#درويش_ودعجبنا
#الحلقة_السابعة
ظلام دامس ، هدوء غير عادي ..
انا وين ما شايف حاجة قدامي ، فتحت عيوني شوية شوية بديت اشوف حوليني
جسمي مكسر وكل حتة في جسمي كانت واجعاني
حاسي بي صداع عاوز يكسر راسي
اتحسست حوليني لاني ما كنت شايف كويس
لقيت روحي في سرير صنقرت وبديت اعاين
شوية شوية الرؤية بدت تتضح لي
لقيت نفسي في غرفة كبيرة جداً وسقفها عالي شديد
قصادي الباب وكان باب عالي والمنور حقو كبير ، باب خشب كبييييير من نوع الابواب القديمة ديك
شبابيك الغرفة عالية برضو مصنوعة من الخشب ايضاً ، الغرفة مضروبة جير اخضر والإضاءة كانت خافتة شديد
في النص في شريط باللون الاصفر والاحمر كان قاسم الحيطة في كل إتجاهاتها ..
بعد استوعبت الحولي فتشت جيوبي لقيت حاجاتي كلها قاعدة تلفوني والسماعة
في شنو والحصل شنوو ..!!
طلعت تلفوني من جيبي لقيت البطارية ضعيفة
والتلفون قرب يقفل .. الساعة عاملة 4:20 ص
اكتر من 50 مكالمة لم يرد عليها وكم رسالة
بعد شوية كدااا باب الغرفة فتح ..
اتخلعت وكنت خايف وعرقان شديد
دخل علي راجل لابس عراقي ابيض وشايل سبحة كبيرة في يدو
صوت السبحة لمن ضرب في باب الخشب وهو بفتح وجاي علي كان واضح ، وقع اقدامو ، مشيتو البراحة وكل تفاصيلوا ..
راجل لاهو طويل ولا هو قصير مربوع كداا
ظاهر عليهو علامات الورع ووشو كان ناير وبشوش
ابتسامتو وهو جاي علي وتفاصيل كتيرة
عرفتو لمن قرب مني .. وركزت في ملامحو
كنت في البداية خايف شديد
بس لما اتأكدت منو اطمنت حبة ...
شيخ محمد احمد خليفة الشيخ ود النيل
قالي بقيت كيف ياولدي احسن !!
ولسة مبتسم
سكت مسافة وقلت ليهو انا وين وحصل شنوو
وكنت عاوز اقوم بس هو اشر لي بي يدو اقعد يعني
قال لي :
قول بسم الله ارتاح انت شكلك لسة تعبان اشرب الموية دي وكان في كوز موية جمب سريري
مسكت الكوز وكنت عطشان بس خفت اشرب
مسكت الكوز مسافة
قال لي اشرب
شربت وكنت عطشان شديد ، شربت الموية كلها
ورجعت تاني من التعب رقدت وكنت بعاين ليهو
قلت ليهو انا حسن صاحب اح....
قبل اتم كلامي قاطعني
قال لي عارفك ياولدي دا م مهم انت بس ارتاح وماتتعب نفسك
قلت ليهو حصل شنو !!
انا ما متزكر شئ مع اني كنت متزكر اني حاولت اشيل الشنطة السوداء وأبحت ورا الدرويش بس لاني كنت خايف
العملتو ما صاح وحيجيب لي الكلام في الحلة فعملت اني م متزكر شي
قام هو ضحك وقال لي:
امس انت اغمي عليك وجبناك هنا عشان ترتاح
ويادوب فتحت عيونك ، اها احسن هسي ياولدي
قلت ليهو ايواا احسن
قال لي تلفونك كان بضرب كتير بس ما حبيت ارد بدلك
ارجع لي اصحابك وطمنهم عليك
مسكت تلفوني ورجعت لي احمد رد لي وكان مخلوع
حسن انت وين يابشر !!
انا كويس يا احمد انا في المسيد تقريباً مع شيخ محمد احمد ..
قال لي خلاص بنجي عليك هسي
قفلت الخط وشيخ محمد احمد لسة كان بعاين لي ومبتسم ، ابتسامتو البشوشة طمنتني جدا وارتحت ليهو شديد 💜
زول يدخل القلب من اول لحظة
شكرتو واعتزرت عن الحصل مني واترجيتو م يجيب سيرة لي ناس احمد او لي زول
قال لي:
" الساترو الله ما تفضحو بين خلق الله "
وكان بسبح بي السبحة وهو بتكلم معاي
قال لي
انت لي عملت كدااا !!
رديت ليهو :
ما عارف بس كان جواي شغف اعرف قصة الدرويش دا شنوو
من اول يوم شفتو فيهو وانا نفسي اعرف قصتوو
انا بعتزر اني اتماديت وكداا اعفي لي
ضحك ضحكة بشوشة كداا وقال لي
ياولدي انا داير اقول ليك نصيحة اوعك تنساها
نحن كلنا عندنا اسرار ، ورب العالمين وحدو هو العالم سرنا
انت زاتك ممكن يكون عندك سر داسيهو ماف زول يعرفو غيرك
انا هنا نطتت عيوني واتخلعت ...😟
بعرفني من وين الشيخ دااا
فضلت ساكت وبسمع ليهو
واصل وقال لي :
ياولدي الدنيا دار امتحان ، ركز في امتحانك وانجح فيهو وسيب الخلق للخالقها
كانت رسالة واضحة بصورة جميلة منمقة اني لازم ابتعد عن الدرويش وما ابحت وراهو
الدرويش ياولدي ربنا رحمو ورقاهو عشان يسبح في ملكوتو ، ودا تشريف للعبد انو يبقي درويش
ودرويش ودعجبنا الانت ساعي وراهو داا ربنا اكرمو وخلاهو درويش عشان يخدم المسيد
الدرويش دا عايش بخدم ضريح ابونا الشيخ ود النيل وبنضف ضريحو ...
والاسرار ياولدي علمها عند الله
ارقد ارتاح والصباح رباح
ارتاح ياولدي صباحات الله بيض
وطلع فات برا وخلاني ، بقيت سرحان وبفكر في كلامو
سبيت لي روحي اني دخلتها في حتة ضيقة زي دي
وحلفت اني انسي الدرويش وما اشغل بالي بي قصتوو
المهم الشيخ جاني تاني داخل وقال لي اصحابك برااا لكن انا قلت ليهم عايزو يبيت هنا ويرتاح وبكراا يجيكم
انا قمت وشكرتو علي وقفتو معاي
في اللحظة ديك انا غيرت نظرتي للصوفية وشيوخها ، صاح انا واحد من الناس ما مقتنع بيهم ولا بي عمايلهم
لكن شفت المعاملة الانسانية الجميلة واسلوب الشيخ خلاني احترموا
بعد شكرتوا قلت ليهو يا شيخ محمد احمد انا طالب منك طلب
قال لي لو بقدر ابشر
قلت ليهو ماف زول يعرف الحصل لو سألك احمد او اي زول
قال لي ابشر ياولدي 😊
قلت ليهو غشهم وقول ليهم اي شي المهم م عاوز اتحرج مع الناس ديل
ضحك وقال لي :
الكذب حرام يا حسن ياولدي
موش حسن برضو
قلت ليهو ايواااا
قال لي انا م بتكلم وبوعدك لكن الكذب ما حل ياولدي ، اخدها نصيحة مني
حبل الكضب قصير
وبدا يحكي لي قصة الشيخ فرح لما جاهو زول قال ليهو دسني قال ليهو خش جوا القش دااا
وخش جواهو
لما جو الناس الساكينو قالو ليهو الزول دا وين قال ليهم جوااا القش داا
الجماعة بقوا مستغربين وبينهم قالوا دا راجل مخرف ومشوا
لما طلع الزول من القش قال ليهو ياحاج استنجدت بيك وتسلمني ليهم. وكان متضايق
الشخ فرح قال ليهو ياولدي
الصدق ان ما نجاك الكذب م بنجيك
