#درويش_ودعجبنا
#الحلقة_26
نفس الحلم بتاع المسيد
واقف في نص المسيد وشيخ محمد احمد جاي علي ومعاهو الدرويش ، ونفس التفاصيل
يبدو يتلاشو حبة حبة لحدي يختفو تماماً وابدأ انا بعدهم اتلاشي
صحيت كالعادة لقيت الساعة 5 صباحاً
صحيت الشباب وصلينا وقعدنا نتونس لحدي م الساعة 7 جات وشربنا الشاي ، بعدها اتفقنا ننزل الجامعة ونشوف الحاصل شنوو بدل عدم الموضوع والقعاد ساي
وبالمرة نشوف الجدول نزل ونعرف مواعيد محاضراتنا ، وفعلا زي الساعة 10 كداا اتحركنا علي الجامعة ...
دخلنا الجامعة وكالعادة في كل سمستر جديد نجي ماشين سواا وكل شوية نقيف نسلم علي ناس
يا اما اصحاب احمد وصحباتو والجكس حقو 😅
يا إما اصحاب منتصر وعبد الله
وانا كالعادة بجامل مع البجاملوا مع انو معظم الجامعة بتعرفني بس معرفة سطحية
ما كان عندي غير الشباب ديل
بعدها كل واحد مشي شاف جدولو وشاف اصحابوا
احمد ضربت ليهو واحدة من جكسوياتو ديل مشي يتونس معاها وخلوني برااي 😅
قلت ليهم بعد تخلصوا تعالوا بتلقوني هنا وانا لو زهجت برجع الداخلية
الروتين العايش بيهو يمكن كان قاتل بس كان ارحم لي كتير من اني اسمع كلام عمي وابقي تحت طوعو واقعد معاهو مزلول
الجامعة الداخلية او الداخلية الجامعة
مرات لمن ارهج بمشي السوق واقعد مع صبري وانشغل بي الدكان وكدااا
اكتر فترة بحبها فترة الامتحانات لانو بندرش وما بحس بالوقت الكتير العندي دااا وماعارف اعمل فيهو شنوو
المهم وانا قاعد في الجامعة في مكانا المعهود الجبنة الجمب قاعة عبد الله الطيب
سرحان كالعادة جات في خاطري روان وبقيت اتبسم براي ، وقلت جواي الفترة البسيطة العرفت فيها روان كانت درس مهم لي اني فعلا حقدر اتجاوز محنتي وظروفي واتسامح مع الحصل لي في حياتي وبقيت بقنع في نفسي انو دي سنة الحياة وكداا
لكن كانت المشكلة انو كل ما احاول اتجاوز بتحصل في حياتي مصيبة تخليني ارجع تاني لي نقطة الصفر ، بس بعد موضوع روان بقيت بحس انو في أمل لسة يعني لو في نص زحمة المشاكل دي بتجيني حاجة حلوة زي روان انا ممكن اعافر
تاني ارجع اقول لكن غير روان ما عاوز تاني وهكذااا🤦🏾♂️
استمريت في التفكير والسرحان لحدي ما حسيت بي يد في كتفي وتلكز فيني وبتحاول تلفت انتباهي
قطعت سرحاني وفي بالي انو احمد او منتصر
اتلفت وراي عشان اشوف دا منو وكانت الصدمة 😅
روااااااااااان 😍
اي رواااان بي شحمها ولحمها وبي كامل هيئتها ما ناقصة بالعكس زايدة جمال علي جمالها
لابسة عباية وكانت اجمل ما يكون ، انا طبعا راسي شطب وبقيت ماعارف اقول شنو ووقفنا مسافة ساكتين وبعدها بصوت واحد الاتنين
" كيفك "
وضحكنا سوااا
كان معاها أحمد واقف بس م اتكلم وخلانا علي راحتنا ، سألتها
الجابك هنا شنو ولي يا احمد ما وريتني ؟؟
احمد قال لي :
وأوريك لي شنو ، اديني سبب يخليني اوريك
اجابتو دي كانت عميقة شديد وكان وراها سؤال
انو م دام كسرت حنك روان وعاوز تنساها لي هسي اهتميت ، كان عاوز يوصل لي رسالة انو ما ينفع ابعد عن روان
قعدنا واتونسنا ، ولفينا الجامعة انا وهي واحمد زاغ مننا
وطبعاً انا كنت لحظتها حاسس اني في الجنة وانو الدنيا رضت علي
كنت مبسوط زي الشافع والله 😭💜
جية روان ولقاها دا ريح قلبي شديد ورجعني مبسوط من تاني ، اكتفيت لحظتها انو انا ما عندي غير روان وانو مهما بعدت ما حقدر انساها او امسح الجواي ليها من حب
قلت ليها جيتي كيف ؟
قالت انها اصلا جات مع حبوبتها عندها عملية وجات ليها كم يوم واتفقت مع احمد يجبها الجامعة اصلا من زمان هي كان نفسها تشوف جامعة الخرطوم وتقري فيها ..
سألتني ؟
لي بتحاول تهرب مني ياحسن !!
قلت ليها:
عشانك😊
ردت لي رد وجعني شديد
قالت لي:
هو انا طلبت منك تخليني عشان مصلحتي ، عارف
لو كان واصلت ودافعت وما حصل نصيب ما كنت حزعل بس هروبك حسسني اني هينة عندك
انا لحظتها مسكتها من يدها ولحظتها قلبي وقف وقلبها وقف واتأكدت ساعتها انو كلامنا دا مجرد عتاب لكن ماف شئ اتغير جوا اي واحد فينا
قلت ليها ابدا والله ما بتهوني علي 💜
انا بتهون علي نفسي لما احس اني حظلمك او اجي عليك او اخرب حياتك ...
انا لو حكيت ليك انا شنو والحصل معاي شنو في حياتي والله حتفهمي انا لي عملت كداا
قاطعتني وقالت لي :
احكي لي انا اصلا جاية عشان تحكي لي
سكت مسافة ودا كان تحدي لي
انا عمري ما حكيت لي زول ومابحب احكي ، وهي عاوزة تعرف
اعمل شنو او اتصرف كيف هسي 🤦🏾
لقيت نفسي تلقائيا قلت ليها طيب حأحكي ليك
سقتها وطلعنا برا الجامعة ونزلنا شارع النيل في مقاهي هنا علي النيل قعدنا هناك عشان الجوطة حقت الجامعة
وبديت احكي ليها
فضلت احكي من اليوم الماتت فيهو امي لحدي اخر لحظة اللي انا وهي قاعدين فيها
بعد خلصت عاينت ليها لقيتها بتبكي ، بتبكي ودموعها كانت جاريات مطر
قلت ليها ما تبكي انا ما بحب اشوف نظرة الشفقة في عيون الناس علي 🤦🏾
قالت لي وصوتها كان برجف :
انا ما شفقانة عليك بس انا زعلانة لي انت يعملوا ليك كدااا هم لي يظلموا واحد زيك
وبعدها مسكت يدي وبقت تطمن فيني
اكذب عليكم لو قلت ليكم ما طمنتني ، كل حرف كان بطلع منها كان بدواي جرح ولحدي ما خلصت كلامها انا حرفياً حسيت اني اتعافيت
جبرت بي خاطري وحبيتها اكتر💜
قلت ليها روان
قالت لي اي يا حسن عاوز تقول شنو ؟
-بحبك يا بت 💜
بقيتي من نصيبي ما بقيتي من نصيبي بحبك وعاوزك يابت الناس
قلتي شنوو !
سكتت روان وخجلت كعادتها ، بس ورا سكوتها قريت ريدة وحب لي كبيييير
ودا كان اجمل يوم في حياتي ، اليوم اللقيت فيهو نفسي بعد رحلة ضياع اليوم الحسيت فيهو بي عدل ربنا وحسيت بي عوضو لي عن كل لحظة ظلم والم وفقد انا عشتها
عارفين انا لحظتها سامحت الدنيا كلها علي العملتوا معاي ، سامحت عمي جمال وسامحت عمي الريح وسامحت كل زول ظلمني
عرفت لحظتها انو الحب قادر يغير واتزكرت كلام عم إبراهيم
" الراجل ان حب بتغير "
وقررت احارب عشان روان حتي لو خسرت ما مشكلة المهم احارب
روان قالت لي :
حسن حبيب القسي ، الكلمة دي كنت عاوز اقولها ليك من ايام البكا لكن م قدرت وهسي قلتها ليك
اسمع ياود الناس
انا حبيتك وما بنكر لكن عاوزاك تعرف شئ واحد بس
انا أخترت أحبك ، وانا من قمت اتفرض علي كل شئ من لبسي لي راجلي الحكمل معاهو حياتي
عمري ما خيروني بس انت الوحيد الاتحديت نفسي وعاداتنا وتقاليدنا واتحديت كل شئ واخترتك
فيا ود الحلال حارب عشاني ، ما عاوزة يجي يوم اندم اني إخترتك😊
إبتسمت في وشها وقلت ليها :
ان ياروان إتأذيت من طوب الأرض ولسة واقف علي رجولي ، وبعد حبيتك سامحت الظلمومي كلهم
والعفو أقوي من الإنتقام
باقي ليك حبك الخلاني اسامح الدنيا م بخليني احارب عشان 💜
يا بت الناس وحياة حبي ليك انا جمبك
الا تجي من الله فوق ساعتها اعفي لي بس
انا بس ما عاوز منك شئ كتير ، كل العايزوا منك بس تبني الإتهدم جواي من جديد ، شكليني زي ما تحبي وارسميني علي كيفك
لونيني بالألوان البتحبيها ، انا والله في الدنيا دي غيرك ما عندي شئ ياكي الفاضلة لي ياروان
وانا كان علي والله اجيب الدنيا تحت رجليك واعيش أرضيك واسعدك واهنيك 💜
مسكت يدها وكانت دافية وعرقانة ، اي ياهو الحب زاتوو
لحظتها انا شفت الدنيا دي دنيا تانية ، والناس كانهم ناس تانين
إحساس انك تلقي نفسك بعد رحلة تعب ويجيك زول يحببك في الدنيا الكرهوك ليها اقرب الناس ليك
لو الإنسان بتحسب عمرو بي اللحظات الحلوة العاشها فأنا إتولدت يادوب وعمري إبتدا مع أول مرة شفت فيها روان 💜
