
فاتن / و مغاورى عامل ايه
فاطمه / قطعت و قطعت سيرته ان شالله قطع ايديه الاتنين اللى اتمدت على سيده
فاتن / على اساس ان مختار هينضرب و هو ساكت انا بسال ليكون جراله حاجه و الدنيا تولع و ما نعرفش نلمها
انتصار / و هى كدا ما ولعتش يا فاتن ما ولعت و اللى كان كان
انتصار تروح تقعد على اقرب كرسى
انتصار / كلم الرجاله يا عباده خليهم يسيبوا اللى فى ايدهم و يجوا على هنا خلينا نشوف هنلم الليله دى ازاى ... دا ان كانت هتتلم فى سنتها
انتصار تقوم بالعافيه و تتسند على الترابزين و تطلع فوق
........................
فى اوضه مختار
مختار يروح يقعد على السرير و يفتح الادراج بتاعه الكومدينو اللى جنبه و يقلب فيها و هند لسه واقفه عند الباب
مختار / شوفيلى كدا فى هيموكلار و لا ريباريل جيل
مختار يبص يلاقي هند واقفه بصاله و عنيها كلها دموع يتنهد و يروحلها ياخدها فى حضنه
هند / ليه كدا
مختار / انا اللى بدات عصبنى ما حستش بنفسي غير و انا بضربه و هو اكيد ما كانش هيسكت يعني
هند / و بعدين ... اهله هيسكتوا يعني و لا هيجوا يكملوا عليك
مختار / ما تقلقيش انا كلمت ناصر و زمانه جاى و هو هيتصرف مش اول مره تحصل
هند / كويس ... واخدين على كدا يعني ... طب ما فكرتش ان انا مش واخده ... يعني انت عارف انا حاسه بايه دلوقت
الباب يخبط مختار يطبطب على كتف هند و يروح يفتح يلاقي انتصار واقفه شايله صندوق اسعافات
انتصار / هتحتاج ده
مختار / تسلمى
انتصار / ماشي و اهى هند معاك لو فى حاجه
انتصار تبص على هند زعلانه تبص فى الارض و تمشي مختار يقفل الباب و يدخل يقعد على السرير و يفتح الصندوق هند تروح جنبه تساعده
مختار / اوعى تكون صورتى فى عينك اتهزت بعد ما انضربت ؟
هند / رايق اوى يعني ما شاء الله
هند تقوم تفتح الدولاب و تطلع غيار نضيف لمختار و تساعده يغير
........................
فى المكتب تحت
الرجاله كلها متجمعين
امين / يعني هنسكت ؟
ناصر / لا هنروح نولع فيهم و يجوا يولعوا فينا و نخلص على بعض و الكل يرتاح
عباده / امال ناوى على ايه يا كبير
ناصر / انا كلمت الحج شاهين قولتله نقعد و نتراضي
سليمان / و اللى حصل ده فيه تراضي يا كبير
ناصر / قول تانى يا مختار عشان سليمان ما كانش مركز مين فيكوا اللى بدا بالضرب
مختار / انا
ناصر يشاور على مختار و يضرب على المكتب
الرجاله تبص فى الارض
ناصر / لما يجي الحج شاهين مهما قال نلم الليله و نبقي نتحاسب بعدين
الرجاله تهز راسها ناصر يسيب المكان و يطلع بره مختار يبص لعباده و بعدين يبص على الرجاله و يطلع ورا ناصر ميلاقيهوش
مريم / مشي بره
مختار يهز راسه و يطلع الجنينه يلاقى ناصر واقف يروحله يقف جنبه يبصله ناصر يبصله
مختار / احنا و الجوارحه على اتفاقنا حبيت اقولك
ناصر / تقولى ايه
مختار / مغاورى شاف نوع السلاح فى فيلا فيرا
ناصر / انت بتهزر يا مختار
مختار / ما كانش ينفع تبين قدام حد غير انك متعصب على الاقل لحد ما نعرف هى واصله جوانا لحد فين ما حدش هيعرف غير انا و انت و عباده و مغاورى و الحج شاهين
ناصر يبص الناحيه التانيه و يكتم الغضب جواه
مختار / ليك حق تضايق بس احنا لو كنا ضيعنا الفرصه
ناصر يشاورله يسكت
ناصر / ماشي يا مختار ... خلاص ... و الحج شاهين وافق على الكلام ده و لا هو كمان اتحط قدام الامر الواقع زيكوا
مختار / كانت وليده لحظه
ناصر يبصله مختار يبص فى الارض
ناصر / هند عرفت
مختار / لا ما حدش هيعرف حتى الرجاله لازم تفتكر ان الخناقه بجد عشان ما حدش يغلط
ناصر / و انت ضامن بقي العيلتين ما يمسكوش فى بعض
مختار / و مين ياجروا يكسرلك و لا يكسر للحج شاهين كلمه
ناصر / بتلعب لعبه ما انتش قدها
مختار / اللى تشوفه يا كبير
ناصر يدخل جوه و يطلع فوق من غير ما يقف لحد مختار يدخل وراه
انتصار / ماله يا مختار فى حاجه تانيه حصلت و لا ايه
مختار يهز راسه لا و يبص لعباده
...............
فى سرايا الجوارحه
الرجاله متجمعه و فى شاب بيلبس شاهين العبايه
ام مغاورى / و ليه القاعده دى بقى ما تتعملش عندنا يعني يبدا بالضرب و احنا اللى نروح نراضي من امتى بتصغرنا كدا يا كبير
شاهين / كانوا هنا كانوا فى بيتنا و ابنك الحيله المحترم ما احترمش لا كبير و لا صغير حصل و لا لا
مغاورى / كنت عاوزني اسكت يعني
شاهين / ايه اللى وداك وراهم رايح للمشاكل برجليك ليه
مغاورى يبص فى الارض
راجل / قاله كلمه يرد بكلمه لكن احنا مش صغيرين عشان يمدوا ايديهم علينا
شاهين / لما الكبير يتكلم الكل يسكت هنروح للناس ما حدش يتكلم الا باذنى مفهوم و لا لا
كل الرجاله تبص فى الارض
شاهين/ مغاورى يبقي ابنى و انا احسن من يجيبله حقه و لو مش واثقين فكلمتى يبقي بناقصها
راجل / ما عاش و لا كان يا كبيرنا دا انت الخير و البركه
شاهين / اتحركوا على العربيات يلا
الرجاله كلها تتحرك
.....................
 
فى المطبخ عند الزنايته
مريم بتصب الشاى و سماح عماله تلقم فى كوبايات تانيه
سماح / هاين عليا اجيب الملين بتاع ابويا و ابهدلهم كلهم
مريم / و هيعرفوا كباياتنا من كبايتهم ازاى يا اذكى اخواتك
سماح / و انا كنت ناويه اعمل كدا بجد انتى كمان انا بقول هاين عليا مش طيقاهم و لا طايقه دخلتهم
مريم / حقه دول ما سبوش حد من عيلتهم الا جابوه معاهم
سماح / قال و عباده كان رايح يناسبهم بركه يا جامع ان الجوازه باظت
مريم / حرام عليكي خديجه غلبانه
سماح / و هى فين خديجه ان شاء الله
مريم / هتعمل ايه يعنى الله يعينها هى تقدر تقول حاجه بعد كلمه ابوها
فاطمه تدخل
فاطمه / سنه بتعملوا الشاى
مريم / خلصنا خلاص هنقلب بس
فاطمه تتنهد و تهز راسها
.............................
فى المضيفه
رجاله واقفه و رجاله قاعده و زحمه موت و الكل بيتكلم بصوت عالى و يشدوا قدام بعض
شاهين / باااااس مفيش احترام لكبار وسطيكوا و لا ايه
راجل / مش سامع بيقولوا ايه يا حج
ناصر / و هو اللى انتوا بتقولوه شويه يعنى
مغاورى / انا حقى مش هسيبه يا كبير
ناصر / حقك خدته بدراعك و خصلنا
مغاورى / كان المفروض اسكتله و اجيلك اعيط يعنى
ناصر / انت غلطت و هو غلط خلصنا قولنا يلا اتراضوا
مغاورى يبص لشاهين و يبص لمختار
عباده / يا جماعه ما يصحش كدا دا كان زمانكوا بتزفونى دلوقت
مغاورى / يومين تلاته و تقرير الطب الشرعى يبان و نعرف الرجاله اللى فى المخزن ماتوا ازاى
عباده / مش هنخلص فى سنتنا احنا بقى
شاهين / و لا عمرها هتخلص الا اما حق الرجاله اللى راحت يرجع
مختار / نحلفلكوا بايه عشان تصدقوا ان مالناش دخل بالحكايه دى
مغاورى / هانت بكره الشركه تبعت تقريرها و نشوف
ناصر / و هى هتقولك النظام بتاعنا اللى انتوا دافعين فيه شئ و شويات ما اشتغلش ... دا انت تبقى طيب اوى
مغاورى / بكره تشوف الطيب ده هيعمل ايه لما الحقيقه تبان
ناصر يقف
ناصر / هتعمل ايه يا مغاورى
شاهين يقوم يقف
شاهين / و انت يفرق معاك فى ايه يا كبير ما دام ما لكوش دخل بيها
ناصر / يفرق معايا طريقته و قله احترامه للاكبر منه
شاهين / فى دى معاك حق راضى عمك يا مغاورى
مغاورى / حقك عليا يا كبير بس انا ليا حق عند اخوك و مش هسيبه
ناصر / راضى اخوك يا مختار
مختار / حقك عليا يا مغاورى بس انت كمان استفزتنى
مغاورى يشوح بايده و يبص الناحيه التانيه
مغاورى / حد كلمك
شاهين / راضى اخوك انت كمان يا مغاورى
مغاورى / ما تجيش عليا يا ابا يسترك
شاهين / مش هتنى كلامى يا مغاورى راضى اخوك و حب على راسه و انت كمان يا مختار
ناصر / انتوا اخوات و الداخل بينكوا خارج راضو بعض خلونا نفضها سيره على اخر الزمن هيقولوا الجوارحه و الزنايته مسكوا فى بعض امال لو ما كنتوش عشره عمر و متربين سوا
مختار / خيركم من يبدا بالسلام هات راسك ابوسها
مختار يشد مغاورى من رقبته جامد مغاورى يبرق مختار يبوس راسه مغاورى يشد مختار من رقبته بنفس الطريق و يبوس راسه
مغاورى / حقك عليا يا ابن عمى
ناصر / ما تتكررش تانى المره الجايه مش هنعديها على خير ما عدتوش عيال صغيره انتوا كبار امال مين هيشيل البلد من بعدنا ...ساعتها هتاكلوا بعض بقى
شاهين / من ناحيتنا مش هتتكرر المهم ما تتكررش من ناحيتكوا
ناصر / اذا عرف السبب بطل العجب يا كبير الجوارحه
شاهين / بالاذن يا حج
ناصر / اقعد اشرب الشاى
عباده / كان زمانا بنشرب شربات دلوقت لولاش ولاد الحرام
مغاورى / كل و تاخيره و فيها خيره
عباده / و فين الخير فى اللى حصل ده يا سى مغاورى
...............................