كرونيك💕 #العشق_الأسود💕

06

حلقة 6
صبح الصباح ... لبس و مشى لدار انسابو باش يجيب مهرة ... دخل لقى الدار كنها قبر ... فارغة باردة ... وقف ينادي في صحن الدار ...
_ مهرة ....مهرة ... ( ما جاوبو حد ..)
دخل للبيت لقاها قاعدة متكمشة على روحها ... حاطة لكيت  في وذنيها  ... دموعها على خدها ... الشهقة تهز فيها و تنفض ... و الاوراق دايرة بيها من كل شيرة .. لابسة شورط فضح رجليها الي كيف رجلين الغزال ... منحوتين ما فيهمش غلطة ... بقى يتفرج دايخ ...مش فاهم روحو ... كنو اول مرة يشوف مرا ... وهو الي تعدى على ايديه منهم لانواع كل ... طلعت راسها شفاتو متمسمر قدامها ... تفجعت جبدت الملحفة غطت بيها رجليها ...
_ اش تعمل هنا يا حيوان ... اخرج البرة ... اخرررررج ... ( ولت تصيح على قوة جهدها )
يا عبد سميييييع. ... يا عبد سمييييع ( يخدم عندهم )...
_(تلفت سكر الباب ووقف بجنب سرير ... )... جيت باش نروح بيك لدارك ...قوم بدل دبشك ...( شاد روحو بسيف باش اعصابو تبقى هادية )
_ اما دار و اما عرس ...الي عمل ها صفقة المسخة في الحبس تو ...لكن انا من غدوة باش نرفع فيك قضية طلاق لضرر ...باش نخرجك من حياتي بنفس السرعة لدخلتلها ...( واقفة قدامو مادة صبعها في وجهو )..
_ اوك باهي يلا بدل دبشك باش نروحو ... ( هدوء صوتو جننها ... خلاها تخرج من صوابها )...
_ بح وفى ...تمثيلية وفات و منظرك ولى بايخ ... بر روح ايهم و ربي يسمعنا على بعضنا علم الخير ... منعرش علاش ملي  دخلت علينا و مشاكل هابطة ترخ علينا ...   لكن تأكد منيش باش نسكتلك و توا اخرج عليااا يلا  ...
مزالت تحكي ..رماها فوق كتفو قلش عليه هاز شكارة سكر ... و خرج ... سمعت امها صياح ... حاولت تقوم منجمتش ...جاء عبد السميع باش يفكها ...اعطاه ايهم برجلو ضربة خلاه ممدود ... بقت تعض و تضرب فيه ...ايديها وجعتها و هو محسش
ايهم رفن مهرة  لتالي سكر عليها  و تعدى ... بقت تصيح و تضرب لين تعبت ... وصلو حللها الباب ...خرجها ...شدها من شعرها ووقفها قدام دار ...
_ شفتي دار هاذي ...مكش باش تخرج منها كان مهزوزة على الاكتاف... اذا تحب تخرج من هنا اقتل روحك ... هاك شد ( حطلها المسدس في ايدها و كبس عليه ) ... ماك لبة ... و الموت خيرلك من هنا ...يلا اقتل روحك ...
_( حست روحها محبوسة ...حست جناحاتها مقصوصة ...هزت المسدس من ايدو...ايدها ترعش... ساخفة على روحها  ...دارتلو و دموعها تحكي وجيعتها)... اش رايك كان نقتلك ...كيما قتلتني ... اش رايك تره ...وقتها نخرج من هنا ولا زعما ... قول على لقليلة نقص واحد من شواطن  ... ( ترعش بكلها ...لمت شجاعتها ووقفة مصوبة الفرد عليه)
_ اقتل ما عندي حتى مشكلة ...اما نعرفك خوافة ... متنجميش ... ايديك نظاف ...مكش مجرمة ...هههههه يلا جرب تره  ... اضرب ...ارتاح تحرر عيش... امشي  للي تحبو و عرس و جيب ملايكة صغار كيفك ههههه ... ( حل ايديه و مقدملها صدرو )
_ ااااااه يا ربي  ... انت شيطان ...انت ابليس في ذاتو ...لازم نقتلك و نفك سلسلتك من على رقبتي ...  لازم نرتاح منك ...موووت ايهم ..مووووووت  ( غمضت عينيها و ضربت نار ...لكن مقرون كان فارغ  )
_ ( تفاجأ من جرأتها لكن كان اذكى منها و خذا احتياطو ..كان حب يعرف اخرها وين ينجم يوصل  )مبروووك عليك ...وليتي منا و فينا ...بدا قلبك يسواد و تولي كيفنا ... مرحبة بيك في عالم الشياطين .... هههههههه ( اعطاها  بظهرو و دخل يضحك)
_ انت شكون؟؟ ... اش عملت فيا؟؟ ( ولت تصيح عليه على قوة جهدها )...مسختني ...وليت كيفك مجرمة ... طول عمري نخاف لا نعفس نملة اليوم واقفة و شادة فرد ...( رمت الفرد من ايدها )...يا ربي اش عملت تحتك باش نتعاقب هكة ... حياتك سودة و الي يقرب منك يتحرق ... انت مستنقع مسخ و الي يلمسك يولي كيفك...
_ ( دارلها نظراتو اقرب منها للثلج في برودها لكنو من داخل كان كيف الجمرة )...اذا كملت المحاضرة متاعك اطلع لبيتك ....
جوابو البارد خلاها تهاوى .. تنوح على سعدها ... تبكي بحرقة ووجيعة ما توفاش ... وين ما تتلفت تشوف ظلام ... تشوف حرقة ...و برشا دموع ...  
لبنات الله يخليكم اكتبو  في ريبوندر فسخو لكومنت فما  ناس مش منجمة تقرى