كرونيك💕 #العشق_الأسود💕

38

الحلقة 38
ايهم مشى ترمى في اول بار لقاه قدامو ... بقى يشرب و يتذكر مع كل رشفة طعم شفايفها ... خرج مترهوج ... يسوق كيف المهبول ... ترمى على قبر امو ... متخبي من دنيا ... ترمى باش يلوح حمولو على ظهرها ...
_ نحبها يا امي ...نحبها ... وهي ما تحبنيش ... نحب ضعفها و قوتها و هزت عينيها الي دمرتني بيها نحب سرها و كمونها و ضحكتها ... اما هي متحبنيش ... نحب دمعتها و شهقتها و العسل الي سايل على شفتها اما هي قاتلي مستحيل تحبني خاطر انا انسان مننحبش نتكره اكا هو ... بقى يبكي لين حس روحو  باش تخرج ...قام من عند امو مرمد بتراب  مترهوج غسل وجهو و رجع لاكرهبة  ... لقى روحو من غير ما يشعر عند وحدة من صحباتو لقدم ...
_ ايه ايهم ...من وقتاش ... مش قالو عرست و تبت ربي ...هههي ههي ( طرشق في لوبان و تتفرج في حالتو )
دخل دزها على الحيط خنقها يبوس فيها بوحشية و غل و هي تفرفت بلوجيعة ... كنو حاب يثبت لروحو انو مهرة مجرد كذبة وهم تغيب بحضور اي وحدة غيرها ...لكنو كان غالط ...غالط برشا ... كان كل ما يلز على صحبتو كل ما يزيد حضورها يطغى و يخنقو ... في لخر استسلم ...سيبها و دخل ترمى على سرير رقد ...
مهرة كانت واقفة على بلكون ...شافت سوسن  خارجة تتسحب ...تمشي و تتلفت ...لحقتها حست باش يطلعلها كنز من الموضوع ... و احساسها مخيبهاش  لقتها مع واحد باين فيهم يحبو بعضهم برشا  ...  رجعت لدار اختارت فيلم رومنسي ..ومشت حطاتو في تلفزة ... دخلت سوسن وجها مغصور ... باين عليها لبكى ...
_ سوسو ايجا نتفرجو فيلم يهبل ... ( قامت جبدتها وقعدتها بجنبها اول ما حست سوسن مندمجة سألتها  )... سوسو ياخي عمرك حبيت ..
_ ( تنهدت سوسن و طبست راسها )... الحب صعيب ياسر يا مهرة شكون ينجمو ...
_ يعني حبيت ( غمزتها )
_ ايييه حبيت و نحب و مازلت باش نحب ... اما المكتوب يعطيه وهف ... يلعب بينا كيف الريشة ...( تنهدت )
_( حضنت سوسن ) الله الله ... هاو ضرب صحيح ... ايه علاش ماجاش لدار ...
_ جاء مرة و ثنين و ثلاثة ... امي رفضاتو خاطرو على قد حالو ... ( مسحت دموعها )
_ كان جيت كيفك نهرب نعرس بيه و نحطها قدام الامر الواقع و تتغشش شهر و لا ثنين و تو ترضى ...اما خير ولا تبقى تعاني ( قاصدة تحطلها لفكرة في راسها  )...
بقت مهرة تشوف لسوسن ...كانت هايمه تخمم ظاهر فيها تخمم في لكلام الي حكتهولها ... السهم جاء بضبط في بلاصتو ...