كرونيك💕 #العشق_الأسود💕

65

الحلقة 65
ايهم كان مركز مع كل تفصيلة فيها ...كأنه وقع في حبها من جديد ... هزت عينها لمدمعة دقت على بواب قلبو من جديد ...بقى يتخيل فيها كرشها قدامها ... تمشي شادة فيه ...وتدلل ... حتى تفكير في لحكاية وجعلو روحو...
لمح الكرهبة ...حس بحركتها  ... شد ايدها ...كبشت فيه ...دارت جت في حضنو ... طار شابو الي كانت لبساتو و تمايلت روبتها ..  و غرق كل شي في حضن ايهم ... بقت باهته في روحها كفاش هربت منو ليه ... عمرك تخاف من حد تتخبى في حضنو ...حط ايدو على شعرها تحرق ...الظفاير الي يعشق ريحتهم  و تموجهم  مفماش ... قصت شعرها كوب قارسون ...كنها تقلو حتى شعري معادش ينتميلك ...معادش متاعك... بعدت عليه ...
_ ايهم استسلم ... انا وياك منجتمعوش ... انت نار ...(تشوفلو تحاول تأثر فيه)
_( قص عليها )و انت الماء الي يطفيني ...
_ ايهم قربك يحرق فيا ... يقطع في عروقي ... انا تعبت انت متعبتش... و آخر ها الحرب شنوة ... نبقى  نكوي فيك تكوي فيا لين ننهو بعضنا ... و ها لملايكة شكون بيها ... ايهم بلحق لحكاية معادش انت و انا فمة روح في نص... خليني نمشي ...امااانك ...
_ امشي مهرة و اسكت ...( جبدها للكرهبة)
وصلو لدار تتفرج كل ميترو حاط فيه راجل... شبابك عليها فار فورجي ...بلوغة اخرى مستحيل تهرب وفر على روحك المحاولة ...حلت باب بيتهم تصدمت ...تلفتت تشوفلو جبد الباب سكرو ...
_ بيتك اللوطة ... برشا عليك دروج ... اي حاجة تستحقها قول لرجب ...( خلاها و خرج )
ترمت على سرير ... حتي بيتهم  ريحتها محروقة كيف ارواحهم ...فيها حاجة تحبها تستسلم و تحاول تبني علاقتها معاه مرة اخرى ... و حاجة اخرى حاسة بظلم ... حاسة بلخذلان و مش منجمة تنسى ...عايشة صراع كبير ... ضايعة بين قلبها و عقلها ...
تتمنى يحل الباب يقلها مهرة احكيلي ... سمعني همك ... علاش انت جيت لها دار بنية خايبة ...اشكيلي و تو نسمع...تمنت يمسح دموعها و يحط راسها على كتفو و يقلها لوح و انا نهز  ...بقت تشوف للباب بالك يدخل ...عارفة روحها غلطت ...لكن لو منسامحوش و نغفرو كيفاش نحبو ...
ايهم كان واقف البرة ...حاط ايدو على الباب متمسمر ... على الاقل مهرة قدام عينو ..يشم في ريحتها في دار ...توحشها برشة ...تعب من مراقبتها من بعيد ...تخنق في بعدها ... قلبو نزف دم عليها ... حبها علمو سكات ...علمو يلوج عليها و هي قدامو ...مستعد يفديها بروحو المهم تعطيه فرصة خاطر عارف عمق جرح الي في قلبها ... عارف كبريائها و عزت نفسها ... عارف انو مينجمش ها دنيا من غيرها ... عارف ها المحرقة الي في قلبو متطفاش من غير حبها و ها لوجيعة معندهاش دوا كان ريحتها ... عارف انو حرمانها من بنتها غلطة لكن قال لروحو بالك يرتب روحو و يستعد لوداع اخير الفترة هاذي و يعمل بنتو حجة باش يخليها جنبو اطول وقت ممكن ...
منجمش يشد روحو دخل ...وقف بقى يشوفلها ...عينيه فيها برشا كلام ...لكنو بقى ساكت ...طلعت تشوفلو شفايفها خايفة تفضح الي مخبي في قلبها ... خرج هارب منها او بالاحرى من روحو ..خلاها تغفس في دموعها 
عشقهم عشق مؤلم ...عشق اسود ...عشق الظلام لنور ...عشق كل ما تشتد وجيعتو كل ما يقوى و يكبر ... كيف الخزف ...كل ما يتحرق كل ما يتماسك اكثر و اكثر ...