#درويش_ودعجبنا
#الحلقة_21
"والجوه الجوف يا فاطمه صعيب
الجوف محروق نيرانو لهيب
وما فضل عاد
الا اظن دخان ورماد..
وملاني الخوف الشقا الجوف
ويبس فيهو عقاب الروح
ويني الروح؟
الروح يا فاطمه وراك راحت
وفضل بس يا فاطمه سواد
وبقينا بعاااااااد "
ماتت فاطمة ورحلت أجمل حاجة في دنيتي ، رحلت أخر حاجة فاضلة لي من أسرتي 😭
رحلت ولو ما الموت حق علينا كلنا كان جنيت ...
ويمكن اكون فعلاً جنيت ، وانا ما مؤآخذ اذا جنيت
المريت بيهو بجنن أي زول خليك مني أنا اللسة عمري ما وصل ال20
دي الدنيا البقولو عليها بتحقق فيها احلامك وتعيش مبسوط ؟
دي الدنيا اللي الناس بتتشاكل وتتحارب فيها
ما عاوزها ، عاوز اموت والحق اختي وامي وابوي
كفاية يا دنيااا كفااااااااااااية 🤦🏾♂️😭
وعيت بعد مدة وكنت في المستشفي راقد ، فتحت عيوني
لقيت عمتي وبناتها ومحمد وعمي الريح واقف
وبقيت بعاين لي عمي الريح
تصدقوا عمي الريح كان بشبه ابوي شبه غريب ، صورة طبق الأصل منو بس هو اكبر
كانوا بقولوا لي ابوي انت بعد كم سنة حتبقي كدا ويأشروا لي عمي
دا كان احساس صعب ، انك تشوف الظلمك شبه ابوك ومن لحمك ودمك
حرفياً انا في اللحظة دي انتهيت تماماً واعلنت الاستسلام ، تعبت وانا بحارب وبدافع عن اختي وعن حياتنا وإستقرارها
انا لدرجة ما كنت قادر ابكي أختي ، جفيت تماماً
دموعي كملوا وحزني انتهي
ما فضل فيني حيل ابكي بيهو ، بقيت بسرح بس
قربوا مني كلهم واي واحد دمعتوا في خدو جارية
وبقو يسألو فيني كيفك وحاسي بشنو ؟؟
ياسلام ياااخ حنية شديدة وخوف شديد علي
طيب من الأول لي وصلتونا لكداا
عمي الريح قال ليهم خلو يرتاح واطلعوا براا كلكم
انا لحظتها خفت وما خفت
في الاول خفت يكون عاوز يقتلني بعد يطلعهم
بس تاني قلت في جواي خلي يقتلني وارتاح والحق اهلي ، لانو انا ما ضامن نفسي بعد اطلع ممكن انتحر عادي 🤦🏾
طلعوا كلهم وخلوني مع عمي الريح وبقي بعاين لي في عيوني ...
قريت في عيونو شر وغضب وإنتقام وكره
قال لي :
انت ما عندك زنب الزنب كلو علي ابوك ، هو الوصلنا للمرحلة دي
رديت ليهو :
م تجيب سيرة أبوي في لسانك لانو أبوي لو كان عايش ما كان قدرت تعمل ربع العملتوا دااا ، انا ابوي كان سيدك وبعد مات سيدك ولحدي م تموت حيفضل سيدك
لكن انت خسيس وما عندك زرة رحمة
عارف انت بتشبه شنو من الحيوانات ؟؟
الضبع بالتحديد
لانو الضبع خواف ولما يهاجمك م بهاجمك راجل لي راجل لانو خواف
ممكن اسألك سؤال ؟؟
ممكن تحكي لي الحصل عاوز اعرف الحقيقة ؟؟
وماف زول غيرك حيقول الحقيقة صاح
قال لي :
لو كان سمعت الكلام زمان كان هسي اختك جمبك وما كان حصل دا كلو ..
انا ما عملت شي غلط انا اخدت حقي بس
قلت ليهو :
حقك !!!
ياتو حق داااا
قال لي : انت قايل أبوك دا قروشو دي كلها حقتو براهو
ابوك لو ما أنا خليتو زمان يخش السوق ما كان بقي الحاجة الهو فيها دي
ابوك كان بفرض رايهو علينا وماسح شخصيتي وكل قرش ابوك جابوا انا أولي بيهو لانو انا الكنت السبب في انو يخش السوق
رديت ليهو :
ابوي كان صاح لما مسح شخصيتك لانو شخصيتك مقرفة ومقززة ، لكن انا ماعاوز اسمع تبريراتك انا عاوزك تحكي لي الحقيقة
