#درويش_ودعجبنا
#الحلقة_15
بعد ما إتصل علي عمي جمال وإستعجلني عشان أجي بيتنا وبعد م سمعت صوت جوطة
طوالي قمت سريع وطلعت من شقتو وجري علي البيت حتي بدون م أشيل كتبي وحاجاتي
ياربي الحاصل شنوو !!
ربنا يستر غايتوو
وصلت البيت وسامع صوت الجوطة من برااا ، وانا داخل علي البرندة حقتنا من الحوش محمد ود عمي طالع وشكلو غضبان ومتضايق شديد وطلع سريع ومرق برااا
خشيت جواا لقيتهم كلهم وقفين وشكلهم متنشنين
سلمت عليهم وقلت ليهم في شنو ياجماعة
وقبلت علي عمي جمال وسألتوا حصل شنو ياعمي ؟؟
وكان واقف وخاتي يد ورا رقبتو واليد التاني بمسح بيها علي وشو وشكلو كان معصب
ودرعلي عمي الريح وكان هايج شديد ...
قال لي :
اسمع يا حسن هنا ، من الليلة ولي قدام فاطمة اخت رجلها م تعتب الجامعة خلاص جامعة ماف تاني ليها دا كلام فارغ ساي زمان ساكتين عشان ابوك وابوك كان طالقها ساي المسكين هسي ابوك ربنا يرحمو تخش عليها تفهمها الكلام دا سامع وبقي يجوووط ويهرج
انا طبعاً بقيت واقف مصدوم دا شنوو داا وعمي لي بعمل كدا والسبب شنوو !!
قلت ليهم اول شئ فاطمة وين ؟؟
عمتي قالت لي جوا بتبكي معاها البنات ...
طوالي جريت خشيت غرفتها لقيتها بتبكي شديد لمن ما قادرة تاخد نفسها ، قلبي وجعني شديد وحننتني
قلت للبنات اطلعوا خلونا وهدو عمي
طلعوا وبقيت بهدي فيها ..
ما تبكي يابت انا هدا جيت احكي لي مالك
قامت تبكي زيادة وبقت تحكي ..
قالت لي:
عمي جا لقي صحباتي لمن جوني وشاف لبسهم وانت ياحسن عارف الاحفاد البنات بلبسوا كيف قام ناداني وقال لي ديل منو ؟؟
قلت ليهو زميلاتي في الجامعة والكلام دا هنا في البرندة وقال لي لابسات كدا لي هن جايات من ديسكو ولا شنو !!
وكانت ملاذ صحبتي جات ماشة علي المطبخ سمعت كلامو والبنات اتضايقوا ومشو وأحرجني
وانا قعدت ابكي
قلت ليها:
ولي م اتصلتي علي طوالي ؟؟
قالت لي :
قلت اخليك تقراا لمن تجي بعدين بحكي ليك
بعدها جا ناداني وجمع اعمامي وعماتي وقال لي تاني ماف جامعة تقعدي في البيت دا كلام فارغ
لحدي م نشوف ليك عريس يلمك 😭
وانا بس من ساعتها ببكي ، لي يقول لي كداا انا حصل يوم جبت ليهم الكلام ولا حصل لبسي كان كعب
ولي يقول لي عريس يلمك ، انا لو ابوي عايش ما ....
قلت ليها خلاص م تكملي اهدي اهدي كل شئ بتحل بس عليك الله بطلي بكا يابت انا حسن اخوك م بتعرفيني ياتو يوم كان نفسك في شئ وما عملتوا ليك
جامعتك حتكمليها بس انتي اهدي تمام ..
سكتت شوية وهدت بس لسة دموعها جارية
قلت ليها عايني انا حطلع واتناقش مع عمي م تطلعي وم تتكلمي انا بحل الموضوع دا تمام ؟؟
قالت لي تمام وانا طلعت برااا
لقيت عمي قعد في الكنبة وخاتي يدينو تحت حنكو ومعصب لسة
انا صراحة عصبي وبنفعل اقل شئ نفس طبع ابوي الله يرحمو وكمان فوق لي دااا فاطمة دي خط احمر عندي البمسها بي سوء بضبحوا زي الما حصل شئ
لكن مسكت نفسي وقلت ماف داعي اعقد المسائل
عمي الريح انا عارف طبعو متعقد من ابوي من زمان لانو هو الكبير لكن الكلمة الكانت بتمشي كلمة ابوي وعمي الريح رايهو م كان مهم زي راي ابوي من زمان ودي عقدتوو عشان كداا كان بتحكم في اولادو وبناتو شديد ومكرهم عيشتهم
المهم ..
قلت ليهو يا عمي ممكن اتكلم معاك برانا ونتفاهم في الموضوع دااا !!
طوالي عاين لي كدا وحدر لي وبي إسلوب كلو إستخفاف ..
والله ياعو الفضل تجيني انت ياحسن وتقول عاوز تتكلم معاي وتتناقش انا عمك جمال ابيت اتناقش معاهو اتناقش معاك انت
انتو اصلكم الاتنين ابوكم دلعكم وخلاكم عاوزين تطلعوا للناس في راسها
انا كلمتي قلتها البت دي جامعة لو تكسر رقبتها ماف ليها ..
ولو عصت كلامي بكسر رجلينها سامعين ..
انا صراحة بعد كلامو دااا اتضايقت شديد ، يعني عدم احترام للقاعدين وعدم احترام لي اخوهو الميت الما تم اسبوع ..
قلت ليهم كلام وانا كنت معصب شديد
ووجهت الكلام ليهم كلهم ..
ياخ انتو هسي دا وقت كلام زي داا !!
يعني نحن ابونا ميت ما تم اسبوع تربتو لي هسي باردة ومويتها ما نشفت
جايين تزيدونا زيادة انا ممتحن واختي انتو عارفنها حساسة ياخ نحن فقدنا امنا وابونا بدل تحتونا وتبقوا لينا اهل تجو تزيدو العلينا
ياخ لو عاوزين تتناقشوا في مواضيع زي دي بالله ما تتناقشوا لينا هنا في بيتنا ، اي زول يمشي يجوط في بيتو والكلام وجهتو لي عمي الريح
هنا طوالي جاطت
عمي هاج وشبكني انت قليل ادب وم اتربيت وجاني وطااااخ اداني كف .
وطلع طوالي من البيت عماتي ديل يبكن والوضع بقي متأزم
بعدها كلهم طلعوا وساقوا بناتهم الوحيد الفضل عمي جمال ...
بعد طلعوا جاني قال لي :
ما صاح ياحسن تتكلم مع عمك كداا دا عمك في النهاية وعمك الكبير
قلت ليهو :
عمي عاين انا جيتو وقلت ليهو نتناقش سمعتو قال لي شنو صاح !!
انا ماشافع انا زول كبير وبقيت راجل البيت دااا ومسؤول منو
اختي انا مسؤول منها ما زول تاني ، انا محترمو ولو كان قال لي الكلام دا انا
اني اخلي المدرسة والقراية بسمع كلامو لكن اختي لأ اختي لأ ياعمي
اختي خط أحمر
انا بعدين بعد العشاء بمشي بعتزر ليهو وبحاول اتفاهم معاهو لكن ياعمي عشان تكون عارف
فاطمة اختي بكرة حتمشي الجامعة والبسألها انا ما برحمو
وكنت معصب شديد ومتضايق وفي نفس الوقت بديت احس بي تعب المسؤولية والمشاكل والضغوطات
عمي قال لي :
احسن شئ تعملوا انت امشي اعتزر منو واتفاهم معاهو وانا معاك بجي لاحقك نتناقش كلنا سوااا
