البر التانى بقلم / لولو_محمد (كامله )

الحلقه ١١٢

((((((( البر التانى )))))))
#لولو_محمد
الحلقه ١١٢
رساله توصل لفيرا تبص فى الموبايل
////////
مامه هند و اختها معانا و احنا فى الطريق للفيلا
////////
فيرا تبتسم و تتنهد
فيرا / اخيرا حد فى البلد دى عمل حاجه صح و فلحت معاه انا فى حياتى ما شوفتش افشل من المصريين
رشيد / ما تجيبي رجاله من بلدك ما دام احنا مش عاجبين
فيرا / ليه و انا هبله اجازف برجالتى خليهم مصريين فى بعض يخلصوا على بعض خلى البلد تنضف
رشيد / خلاص ما تزعليش بقي اما اللى انتى عوزاه ما يتمش
فيرا / واضح فعلا ان ما عندكش اللى يزعل عليك
رشيد / و لا عندى اللى ازعل عليه فيا تقتليني يا تسبيني امشي عشان زهقت
فيرا / و ان ما سبتكش تمشي هتعمل ايه يعني
رشيد يقوم يقف و و يعدل هدومه و يروح ناحيه الباب الرجاله تقفل عليه الطريق يبص لفيرا تشاورلهم يوسعوا يبتسم و يحيها براسه و يمشي فيرا تروح تقف فى جنب و تنفخ و هى متعصبه
......................
فى الحضانه
ناصر يوقف العربيه و ينزل يطلع يجرى يخبط على الباب بنت من اللى شغالين تفتح الباب
البنت / اهلا يا كبير اتفضل اتفضل
ناصر / الحجه ام عبد الله موجوده
البنت / لسه نازله
ناصر / نزلت راحت فين
البنت / جت واحده قالتلها ان فى رجاله اتهجموا على السرايا عندكوا خدت ياسمينا و نزلت تجرى
ناصر / مين الست دى
البنت / والله اول مره اشوفها
ناصر يبص فى الارض و يهز راسه
ناصر / رجعى العيال دى لاهاليهم عيل عيل لحد باب بيته و تسلميه لابوه او امه و هسيب معاكى رجاله تساعدك و اقفلى المكان و روحى بيتك
البنت تهز راسها و تدخل تنادى العيال ناصر ينزل الشارع و هو متعصب
ناصر / ممدوح .. فرج
اتنين رجاله يجروا عليه
ناصر / خدوا عربياتكوا و اتنين كمان و وصلوا العيال دى لبيوتها و تسلموهم لاهاليهم و ما تسيبوش الحريم اللى فوق الا اما يرجعوا بيوتهم و تطمنوا عليهم
شاب / امرك يا كبير
ناصر / يلا اتحركوا
البنات تنزل من فوق و معاهم العيال ناصر و الرجاله يركبوهم العربيات و العربيات تطلع
ناصر / فتحى
راجل يدخل
ناصر / لم كل الرجاله و اقلبولى البلد عاليها واطيها لحد ما تلاقوا الست ام عبد الله و بنتها
فتحى يهز راسه و يجرى تليفون ناصر يرن يبص فيه و يرد
ناصر / ايوه يا فاتن ايه الاخبار عندكوا
فاتن / انا فى الطريق هناخد هند المستشفي
ناصر / مالها هند هى كمان
...................
على طريق بره البلد
شيرى بتبص من الشباك
شيري / هو احنا رايحين فين
الست / هندخل السرايا من ورا الطريق اللى تعرفيه مش امان
شيري / بس احنا كدا خارجين بره البلد
الست / هههههههههههههه ما شاء الله انتى لحقتى فى الفتره البسيطه دى تحفظى كل طرق البلد
شيري / لو سمحت وقف العربيه ... بقولك وقفى العربيه انا عاوزه ارجع لبنتى ... بقولك وقفى العربيه
الست تشد اجزاء مسدس و تلف لشيرى شيرى تشد ياسمينا لحضنها
الست / شاطره
الست تتعدل فى كرسيها
شيري / انتوا مين ؟ و بتعملوا معانا كدا ليه ؟ انا ما اعرفكوش ... طب خدونى انا و سيبوا البنت دى صغيره ما تعرفش حاجه
الست / يعني هتبقي مبسوطه لو فتحنا الباب و سبناها هنا لوحدها يعني
شيري تحضن ياسمينا اوى
الست / قولت كدا برده
شيرى الدموع تنزل من عنيها و العربيه ماشيه على الطريق
....................
فى المستشفي
فاطمه واقفه على باب اوضه العمليات بتعيط و تدعى انتصار تدخل فاطمه تشوفها تجرى عليها
فاطمه / ما خلتكيش مرتاحه ليه
انتصار / مش هرتاح الا اما اطمن على ولادى هى عامله ايه
فاطمه / لسه جوه
انتصار / هتبقي بخير هتقوم بالسلامه و تبقي بخير
فاطمه / شوفتى عباده و اللى جراله ... التلاته يا انتصار التلاته بالمنظر ده
انتصار / بيقولوا كانوا التلاته قدام راجل واحد
فاطمه / لو كانوا قالوا الكلام ده قبل اللى حصل النهرده ما كنتش صدقت دول زى بتوع الفيلم الاجنبى بتاع الزومبى دول بيمشوا و هم ميتين
انتصار / لا لا بتوع الفيلم كانوا بطاء و غيرهم دول حاجه تانيه
فاطمه / حاجه مرعبه اكتر حاجه ما نفهمهاش
انتصار / بس بيموتوا فى الاخر
فاطمه تبصلها
انتصار / طلقه فى الدماغ
فاطمه / مين دول و ازاى كدا و عاوزين مننا ايه
انتصار / ما اعرفش بس هنعرف نعدى بس اللى حصل ده و نرجع بيتنا و ان شاء الله كل حاجه تبقي تمام
فاطمه / ازاى ازاى هتبقي تمام ازاى
انتصار / ما اعرفش والله العظيم ما اعرف بس احنا مش قليلين يا ام عباده احنا مش قليلين هنقف جنب بعض و نتكلم و نفهم و نلم بعض و نقوى بعض و نكمل ياما دقت على الراس طبول يعني
فاطمه / المرادى غير ... المرادى انا خايفه ... المرادى الموضوع كبير اكبر مننا
انتصار / و ربك مفيش اكبر منه
فاطمه تمسك ايد انتصار انتصار تبصلها و تمسك فى ايدها
.....................
فى السرايا
ناصر يدخل بالعربيه الرجاله توسع ناصر ينزل من العربيه يجرى عليه واحد من الرجاله
الراجل / الحريم و الاطفال جوه السرايا و احنا نضفنا الجنينه دى و الورانيه و بعتنا للراجل يجي يصلح البوابه
ناصر/ الحجه ام عبد الله جت
الراجل / لا يا كبير ما جتش
مريم تفتح باب السرايا و تجرى تترمى فى حضن ابوها ياخدها فى جنب و هى بتعيط
ناصر / عدت يا مريم خلاص اهدى عدى
مريم / سماح يا بويا سماح فى المستشفي و هند و جابر
ناصر / هيبقوا بخير ما تخافيش كلهم بخير ان شاء الله اخبار الجماعه اللى جوه ايه
مريم / احنا كويسين .. بس ... بس خايفين
ناصر / رجاله البلد كلهم على الباب تخافى ازاى يا مريم
مريم تبص فى الارض
ناصر / انا اطمنت عليكوا هرجع المستشفي اطمن على اخواتك و الباقين و لما ارجع هنتكلم تانى
مريم / اجى معاك
ناصر / خليكي هنا ما تسيبهمش لوحدهم
ناصر يبص على مخزن السلاح يلاقيه مقفول
مريم / احنا اخدنا سلاح كتير جوه و الرجاله ركبوا قفل جديد
ناصر يهز راسه و يبوس راسها و يروح ناحيه راجل
ناصر / لو الحكومه جت
الراجل / جم يا كبير و ما لقيوش حاجه
ناصر / و البوابه المكسوره
الراجل / السواق كان شارب و دخل فيها بالغلط و الغفر ضربوا نار من خضتهم و ظبطنا كام راجل من عندنا لحد ما الحوار ينام
ناصر / و الرجاله اللى مسكتوهم
الراجل / الله لا يرحمهم بقي بس جبنا بطايقهم
الراجل يدى لناصر البطايق ناصر يبص فيها
الراجل / رجاله ابو فارس
ناصر / و احنا من امتى بينا و بين ابو فارس غير كل خير
الراجل / انت ما شوفتش اللى حصل يا كبير انت ما شوفتش اللى شوفناه
ناصر / سمعت سمعت ما تقلقوش مش عاوز حد يقلق انا ليا صرفه نفوق بس من اللى حصل و كل حاجه هتتظبط ان شاء الله
الراجل / و احنا وراك يا كبير اهل البلد كلهم وراك
ناصر يطبطب بايده على كتف الراجل و يبتسم
.........................
على الطريق
شيري حاضنه ياسمينا اوى عربيه مغاورى تعدى من جنبها بسرعه و تفرمل و تقف بجنب تسد الطريق عربيه شيرى تفرمل فجاه شيري تحضن ياسمينا اوى و هى حاطه راسها فى حضنها الراجل ينزل من العربيه مغاورى ينزل من العربيه و يضربه طلقه فى دماغه الست تنزل بسرعه و تشد الاجزاء مغاورى يضربها فى دماغها شيري بتتنفض و شايفه اللى بيحصل و حاضنه ياسمينا مغاورى يشد جثه الراجل الناحيه التانيه من العربيه و يروح من باب السواق
مغاورى / انتى كويسه يا امى
الست تبصله
مغاورى يفتح اللوك و يفتح الباب اللى ورا السواق
مغاورى / يلا نروح يا امى
شيري بصاله و حاضنه ياسمينا و بتتنفض
مغاورى / يلا يا امى .. انا هروحك ما تخافيش ... تعالى
شيري تهز راسها لا
مغاورى / ما تخافيش يا امى والله هروحك السرايا ما تخافيش تعالى يا امى
شيري تبصله و تسيب ياسمينا مغاورى يشيلها
مغاورى / ايه الجمال ده اللهم بارك تاكلى شيكولاته ؟ معايا شيكولاته فى العربيه
ياسمينا تبص لمامتها نزلت من العربيه مغاورى ياخدهم و يركبهم و يلف بيهم يرجع و بعدين يفرمل و ينزل
شيري / انت رايح فين
مغاورى يفتح التابلوه و يطلع شيكولاته و يديها لياسمينا
مغاورى / جاى حالا يا امى حالا ما تقلقيش
مغاورى ينزل يفتح شنطه العربيه و شيري متبعاه يروح يركب الجثث العربيه و يكب عليهم و على العربيه بنزين و يولع فيهم شيري تتعدل و تبص قدام و مغاورى يرجع يركب تليفونه يرن
مغاورى / لحقتهم لحقتهم ... حبيبي
مغاورى يقفل و يبص فى المرايه على شيري
مغاورى / انتى بخير يا امى
شيري تهز راسها
مغاورى / حقك علينا هنروح اهو
مغاورى يسوق و شيري بتبص لياسمينا بتاكل الشيكولاته ياسمينا تعزم على مامتها شيري تهز راسها لا
......................
فى المستشفي
ناصر يركن العربيه و يدخل يقابل شاهين يحضنوا بعض
ناصر / جميلكوا على راسي
شاهين / دا واجب علينا لو كان جرالهم حاجه كنا هنرفع عينا و نبص فى عيون الناس ازاى
ناصر يهز راسه
شاهين / ادوا لهند حقنه مهدئه و نايمه و ام عمر معاها و جابر طلعوله الطلقه من رجله و بخير الحمد لله بس سماح لسه فى العمليات
ناصر / طولت قوى ليه كدا
شاهين / ما اعرفش بس ان شاء الله خير
ناصر / هستاذنك اطمن عليهم
شاهين / اتفضل اتفضل
....................
فى اوضه عباده
ناصر يفتح الباب يلاقي عبد الله ممدد على السرير و سرير عباده و مختار فاضين
ناصر / حمد الله على السلامه
عبد الله / الله يسلمك
ناصر / امال الجماعه فين
باب الحمام يتفتح و عباده يطلع و هو بيتسند ناصر يروح يسنده
عباده / ازيك يا كبير
ناصر/ بخير طول ما انتوا بخير ... امال مختار فين
عباده / بيطمن على جابر
عباده يغمز لناصر على عبد الله ناصر يبص على عبد الله
ناصر / هم لحقوا يقولوله ما شاء الله الكلام فى البلد دى اسرع من الضوء
عبد الله / هو بخير يا كبير
ناصر / بخير بخير المهم انتوا بخير ؟
عبد الله / مريم عرفت انى انضربت ؟
ناصر / لسه بس ما فيش حاجه فى البلد دى بتستخبى مسيرها تعرف
عباده / ههههه من ساعه ما فاق و هو ما لوش سيره غيره شكلى ايه قدام مريم بعد اللى حصل
ناصر / ههههههههههههههه هروح اطمن على جابر و ارجعلكوا
ناصر يجي يمشي عباده يمسك ايده و يبصله
ناصر / مش عاوز حد فيكوا يكون ناقصه حاجه عاوز كل حاجه تبقي تمام و بخير
عباده يسيبه و يمدد فى السرير
عبد الله / تسلم يا كبير
ناصر يبص لعباده و يطلع بره
...................
فى اوضه هند
هند نايمه و فاتن قاعده الباب يتفتح مختار يدخل و هو بيزك فاتن تجرى تسنده
فاتن / عمى بالراحه بالراحه
مختار يبص على هند
فاتن / كويسه والله العظيم بخير و كويسه هم اللى منيمنها ادوها دوا ينيمها الدكتور اكدلى
مختار يروح يقعد جنبها
فاتن / عباده و عبد الله عاملين ايه انا لسه عارفه باللى حصل بس قالولى اخليني جنبها ما اسبهاش لوحدها
مختار / تسلمى يا فاتن تعبناكى و انتى حامل
فاتن / تعبكوا راحه يا عمى ... قالولك على اللى حصل فى السرايا
مختار / قالولى
فاتن / هند ضربت نار و كانت بتوقعهم زى الدبان كانت واقفه بمليون راجل
مختار يبص على هند
فاتن / بس ما استحملتش يا كبدى اول ما الدنيا هديت و بدات تستوعب اللى حصل طبت فى الارض و لما فوقوها قعدت تصرخ و ما حدش كان فاهملها حاجه ادوها مهدئ و نيموها
مختار يهز راسه و يطلع ينام جنبها فى السرير
فاتن / اطلع بره ؟
مختار / تطلعى بره فين يا فاتن انا بس مش قادر اقعد هفرد ضهرى و انتى كمان حامل افردى ضهرك و ارتاحى كفايا عليكي اللى شوفتيه
فاتن / انا ممكن اروح
مختار / ارتاحى يا فاتن و ما تروحيش فى حته خلينا نروح على خير نامى نامى
فاتن تروح تعدل الغطا عليهم و تروح تقعد على الكنبه
...........................
على الطريق
عربيه فيرا معديه تشوف زحمه
فيرا / ستوب ( اقف )
الراجل يركن
فيرا / جو سى وات هابند ( روح شوف فى ايه )
الراجل ينزل من العربيه و يعدى وسط الزحمه يشوف العربيه متفحمه
...........................
قدام المستشفي
مغاورى يركن العربيه
شيري / انت جايبني هنا ليه ؟
مغاورى / العيله كلها هنا هتروحى السرايا تعملى ايه
شيري / هروح لبنتي
مغاورى / اقسم بالله يا امى هند و عبد الله جوه
شيري / قول بالله حد فيهم جراله حاجه
مغاورى / كويسين يا امى و لما هتشوفيهم هتطمنى عليهم بس يستحسن انك ما تقوليش لحد فيهم على اللى حصل دلوقت عدت على خير و ان شاء الله لما الامور تهدى احكيلهم زى ما تحبى
مغاورى ينزل من العربيه و يفتح لشيري الباب بتبصله باستغراب امين يدخل
امين / حمد الله على السلامه يا ست الكل
شيري / امين .. ايه اللى حصل ؟ انا مش فاهمه حاجه
امين / اجبلك عصير يا ياسو
ياسمينا تنزل لامين جرى يمسك ايدها
امين / الحمد لله يا ست الكل عدت على خير تعالى معايا تطمنى بنفسك على هند و عبد الله الكل جوه
شيري تنزل بسرعه و تدخل المستشفي و امين يبص لمغاورى و يبتسم و يهز راسه يحيه مغاورى يهز راسه امين يشيل ياسمينا و يجرى ورا شيري
..........................
فى سرايا الجوارحه
كوثر / انتوا بجد هتروحوا
ام مغاورى / زياره المريض واجب يا ام عباس
كوثر / بعد كل اللى عملوه
ام مغاورى / و هم عملوا ايه؟ حرقوا المخزن ؟ ربنا وحده اللى يعلم مين اللى عملها بس سماح انضربت بالنار و لازم نطمن عليها فى الاول و الاخر اتربت وسط عيالنا
كوثر / بس الدنيا دلوقت مش امان و الرجاله
ام مغاورى / البلد كلها على رجل ما حدش هيستجرى يعمل حاجه
خديجه تدخل
خديجه / انا جاهزه ياما
ام مغاورى / هتيجي يا كوثر
كوثر / لا
ام مغاورى تهز راسها و تمشي و خديجه و تلاته كمان وراها
.......................
فى اوضه عبد الله
امين يفتح الباب و شيري تدخل عباده و عبد الله يتعدلوا
امين / هاخد ياسمينا اجبلها حاجه تاكلها تمام ؟
شيري / خد بالك منها
امين / فى عيني يا امى
امين يشيل ياسمينا و يمشوا و شيري تبصلهم يبتسموا
شيري / هو فى ايه ؟ انا مش فاهمه حاجه
عباده / اهدى يا امى احنا بخير شويه كدمات بسيطه من اللعب و مخلينا بس تحت الملاحظه لكن احنا بخير الحمد لله
شيري تبص لعبد الله يبتسم
شيري / و هند فين
عبد الله / و ايه هيجيب هند هنا يعني ؟ و انا اللى كنت فاكرك جايه تطمنى عليا
عباده / هند مع جوزها فى اوضه لوحدهم
عبد الله / اوضه مين ؟
عباده / يا عم انت تايه و لا ايه انت مش واخد بالك ان مختار مش هنا بقاله ياما ادوله اوضه لوحده عشان هند تقعد معاه
عبد الله / شوف الواطيه راحت تطمن على جوزها و ما سالتش فى اخوها
شيري تسيب الاوضه و تطلع بره و هى بتعيط
عبد الله / هو فى ايه ؟
عبد الله يقوم
عباده / مش سهل تشوفك متكسعم كدا يعني
عبد الله / لا يا عم امى فيها حاجه
عبد الله يطلع بره و هو بيسند يلاقي شيري واقفه مع ناصر و بتعيط
شيري / انا مش هطمن الا اما اشوف بنتى
ناصر يبص لعبد الله
ناصر / انت ايه اللى طلعك انت كمان ؟
عبد الله / انا كويس .. هو فى ايه ؟
ناصر / مفيش حاجه يا عبد الله ادخل
شيري / طب قولى رقم الاوضه و انا اروحلها
ناصر / هوديكي يا ست الكل والله حالا عبد الله بس يرتاح و هوديكي دا هى فى الدور اللى فوق مش بعيد يعني ... ادخل ارتاح يا عبد الله
عبد الله / انتى بتعيطي ليه يا ماما هى هند فيها حاجه
شيري / ما اعرفش لما اشوفها هعرف
عبد الله / هى هند فيها حاجه يا كبير
انتصار تدخل تحضن شيري و تبوسها
انتصار / حمد الله على السلامه يا اختى
شيري / وديني لهند يا ام فاتن ابوس ايدك طمنيني عليها
انتصار / انا لسه نازله من عندهم نايمه و زى الفل و هاخدك اطمنك عليها تعالى
عبد الله / انا جاى معاكوا
عباده يطلع من الاوضه
ناصر / تدخل ارتاح يا عبد الله
عبد الله / انا كويس الحمد لله ما تقلقش عليا تعالى يا امى
عبد الله و شيري و انتصار يمشوا لحد الاسانسير
عباده / انا كدا خلصت دورى انا كمان وديني بقي لسماح اطمن عليها
ناصر يهز راسه و يسند عباده
عباده / انا كويس يا كبير وديني بس لاختى
ناصر يمشي و عباده ماشي جنبه بيسند على الحيطه
.....................
فى اوضه هند
هند نايمه و مختار نايم جنبها الباب يتفتح فاتن تتعدل هى و مختار شيري تدخل و وراها عبد الله
عبد الله / هى مالها فى ايه
مختار / ادوها مهدئ و نامت ما استحملتش اللى حصل
عبد الله يبص عليها نايمه
عبد الله / احنا مش كنا اتفقنا ان ما حدش هيقولها ايه اللى جد بس
شيري تبص لمختار
مختار / انتى كويسه يا امى
شيري تبص لعبد الله و ترجع تبص لمختار و تهز راسها
فاتن / تعالى يا امى ارتاحى شكلك تعبانه
مختار / امال ياسمينا فين
عبد الله / مع امين
مختار يهز راسه و يقعد على كرسي
انتصار / انت يا ابنى هتفضل واقف كدا انت مش المفروض ترتاح
عبد الله / انا كويس يا امى الحمد لله بقيت كويس
انتصار / انا هروح ابص على عباده و ارجعلكوا اجبلكوا حاجه
شيري / تسلمي يا اختى
انتصار / تعالى معايا يا فاتن
فاتن تقوم و تمشي مع انتصار و اول ما تطلع من الاوضه
مختار / هقولها تجبلى موبايلي
مختار يطلع وراهم
مختار / ام فاتن
انتصار تبص وراها مختار يقفل الباب
مختار / سماح عامله ايه
انتصار / فاقت و بقت زى الفل الحمد لله بس هتفضل هنا لحد بكره
مختار يهز راسه
إنتصار/ خلى بالك من ام عبد الله ما جتش هنا بالساهل
مختار يبصلها باستغراب
انتصار / مغاورى الله يستره لحقها قبل ما يخطفوها هى و البت الصغيره
مختار عنيه توسع
انتصار / اخوك كان قالب عليهم البلد لحد ما مغاورى كلمه و طمنه و جابها على المستشفي هنا
مختار يهز راسه و يبص على باب الاوضه و يفتح و يدخل و يقفل الباب
فاتن / هو اللى بيحصل ده بجد ياما
انتصار / والله يا فاتن انا لحد دلوقت ما مصدقه بس هنعمل ايه ربك كبير تعالى اما نطمن على سماح
فاتن تهز راسها و يمشوا
.......................