كرونيك💕 #العشق_الأسود💕

28

الحلقة 28
_(شفاتو خارج  مشتلو تجري .. كانت ترعش اقرب منها ميته للحية ريقتها سايلة و خشمها زادة ) ايهم ..اعطيني ...نعرف عندك اعطيني ...شوية برك امان ... باش نجن ...راسي منمل يوجع فيا ... راسي ... شمه وحدة ... نبوس ايديك ( وطت على ايدو جبدها )
_( كان ضعيف برشا ...اول مرة يحس روحو عاجز بعد حادث اهلو  ) مهرة لازمك تتخلص من ها سم الي في بدنك ... ارجع جبل ما يهزو ريح كيف قبل ... مفماش سم هاري لازمك تتخلص منو لازم ترتاح  ( سكر في وجها لباب بعين مكسورة و قلب مفتفت )
_ لاااا امان حل ....امااااااان حل حل .... ايهم ... باش نموووووت ... ااااااااه  راسي ...( تضرب في راسها في الباب )
بقت تعيط  و تضرب في راسها ...تكى على الباب يسمع في بكاها و صوتها المخنوق  .... كل دمعة منها كان يغطس و يطلع في لوجيعة ...منجمش يستحمل اكثر من هكة ... حل الباب و دخللها ...
_( وقف قدامها  شدها بسيف وهي تفرفت حطها في سرير بقت ترفس ) ... مهرة اهدى ... علاش تعمل في روحك هكة ... اماااان ريض... انا معاك و باش ترتاح بكيفك و لا غصب عليك ...لازمك ترتاااااح ...
_( غرست وجها في سرير ..تتصكك برجليها )..ااااه ...ااااااه ... راسي ... رااااااسي باش يطرشق ...باش نموت ...ااااااااه ..
مشى يجري جابلها دوا الي خلهولها طبيب ... محبتش تشربو ... برك عليها حطلها الحربوشة و سكر عليها نفس لين بلعتها...
حس جهدو وفى ... و المهدئ بدا يعطي مفعولو ... ترخفت مهرة و استسلمت لنوم ...شعل سيقارو خرج يتمشى  ... مخو هايم ...و عقلو مش راكب عليه ...من تعب حط راسو هزو نوم ..اخر ليل يسمع في لطخة قام مسوبع ...حل الباب على مهرة ضربو لهوى البارد ... لقى شباك مكسر ريحتها مفماش ...خرج يجري حفيان ... شاف خيالها في ظلام ...تبع جرتها ...ينادي عليها و هي تتلفت و راها تشوفلو وترجع تجري ... وصللها شدها ...
_ ( حضنها على قوة جهدو ) علاه يا مهرة ..علاااه وين ماشية في ها ظلام باش دبر سم الهاري ... تهنى مفماش ...
_ ( كبشت فيه كنو نفس الي باش يرجعها لدنيا )...ايهم خرجني من ها ظلام ...خرجني و لا باش نقتل روحي و نرتاح ... ( بقت تبكي محروقة دخلاني و هو اعظم منها ...شدها من ايديها بشوية و دخلها لدار ... )
حطها فوق سرير ... تكى بجنبها ... وربط ايدو في ايدها ... بقى يتفرج على صوابعها ... و سوليتار الي في ايدها ... يخمم في ها القدر الي ربطو بيها ...وخلاه يتعلق بكل تفصيلة فيها ...شعرها جاء على وجهو ... شدو بإيديه شمو ... قربت منو ...تخبات في حضنو ... رخف بدنو استسلم للحظة و غمض عينيه ...
فاق على صياحها  ... وجها عارق و ازرق مخنوقة  ...اعصابها كل مشدودة حاولت تفك ايدها منو  لكنو شدها و حملها من تالي ... كانت كيف لعصى واقفة في حضنو ...  ترافس بإيديها و رجليها منجمش يسيطر عليها ...  تتهز و تتنفض  كانو ضربها الف فولت ...ترعش و تصيح و سينيها تتصكك  ... كبس عليها اكثر و لين حس نفسها تنظم و رجعت رقدت ... شعل حس بحرقة كبيرة ...من لوجيعة الي مكناتو خرج كسر الي قدامو كل ...خرج البرة صاح لين بح صوتو و وجعو راسو ...
فاق صباح ذوبلها دوا في كاس حليب ...سقاهولها بضرب البونية ...اول ما رقدت   خلاها و  رجب فوق راسها ... رجع لدارهم جابلها شوي دبش ...هو خارج قابلو عمو ...
_ ( شعل سيقارو ) اخيرا شفنا وجهك مسيب كل شي على ظهري و ظهر سميح و تجري و را وحدة مدمنه ...
_ ( عطيه بظهرو ).. طول عمرك تاكل في اللقمه الباردة و انا نكلت كيف ثور في ساقية ... نلهث البرة و لداخل و انت تحت مرتك ... ميسالش كيف مرة نرتاح ... و مرتي انتم الي رديتوها هكة ...احساسي عمرو ما يخيبني ...نشم في ريحة مرتك المنتنه في لحكاية ... ستنى تبرى و نعرف منها الصافي و بعد نتحاسبو ...
مزال عمو يتكلم خلاه و خرج يزرب خايف لرجب يغفل على مهرة ...