كرونيك💕 #العشق_الأسود💕

69

الحلقة 69
ايهم كمل الخدمة بكري تعدى هزها لكلنيك دخل شادها ....
(طبيبة شفاتو تبسمت ...) ...اخيرا شفناك  ... مهرة كل رونديفو تحكي لبنتها عليك ... شهتنا نتعرفو عليك ...ايا مهرة ادخل ريقل روحك ...
بقى يشيع فيها بعينيه ...شوي و ناداتو طبيبة ...اول مرة يشوف بنتو ... كانت تحرك في ايديها و رجليها ... حاجة منو قدامو ... كان لقى يحضن لإكرون و يبوسها ... بقى يثبت و يسأل في طبية لين مرجها وهي بينها و بين روحها شايخة عليه ... فرحانه بإهتمامو ... تقول اذا انا ايدي مسخة ...اذا انا ليلي  غالب نهاري ...هاو ايهم ... ينجم يربيها و يكبرها صافية كيف السماء ...
طلبت منو خرجو يدورو يشرو  شوي دبش تحب تخليلها كل شي قبل ما تمشي ... تحب تختارلها لبستها سريرها ...لاندو متاعها مشيتها ...قعادة ...كل شي ... حتى من البيبرو جابتها ...
كانت كل ما تلقى قطعة تعجبها تشمها و تبوسها تتخيل بنتها لبستها ... تسرح بخيالها ...تشوفها تحبي و تشوفها ددش و تشوفها تجري ....  تهز في  لاندو كنها فيه ...وتغنيلها ... مهرة مشوية ... محطمة
..مدمرة ...موجوعة .. ايهم قلبو وجعو خرج البرة يستنى فيها تكمل يحرق في سواقر ...
_(روحو حطت دبش ... ) ايهم نطلب طلب و متخيبنيش ...
_ ( طلع راسو يتمنى تقلو خليني نربي بنتي ...يتمنى تقلو بطلت ..منحبش نبعد عليكم ..)... نحب بيت زهرة تكون بيتنا ... تنجم تبعثلي صنايعية نحب نبدى نركح فيها ...
قاللها باهي براسو ... و رجع لسكوتو ... رجع لخوفو و ضعفو ... مهوش عارف علاش ساكت ... علاش راضي ... كرامتو وجعاتو زعمة ... ولا لدرجة الحقد عاميلو قلبو ... حابب ينتقم ..من شكون و علاش ... يمكن معادش ينجم يعيش من غير كره من غير رغبة في الانتقام ...
يتفرج عليها كفاش تبكي كل ليلة ... كفاش تتقطع قدامو ... هي اشجع منو برشا ... قررت تعاقب روحها و تنظف لوسخ الي داير بيهم ...  اما هو  مزال واحل ...مش عارف كفاش يعيش عادي ... مستثقل الوقفة قدامها و الاعتراف انو عاجز من غيرها
دخلت لبيتها ... بقت تكتب لبنتها ... تحكيلها على قصة حبهم المجنونه ... توصي فيها عليه ... حطت كل رسالة في كردونه كبيرة ... دخل لقاها غاطسة ...
_ مهرة شنوة ها لكرادن هاذم ... اش تعمل ( يشوفلها حاير )
_ ( جبداتو من ايدو )... هاذي اعطيهالها كيف يولي عمرها ثلاثة سنين ... شوف حطيتلها باربي كبيرة ...و..و دبش كوجينه اك نهار  طلبتهم اون لاين ...قريت انو لبنات في العمر هاذا يحب الحاجات هاذي ... وهاذي ..هاذي ( تمسح في دموعها ) ...قصص متع سندريلا و الاميرة نايمة و برشا حاجات اخرى  ... اعطيهالها كيف تولي تعرف تقرى ...وباكوات الاكسسوارات هاذي اعطيهالها كيف يولي عمرها سبعة سنين ...اما هاذي رندلات و شكاكل ...كيف يطوال شعرها زينولها بيهم شعراتها الحلوين ...( شدت كرشها و هبطت على الارض انهارت... غمضت عينيها كنها حبست لوجيعة كل لداخل  )
كانت في اضعف لحظاتها وهو مزال ساكت ...مزال يقاوم ... يشوفلها عينو دمع محروق اما مزال ساكت ...حاب يضمها يقلها ممنوع تخرجي من حياتي لكنو مزال ساكت ...