#درويش_ودعجبنا
#الحلقة_18
مرت ثلاثة ايام وانا محبوس في القسم ، بدوم م أعرف انا هنا لشنو او تهمتي شنو
الحراسة كانت مواجهة مكتب الضابط المناوب اللي هو دا الجاء وقبض علي
طوال الثلاثة ايام دي انا كنت بكون قاعد قصاد باب الحراسة وكل ما المح الضابط طالع او داخل بكورك عليهو ..
يا سعادتك انا هنا لشنو ؟؟ وتهمتي شنو
لما يركز معاي كان بجي بعاين لي مسافة وبمشي وببتسم لي ابتسامة خبيثة
متزكر شكلو كويس وما حأنساهو
جهامة وصحتو سمحة وعندو بطن اكبر من باقي جسمو ، حسو عالي جداً لو لبس جلابية تقول تاجر مواشي او جزار
لهجتو قريبة بلهجة اهل الشمال ، تقريباً شايقي او حاجة بالشكل دااا
مشلخ ولونو اصفر ووشو باقي شر وعيونو حادة
وضحكتو ملانة خبث
وواضح انو ليهو هييتو في القسم داا ، كل العساكر بتخاف منو واذا جا ماري بصلحو قعدتهم
العساكر الكانو بجيبو لينا الأكل بحنسهم تحانيس عشان بس اقدر اعرف بلاغي فيهو شنو
في عسكري اتعرفت عليهو وكان مركز معاي انا تحديداً كل ما يجي بعاين لي وبمشي من نظرتو لي حسيت اني ممكن اقدر اصل لي معلومة من خلالو
امس اللي هو كان تاني يوم لي في القسم الضابط ما جا القسم .. او ما كان مناوب ساعتها م عارف
جا العسكري داخل جاب لينا الفطور
بعد خت الاكل مشيت وراهو مباريهو وهو حس بي
لمن قرب لباب الحراسة وقف وقبل علي
بي زهج كدا ..
في حاجة يامتهم ؟؟
مباريني مالك
قلت ليهو :
ياسعادتك انا من امس هنا وانا والله خالي وراي ناس مسؤول منهم
انا عاوز اعرف اي شئ انا هنا لي ...
واتوسمت فيك الخير وعاوزك تساعدني
قال لي عاوز شنو ؟؟
قلت ليهو انا عاوزك توريني بلاغي فيهو شنو ؟؟
وعاوزك تاني تخليني اعمل مكالمة وبس
قام ضحك وقال لي :
ماعاوز قزازة ببسي وكيكة
انا من واقع خبرتي عارف العساكر ديل كلهم او معظمهم بتاعين كسرات
قلت ليهو :
شوف الببسي والكيكة بي كم وانا عازمك وكلو بي حقو سعادتك ودا جميل اكيد حردو وما بنساها ليك
قام مشي وم اشتغل بي ..
رجعت انا ورا اخر الحراسة في مصطبة كداا قعدت فيها وختيت راسي ورا علي الحيطة
الحراسة م بتتقعد وما مريحة كأنك في حمام وقفلو عليك بي برااا
الرقاد في الارض والقعدة في المصاطب والمصاطب اسمنت صبة
بس دا كلو ما هماني ، همي كلو فاطمة كيف وحاصل عليها شنو
ولي الان لي ماف زول جا سأل مني !!
عمي جمال وين ؟؟
كنت عارف الموضوع وراهو عمي الريح 🤦🏾♂️
فاطمة اكيد فقدتني وعمي جمال لو عرف اكيد حيجي جري .. ياربي ما عارفين انا في ياتو قسم مثلا
طيب لو م عارفين اول قسم حيجو يفتشو فيهو قسم الاوسط داا لانو اكبر قسم واقرب قسم
لالا اكيد في شئ ...
رجعت تاني افكر في فاطمة وفي حالها وانا ماعارف شئ عنها
في المساء كداا
حوالي الساعة 8:30 كداا جا العسكري القبيل وطبعا من كلامو مع الناس وتركيزي عرفت اسمو
بقولو ليهو معاوية
اسمراني طويل شكلو من جبال النوبة ، بلبس الطاقية حقتو بالجمبة الشارة تكون علي الجهة اليمين وبكفكف قميصو لحدي اخر شئ ولانو جسمو كان مليان ومعضل كدااا مع طولو كان هائم حول نفسو ومفتكر نفسو لواء عديل
حتي في مشيتو تلقاهو رافع راسو كدا ويعاين للناس من فوق لي تحت
بس ظاهر انو العساكر بحبو شديد لانو زول ضحك وكل شوية يجي يقول لي العساكر نكتة ويضحك ويمشي
بس مع العساكر حنين ومع الناس البجو القسم حازم وبركب مكنتو دي
المهم جا وقف قصاد الحراسة وبقي يكورك
أدم يا ادم ...
ادم دا واحد من المحبوسين معانا هنا عمك كداا سكير جنوبي شكلو زبون عندهم كل شوية يحكي لينا انو طوالي بجي هنا
لمن العساكر حفظو
بقعد ليهو زي اسبوع وبطلعو .. حتي بقو م بفتحو فيهو بلاغ ولا بعرضو نيابة او محكمة
الا في حالة جا بي مشكلة او حاجة زي دي
عمك ادم مشي عليهو وكان بترتح لانو السكر خلاص عتق في جسمو وبقي م بتفرز سكران ولا واعي
شوية وجا راجع وقف قصادي وقال لي
هي ولد انت ، ولد سمه زي داا بجي هراسة لي شنو ؟؟
انا ما عندي اخلاق ولا فاضي للعولاق داا
قلت ليهو :
اسمع اختاني انا بخمك بي كف بتقع جنازة قبلك ما ناقص سكاري
هو كل م اقول كلمة يضحك ويأشر علي باقي المساجين نظام شوفو دا بقول شنو
تقريبا هو م كان واعي ولا واعي م عارف
قال لي :
عسكري دايرك ...
انا كنت ورااا في اخر الحراسة والحراسة اصلا شكل حرف L
ممر طويل علي يدك الشمال زنازين تانية بختو فيها المتهمين بي جرائم كبيرة او ما واعيين زي زنزانتين هم اخر حاجة الحمامات
نهاية المممر علي يدك اليمين قصاد الحمامات زي غرفة كبيرة كداا فيها مساطب المتهمين بقعدو فيها
انا قمت ومديت راسي علي الممر اشوف هل كلامو صاح لو م صاح بكفتو اصلا انا روحي محرقاني وقافلة معاي
شفت العسكري واشر لي تعال يعني
مشيت عليهو
اول م وصلتو كسرت ليهو. تلجة
سعادة اللواء معاوية
قام ضحك
لواء أديل ما أسرت ألي
بي لهجتو
لالا ياخ دا مقامك اها حتساعدني
قام قال لي اول شئ انت بالذات الدابت موصي م يتعاملوا معاك
قصدو ماف زول يساعدني من العساكر ، المهم
قام قال لي :
لكن شكلك ود هلال وما بتاع كوكو ومشاكل
ما مجرم انت
قلت ليهو فعلا انا جابوني وماعارف حتي تهمتي
قال لي اسمع انا بوريك لكن لا شفتني لاشفتك وبعدين بعد تتلع هقي برااا حلاوة الطلعة
قلت ليهو ابشر
واصل وقال لي :
انت مامفتوح ليك بلاغ عندنا هنا ، قلت ليهو كيف يعني
قال لي كدا عديل ماف بلاغ بي اسمك
طيب وحابسني لي ..
قال لي والله الدابت دا هو طلع الدورية بنفسو وما طوالي بطلع بي نفسو لكن لمن يطلع مع الدورية ويجيبو ليهم زول معناتو دي لبطة كبيرة
وقام مرق تلفونو قفلو ودخل شريحة كدااا ، شكلو دي البشغلها للمتهمين يتصلو بيها
مفتح معاوية لكن ، عشان لو اتشم ريحتو م يعرفو انو دا هو
فتح التلفون وكان تلفون صيني كدااا بتزكر نوعو
تلفون شيطان لو متزكرنو صوتو عالي شديد
لما فتح التقول القسم دا كلو صحي
لكن شكلو العساكر مشو العشاء وما كان في ناس كتار
قال لي مليني الرقم عشان تتصل لي زول يشوفك ووريهو م يجيب سيرة انك اتصلت ليهو
كنت عاوز امليهو رقم فاطمة بس قلت عمي اكيد حيعرف دا لو م شال منها تلفونها لي هسي
جاني في بالي عمي جمال وبعد مليتو الرقم
قلت ليهو لالا خليهو
قال لي اصلا مغلق الرقم دااا ...
مغلق !! كيف داا ياربي عمي جمال مالو
مليتو رقم صبري وما كنت حافظو كلو ، متزكر نهايتو ياربي 80 ولا 88 م عارف المهم جرب 80
طلع ماهو قلت ليهو جرب 88
قال لي كدا هسابك كتر وهلاوتي تزيد
يعني التقول مؤجر لي عربية 🤦🏾♂️
جرس طويل ماف زول رد ...
قلت ليهو خير يازول لو رجع ليك جيبو لي
وخلاص قنعت انا وزهجت شديد
قلت حسبي الله ونعم الوكيل وقبلت راجع
فجأة التلفون ضرب
قبلت رجع لي معاوية العسكري وقال لي نهايتو 88 دا موش زولك ؟؟
قلت ليهو اي جيبو شلت التلفون ورديت
صبري :
الو منو معاي لقيت مكالمة من الرقم داا !!
صبري انا حسن اسمعني م عندي زمن
صبري :
حسن !! وين انت يازول تلفونك قافل ليهو يومين قلت عيان مالك ؟؟
صبري اسمعني بكرة من الصباح تجيب عبد الرحمن وتجوني في قسم الاوسط انا محبوس هنا بدون تهمة وماف زول عارف
قال لي خلاص بجيك من الصباح اغشي اهلك اكلمهم
قلت ليهو لالا م تجيب ليهم سيرة تعالوا براكم وحاجة تاني
تمشي الصباح المكتب الخزنة شفت الصندوق الفيو مفاتيح المخازن ؟؟
قال لي اي
قلت ليهو عاوزك تشيل مفتاح منهم فيهو علاقة بالأحمر كداا بتاعة المريخ
قال لي اها
قلت ليهو وتمشي دكانا الفي سوق امدرمان
دا اول دكان لي ابوي وكان مكتبو القديم
فيهو خزنة هناك
تمشي تفتح الخزنة ديك ، حتلقي ورق عاوزك تشيل الورق دااا وتخلي معاك في مكان امن زول يعرف خبرو غيرك ماف
وماف زول يشوفك امشي بدري ورجع المفتاح محلو
قال لي :
حسن في شنو ياود قلقت بي
صبري ماعندي زمن بس القلتو ليك دا سوي انا ماعندي زول اثق فيهو غيرك
وتعالو لي بي جاي عبدالرحمن يشوف الحاصل شنو
وقفلت منو ؟؟
بعد دا اللعب بقي ع المكشوف
انا من تحليلي عمي ليهو دور في الحاجة دي وباعدني لانو عندو فهم
رجعت التلفون للعسكري وقلت ليهو بكرة حعشيك عشوة كاربة
ومشي مني مبسوط ....
رجعت وانا كدا شوية قدرت اعمل حاجة في المصيبة دي
ورقت شوية وبقيت افكر بي رواقة واربط الأحداث
طيب ممكن اتقبض علي بي تهمة شنو !!
اذا عمي عندو قرار محكمة بي وصايتي تاني يفتح بلاغ فيني لي شنو ؟؟
عقلي طش م وصلت لي شئ
غير انو بعدني لي سبب ، عندو شئ في راسو عاوز يسويهو
بقيت لافي في الحراسة مرة امشي اقعد في باب الحراسة واعاين للعساكر ماشين وجايين
ومرة ارجع اقعد ورا مع المساجين المعاي ، كانوا بتونسو واي واحد بحكي في قصتو
انا بس بسمع في كلامهم ما شاركتهم ، م كانو شغالين بي ..
في النهاية مشيت قعدت في الممر وتحديداً قصاد
اول زنزانة وربعت يدي وغمضت عيوني وحاولت انوم
مع انو النوم م جاني بس حاولت
بعد شوية سمعت صوت زول بنادي علي من جوا الزنزانة دي
ياشاب ياشاب ...
ياولدنا
رفعت راسي وكان في زول في الزنزانة دي ..
واقف قصادي بينا حديد الزنزانة بس
ماسك في الحديد بي يدينو وكان مجنزر فوق وتحت ، كلبشات في يدينو وتحت في رجولو
ما كبير في السن ممكن يكون عمرو زي 40 او نهاية ال30
عاينت ليهو ملامحو كانت ما واضحة شديد لي
بس من شكلو كان جهامة كداا لابس بنطلون جينز
وقميص مخطط اسود واحمر نص كم وواسع عليهو وفاتح زرارتين فوق او مقطوعات م عارف
قلت ليهو انت معاي انا ؟؟
قال لي اي معاك ..
مالك قلقان كدااا ، جاي في شنو !!
دا طبعا اول سؤال ممكن يسألوك ليهو في الحراسة بلاغك شنو !!
قلت ليهو والله ما عارف تصدق
قال لي اهااااا فهمتك ، سياسة
قلت ليهو سياسة شنو م بتاع سياسة انا !!
ضحك قال لي:
اي زول بجيبو هنا بدون بلاغ بكون سياسة في الاغلب
شكلو زول فاهم ما جاهل من طريقة كلامو واسلوبو المنمق
قام نزل تحت وقعد ع الارض وبقينا مواجهين بعض
زنزانتو كانت طافية مافيها نور بس لما قعد نور الممر ضوا شوية علي وشو وقدرت اشوف ملامحو
اخضراني كدا ووشو مليان شام ودقنو كثيفة كداا
قال لي :
انا خالك منعم اسمي منعم اسمك منو !!
جاريتو في الكلام
انا اسمي حسن انت هنا بتهمة شنو ؟؟
كان واضح وصريح قال لي :
قتل
اتخلعت انا وعاينت ليهو قتل قتل يعني كاتل زول !!
قام ضحك وقال لي اي كاتل زول مالك مستغرب 😅
كيف م استغرب وكمان بتضحك وانت قاتل زول وما خايف او حتي شايل هم
ضحك تاني وقال لي :
شفت انت شايل هم قدر شنو. في حاجة م عملتها زي م بتقول اها انا قاتل زول يعني مصيري محتوم
وهدا مبسوط
عاين انت م تشيل هم م بتقعد كتير ..
من خبرتي بقول ليك الانت فيهو دا قرصة اضان من زول معاديك
قلت ليهو عمي مقاصدني
قال لي عمك عديل ...
اها وبعد تطلع حتعمل شنو ؟؟
قلت ليهو احتمال كبير اقتلو ... قام ضحك
وقال لي وتجي تقعد زي كدااا
ما تتهور انت لسة شاب اسمعني يا حسن
اخد الحق صنعة وحرفة خليك مفتح
قلت ليهو كلامك صاح والله لكن انا ماعاوز مشاكل ما كان نفسي نوصل لي دااا
كل الكنت عاوزو نكون زي ما كنا اهل واحباب ما اكتر وانا ما شايل ليهم حقد او ضغينة انا بس والله خايف علي اختي منهم لانها براها
بقي يسأل فيني وانا احكي ليهو.
تقريباً حكيت ليهو قصتي كلهاا وإتأثر لي شديد
قال لي كلنا كداا انا زاتي والله خالي واري تلاتة اطفال ماعارف الحاصل عليهم شنوو
بس لو عاوز نصيحتي ما تتهور اتعامل مع الموضوع بي زكاء وما تضيع نفسك
وبقينا نتونس وقلت ليهو احكي لي قصتك
وكانت قصتو اغرب من غريبة وعجيبة
حكي وقال لي :
.
.
.
يُتبع
#أبوبكر_علي
