كرونيك💕 #العشق_الأسود💕

13

الحلقة 13
الايام تقريبا قاعدة تتعدى كيف كيف ... اليوم  ايهم رحمها و باش يهزها لصحبتها بعد تقنقين نهارين و بكى و تكسير راس ... لبست  شوميز و كلسون اسود ...وقفت تلم في شعرها دخل ايهم ... هزها و حطها ...
_ ادخل بدل ... شنية الي لبساتو هاذا ... تحرك ...( يشاورلها على كلسون )
_ امانك ايهم مش اليوم ... و الله حاسة روحي باش نستفرغ و معدتي تقلب سيبنا ... ( هبطت تلبس في بوت )...
_ قتلك ادخل بدل لا نقطعو على لحمك ...اخرج عريانه خير ... تحب ناس يتفرجو عليك و يقولو هاذي مرت ايهم  ...سروال محزوق برشا ... بدلو  وهاو نبه عليك ...متلبسش حاجة فوق ركبة و لا اكتافها عراية و لا محلولة من فوق و لا من لوطة ... ( يشيع فيها و هي تفرت في دبشها )...
_ تحبش تجيبلي جبة جداك  نلبسها  ... خرا متع خرا صباح متع وذني ... ( هزت سروال لارج و دخلت تبدل  )... في بالو الارض دور على خاطرو هو ...ااايه سردوك رجليه في لخرا و يعوعش ...
_نعم قلت حاجة ...سمعني ...( قحرتلو و سكتت) ايا تكبس تره يا هايشة سي نو تبطل ها المشية ( يقلب في دبشها )...
_ كهو انت بطبيعتك تتلكك ... و بطبيعتك مكش حاب تهزني ... ( عقدت حواجبها و بدت تتهز و تتنفض وحدها )
_ سكر فمك اش تاكل ضو سخط على راسك ايا امشي ...
دخلت لدار  بسمة و تعدت تجري طل من بلكون عليه لقت رجب اللوطة و معاه زوز رجال ... عرفاتو مستحيل يخليها على راحتها ...
_ تي شبيك كيف روسور تنقز من شباك لشباك  ...اركح يزي من تفركيح ... واصلا اش مجيبك مش قلتي بطلتي ( بسمة مرمية فوق كنبي اعصابها محلولة  مش منجمة حتى تنطق )
_ بسمة اعطيني نحب نشرب نحب ننسى نحب نولي كيفك نخرج من ها دنيا و معادش نحس نولي ثلجة  ... هاااات امان ( تفكلها في الدبوزة  )...
_هههه تو انت تشكر و لا تذم فيا ... على كل حال بارك الله فيك يا ابنتي خخخخخخخ.... و علاه تحب تنسى  ابنت صالح ... اش عملت من عملة ناتنة ...اش صارلك
_ هههههه اش صارلي ... قول اش مصارليش ...صاحبتك شاربة المر من كيعانها ...هات لخرى ...( طلعت دبوزة لفمها تشرب بغل )
دبوزة وحدة  خلتها تطير ... حست قلبها يدق بلقوي باش يطرشق ... اطرافها بردو ... حست راسها باش يتقسم في ثنين ... شوي شوي ... الحس الي في مخها كل ولى فلو ... بدت تضحك ... صوتها علا ... وصلت لملكوت اخر ... حست روحها طايرة ...حلت بلكون و بدت تضرب في رجب بدبابز شراب الفارغة و تنادي ...
_ يا رجب يا طحان ههههههه ....يا رجب يا كلب ايهم ...شفوهشفوه يا ناس  شفوه ...اهو رجب هَوْ هَو ْ...هههه..هههههههه...
_ سكر البالكون و ادخل يا خرااا فضحتنا ... (قامت بسمة تتعكز دزتها لداخل و سكرت البورت فيناتر )..
_(حضنت بسمة ولت تبكي ...) بابا في الحبس يا بسمه ... وراجلي ...ايجي نحكيلك على راجلي ... هههههه مهرة اقعد ...مهرة اوقف ...مهرة البس ... حاسبني الكلبة متاعو ... قصفلي شبابي و خلاني كيف الارض البور ... لا نجم لا نحلم لا نبني مستقبل ...آخرتي باش نرضخ  للواقع ... آخرتي باش نولي عبدة عندو ... خاطر تعبت انا تعبت و نحب نرتاح يا بيسو ...( هزت كعبة البيرة من ايد بسمة و قامت تترامى )
  نزار ... نزار مسكين وكلو طريحة ... كسرلو ايدو ... عايشة مع شيطان ... وين نمشي يخرجلي كيف الجن ... ( هي مزالت تتكلم و الباب دق بلقوي )...هههه قتلك انا ...
حلت الباب تترمى طاحت في حملتو ... دخل جاب ساكها و كركرها وراه ...من غير ما ينطق
_ باااااي بسمه ...هههه ماشية لعش زوجية ...ههههه بااي ..( رجليها داخلين بعضهم مش منجمة حتى تمشي )
لوحها في  الكرهبة كيف العادة كنو يرمي في ورقة في بوبال ... طريق كامل يسوق ساكت عاضض على لسانو ...
_( تلفتتلو  تضحك تحل في عينيها بسيف شهيقة تهز فيها و تنفض  )... شبيك ساكت ....صيح عليا كيف العادة و ذكرني قداش انا ما نفهمش ... ذكرني اني الكلبة  متاعك الي باعهالك بابا ... ( مخرجة ايدها من شباك تلعب بلهوى)
قحرلها قحرة موت ... بلع ريقو باش ما راكيش الكرهبة و يدقدقها بطريحة على المنظر الي هي فيه ... وصلو لدار حلو رجب الباب ... دار هبطها ...مسندها باش مطيحش ...
_ ااااه كلب ايهم اهوااا ....هَوْ هَو  ...هَوْ هَو ههههه( تشاور لرجب )...
معادش منجم هبالها اكثر ... هزها على كتفو ... رماها تحت دوش بارد ... تهزت و تنفضت ... شدها مخلهاش تتحرك ...

_ سيب سخط ... سيبني نحبش نفيق ...نحب نبقى هكة ...نحبش نتذكرك ...ما نحبش ... نحب ننساك ...( تضرب و دز فيه)
_ سكر رب فمك ... هبلت ...اخرتها تترامى كيف زوافرية ... اش شاربة اه ... ( طلعلها راسها و كبس على خدودها باش يشم فمها  ريحت الالكول خرجت تعطعط زاد هبل ).. ...هبلت انت هبلت ... (ضرب الحيط بيدو ...)
  بعداتو و خرجت من تحت دوش تترامى شعرها مبلول هابط على وجها طلع فيه ...
_ نشرب  و نعمل الي نحب ...وانت اش يهمك ...شكونك تدخل في حياتي ... شكونك اه ... ( هبطت مع الحيط تبكي بحرقة )  ... منحبش نفيق ... حتى لو ساعة و لا ساعتين خليني ننساك و ننسى الي صار ...
( عض على لسانو ووقف قدامها  ) طلع راسك اغزرلي ..انت باش تعيشي في دار هاذي عجبك و لا ما عجبكش ...انت ملكي و حياتك ملكي و مفما حتى قوة في دنيا تنجم تبدل شي هاذا ...وين نقلك تترص و تاقف ...تاقف شهر شهرين عام في لخر تو تتعود  ..واضح ...( تلفت وصاح عليها )
_( وقفت قدامو بكل قوتها ) اش تحب مني ...واش طالب ... تحب تهدمني ...برافو انا ما بقى مني شي ...راني عبد لحم و دم ...نحس راني نحس ...( شدها من ايدها وقفها يشوفلها )..سيبني ..سيب سخط ايدي توجع فيا ...علاش تكرهني هكة علاش  ( حطت ايدها على فمها  باش تخبي صوتها )
_ ( حط جبهتو على جبهتها و قربلها )...
مكتوبك تجي بنت واحد مسخ ... ومكتوبي طيحي بين ايديا ... ارضي بمكتوبك يا بنت الناس و ما تعبينيش ...و تعبي روحك .. سيبها رجعت لنفس لبلاصة .. دكت راسها بين رجليها  ... رفن الباب وراه و خرج ...