البر التانى بقلم / لولو_محمد (كامله )

الحلقه ١١٣

(((((((البر التانى )))))))))
#لولو_محمد
الحلقه ١١٣
إنتصار/ خلى بالك من ام عبد الله ما جتش هنا بالساهل
مختار يبصلها باستغراب
انتصار / مغاورى الله يستره لحقها قبل ما يخطفوها هى و البت الصغيره
مختار عنيه توسع
انتصار / اخوك كان قالب عليهم البلد لحد ما مغاورى كلمه و طمنه و جابها على المستشفي هنا
مختار يهز راسه و يبص على باب الاوضه و يفتح و يدخل و يقفل الباب
فاتن / هو اللى بيحصل ده بجد ياما
انتصار / والله يا فاتن انا لحد دلوقت ما مصدقه بس هنعمل ايه ربك كبير تعالى اما نطمن على سماح
فاتن تهز راسها و يمشوا
.......................
فى اوضه سماح
سماح نايمه تعبانه و الكل حواليها خديجه مامتها و الكل الباب يخبط و يتفتح و ناصر و عباده يدخلوا خديجه تتفزع من منظر عباده و تقوم تقف مامتها تشدها تقعدها خديجه تبص فى الارض
عباده / ازيك يا سماح
سماح / شوفت اللى حصلنا يا عباده
عباده / المهم انك بخير دلوقت
فاطمه / اقعد ارتاح يا حبيبي
عباده / هبص على جابر عن اذنكوا
عباده يبص على خديجه باصه فى الارض يطلع بره
ناصر / خدوا راحتكم
ناصر يقفل الباب
عباده / انا هطلع من هنا اجيب اجلها و اجل اللى يتشددلها
ناصر / قبلها فى مشوار اهم لازم نعمله
عباده / مشوار ايه ده اللى اهم من تار حريمنا
ناصر و عباده يبصوا لبعض
....................
فى فيلا فيرا
ادواردو ممدد فى السرير و وشه ازرق فيرا تفتح الباب و تدخل
فيرا / اى هايت زيس كونترى .. يو نو وات اى دو هايت زيس سيتى ... لوك ات يو .. يو لوك شيت ... ماى مين ات ذا هوسبيتال سو زيم واكينج از نوثينج هابند اند جيس وات ويزاوت ذا بى كاى ... اوه جاد اى ود لف تو كيل سم وان ناو ( انا بكره البلد دى ... انت عارف انا بكره المدينه دى .. بص لنفسك شكلك صعب رجالتى فى المستشفي شافوهم بيتمشوا و لا كان حاجه حصلت و من غير البى كاى .. اه يا ربى انا نفسي اقتل حد دلوقت )
فيرا تبصله بحزن و تروح تقعد جنبه
فيرا / اوه بيبي ذى هيرتد يو سو باد اند اى كودنت مايك ايت اب تو يو ويذ وان اوف زير بريشوس لايديز ( اه يا حبيبي عوروك جامد و انا ما اقدرتش حتى اعوضك بواحده من ستاتهم الغالين )
فيرا تفتح الدرج و تطلع شريط و تاخد من حبايه و تحطها على بق ادواردو و تسقيه شويه مايه
فيرا / سون اينف وى ويل تاك اور ريفنج وى ويل ميك زيم سافر زى ويل اول سافر ( قريب اوى هننتقم هنخليهم يعانوا كلهم هيعانوا )
...................
فى اوضه هند
هند نايمه فى حضن مختار تفتح عينها تلاقيه نايم و شكله تعبان تبص حواليها مفيش حد تحاول تقوم مختار يفوق
مختار / على فين
هند / سماح ... جابر
مختار / كلهم بخير ارتاحى و نامى شويه
هند / شوفت اللى حصل ؟
مختار / عدى خلاص
هند الدموع تنزل من عنيها
هند / هو ايه اللى عدى ؟ انا قتلت يا مختار قتلت
مختار / انتى عملتى الصح عملتى اللى اى حد مكانك كان لازم يعمله
هند / انت كنت عارف ان ده هيحصل صح
مختار / لا طبعا ايه اللى بتقوليه ده تفتكرى كنت هسيبك لوحدك لو كان فى احتمال واحد فى المليون انه يحصل
هند / امال ليه كنت مصمم انى اتعلم ليه كنت بتعلمنى ليه كنت
مختار / انتى اللى طلبتى انتى اللى طلبتي افتكرى كويس ... هند ... من يوم ما وعيت على الدنيا دى اول مره ... اول مره اصلا حتى اسمع ان فى حد اتجرا و اتهجم على الحريم الحريم و الاطفال طول عمرهم خط احمر يا هند انا حتى مش من حقى اتخانق او احتك باى واحد معاه حريم و اطفال يا هند مش من حقى حتى اخوفه قدام اهل بيته احنا اتربينا على كدا يا هند
هند /  امال ايه اللى حصل ده انت ما شوفتش اللى حصل  دول ما كانوش حتى زى اللى بنشوفهم فى الافلام فاطمه و انتصار فضوا فيهم مدفعين رشاش
مختار / كانوا مبلبعين ما كانوش حاسين ان فى رصاص دخل جسمهم كانوا بيكملوا لحد ما يموتوا عشان كدا لما كنتى بتضربى فى النفوخ كانوا بيقوا علاطول غير كدا كان لحد ما يموت بيكمل
هند / ما كانوش بيخافوا حتى من صوت الرصاص انا
مختار / انتى عملتى الصح لو ما كنتيش قتلتيهم كانوا هيقتلوكى او هيعملوا اللى اسوء من الموت هم كدا كدا كانوا هيموتوا لو مش بايدك كان بايد اى حد تانى و اولهم انا ما كانوش هيقفوا الا لما يموتوا يا هند ما كانش هيوقفهم حاجه الا انهم يموتوا
هند / انا مش فاهمه اى حاجه ... و مغاورى مغاورى
مختار / مغاورى مننا يا هند مهما كان الخلاف اللى بينا مهما زعلنا و اتخانقنا مغاورى مننا اتربى زينا ووسطينا و القانون اللى بيحكمنا واحد
هند / دا بيكرهك
مختار / بس راجل .. هو ما بيكرهنيش هو ... احنا ما بنتفقش بس ما بيكرهنيش
هند / انا مش فاهمه اى حاجه حاسه انى متلخبطه و تايهه و خايفه صوره الناس دى لسه فى دماغى منظر الدم و صوت الرصاص ... منظر سماح كل حاجه كل حاجه ... و انت انت فيك ايه انت مالك
مختار / مش كنا بنلعب يعني انتى عارفه اصابات الملاعب عادى يعني عدت
هند / مختار هسالك و تقولى الحقيقه مختار هم هيجوا تانى هيعملوا كدا تانى
مختار / هنعمل كل اللى نقدر عليه عشان نضمن انه ما يحصلش تانى و ان اللى اتجرا و عمل كدا لازم هياخد جزاءه
هند / و الناس اللى ماتت
مختار / جاء رجل إِلى رسول الله صلى الله عليه وسلم
هند / عليه الصلاه و السلام
مختار / فقال: يا رسول الله أرأيت إن جاء رجل يريد أخذ مالي؟ قال: فلا تعطه مالك قال: أرأيت إن قاتلني؟ قال: قاتله. قال: أرأيت إن قتلني؟ قال: فأنت شهيد قال: أرأيت إن قتلته؟ قال: هو في النار صدق رسول الله صلى الله عليه و سلم
هند / عليه الصلاه و السلام
مختار / من قتل دون ماله فهو شهيد، ومن قتل دون دينه فهو شهيد، ومن قتل دون أهله فهو شهيد، ومن قتل دون نفسه فهو شهيد اللى ماتوا من الغفر و هم بيدافعوا عن روحهم شهدا و اللى ماتوا و هم بيدافعوا عنكم شهدا و اللى ماتوا منهم فى النار
هند / و اهلهم و عيالهم و مراتاتهم
مختار / هنعوضهم و نتكفل بيهم لو كان اهلهم مكانكم كنا هنبقي اول ناس نموت عشانهم يا هند و هم عارفين دا كويس ... انتى شوفتى بعينك اهل البلد كلهم جريوا عليكوا مش عشان انتوا حريمنا .. لا .. عشان انتوا حريم اهل البلد كلها .. مغاورى و الجوارحه و كل البلد جريت عليكوا .. عشان هم رجاله و انتوا حريم .. مش مهم انتوا حريم مين المهم انهم يفضلوا رجاله 
هند تسكت ثوانى و تفكر و تبلع ريقها
هند / طب الناس دى كانت عاوزه مننا ايه احنا عملنالهم ايه
مختار / ما اعرفش اللى عملوا كدا ما كانش فى بينا و بينهم غير كل خير بس غدروا بينا حد زاققهم علينا
هند / و طبعا انتوا مش هتسكتوا على اللى حصل
مختار / لو احنا سكتنا اهل البلد مش هيسكتوا اللى حصل ما كانش حاجه صغيره ممكن تعدى بالساهل دا عرض و شرف اللى حصل يا هند لو ما اتردش عليه رد يليق بيه غيرهم هيتجرا
هند / انا خايفه عليك
مختار / بس انا ما عدتش خايف عليكي بصراحه رفعتى راسي وسط اهل البلد كلهم
هند / انت بتقول ايه
مختار / كلهم كانوا بيقولوا المصراويه المصراويه ان كنتى انتى و لا عبد الله من الليله كله هيعملكوا حساب
هند تبص الناحيه التانيه
هند / والله انت فايق و رايق
مختار / ما دمتى بخير ابقي بخير يا هند
هند تبصله
هند / طب و البوليس و الحكومه
مختار / الدنيا عندنا ما بتمشيش كدا يا هند ما تشغليش بالك
هند / ازاى يعني ما فيش قانون خالص كدا
مختار / فى بس قانونا غير و الحكومه ما لهاش غير ان النظام يمشي و احنا هنمشيه يا هند
هند / يعني لو البوليس سالنى هقول ايه
مختار/ مش هيسالك الموضوع خلص خلاص
هند/ ازاى يعني؟
مختار / زى ما بقولك كدا و نامى بقي انا تعبان و عاوز انام و انتى ما شاء الله لوك لوك لوك لوك و انا ما ليش فى رغى الحريم ده
هند تبصله
مختار يضحك و ياخدها فى حضنه و هى مقموصه يحضنها و يبوس راسها تعيط فى حضنه يتنهد و يطبطب عليها
......................
فى اوضه شيري فى السرايا
ياسمينا نايمه و شيري قاعده جنبها بتقرا قران الباب يتفتح بالراحه تبص تلاقي انتصار بتدخل راسها بشويش
شيري / تعالى يا ام فاتن انا صاحيه
انتصار تدخل
انتصار / ما عرفتش انام قولت اجى اطمن عليكي و كنت خايفه اصحيكي
شيري / لا يا حبيبتي انا صاحيه تعالى
انتصار تدخل و تقعد قدام شيري على السرير و تبص على ياسمينا حاضنه الدبدوب و نايمه
انتصار / انتى عامله ايه يا اختى
شيري / هو ايه اللى حصل النهرده ده يا ام فاتن سماح و جابر و حتى مختار و عباده و عبد الله و انا ايه ده
انتصار / والله يا اختى ما عارفه اقولك ايه انا اول مره اتحط فى موقف زى ده و بصراحه ما حدش مصدق انه حصل منهم لله ولاد الحرام بس ما تخافيش الحمد لله عدت على خير و لعله خير برده
شيري / خير ازاى بس
انتصار / ما دام ما حدش مننا جراله حاجه يبقي خير ان كان فى حاجه احنا مش واخدين بالنا منها ناخد و نفتح عنينا
شيري / و ليه كل ده اصلا
انتصار / ولاد حرام اقسملك بالله يا اختى اللى عملوا كدا ما فى بينا و بينهم غير كل خير و لا نعرف ايه اللى قلبهم علينا و لا ازاى نسيو اصلهم و قربوا من الحريم صدقيني الكبير كان جاى يجيبك بنفسه راحلك البيت و الحضانه و قلب عليكي البلد
شيري / قالولى يا اختى
انتصار / بس انتى جدعه انك ما قولتيش حاجه للعيال احنا حتى عبد الله لحد دلوقت بنحاول ما نعرفوش اللى حصل فى السرايا بس ما فيش حاجه بتستخبى و هند اديكي شايفه ما استحملتش الخضه يا قلبي
شيري / اقولك حاجه و ما تزعليش منى
انتصار / عمرى ما ازعل منك ابدا يا اختى قولى
شيري / انا ندمانه على اليوم اللى مختار سكن فيه جنبنا
انتصار تبصلها بحزن
شيري / اقولك ايه بس احنا كدا كدا كنا فى جحيم هند كانت عايشه فى كابوس بس هى يعني دلوقت عايشه فى الجنه يعني انا عرفت اللى هند عملته عرفت انها قتلت عرفت انها
انتصار / كانت بتدافع عن روحها كانت بتدافع عن اهلها و اخواتها
شيري / و عبد الله عبد الله لسه صغير ما لوش دعوه بحاجه لا هو قد مختار و لا قد عباده عشان يلعب معاهم مع انى بعد اللى حصل مش مصدقه انه كان لعب مش اول مره يلعبوا و انهى لعب اللى يرقد التلاته فى وقت واحد
انتصار تمسك ايد شيري
شيري / اوعى تفتكرى انى ما بحبش مختار اقسم بالله ما يفرق عن عبد الله
انتصار / عارفه يا اختى
شيري / والله بحبه و بحبكوا كلكوا بس احنا مش زيكوا احنا غلابا
انتصار / و احنا والله يا شريهان يا اختى غلابه بنجرى على لقمه عيشنا بس الظروف بقي و انتى عايشه معانا و شايفه احنا ما بنجريش على الاذى بالعكس اللى نقدر نساعده بنساعده و بيتنا مفتوح للكل بس ما بنقبلش نبقي حيطه مايله وقت الجد بنقف فى وش اى حد اى حد يفكر بس يجي علينا لازم نوقفه عند حده
شيري / طب و بعدين
انتصار / و لا قبلين يوم و عدى اتعلمنا منه حاجات و هننساه
شيري / بالبساطه دى
انتصار / مهو وقوفك عنده كتير مش هيزيدك و لا ينقصك انتى بخير و عيالك بخير بالعكس دا انتى المفروض تطمنى عليهم اكتر الحمد لله ما عادوش عيالك الضعاف بتوع زمان هند بقت قويه و عبد الله بقي اقوى المفروض تطمنى
شيري / ازاى بعد اللى شوفته انا شوفت مغاورى بيقتل اتنين فى ثانيه و بيولع فيهم
انتصار / عشانك عشان خطفوكى مغاورى هو اللى نجدنا كلنا النهرده و نجد سماح و جرى بيها على المستشفي كتر خيره ربايه الامرا
شيري / ازاى هو مش انتوا متخانقين معاهم
انتصار / الفرق بين ابن الاصول و المنافق و مغاورى اصيل و ابن اصول و بعدين دا بيقولوا عبد الله لعب قدامه و ظبطه
شيري تبص فى الارض و تتنهد
انتصار / انتى من هنا و رايح هتفضلي معانا انتى و عبد الله انتى غاليه علينا اوى و عمرنا ما هنسمح باى حاجه وحشه تحصلك انتى و لا ياسمينا
شيري / كتر خيرك
انتصار / هسيبك ترتاحى بس بالله عليكي ما تبقي زعلانه مننا خصوصا مختار دا بيحبكوا و ما بيستحملش عليكوا الهوا
شيري / ما تاخديش على كلامى انتى عارفه غلاوتكوا و غلاوه مختار
انتصار تبتسم و تمشي و شيري تتنهد و تمسك المصحف و تكمل قراءه
.................
فى شقه رشيد تانى يوم
الباب يخبط يروح يفتح و فى ايده دبوس فرخه يلاقي فيرا يرفع حاجبه
فيرا / انا جايه اعتزر عن اللى حصل منى امبارح
رشيد يفتح الباب فيرا تدخل رشيد ياخد قطمه
رشيد / شايفك جايه بايدك فاضيه يعني
فيرا / انت ما عدتش بتسهر فى الكباريه اياه ليه
رشيد / اسهر فين انتى لو كنتى اتاخرتى ساعه كمان كنتى جيتي ما لقيتينيش
فيرا / على فين ان شاء الله
رشيد / اى حته امان البلد دى هتولع فى اى وقت و انتى عارفه السبب كويس
فيرا / لا الحقيقه مش واخده بالى
رشيد يبتسم و يبص الناحيه التانيه و يروح يكمل اكل
فيرا / مش هتعزم ؟
رشيد / هو صحيح الاكل مش قد المقام بس بصله المحب خروف اعتبرى نفسك فى بيتك و اتفضلى
فيرا تروح تقعد
فيرا / احنا لسه فى بينا شغل ما خلصش
رشيد / بالنسبالى انا خلصت الشغل و سلمته لحد عندك
فيرا / يا سيدى هديك حساب شغل جديد انت بجد صعب جدا فى معاملتك
رشيد / انتى حلوه اه بس الفلوس احلى و لا مؤاخذه
فيرا / موافقه
رشيد / و تشوفيلى حته امان اقعد فيها اهل البلد لو شموا خبر انى بشتغل معاكى
فيرا / تعال اقعد معايا فى الفيلا
رشيد / معاكى معاكى
رشيد يغمزلها ترفع حاجبها
فيرا / رشيد
رشيد / ما يبقاش خلقك ضيق كدا بهزر معاكى
فيرا / هستناك فى العربيه خلص اكلك و هات حاجتك و حصلنى
رشيد / ماشي
فيرا تشد بطاطسايه محمره و تاكلها و تمشي و تقفل الباب وراها و رشيد متابعها و مبتسم
...................
فى اوضه هند
هند واقفه باصه من الشباك مختار يطلع من الحمام يقعد على السرير و يفتح الدرج و يطلع مرهم
مختار / هند ... هند
هند تبصله
مختار / ممكن تدهنيلى ضهرى
هند تهز راسها و تروح تقعد على ركبها وراه و تساعده يقلع التيشيرت ضهره ازرق تبصله بحزن و تاخد منه المرهم و تدهن بالراحه
هند / الرجاله متجمعين فى الجنينه تحت
مختار / بيتجموا عشان يشوفوا مين هيروح مع الكبير عزبه ابو فارس
هند / فين دى
مختار / بلد جنبنا كل الرجاله اللى اتهجموا على السرايا بيشتغلوا و عايشين فيها ناصر هيروح يتكلم مع ابو فارس كبيرهم
هند / مغاورى و الحج شاهين كمان تحت
مختار / وقت الجد بنركن خلافاتنا على جنب
هند / سمعت انه كان واقف بيتفرج عليك و انت بتنضرب
مختار يبتسم
هند / الممرضات فى المستشفي كانوا بيتكلموا بصوت عالى
مختار / ما كانش له حق يدخل
هند / مين اللى ضربكوا من ابو فارس برده
مختار / لا دا كان خواجه تبع فيرا
هند / الله يحرق فيرا على اللى جابوا فيرا هو احنا مش هنخلص بقي من الوليه دى
مختار / ههههههههههههههههه اعصابك
هند / بلا اعصابي بلا بتنجان بقي
هند تقوم من على السرير و تروح تفتح الدولاب
مختار / ضهرى يا بنتى
هند / خلصت اللبس
مختار / طب يعني باعتبار انى جوزك يعني ممكن من باب العلم بالشئ اخد فكره انتى سيبانى و بتلبسي و رايحه على فين
هند / هشوف حكايه ست زفته دى ايه
هند تروح تقف قدام المرايه تلبس الطرحه و هى فى منتهى الغضب مختار يقوم يحضنها من ضهرها
هند / انا مش طايقه روحى
مختار / اهدى
هند / ازاى و الحيوانه دى بتهدد اهلى
مختار / الحيوانه دى من يوم ما رجلها عتبت البلد دى و هى عماله تشيل طين و تحط على دماغها
هند / يا سلام و ايه اللى جابرها على كدا
مختار / غبائها و عندها
هند / كان ممكن نموت كلنا لو كانوا ضربوا علينا نار زى ما ضربوا على الرجاله
مختار / ما ضربوش ما تجرؤش
هند تلف و تبصله
هند / ليه ايه اللى هيمنعها
مختار / الرجاله اللى تحت دول كلهم متجمعين بس عشان اتهجموا عليكوا
هند / سماح اتصابت كان ممكن تموت انا كان ممكن اموت و كلنا
مختار / اهدى يا هند
هند / ازاى اهدى ازاى
مختار / ثقى فيا
هند تبصله و تروح تقعد على السرير و تعيط
مختار / لا انا و لا الرجاله اللى تحت هنسمح ان ده يتكرر تانى عرفنا نقط ضعفنا و هنصلحها
هند / ازاى بقي ان شاء الله
مختار / فى بكره شركه هتيجي تركب بوابه جديده اقوى و احسن هنعلى السور و نزود الغفر اللى حصل ده عمره ما هيتكرر تانى
هند تبص لمختار
مختار / انا مش واقف مع الرجاله عشان مش عاوز اسيبك لوحدك بعد اللى عشتيه بس لو عوزانى اخدك و ننزل نقف وسط الرجاله و تسمعى بودانك قد ايه اللى حصل امبارح ده خلى الرجاله تولع من جواها نار اللبسي طرحتك و هاخدك تسمعى
هند / انا مصدقاك بس خايفه
مختار / حقك تخافى بس اصبرى ادينا فرصه يوم و لا اتنين و شوفى الرجاله هتعمل ايه صدقيني يا هند لو كان امانك فى اى حته بره السرايا كنت وديتك بس ما فيش
هند / و انا ما كنتش هقدر ابعد عنك
مختار / يبقي تثقى فيا و تديني فرصه اثبتلك انى اقدر احميكي ممكن
هند / ممكن
مختار / شكرا لو سمحتى بقي كملى دهان عشان ضهرى واجعنى
هند تروح تجيب المرهم و مختار يقعد و هى تدهنله
مختار / بتبيع مخدرات تلغى الاحساس بينضربوا و ما يتالموش ياخدوا الرصاص فى جسمهم و ما يحسوش انا عملت كل اللى اقدر عليه عشان القرف ده ما يدخلش مصر و دخل مش عارف اعمل ايه
هند / بلغوا عنها
مختار / هههههههههههههههههههههه و ماله نبلغ بس ليها عنين جوه الحكومه جربنا مره و قولنا هنسلمها تلبس بس بنت الايه كشفت الملعوب فى اخر لحظه و من يومها صرفنا نظر عن سكه الحكومه دى
هند / بس دا مش دوركوا
مختار / بيتهيالى اللى حصل امبارح يخليه دورنا و لا ايه
هند / يخليه
مختار يبتسم و يمسك ايدها اللى سانده بيها على كتفه و يبوسها هند تبتسم و تكمل دهان
........................
فى الجنينه
ناصر / المساله مش مساله ديه المساله مساله
مغاورى / مساله شرف يا كبير و الديه فى الحاجات اللى زى دى ما لهاش قيمه
ناصر / معاك بس احنا عارفين ان ابو فارس مش هو اللى ورا الموضوع احنا تهمنا راس الحيه
شاهين / سهل تدفع عنهم الديه
شاكر / رجالتها زى ما شوفتوا يسدوا عين الشمس بس هى عوزانا نعض فى بعضينا فجرت مخزنكوا عشان تتهمونا و بعتت رجاله ابو فارس عشان نعض احنا فيهم
امين / بس ما فيش حاجه تبرر اللى عملوه يا عمى
شاكر / ما فيش و يمكن ابو فارس ما يعرفش حاجه عن اللى حصل
سليمان / كان جه و قال مش عمل من بنها الا حتى ما سالوا عن رجالتهم اللى عندنا
امين / و هم ليهم عين كمان يسالوا يا بويا و لا ايه دا لا عتقول حريم من عيال قال صعايده قال
ناصر / انا هروح لابو فارس لحد باب بيته و هلم كبرات البلاد اللى حوالينا و نتكلم على المكشوف و نشوف هيقول ايه
شاهين / و انا هاجى معاك
ناصر / على راسي يا حج
..........................
فى المضيفه
عبد الله موارب الباب و بيسمع عباده ممدد على الكنبه بيقلب فى التليفزيون
عبد الله / وطى الزفت ده شويه هى اللى انضربت بالنار دى مش تبقي اختك انت ازاى هادى كدا
عباده / فى فيلم الكيف كان بيقولك لازم ندوش الدوشه بدوشه ادوش من دوشتها عشان ما تدوشناش
عبد الله يروح يقعد
عبد الله / و المطلوب يعني
عباده / انا لو سبت نفسي للى جوايل هولع فى البلد باللى فيها و هو ده اللى هى عوزاه
عبد الله / يبقي نولع فيها هى
عباده / هيحصل لما نبقي جاهزين
عبد الله / انت مش عباده اللى أعرفه شكل الضرب اللى كلته لحس دماغك
عباده / و لا انت عبد الله اللى جيت البلد دى اول مره و لا اللى جه تانى مره كل ما تكبر بتعقل كل ما تمر بمواقف تفكيرك و نظرتك للامور بتتغير
عبد الله / عشان كدا كدبتوا عليا امبارح
عباده / لا كنت قادر تعمل حاجه و لا حد كان قادر يحوشك كنت عاوزنا نعملك ايه
عبد الله / ما تعملوش انا اللى هعمل
عبد الله يفتح الباب يلاقي مغاورى فى وشه عبد الله يرجع خطوه لورا
مغاورى / ما رضيتش امشي الا اما اجى و اطمن عليكوا
عبد الله / قال يعني ما كانش على هواك
مغاورى / لا ما كانش و اهدى على روحك انا مقدر اللى انت فيه بس انت كمان لازم ما تنساش نفسك
عباده / مش وقته يا مغاورى
مغاورى / معاك حق ... سلام
مغاورى يمشي و يقفل الباب وراه
عبد الله / جاى يشمت فينا ابن ال
عباده / بكيفه يعمل ما بداله بكيفه لولاه ما حدش عارف كان هيجرالنا ايه
عبد الله / تلاقيه هو اللى مخطط لكل ده عشان ينقذ الموقف و يبان بطل
عباده / هههههههههههههههههههه
عبد الله / انا بتكلم جد وقف يتفرج علينا و ما دافعش عننا عشان نروح المستشفي و الرجاله يتلخموا فينا فالسرايا تفضي على الحريم هيدخلوا يخطفوهم و يدخل هو ينقذهم و يعمل بطل
عباده / هو مش ذكى اوى للدرجادى
عبد الله / ما تستهونش بيه دا سوسه و انا عارفه
عباده / ههههههههههههههههه ما تقولهم يعلقولنا على شاى و لا يجيبولنا اى لقمه نعض فيها بدل القاعده دى
عبد الله يبص لعباده و يمشي و يقفل الباب وراه و عباده بيقلب فى القنوات
..........................
فى فيلا فيرا
عربيات كتير تدخل تقف قدام باب الفيلا واحده منهم تنزل منها فيرا و من الباب التانى ينزل رشيد و ياخد شنطه من شنطه العربيه و يدخل وراها الفيلا و هو بيبص يمين و شمال
فيرا / اهلا بيك فى منزلى المتواضع
رشيد / انتى عايشه فى الفيلا دى كلها لوحدك
فيرا / اكيد لا طبعا
ادواردو ينزل من فوق فيرا تجرى تبوسه من خده
فيرا / خلينى اعرفك خطيبى
رشيد يبصله من فوق لتحت
رشيد / و دا كانوا بيلعبوا فى وشه البخت و لا ايه
فيرا / اخص عليك كدا تجرح احساسي يا قاسى
رشيد يبتسم و يبص الناحيه التانيه
فيرا / انا خليتهم يجهزولك احسن جناح عندنا عشان تاخد راحتك
رشيد يبص حواليه رجاله كتير بدى بيلدينج و كلهم عينهم عليه يرمى الشنطه فى الارض
........................