كرونيك💕 #العشق_الأسود💕

51

الحلقة 51
سكر الباب و تعدى بلكرهبة مخلي كان الغبرة وراه ...تكت على صور ..محضنه روحها بيديها و تبكي بحرقة ... حاسة لحمها طايب متآكل ... كنو بدنها ولى عرصة خايخة كلاها دود ...آيلة لسقوط في اي لحظة ...
حس حاجة على خدو ... دموعو كانت هابطة في صمت كيف جرحو ... حاس كنو سكينه في قلبو ...موجوع لدرجة انو عجز على تعبير ... زاد في الفيتاس ...الكرهبة قريب تطير فوق الكياس ...فجأة شد فران لين العجالي قدحو النار ... هبط يجري وقف يعيط ... صوتو كان  مقهور ... تاعب ... ميت ..
_ علاااااه ...علااااااااااااه ... علاه ( عيط لين حنجرتو تجرحت ) ... مهرة علاه عملتي فيا هكة ( يتمتم بصوت واطي  ...)... اخترتي اصعب طريقة و قتلتيني بيها ... سليتي قلبي بيدك ...منيش مسامحك .... مكش باش تشوف مني كان الكره ... نوعدك ندمرك كيف ما دمرتني ( جبد المقرون و فرغو في لهواء ... ) ...
روح يلوج على نجوى ... دز عليها بيت نوم ... تنطر عليها خنقها ...جاء طاهر باش يقوم جبد عليه المقرون...
_ رد بالك تتحرك من غادي ( ايد مصوب بيها على طاهر و ايد خانقة نجوى ) ...مش قتلك كان يظهر عندك حتى ظفر في حكاية ادمان مهرة ننهيك ... ااااااه ...قلت و لا ( صاح عليها عينيها تحلت )... تكلم **** لا نجيفك الليلة ... تلم دبشك ... و تخرج من داري ... فهمت و لا ... منحبش نشوفك قدامي ...( سيبها طاحت على بلاصتها )
_ ( شادة كرومتها وجها احمر )... هاذي داري ... و منيش خارجة فهمت و لا ... عنا الحق كيفنا كيفك فيها ... و متنجمش تخرجني ...
_ ( حسب روحو مسمعهاش و دار لطاهر ) كان تحب مرتك تعيش ... غدوة متشوفهاش عيني ..( صرفق الباب و خرج )
طلع لبيتهم  يكسر و يضرب فلي قدامو كل ... و ترمى يبكي بشهقة ...
خرج البرة كان واقف في نص الدار ... فارغة ...باردة ...كيفو ... هاذا اليوحبت توصلو مهرة ... تقهرو و تدمر كل حاجة حلوة متبقية في حياتو ... الدار و كبرها  كانت ضويقة في عينيه ... هابطة على صدرو كيف جاثوم ...يصيح و حد ما سامعو منو غاطس في بير ...كلم المحامي يبدى في القضية متع طلاق ... يزي ما هبط خشمو و طيح من روحو ...من اليوم هو باش يولي الكابوس متاعها و الي تعدى كل حاجة  و الي جاي حاجة اخرى جملة ...
مهرة ماكانتش بعيدة عليه... تمشي في طريق بعقل هايم و دموع هابطة سخونه تكوي ... كفاش باش تبعد عليه و هو تخلط بروحها ...اندمج فيها ... تنجمش تتنفس بعيد عليه ... اي مصيرو طاهر يقلو لحقيقة ...وقتها الموت اهونلها من الي باش تشوفو منو ... شدت تكسي وصلت لدارهم ...امها كانت متكية وقفت ...
_ مهرة لاباس شبيك ...شنية ها الحال الي انت فيها ( مفجوعة )
_ ( ما خسرتش عليها حتى هزت عينيها ...وقفت قدام دروج )... كل شي وفى ...طاهر عرف ... و انا باش نطلق ...
_ نعم شنية الي وفى ...من وقتاش انت تغلب و تحير ...طول عمرك تخلق من ضعف قوة ...تتحرق و تقوم تتنفض من رمادك ... شبيك تحكي كأنك استسلمت ...( وقفت قدامها )
_ اي فشلت و تعبت و استسلمت ... اش صار الدنيا وفت ...لقيامه قامت ... مشاعرك السودة الي ورثتهالي بلعتني ... انهتني لآخر ذرة فيا ...معادش عيني في ظلام ... تعبت من الخطط و الكذب و تلفيق ... نحب نعيش عملت جريمة ...( حطت عينها في عينين امها بتحدي )..
_ لعب صغار و المراهقين هاذا ما يمشيش معايا ... فماش طلاق ...غدوة ترجع لدار الرصاوي و تكمل تنهي منذر و الطاهر و سلالتهم ... انا تخليت على حياتي ... حرمت روحي حتى من اني نكون ام لنهار هذاكة ... ومش من حقك تحرمني منو ... زهرة لازم ترتاح في رقدتها ... نموت و ما نخليكش دمر انتقامك ... ( استغربت من برود مهرة )انا نعرف شكون الي قلب حالتك ...ولد منذر ...هكة و لا ...طحت على راسك و سلمت في كل شي ...( تشوفلها تحب تقلع الاجابة من عينيها )
_ اي يا بية حبيتو ... عشقتو ...وليت نتنفس حاجة اسمها ايهم ... مش بيدي يا امي ...قلبي ...و منجمتش نحل فمي و نقلو ولو مرة نحبك تعرفي علاش ... خاطرني مسخة من داخل ...سودة ...كيف الارض البور شي ما يخرج مني ...كان لوجيعة ...ودموع ...وقفت قدامو و تفرجت على روحي  مشنوقة بين عينيه ... ذبحتو قبل ما نذبح روحي ...قتلتنا زوز في خاطر ظلامك ..و انتقامك ... نقلك حاجة ... البركة فيك انا متت ...
ترمت فوق سرير كنها تعبت من الحياة ... حابة تستقيل ...تتقاعد ... تتشكل من جديد