كرونيك💕 #العشق_الأسود💕

20

الحلقة 20
وقف ايهم يحظر في فليجتو عندو طيارة صباح باش يغيب جمعتين  ... مهرة وقفت وراه تنقز بلفرحة ...قريب تتحزم و ترقص ...ماهيش مصدقة باش  ترتاح من وجه ايهم جمعتين كاملين ... دارلها  ...
_عارفك باش طير من الفرحة ... اما متخافش النفس الزايد الي تخذيه يوصلي ..يعني  ردبالك  تعمل فيها الي تحب ...قيد عندك ممنوع تشوف الخنثى متاعك ... ممنوع تمشي للهاملة صاحبتك ...ممنوع  تخرجي من غير رجب ... ( واقف قدامها يعد على اصباعها... هي كانت قدامو دايخة فيه و في غزرت عينيه )... ممنوع تهملي ماكلتك ... ممنوع تروح بعد المغرب اوك ...( طلع راسو لقاها دايخة فيه )
_ لا مش اوكي ... خاطرني مش الكلب متاعك انا ... تو انت سافا في مخك ... ( قامت تصيح )...نقلك حاجة طبقني و حطني في فليجتك خير ... ( كابسة على شفتها من غزول)
_ قتلك ماعادش تعلي صوتك ... و جرب حظك يكلمني رجب و يقلي انك خالفت اوامري ... خلي نقصلك راسك فهمت و لا ...( رجع للفليجة يكمل فيها )
خرجت و رفنت الباب وراها ... دخلت للكوجينه تفتش على بنادول راسها وجعها من صباح ... لقت زينب قاعدة تغسل في ماعون ..
_ زينب عيشك كيف تكمل الي فيدك جيبلي قهيوة للبيت راسي في حالة ...
خرجت تتمشى البرة لقت سرور و سماح حاطين مسلسل ... دخلت تربعت بجنبهم ...
_ اووو يا لبنات قداش محلاه ها المسلسل و هند صبري و ظافر العابدين ...يا ميمتي على ظافر ...اااااه يقتل ... شفتو هاك ضحكة ...مقوى سعد مرتو ...
_ ( دارتلها سرور ) كان يسمعك اييييهم ... أَأهْ...مش يكور بيك يذبحك من غير قبلة يا سخطة ...
_ يا بنتي اش مجبدك فيه سي خراا...خلينا نكحلو عينينا بها البقلاوة ...زعمة امو ماجبتش منو كعبة اخرى ...يخلي بقعو قداش الي يلبسو يواتيه( تترشف في القهوة الي مدتهالها زينب )
_ تشرب في قهوة تو ... باش تسهرك يا بنتي ...( بقت سماح تشوفلها مستغربة )
_ تهني وخيتك بلاعة متع قهوة كان نشرب طنجرة نطيح لنوم ...اما بصراحة قهوة زينوبة عالمية نشربها نحس روحي توقظت ..
رجعت تتفرج على المسلسل و ريقتها سايلة على ظافر ... حد ما شاف ايهم كان متعدي للبيرو يجيب اوراق تابعة الخدمة سمع ضحكهم وقف يسمع تشمت في مهرة بقى يعوج في فمو و يقلد فيها مغزل ...هز روحو للكوجينه و هوب قص عليهم ضو ... ورجع للبيت من غير ما يحسو بيه ...
دخلت ضاوية بتلفونها لقاتو متكي موش في دنيا ...
_ شبيه ضو قص ايهم ... زعما يبطى باش يرجع ( تشوفلو براءة )...نحب نكمل المسلسل زح...
_ علاه قالولك نخدم مع ستاڨ و لا كنت بوتو متع ضو قبل ... اش عرفني في امو ...يرجع و لا ...( رجع يبربش في تلفونو )
_ تو تنجمش تجاوب كيف ناس لازم تعطيني محاضرة مع كل كلمه ننطقها ... ملا حال ...حتى انا قداش  حرفة خليت ظافر  و جيت قابلت المنظر هاذا اللطف يا ربي ...
طاح تلفون من ايدها و طفى ...ظلامت البيت هبطت تلوج عليه تدعثرت في الفليجة طاحت ... ايهم كيف سمع لطخة وقف تدعثر هو زادة ... بقو يتفرجو في بعضهم ...ضو القمرة انعكس على وجها الي تورد من الحشمة  كانت تحتو ضمة ايديها على صدرها عينيها مغمضة ... تتنفس بسرعة...قلبها دقاتو مسموعة  ...  وجهو قريب لدرجة انو  نفسها سخون في وجهو ... متركز على  ايديه باش ما يجيش فوقها ... عينيه مركز في كل تفصيلة فيها ... نظراتو ما تكون كان نظرات عاشق و خوفها ما يكون كان رغبة عاشقة ...كنهم طيرين فوق السحاب ... كنو كل شي في حياتهم تلغى ...مشاعر الكره و الرغبة في الانتقام كل تبخرت ما بقى في قلوبهم كان حاجة طاهرة نقيه اسمها
" العشق  "
ريحتها سيطرت على حواسو كل ... كنو مهرة تحولت  الشيخة و لا كمية و هو مدمن ... اول مرة يحس بمرا لدرجة الضياع ...اول مرة ينهزم قدام غريزتو كراجل و يفقد زمام امورو ...شفايفو هبطت تذوق في بشرتها الي ياما اغراتو ...باس جبينها ... عينها و بسلاسة لقى روحو جنب فمها ...اول ما حط شفايفو على شفايفها ..بدنو تحول لنار مقدية ...لب عليه العرق و تقطع عليه نفس ...فجأة رجع ضو ... بعد عليها بربثة ...يسرط في ريقو مش فاهم الي صايرلو ... كأنو رجع مراهق ...اول مرة يقرب لطفلة ... خرج لجنينه خلاها ملوحة على بلاصتها ... تغزر لسقف ...حاطة ايديها على شفايفها ... هبطت دمعة من عينها  و حست  قلبها تعصر من داخل ...