كرونيك💕 #العشق_الأسود💕

60

الحلقة 60
طبس رجب هز الباكو و دسو ...حتى رجب سخفاتو و فرت دمعتو على منظرها ... لكن ايهم كان كيف الحجرة ...لا حن و لا سخف عليها ... انهار فوق دروج ...حط راسو على الحديد يشكيلو ...
_ بسمه البس و روح (مدلها دبشها و سكر في وجهها الباب ) غطس بين دبوزة و الكاس ...كل ما يشرب باش ينسى يزيد يتفكر ...
(فلاش باك )
دخل لقى بية قاعدة في جنينة متع دار العجز ... استغرب ...قرب منها ...شافتلو عينيها ضوت ...كانت باش تفقد الامل ...تصورت انو مش جاي ...
_ مدام بية اش تعمل هنا ... ( نحى لينات شمس و قعد )
_ اااااه يا وليدي ... مدامتك ...بنتي و لا الي كنت حسبتها بنتي حطتني هنا ( تبكي بحرقة مدلها مشوار ) ... رمتني على طول ايدها ... هاذا كل خاطر قلت كليمت حق ... مشافتش لا سهري و لا تعبي عليها ...
_ علاش مهرة باش تعمل فيك هكة ... الي نعرفو تحبك و تقدرك برشا ...( لحكاية عمالها و تزيد غرابة ...) علاش هاذا كل قلي بالك نجم نعاونك و نصلح بينكم ...
_ ااااه اش باش نقول و اش باش نحكي ... مهرة كذبت عليك كذبة كبيرة برشا ...هي و صالح لعبو لعبة مسخة ... ملخر ...مهرة بنت عمك ( ضرباتو في وجهو بكلامها و بقت تراقب في ردت فعلو  )
_ شششكووو..شششكون بنت عمي ..اش ...اش..اش تحكي ... واعية بلي تقول فيه ...خرفت انت خرفت ...( وجهو مشى الوان و جا الوان ) ... مهرة بنت طاهر عمي ...كفاش ... مستحيل ...مستحيييل ..
_ هدي روحك ... تو نحكيلك كل شي ... ( حكتلو حكاية امها و كفاش مهرة حبت تنتقم بطبيعة استثنت انها هي سبب كل شي )
قام عينيه مغمضة ... ركابيه ترعش معادش حملاتو ... ماوصل للكرهبة كان ريقو شاح وو وجهو هرب منو دم ... الصدمة كانت قوية عليه ... حس روحو وسط صندوق مسكر لا فيه مخرج و لا فيه منين يتنفس ...
نفض راسو ...كنو يحب يطيش نهار هذاكة من حياتو ... تمنى انو ما مشاش و ما سمعش الي سمعو ... حس قلبو تكسر و كل عذاب دنيا تلم بين ضلوعو ... الي عملو كل اليوم في مهرة ما يجيش نقطة في بحر  وجيعتو ... هز الكاس ضرب بيه لمرايا لي قدامو هبطها دشداش ...
" ناري باش تبقى تقدي تشوي في جواجية لين ناخذ بطاري منك  ...نوعدك يا مهرة كل كف كليتو من عندك نرجعو بعشرة و كل جرح جرحتهولي  نرجعو ... كلو سلف و دين ... و الله منشربك من نفس كاس الي شربتني منو ... تو تشوف ...تو تشووووووف ... علاه عملت فيا هكة علاااش ... كنت نموت لو لحظة بعدت عليا... حاسك مني ...تخلقت فيا ...علاااه بعتني برخيص حراااااام .... حراااام "
بقت عينو دور  في البيت ... كل تركينه تحكي حكاية من حكاياتهم ... هنا تعاركو ..هنا حضنها ... هنا باسها ... حس روحو باش يهبل ... حس دنيا كل فوق صدرو ... لم كل شي و شعلو ... حرق البيت و بقى يتفرج على نار تاكل فيه و فيها ...لين تقطع عليه نفس و داخ ...
رجب كان واقف في جنينة شاف دخان طلع يجري ...كسر الباب و خرجو ... تلم هو ورجال طفو لبيت بعد ما ولات كحلة كيف قلب ايهم بضبط ...