#درويش_ودعجبنا
#الحلقة_22
" بسم الله الرحمن الرحيم
ابن أخي العزيز وأبني حسن
أنا عارف اذا انت قريت الرسالة دي فحتكون عارف اني سافرت ، انت عارف اني كنت صريح دايماً معاك
وحأكون صريح معاك وحأحكي ليك القصة من البداية للنهاية
أسمع يا حسن ..
أنا كنت شريك مع عمك الريح في كل شئ اتعمل من البداية للنهاية
ما كره مني ليكم بالعكس بحبكم جداً ، وما كان نفسي نوصل للمرحلة دي بس يا حسن
انا بحب نفسي أكتر ، انا عارف العملتوا غلط وغلط كبير في حقكم بس اعفي لي ..
خلي بالك من أختك فاطمة واسمع كلام عمك عشان اختك ، مرات الإستسلام للموجة بكون نجاة لي الإنسان
ما حتسمع عني تاني وما حتشوف وشي ودي الحاجة الوحيدة الحقدر اعملها عشان عارف اذا شفتني فيوم ممكن تقتلني مع اني استاهل الموت
ودعتك الله "
صدمة جديدة 🤦🏾
بس م اتأثرت وما زعلت ولا فرق معاي 😅
خلاص البقي بقي وما جات علي عمي جمال
كل شئ بقي ما فارق ، الشئ الكان فارق فاطمة وفاطمة خلاص راحت ومشت لي رب كريم وأحن مني عليها
الكلام أنا ، حأمشي متين لي رب كريم ... !!
طلعت من بيت عمي جمال ومشيت بيتنا وفتحتو ، خشيت والبيت ، كان مخيف شديد وموحش لدرجة ما تتصوروها
البيت الكان أمان وكان حنين علي الليلة بقيت خايف اقعد فيهو ، لانو البيت بي ناسوا وناسوا ماتوو
مشيت فتحت دولابي كان عندي تلفون زمان جادعوا في الدولاب ومعاهو تلفونات تانية 😅
طبعاً الزمن داك كانت طالعة موضة التلفونات الصينية وكانت رخيصة الوقت داك كل ما يطلعوا تلفون جديد بمشي بشتريهو
يطلعوا واحد تاني بجدع دا الدولاب وبجيب الجديد
كان تلفون نوكيا سي 4
كيباتو كتيرة شبيه بالبلاك بيري بس دا صيني
شلتو ووشلت شنطة ابوي الكان بسافر بيها
لميت هدومي كلها ، وختيتها جوا الشنطة
شلت حاجاتي كلها وأعلنت بيني وبين نفسي الهروب من الواقع داا
طلعت مشيت ناس عمتي ، ما دخلت جوااا وندهت علي صفاء
والزمن داك يمكن الساعة ماشة علي 7مساء قريب العشاء جاتني في الحوش
قلت ليها ما عندك شريحة ، م عاوزاها ؟؟
جابت لي شريحة وتلفون وقالت ليل كانوا حقات اختك وانا لميتهم
وجات شايلة معاها كديسة ، وقالت لي دي برضو حقت اختك كانت مربياها قبل تموت
انا عارفة اني مهما قلت م حقدر اخليك تقعد وحتي لو قعدت م حتكون مرتاح بس لو لي غلاوة عندك
اخد وقتك وتعال لينا راجع ياحسن
- ربنا يسهل ان شاء الله ودعتكم الله
شلت الكديسة وشلت التلفون ومرقت وقلت ليها :
-لو زول سألك م تجيبي ليهو سيرة ...
طلعت ودخلت رقم صبري لاني حافظ رقمو وهو الوحيد البثق فيهو
رد لي :
الو منو معاي ...
: صبري كيفك انا حسن انت وين
: حسن وين انت يازول انت كويس حاصل عليك شئ
: لالا كويس ما عندي عوجة انا ما عندي حتة اقعد فيها ممكن اجي ابيت معاك
: حبابك حبابك تعال طوالي البيت بيتك
: طيب وصف لي
وصف لي البيت واتحركت علي صبري وكان ساكن في دار السلام ..
وصلت لي صبري حوالي الساعة 9:30كداا
وانا طبعا جنيه ما عندي في جيبي
وقفت بتاع امجاد ووصفت ليهو ولما اتفقنا ع السعر بتزكر قال لي المشوار بي 45 جنيه
قلت ليهو ما عندي قروش بس عندي التلفون داا
وطلعت تلفوني السي 4
ووافق وبعد وصلني شالواا ورجع لي 100 جنيه قال لي كدا حبايب
سبحان الله كنت بشوف الخير عند الغرباء وما بشوفو في أهلي
حاجة تحير الانسان
وصلت عند صبري وبت معاهو الليلة ديك والصباح طلعت معاهو علي السوق
العرفتو من صبري انو بعد عمي مسك كل الورق والاملاك حقت أبوي باعها
حتي الدكاكين جردها 🤦🏾
وكل الشغالين مع ابوي اتسرحوا اللقي مكان تاني اشتغل فيهو والسافر سافر وكلهم اتفرقوا
صبري مشي اشتغل مع حاج الأمين ودا كان واحد من التجار الجمبنا وصديق ابوي كان
وطبعا لما مشينا لقيت السوق كلو عارف قصتي بي تفاصيلهاا😅
الا انا بس ... وما كنت مهتم أعرف والله
اول ما جينا داخلين علي السوق كنت بشوف دكاكين ابوي مقفلة وجزء فيهو ناس تانية
احساس كعب كان ..🤦🏾♂️.
السوق كلو كان بعاين لي وبنزل عينو وكانو شفقانين علي 😅
كنت بشوف نظرة الشفقة في عيونهم وكنت بتعب أكتر وبتضايق
قعدنا مع حاج الأمين في دكانوا
سألت صبري عن عبد الرحمن قال لي : إتصلت عليهو وجاي وبالمناسبة الورق والامانة قاعدات وهو هسي حيجيبهم انا خليتو يلمهم لانو هو فوق الشبهات
حاج الأمين دا زي ابوي كان ، زول شهم جداً
بقي بسأل فيني الحصل معاك شنو وكدااا
حكيت ليهم من بعد اليوم الجوني فيهو ناس صبري لحدي ما حكيت ليهم وفاة اختي ..
حاج الحبوب اتأثر شديد وقال لي لا حول ولا وقوة الا بالله العلي العظيم
قام سألني سؤال غريب ...
قال لي :
وجثمان اختك إتلقي ولالسة ؟؟
جثمان اختي اتلقي كيف يعني ... !!
صبري رد علي وقال لي :
انت ما حكو ليك !!
قلت ليهو
- لالا ما حكوا لي وماعاوز اعرف كفاية علي كداا م مستحمل عذاب
صبري قال لي
- العرفناهو انو اختك لما ماتت جثمانها م اتلقي وكانو بفتشو فيهو اكتر من اسبوع
بس ناس الدفاع المدني قالوا انو استحالة يتلقي لانو الحتة الوقعت فيها دي الحتة الغريقة وجريانها شديد
طبعاً انا كنت كل شوية بتصدم بي حاجة جديدة وخير جديد 🤦🏾
الله يرحمك يا فاطمة اختي ، يعني بعد العذاب الشفتيهو دا كلو ما دفنوك 😭
بعد شوية جا عبد الرحمن وسلم علي وحضني شديد وكأني أخوهو وجيت بعد غربة
لمن حسيت انو قرب يبكي ، حقيقي العملوا معاي صبري وعبد الرحمن ماف زول عملوا
اخواااان بالجد وفي الحارة واقفين رتج
عبد الرحمن جانا شايل شنطة وصبري شالها منو وقال لي دي الأمانة ياحسن
لكن قبل تفتحها عاوزين كلنا نقول ليك شئ
