كرونيك💕 #العشق_الأسود💕

19

الحلقة 19
مهرة هزت الكرهبة و جت خارجة جاها رجب كيف شوكة كيف العادة ... حست روحها ملخلخة ومش قد بعضها ... اما تقوت على روحها حلت الباب وطلت عليه ...
_ بلاهي انت باش تبقى ديمة في جرتي ... اركب اي ماشيين لايهم ...( رفنت الباب و ستناتو يركب )
كانت تسوق عادي شوي حست روحها سخونه ...عرقها يصب قلش عليها تجري ... تتنفس بسيف ... شوي شوي حتى من ايديها ترخفت ... ولت تسوق بسيف ... راكت الكرهبة و اعطت لرجب يسوق ... حطت مرفقها على شباك و تكت تجبد في نفس ... مدلها رجب كعبة شكلاطة ...تبسمتلو هزتها من ايدو ... وصلو ... دخلت لايهم ...منظرو وهو يخدم بعيد برشا على ايهم الي تعرفو ... ترمت فوق الكرسي اول ما شافها  دايخة  نقز جاء قدامها ..
_ مهرة اش تعمل هنا و شبيك هكة دايخة و وجهك اصفر ...( مش مصدق روحو لكن هو بلحق تفجع عليها )
_ كاس ماء امان يا ايهم حسة روحي بحال سفيت الملح ... ( بقت تمروح على روحها مشي يجري حللها المكيف و صبلها كاس ماء )...ظاهرلي طاحلي لحديد ...
_ بطبيعة يطيحلك حتى الكنتول انت ... عايشة على طرف لهوى الي تتنفس فيه ... ( واقف حاط ايديه في حزامو و يشوفلها )...ياخي وين عقلك ناوية تقتل روحك بجوع و لا شنية ...
_ براااا عاد ما صدقت ربي انت تو ... سيبنا تو شوي و نتفرهد .. نسيتني حتى علاش جيتك ...اوووف ...( هزت من عندو المنشفة  تمسح  في عرقها  )
_ مشاء الله كان لسانك ديمة زوز ميطرو ...ايا قوم امشي ....تحرك يلا ( لبس الفاست و دارلها )
_ و انا نقول شنوة الي ناقص ...أوامرك ... وين على خير ...
وصلو لمطعم صغير محلاه ... جبد كرسي و قلها بعينيه اقعدي ... خرج شايب بطبوط محلاه ...يعرج في مشيتو ... لحيتو بيضة ...ضحكتو على وجهو حباتو اول ما شفاتو ...
_ يا هراب ...جباتك رجليك تو ... عارف ريحة الكبدة جباتك ...( اول ما سمع ايهم صوتو قام حملو )
_ اي والله جابتنا ريحة لبنينه ... و انت عارفني منجمش نغيب عليك يا راجل يا طيب ...( لكز مهرة بمرفقو باش تقوم تسلم ) هاذي مرتي مهرة ...
_ ايييه عشنا و شفناك معرس ... عييت من كلمة صاحبتي ...اخيرا سمعنا كلمة مرتي ...( شاف لمهرة و ضحكلها )..الي قدامك هاذا يا بنيتي كل يوم بقطعة جديدة ( قحرت مهرة لأيهم  سرط ريقو )
_ يا لعرج ظاهر فيك خرفت وليت تهز و تنفض ...يهديك هدي لعب و برا جبلنا ناكلو ...شكلنا طرف مشوي و كبدة على كيفك ( تلفت لمهرة يلقاها مزالت تقحرلو ) الله.. الله ...كولني بعينيك خير انت زادة ... شعرة و نصدق الي انت هماتك لحكاية و غرت عليا ...
_ ( ضحكت على شق )... غرت عليك ههههه خيالك واسع برشا ...ههههه اما استغربت انو غسيلك لمسخ الناس كل عرفاته ...
هز شرب رشفة ماء لوح لينات و طفاها ... شوية و الطاولة تعمرت ...
(زاد جاء لعرج هاز زوز اصحان ...) هاذي عجة بلمخ ما نود بيها كان الغاليين ... ( حطهم و مشى )
_ ( ايهم شاف لمهرة  فهمت قصدو ) ...  يمشيش في بالك باش نقلك كول صحني ... انسى ... نموت عليها انا العجة بلمخ ...
رقصتلو حواجبها تغزل فيه شوي مدلها صحنو  و بقى يضحك عليها ...
علاقة غريبة تجمعهم ... كيف علاقة نهار و ليل ..عمرهم ما يتحدو ...لكن مترابطين بطريقة عجيبة ..لا يطلع النهار من غير ليل و لا يهبط ظلام من غير ضو  النهار ...

وقفو في الباب يسلمو على الاعرج ... بطريقة ما كانت اول مرة تشوف فيها ايهم مرتاح و يتكلم بتلقائية ...اول مرة تشوف عينيه  صافية  ... اول مرة تكتشف تجاعيد الي بجنب عينو كيف يضحك ...
_ رد بالك عليه يا بنتي ...صعيب تلقى واحد في معدنو ايامنا هاذي ...ما يغركش ها سحابة الي عاملها روحو ... ربي يهنيكم ( حضن مهرة و باسها من جبينها )
_ الله يسامحك ضيعتنا هيبتنا ... اي نروحو يا للة ( سبقها بقت تشوفلو  فرحانه بلوجه جديد الي اكتشفاتو فيه  )
_ ( تلفتلها يقحرلها  )... شوف اسمع لكلام كيما عملت اليوم و انا مستعد نرجعلك تلفونك ...نخليك تخرجي وقت ما تحبي ... المهم ما تعمليش لخنن ..اش قلتي ؟؟
_نسمع لكلام و نريض و تخليني نرجع نخدم من غير رجب ..( لحقاتو تنقز )
_ قتلك تخرج مش تخدم  مع رجب ( دخل للكرهبة )
_ تربطني بسلسلة و تناديلي بوبي خير  ( معوجة وجها مش عاجبها لكلام )
_ و الله فكرة حتى اسم بوبي مواتيك خير ..( دور الكرهبة حط جورج وسوف و تعدى )