القطعة التاسعة
**********
_برضه بتذاكري؟!
سألها رامز بمرح لم يخفِ ضيقه وهو يدخل عليها غرفة المعيشة ليجدها ناثرة أوراقها حولها وقد ارتدت نظارتها وعقصت شعرها خلف رأسها لترد دون أن ترفع نظرها إليه:
_خمس دقايق بس يا رامز وأكون معاك.
هز رأسه وهو يجلس على الأريكة متابعاً ملامحها الجميلة التي انهمكت فيما تفعله ...
قبل أن يقول بنفس النبرة:
_مين كان يقول إن هييجي يوم أغير عليكِ فيه من شوية ورق؟!
رفعت إليه رأسها مبتسمة وقد مستها عبارته لتقول بشبه اعتذار:
_شوية الورق دول هم طريقي عشان أكمل رسم صورة نفسي اللي أنا عايزاها ...ترضى تحب واحدة ناقصة ؟!
_غلَبتيني!
قالها ضاحكاً ثم نظر إليها نظرة عميقة مردفاً:
_بس انتِ مش ناقصة أبداً...بالعكس فيكِ حاجة بتخلليني دايماً مشدود ليكي...أنا عرفت بنات كتير قبل الجواز ...ومع ذلك عمري ما حسيت مع أي واحدة باللي حسيته معاكِ.
تغيرت ملامح وجهها فجأة مع هتافها المصدوم:
_بنات كتير؟! انت عمرك ما قلت لي حاجة زي كده .
_انتِ ما سألتيش!
قالها وهو يهز كتفيه ببساطة مردفاً:
_وأنا كمان ما سألتكيش.
_بس أنا عمري ما حبيت حد قبلك.
ابتسم لاعترافها الحار الذي خرج من شفتيها رغماً عنها ثم اقترب منها بجلسته لينظر لعينيها قائلاً:
_ودي أجمل حاجة فيكِ!
لكنها أشاحت بوجهها بضيق فضحته ملامحها مع عبارتها:
_ما كانتش دي أبداً صورتك في عيني...أنا ما اتجوزتكش عشان شكلك أو مركزك...أنا اتجوزتك عشان أخلاقك...حسيتك صورة من بابا الله يرحمه .
فاقترب منها أكثر لينزع عنها نظارتها ثم رفع ذقنها إليه ليهمس لها بصدق:
_ده كان ماضي وراح لحاله ...والدليل إني بحكيلك عليه دلوقت ببساطة ...قلبي خلاص دخلتيه انت وقفلت الباب وراكِ.
ورغم شعورها بصدق حديثه لكن ذاك الخوف الذي احتل قلبها جعلها تقول بنبرة جافة:
_إخلاصك ده ليك مش لي...لأني لو حسيت للحظة إنك بتخونني ولو بمجرد مشاعر أنا هاخرج من حياتك من غير تردد .
_ممممم...من غير ما تسأليني عن السبب؟!
_الخيانة مالهاش مبرر ...طلقة غدر ماينفعش ترجع مسدسها تاني ...عرفت ليه أنا ما بنجرفش ورا مشاعري ؟!..عشان في لحظة زي دي قلبي ما يتكسرش.
أنت تقرأ
سينابون .. ج 1 .. ج 2 .. للكاتبة نرمين نحمد الله
Romanceجميع الحقوق محفوظة للكاتبة سينابون ... =========== ليس الحب أن ترجح كفتي في الميزان... الحب أن أكون أنا الميزان! ليس الحب أن يوافق شخصي مزاجك... الحب أن أكون أنا "مزاجك"! ليس الحب أن "تلمس" كفي، "تشم" عطري،"تسمع"صوتي،"تتذوق" أنوثتي،"ترى"فتنتي... بل...
