#درويش_ودعجبنا
#الحلقة_الثامنة
أصبحنا واصبح الملك لله ، نمت بعد الصبح زي 3 ساعات كدا وصحيت بعد ما كان اخر مشهد شفتوا شيخ محمد احمد وهو في مصلايتو الكانت واضح انها مصنوعة من جلد بهيمة
الصوف ابيض ناصع وفي شوية بقع صوف لونهم بني غامق
صحيت وقمت ، لقيت في الطربيزة جمبي في جلابية مطبقة لونها اخضر
جلابية جديدة كانت ومعاها سروال ابيض وشال بالأحمر كان وفوق ليهم فرشة جديدة ومعجون ، غيرت هدومي ولبست الجلابية والسروال والشال لفيتو حولين رقبتي
لانو م كنت عارف اعمل بيهو شنو 😅
الفرشة والمعجون شلتهم وطلعت مشييت مسااافة لحدي م وصلت جمب وضاية كدا فتحتها واتسوكت وجيت راجع
وانا راجع كان في ناس كتيرة بس ما شديد في المسيد ، ناس بتسلم علي بعض وشكلهم
مريدين وبعضهم مداحين وغيرو
واحدين لابسين جلاليب بالاخضر وواحدين بالأحمر وواحدين لابسين ابيض عادي
والاهم من دا كلو لاحظت ليهو انهم كانو مبسوطين كأنو الليلة عيد وهي فعلا عيد
الجمعة عيد للمسلمين
كانو كلهم او معظمهم رابطين شال في نصهم
وطرف الشال المبروم مدلدل لي تحت
وانا طوالي عرفت يتربط كيف الشال
وانا راجع علي الغرفة حقت الشيخ الناس كانت كلها بتعاين لي وبتودودوا بينهم
دا منو !! وبالذات دهشتهم زادت لما شافوني طالع من غرفة الشيخ المابخشها اي زول
دخلت الغرفة لقيت الشيخ جواا قمت سلمت عليهو وصبحت عليهو
صراحة الشيخ دخل قلبي وحسيتو قريب لي شديد
قال لي صباح الخير ياولدي ماشاء الله الجلابية وجيهة فيك دي هدية من ابوك الشيخ
عشان تتزكرنا بيها ...💜
شوف الدنيا دي مرات بكون فيها ناس طيبين شديد وحنينين علينا ومرات بظهروا فجاءة بس بس بطيبوا خاطرنا
من زمن طويل دي اول مرة زول يجيب لي هدية وكنت مبسوط بيها شديد 😭
شكرتو شديد واستأذنتو اني حرجع الحلة عشان اصبح علي ناس احمد واشحن تلفوني لكن بجي بعدين الحولية 💜
ابتسم كعادتو وقال لي :
انت اصيل يا حسن انا عارف انت محرج من امس لانو ابراهيم والد احمد ممكن يزعل منك
بغض النظر عن خلافي معاهو بس كونك
تشيل هم زعلوا دي اصالة منك وانا بكبرها ليك جدا ، وحتي لو م قدرت تجي بعدين م تضغط علي نفسك
بس ما تنسانا واتزكرنا دايما وادعي لينا معاك ياولدي يمكن انت اقرب مننا منزلة لربنا
قلت ليهو لالا اكيد حجي انا ارتحت ليك شديد يالشيخ واكيد ما بنساك ولا حنسي الليلة دي طول عمري 💜
شلت حاجاتي وطلعت لابس جلابيتي الجديدة وكانت عاجباني شديد والشال برضو اتلفحت بيهو ...
طلعت وصورة الشيخ محمد احمد اتحفرت جواي خلاص وبقي في راسي وفي قلبي
ومشيت ع الحلة
وصلت البيت وتلفوني كان قافل وكنت مبسوط شديد ومرتاح نفسياً
وانا في خشم الباب عاوز ادقو عشان يفتحو لي اتزكرت حاجة مهمة شديد
عم ابراهيم لو شافني حيعرف وحيزعل
تاهت مني دي وطوالي جريت خوفا من انو يجي زول يفتح الباب
اضاريت ورا شجرة نيم في الشارع الوراهم
وفتحت تلفوني بعد طلعت البطارية ورجعتها
كدا حيديني مساحة افتحو شوية ويقفل
اول م فتح اتصلت علي احمد
رد لي وشكلو كان صاحي يادوب قلت ليهو عم ابراهيم في البيت قال لي لالا من الصباح بعد الصلاة قعد في الجامعة مع لجنة المسجد عندهم ... تيت تيت البطارية فارغة
تلفوني قفل لكن كويس ادي مهمتو
رجعت تاني البيت 😅 زي الحرامي الشاف سيد البيت طالع قام اتدسي وبعد طلع جا راجع
المهم دقيت الباب الكبير حق الرجال ماف زول فتح مسافة لمن قنعت
مشيت باب النسوان دقيتو مسافة
فتحت الباب اخت احمد وأول م شافتني كتمت ضحكتها عشان م تحرجني ..
الضحكت وماقدرت تكتمها روان اصلا كانت طالعة شكلها منهم وراجعة بيتهم
الكلام دا زي الساعة 10:30 كدااا
وقت الفطور كداا
روان بتضحك وانا كنت بحبها اكتر كنت اسعد مايكون قلبي رايق وروان جمبي وبتضحك
صحي الشيخ كلامو صاح اعقد يدك وسبح واستغفر ربنا بهون عليك
قلت ليهم بتضحكو لي شكلي بضحك😅
روان قالت اي اي ولسة بتضحك
قلت ليها اضحكي سمح اضحكي لسة المهم انا كنت عاوز طريقة اتكلم معاها بس سناء اخت احمد واقفة م قدرت اعمل شئ
روان كانت بتضحك وانا كنت بكاوي في الدنيا وبنتصر عليها 💜
المهم سلمت عليهم وصبحت عليهم ودخلت
بعد اتأكدت انهم م شايفني جريت جري الديوان 😅
جريت زي المجنون علي الديوان وكنت جاري لاحق اشحن تلفوني ويفتح عشان اضرب ليها بعد شفتها ماسكة تلفونها في يدها قبل شوية
خشيت الشباب شافوني بس صوت واحد
بسم الله الرحمن الرحيم
وفكو الضحكة فيني وصحو احمد تاني
احمد عاين لي كدااا وقال لي
بي جلابتك دي نسميك شيخ حسن بس
كلامهم دا كلو م مركز معاهو جريت شلت شاحني وختيت التلفون في الشاحن وبفتح فيهو
احمد قال لي قبل شوية انا امي نادتني مشيت لقيت ...
لقيت نفسي بسبقو وبقول
روان اي عارف لاقيتها هسي وانا داخل
تلفوني فتح واخد ليهو عليقة كدا وبقيت منتظرو يشتغل زي الناس عشان اتصل علي روان
احمد قال وشافتك بي منظرك داا
ضحكت وقلت ليهو اي ، وضحكت فيني
قاموا ضحكو فيني
تلفوني فجأة اتصل وكانت روان 🙈
طوالي اشرت للشباب يسكتو ، رديت ليها
اول م رديت كلهم جو اتلمو فيني 😂
زي البهيمة الشفعها ملمومين فيها
طبعاً م بقدر امشي حتة تانية التلفون حيقفل
رضيت بالوقعت علي 😂
والشباب بي طريقة درامية وصامتة بقولوا لي افتح الاسبيكر وانا بأشر بي يدي يعني لا
وروان تشيل وتقول الواا الووو حسن الواا
قلت ليها
كيفك !!
ضحكتك وقالت لي انا ولا انت ياشيخ الطريقة ياحوار الشيخ وكانت بتضحك😅
دا شنو اللابسوا دا وكنت وين الصباح سألت منك سناء قالت من امس مافي البيت ؟؟
انا شمشارة صاح !! م من حقي اسألك ؟
قاطعتهالالا عادي والله 😅
عايني ححكي ليك كل شي بس م ينفع كداا
عاوز الاقيك وكنت جرئ كالعادة دي روان كيف م ابقي جرئ
سكتت وشكلها خجلت
قالت لي خلاص اشوف وبوريك وقفلت الخط
يادوب ما ركزت لقيت منتصر فاتح كاميرا حقت تلفونو وبصور فيني
انا شكلي سرحت في عالم تاني 😂
المهم ضحكوا فيني ودوروني شديد كالعادة
عبدالله قال لي منتصر
انت يامنتصر هدومك وينها جاي لابس جلابية
نحن م عندنا اولاد يبيتو براا وم معروف كانو بايتين وين بي طريقة درامية كوميدية كداا
منتصر بضحك قال
عمو الشيخ اداني هدوم جديدة
وضحكو كلهم وانا زاتي كنت بضحك وساكت اقول شنو عاد
م خلو لي جمبة انوم عليها 😂
سألوني من الجلابية وحكيت ليهم كل شئ حصل معاي من امس لحدي هسي
احمد كان بسمع وساكت م اتكلم
بعد شوية سمعنا سناء بتنده علي احمد طوالي احمد قام مشي
لما احمد طلع جاتني رسالة في تلفوني من روان
مضمونها
" بعد العصر في المسيد نتلاقي حتصل عليك تمام !! "
تمام شديد يا قلبي انا 🙈🙈
انبسطت شديد
بعديها احمد جا شايل صينية الفطور ، منتصر قام فتح الضلفة التانية للباب ودخلوا الصينية
فطرنا واول مرة اكل كداا وانا لسة حاسس اني جعان ، او اول مرة اضوق طعم الأكل
المهم اكلنا وشربنا الشاي
والشباب اخدو رقدة لحدي قريب مواعيد الصلاة
انا ما نمت لانو كنت كملت النوم كلو في المسيد ، بقيت كل شوية افتح رسالة روان واعاين ليها واتكشم براي
تلفوني فيهو برنامج منزلوا بسجل المكالمات
وكنت مفعلو لما روان اتصلت اول مرة عشان لو اتصلت تاني اكون حافظ مكالمتها
اخر مكالمة القبل شوية دي اتسجلت
فتحتها وبقيت بسمع في صوتها ولما تجي حتة الضحكة برجع المؤشر ورا واعيد الضحكة
وفضلت كداا لحدي ما اذن الاذان قمت استحميت واتوضيت وغيرت هدومي وجهزت للصلاة
الشباب برضو قامو وجهزوا وطلعنا الجامع
صلينا الجمعة وسمعنا الخطبة حقت عم ابراهيم ورجعنا تاني البيت
وبقيت راجي العصر متين يجي عشان نمشي المسيد 🙈💜
عم ابراهيم رجع معانا من الصلاة قال لينا بعدين حتمشوا المسيد ؟؟
سكتنا قام احمد قال ليهو اي يا ابوي حيمشو يتفرجو وكداا
قال لينا تمام م تتأخرو بس وانت ياحسن وين امس ؟؟
ومن طريقة السؤال شكلوا عارف الاجابة 🤦🏾♂️
سكتنا كلنا .. الظاهر الشباب ما عرفو يكذبوا عليهو
سكت انا وم عرفت اقول شنوو
عم ابراهيم اتحسس وقال لي
انا خفت عليك بس لكن م دام انت كويس طمنتني😊
رجعنا البيت
بعد ساعة كداا حوالي الساعة 3 جابوا الغداء واتغدينا كلنا واتونسنا بعد شربنا الشاي
انا بالي كلو في روان واني حلاقيها واتكلم معاها ..
جاني اتصال من روان زي الساعة 4 كدااا
رديت
روان اهلين كيفك
: كويسة انت كيف ، انا في المسيد انت وين !!
قلت ليها اقل من نص ساعة وبكون معاك
قالت لي طيب اسرع لانو انا مفروض قبل المغرب اكون في البيت
طوالي قمت وغيرت هدومي لبست لي بنطلون بيجي كداا وقميص كحلي
ورتبت نفسي ..🙈
وبغني
" الليلة بي شوفت الحبيب عيوني تبقي مكحلة ترن ترررم سمحة الصدفة تررم حلوة الظروف 😅"
احمد قال لي القميص دا م ظريف البس تيشيرت
كان عندي تيشيرت لونو سماوي فاتح كداا لبستوو
احمد قال لي جاهز !!
قلت ليهو اي ارح طلعنا كلنا انا واحمد ومنتصر وعبدالله وجو معانا اخوات احمد كنا ماشين علي المسيد
اتأخرت انا وخليتهم يسبقوني بخطوات وناديت احمد بالجمبة قلت ليهو في دكان قريب عاوز اشتري حاجة
قال فهمتك بعد ضحك
قام احمد قال لي منتصر انتو سوقو البنات ونحن بنلحقكم
قال لينا انا م بعرف المسيد بي وين لكن!!
احمد قال ليهو اخواتي بعرفو
نتلاقي هناك تمام
وفعلاً فارقناهم ومشينا في دكان كدا خشينا
فتحت التلاجة وشلت كم شكلاتاية كداا وكم شيبس وطلعنا
قرية ود عجبنا كانت لسة م متطورة ماف محل زهور او هداية عشان الواحد يشيل ليها هدية او وردة
حياتهم بسيطة لسة حتي الدكان معظم البضاعة سكر وشاي ..
مشينا المسيد بعدها واتصلت علي روان
ردت لي :
اها وصلت
قلت ليها ايواا ووصفت لي مكانها ومشيت ليها
خلاص انا بقيت حافظ كل شبر في القرية دي
لاقيتها وكانت لابسة اسكيرت اسود وبلوزة او قميص كداا لونها اصفر منقاوي كدا وطرحة لافاها في راسها
كانت حلوة شديد واول ما شفتها قلبي دق شديد 🙈
ما لاقي تفسير لي كل البحسو تجاها غير انو في راحة نفسية بعد رحلة من التعب وحاسس انو هي حتة مني ولقيتها ، حتة كان ضايعة
صراحة روان فتحت جواي كمية من الاحاسيس الكانت مدفونة
والغريبة للان م عارف شي غير انو اسمها روان وجارة ناس احمد بس
كل تفاصيبها كانت غايبة عني ، بس ما كنت شاغل نفسي كتير كل همي اني الاحساس الحلو دا عاوزو يستمر جواي وما ينقطع 💜
المهم ..
اول ما قربت ليها وشافتني
بي صوت واحد قلنا لبعض
" كيفك "
ضحكنا سوااا وسلمت عليها ، واتمشينا
قالت لي :
طبعا اتأخرتو وانا م ينفع اقعد كتير يعني بالكتير حنقعد ساعة
قلت ليها :
وهي الساعة معاك هينة راضي بيها !!
الساعة جمبك عمر ..
ملامحها كانت بتتغير بين خجل وحاجة تانية اقرب للخوف او القلق
سألتها مالك ؟
كانت صريحة في كل كلمة .. وكنت حابي صراحتها دي
قالت لي :
" ماعارفة كلامك معاي بي اسلوب حلو ومحاولاتك المجنونة عشان تقرب مني واحساسك الواصلني انك عاوز تفضل قريب لي مخوفني شديد ، انت م بتعرفني كويس ولا عارف اذا كنت مناسبة ليك او لا
فالخوف احساسك يكون مجرد دهشة او اعجاب ومع الزمن يتحول
فاهمني انت صاح ..!
كنت مركز مع كل حرف بتقولو ومهتم شديد
رديت ليها :
" عايني ياروان انا يمكن الظروف ما خلتنا نقعد كتير او نعرف بعض .. بس قصة خوفك من اني ازهج او ما تنفعي معاي شيلي من راسك
انا الخايف اني ما انفع معاك .. صراحة انا ما زي ما انتي شايفاني
انا واحد تاني خالص باهت جداً وعبارة عن انصاف شعور ، من كل شعور ربنا كتبو للانسان انا عندي نصو بس
فقدت النص التاني زمان بلا رجعة
انا اول مرة اقول الكلام دا لي زول واللي هي انتي
روان هنا ابتسمت وخجلت .. كانت مبسوطة وبتسمع كلامي
واصلت وقلت
انا عاوز احكي ليك اي حاجة حصلت لي من اتولدت لحدي اللحظة دي ، عاوز احكي كل شي جواي ليك ، وتكوني اول واخر زول احكي ليهو 💜
انا ما بعرف الحب ولا عشتو ولا جربتو ، وماعندي خبرة في تفسير الاحاسيس فأنا زاتي م عارف حاسس تجاهك شنو
بس البقدر اقولو اني في اللحظة دي حاسس اني اتولدت من جديد واني لاول مرة بتكلم وبسمع وبشوف
بقينا ماشين وبعدنا عن جوطة المسيد شوية والواطة كانت خلاص علي وشك المغيب
بعد ونسة كتيرة حلوة ، حكت عن القرية وعن حاجات كتيرة
بعدها عاينت لي تلفونها لقت الساعة 5:20 قالت لي انا اتأخرت مفروض ارجع بس م عاوزة امشي حاسة اني عاوزة اسمعك
قلت ليها لالا م مشكلة حنتكلم وحسمعك وتسمعيني
انتي عارفة انو نحن بكرة حنسافر ونرجع الخرطوم ؟؟
حسيتها اتصدمت وفضلت ساكتة🙂
انا كنت متضايق من رجعتنا دي اكتر منها😅
قلت ليها عايني
انا مستعد اعرف كل شي عنك من اسوء شي لي اجمل شي وبوعدك اني ما فارق معاي اي شي غير انك تكوني جمبي
ومستعد احكي ليك كل تفاصيلي تمام اتفقنا
قالت لي اي اتفقنا بي صوت ضعيف مبحوح
قلت ليها خلاص حرجعك البيت ..
وفضلنا ماشين علي الحلة بي اتجاه بيتهم
ولما قربنا نصل قالت لي خلاص انا بوصل انت امشي ناس حلتنا ديل لو شافوني معاك حينقنقو كتير
قمت اديتها الكيس الفيهو شكلاتات ومعاهو ورقة مطبقة
قلت ليها معليش كان نفسي اجيب ليك حاجة احسن من كدا تكون شبهك بس انتي عارفة حلتكم جعانة 😂
ضحكت وشالتهم وكانت عاوزة تفتح الورقة بس انا منعتها
قلت ليها حتفتحيها بس ما هسي بعد ترجعي وتروقي وتاكلي الشكلاتة بي مزاج ..
قالت لي اوكي وودعتني ومشت
وانا رجعت مبسووووط انطط في الشارع زي الشافع 😅
دا طبعاً بعد ما باريتها بدون م تشوفني واول ما دخلت البيت اتصلت عليها وقلت ليها
انا كدا اطمنت عليك وصلتي خلي بالك من نفسك
كانت ساكتة وماعارفة تقول شنوو
اخر حاجة قفلت منها
وانا راجع بنطط ومبسوط فجأة
لاقاني مؤتمن في نهاية شارعهم عاين لي مسافة وسلم علي
انا طبعاً خلاص مؤتمن بقي شبه عدو لي 😅
لكن اتعاملت معاهو عادي
قال لي اوو حسن الراجل الضكران وشكرني علي وقفتنا معاهو في وفاة والدتو
قلت ليهو العفو دا الواجب وكنت بتعامل بي حزر معاهو ، م عاوز افتح معاهو موضوع اصلو
فجأة سألني
الجابك بشارعنا شنو ؟؟
سكت مسافة وجواي قربت اضربو واقول ليهو انت مالك ..
سؤالو لي كان بطريقة عفوية بطبيعة ناس القري العفويين
مسكت نفسي وقلت ليهو
حايم في الحلة ساي اشوفها عاملة كيف وكدااا
واستأذنت منو ومشيت
بعد وصلت اخر الشارع عاوز الف عاينت ليهو لقيتو واقف وبعاين لي بطريقة غريبة جداا
ياربي دا مالوا شافني مع روان ولا حكايتو شنوو !!
ياخ قول شافني حيعمل شنو روان اختو ولا بتو
تاني اتزكرت انو لو شافني واتكلم ممكن يسبب مشكلة لروان
خفت واتضايقت شديد
رجعت البيت قلبي مقبوض والمغرب مع خشم الباب قال الله اكبر
.
.
.
يُتبع
#أبوبكر_علي
