Marrying Mr. Billionaire (COMPLETED)

Chapter 2

Dinala ako ni Boboy sa abandonadong gusali. Hindi lang naman kami dahil may nakita kaming mga babae. Hindi naman sa pagiging judgmental, pero para silang adik sa paningin ko at hindi ninyo ako masisisi. Hindi ko alam kung ano'ng klaseng raket ito pero may tiwala naman ako kay Boboy dahil marami na akong naging raket kasama siya. 

"Sino iyan, Boboy?"

Naibaling ko ang tingin sa babaeng nagtanong na may tattoo sa kanyang kaliwang braso. Nakaupo siya sa isang sirang upuan habang may lollipop sa kanyang bibig. Buhok niya ay kasing kulay ng mais at kasing kulay ng kape naman ang kanyang balat. Suot niya ay isang ripped denim shorts at red crop top. 

Tumawa si Boboy at inakbayan ako. "Si Katkat, kaibigan ko," pakilala ni Boboy sa akin. 

Sa inis ko, agad kong inalis ang kamay niya sa balikat ko at dumistansya.

Tiningnan naman ako ng babae mula ulo hanggang paa. Kita ko ang pag-irap niya bago ibinaling kay Boboy ang tingin na ngayon ay nakangisi na. 

"Seryoso ka ba, Boboy?" hindi makapaniwala niyang tanong at natawa. "Nag-recruit ka pa talaga ng isang lampa? Madadamay tayo kapag nabuking iyan!"

Napasinghap ako sa narinig. Ano? Mabuking? Hindi ko tuloy maiwasan ang magduda. Ano ang ibig niyang sabihin?

Actually, may bigla agad pumasok sa isip ko pero agad ko itong inalis dahil baka nagkakamali lang ako ng dinig. Hindi naman siguro magagawa ni Boboy ang bagay na nasa isip ko. Matagal na kaming magkakilala at ni minsan, legal naman lahat ng raket namin. At isa pa, malaki ang tiwala ko sa kanya kaya sumama ako. 

Ang isang babae naman na katabi niya ay tumayo at naglakad patungo sa akin. Parang buntot ng manok ang buhok niya dahil sa kulay. Straight ang kanyang maikling buhok na may bangs. May hikaw siya sa ilong at may tattoo rin siya sa balat na bumagay sa puting balat niya. Nang nakalapit, naaninag ko sa ilaw ang brown niyang mata. 

Pinagkrus niya ang kanyang braso at tinaasan ako ng kilay. "Itsura pa lang nito, hindi yata ito marunong magnakaw, Boboy!"

Namilog ang mata ko at nagulat sa sinabi niya. Bumilis ang tibok ng puso ko at binalingan si Boboy na ngayon ay hindi na makatingin sa akin. Binalik ko ang tingin ko sa babae na ngayon ay malaki na ang ngisi. 

"M-Magnakaw?" hindi makapaniwala kong sambit. "Ano ang ibig mong sabihin?"

Tumawa ang babae na nakaupo sa upuan bago tumayo at lumapit na rin sa amin. "Yes, magnakaw! As in akyat bahay! Bakit?" Niliitan niya ako ng mata. "Isusumbong mo ba kami? Wala ka nang magagawa dahil automatic kasabwat ka na namin!"

Bigla akong namutla. 

Ano ba itong pinasok ko? Kahit sobrang dami kong problema, ni minsan, hindi ko naisip ang ganitong klaseng raket. 

Tiningnan ko muli si Boboy na hindi pa rin makatingin sa akin. Unti-unti kong ikinuyom ang kamao ko. 

Bastard!

Umiling ako at hinarap ang dalawa. "Hindi. Hindi ako sasali sa inyo. Uuwi na ako."

Akmang tatalikod na sana ako nang bigla nila akong pinigilan sa paraang paghawak sa tela ng damit ko. Napatingin ako sa kanila. 

"Walang atrasan!" asik ng babaeng may mala-mais na buhokm "Damay ka na! Kung ano man ang mangyari sa amin, pati ikaw kasali! Kapag aatras ka, patay ka sa amin!" banta niya pa.