الجزء 15
دخلت شفت فالدوسيات لي عندي علا هذوك الثلاثة و حتا دوسي منار كان هنا شغلت البيسي و حطيت الفلاش وقاعد نقرا فالمعلومات علا المتهمين و كل واحد عندو علاقة بيهم عمرنا حكمنا عليه دليل كان كل مرة يبدل الاعضاء و البلاسة الا شخص واحد كان هو لي ديما يقودالعمليات هذي لمرة راح طيح في يدي يا وسخ و خر راسو لتالي حس بيها دخلت من ريحتها منار: اووو واش هذا اول مرة نشوف البيت هذي مفتوحة جواد: هذا مكتب نستعملو وقت الخدمة فيه دوسيات مهمين علا هكا نغلقو منار: عوجت فمها خايف علا دوسياتك مني ياخي جواد بابتسامة: اممممم نعرفك كان تدخلي تقلبي الحالة لانو راح تحاولي تنظفيه ههههه فالحقيقة خايف اذا تقرا واش كاين فالدوسيات.. قربت منو منار: واش راك تخدم وقفت قدام راسو قاعدة نشوف فالمخطط عوجت فمها و هي نشوف فيه منار: يشبه لجامعتي جواد: امممم منار: حاجة خاصة فيه مي ماعلباليش واش هي... هذي باب جواد: راكي بنواضرك و ماكيش تشوفي منار: بنرفزة حكمتلو وجهو و قرباتو للبيسي شوف هذي باب يعني نورمانمو تدي لحاجة و هي تدي لكولوار فارغ مكان فيه والو....جواد ثبت مليح فيه من بعد ضحك و ناض رفدها و بدا يدور بيها و يقول جواد: علبالك انتي حنونة لقيتيها لقيتيها منار: تصيح يا مهبول هبطني دخت جواد هبطها و قرب باسها بوسة مرصوصة علا خدها مرسي بفضلك راح تنجح المهمة خرج و خلاها مروهجة مالموقف مازال تحت تاثير الصدمة (بعد ما نضت لقيت ذيك الباب مفتوح بقيت مترددة ندخل ولا لالا طليت شفتو قاعد يخدم بالبيسي يعني جا ولقاني راقدة في بلاستو و روبتي طالعة و معنقة نخدتو يا يما علا تبهدايل كيفاش نشوف فيه ذكا و زيد كان كاش مايقولي اصلا حذرني مقبل ربي يستر برك قربت عندو شفتو حاط مخطط للفاك شبهتو لمخطط لفاك تاعنا و زيد كي سقسيتو حكا بالخايب علا نواضري حلوف هذا البهلول حسبني غبية بعد ما قتلو هكذاك حسيتو طار في مخو قرب حكم البيسي بيديه الزوج من بعد ناض ضحك خلعني مانفيق غير بروحي رافدني و يدور بيا ههههه ملا مهبول ماعرفتش منين نصنفو هذا الانسان الغامض خرجت مالبيرو تبعتو لقيتو يحكي فالتليفون و شايخ الابتسامة مافارقتش وجهو رحت نتصنت خفت اذا تكون طفلة.. رجعتلي الروح كي سمعت اسم سامي ..بعد مدة كوبا و رجع لبيرو شوية و خرج لصالة لقاني حاطة بيسي قدامي كنت نشوف فالمعلومات لي عطاهملي ايمن لقيت شوية عاونوني ) جواد بعد ماقعد قدامي: واش راكي ديري انا وعينيا فالبيسي بحث راني نخدم فيه السمانة لجاية نقدمو جواد: تحبي نعاونك منار: بشك اممم نتا واش فهمك في انجلي يا حضرات جواد: امممم نتي واش تعرفي عليا غير اسمي يا صغرونة منار: انا كبيرة مش صغرونة و قحرتلو جواد: شاف فيها بخبث و طلعها وهبطها امممم اما مخك صغروون و غمزها منار: تبدل فالموضوع مالا احكيلي علا مميزات جواد عبد الحق خليني ننباهر جواد: نحالها البيسي و حطو في حجرو و دخل في ارشسف مكتبة انجليزية منار: بانبهار وين تعرفو هذا نتا وزيد منين جبت المودباس. جواد: امممم كنت نقرا ثما منار: بعدم تصديق تفركهم عليا يعني.. قحرلها جواد و كمل بعد ما جبت الباك رحت لندن قريت اربع سنين.تخرجت بتقدير جيد جدا عندي ليصونص انجلي يا فهيمة بعدها قررت ننضم لشرطة و كان عمري 21 سنة منار: واو مالا تعاوني فالميموار و ذبلتلو عينيها جواد: والمقابل واش هو منار بلهفة لي تحب جواد: خزر لشفافها و تبسم قرب نحالها نواضرها حطهم فالطابل و قرب لشفافها و حط شفافو عليهم و باسها بوسة خفيفة غمض عينيه و قعد يحس بلحظة حسها ترخفت جواد: منار منار يا روحي فيقي
منار:....
جواد: واشبيك منار... قعد يضرب في خدها ضربات خفاف
منار: امممم ويني انا
جواد: ..... مالقاش واش يقوللها بلوكاتلو مخو...نروح نجيبلك كاس ما
فتحت منار عينيها بدات تستوعب واش صرا حطت يديها علا شفافها تسترجع فالاحساس لي تملكها حتا خلاها تفقد الوعي.... حتا التخيل مكنتش نتخيل انو راح يبوسني يعني جواد باسني شافتو جاي حكمت البيسي تظاهر كانو ماصار شي ماعرفتش واش ندير مرا نغلقو مرا نفتحو حسيت بقربو مني وجهي ترشق مالحمورية حطلي الكاس في يدي
جواد: اشربي و ايجا نكملو البحث( كان لازم عليا نتظاهر انو ماصار شي هي ترصالي غميانة مرا اخرا عمري تخيلت نبوس وحدة و يغمى عليها ماعرفتش كيفاش جاتني فكرة المقابل هذي و البوسة كنت نحسب انو بعد ما نبوسها راح يخف الشعور لي حاسس بيه لكن صرا العكس كل لي قاعد نخمم فيه هو شفافها و طعمهم والاحساس لي عمري حسيتو مع انو عرفت عيطا بنات و عملت لي ما يتعملش لكن منار غير قربها غير طعم بوساتها غير ضحكتها غير حتا انو نسيت وقتها كلش الخطة و بوها والانتقام تمنيت اني نحضنها و نخبيها عندي جاني صوتها )
منار: معليش نسقسيك
جواد: باستغرا وي
منار: ياخي يقدر يطلع عندك توأم و هو ضايع و انتو مافيبالكمش
جواد: هههههههههه من نيتك هذا سؤال
منار بغضب: ماتضحكش عليا
جواد: علاه هذا سؤال بفضول
منار: لانو شفت شخص نسخة منك في كلش الا العينين و صوت و الغضب قالتها بين شفافها
جواد: يقولو يخلق من الشبه اربعين شوقتيني نشوف شبيهي هههههه
منار: اممممم انا كي شفتو قريب هبلت قلت نتا ههههه
جواد: قتلك مخك صغرون هههه...عاون جواد منار في لي قدر عليه ووعدها يجيبلها بيسي ليها كل واحد شد بلاستو يخمم فالاخر و لي جاي...
في مكان اخر قاعد في كرسيه لي يتهز رايح وجاي و حاط يدو علا راس كلبو
الرجل: بوس عندك تليفون من الضابط مراد لي متكفل العملية الجاية
البوس: جوزهولي
مراد : بوس حبيت نقولك انو كلو تمام و جماعتنا مستعدة للاسبوع الجاي
البوس: علبالك تكون غلطة نمحيك مالدنيا نتا ولي معاك
مراد بخوف: ماتخممظ بوس رانا مامنين الوضع و دايرين احتياطنا
البوس: اني حاط ثيقتي فيكم علبالك نص ثروتي راه في ذيك الشحنة و دراهم كبار خسرتهم علا هذاك المخبأ
مراد: ممايكون غير لي تفرح بيه بوس رانا ليها.... عاد بذاكرتو ليوم لي قرر فيه انو يبعد علا فريق المهمات الصعبة كيما كانو مسميينهم كانو هوما ثلاثة لكن الثناء كان غير لزوج برك الكل يحب محمد و ابراهيم... حتا كرهت الخدمة معاهم و قررت نبدا وحدي و خليهم يعرفو قيمتي
الحاضر: 14 سنة و انا نحوس و مازال مالقيتش المفتاح حتا منار ماعندها والو كنت نراقبها في كل وقت بسبت هذوك الزوج 14 سنة و انا نعاني حتا بعد ماقتلتهم و ماتهنيتش لازم نشوف حاجة اخرا نفك بيها الشيفرة لي داروها هذوك الزوج... الله ينعلكم بزق علا فوطو تجمعهم و ناض راح لكرهبتو
عند مراد
مراد: واش درتو فيها لقيتو نهار مناسب مالسملنة الجاية
عمار: ايه لقيت نهار لي تكون فيه الفاك خايضة و الصوت عالي و نقدرو نخرجو السلعة فالكامياوات بلا مايسمع اي واحد
مراد : بزربة واش هي،
عمار: كاين حفلة راح ديرها الجامعة للاعضاء الجدد المنضمين لنادي راح يكون فيها غنا و شراب يعني كل واحد مشغول بحالو و الطريق تكون فارغة
مراد: بفرح شكون صاحب الفكرة
عمار: واحد مالجماعة جديد
مراد: رد بالك تحكيلو علا تفاصيل الخطة
عمار: ماتخافش راني قاريلها الحساب
عند جواد
سامي: والله تقولي كيفاش عرفت المخبأ خبراء توعنا عندهم شهور و هوما يدرسو فيها ومانتابهولوش اصلا شكون يخمم في باب
******************
