#درويش_ودعجبنا
#الحلقة_35
" أنا درويش وماشي ، ماشي بي نور الله
والمعاهو الله عمرو يوم ما تاه
انا درويش وماشي ، ماشي بي نور الله
والمعاهو الله عمرو يوم ما تاه
.
.
بي صوت أشبه بي أصوات المادحين ، وكأنوا في حلقة زكر
كان الدرويش واقف في نص الميدان ، والواطة مغيرب كدااا ، المسيد فاضي ما فيهو زول بس أنا واقف والغريبة حولي في اصوات مادحين وناس بزكرو الله بس انا ماشايف غير الدرويش
كان فارد يدينو زي الجناحات وكأنوا عاوز يطير ورافع راسو لي فوق وكأنوا حدد وجهتوا الماشي ليها
فوووق السماء ....
كان بقول في الكلام الفوق داك وبلف حولين نفسو كأنوا بزكر في الله
انا درويش انا درويش علي باب الله وماشي بي نور الله وطريقي لي الله ورفيقي فيهو الله وزادي من الله
وكلو علي الله وكلوو علي الله 🥺
كان بلف حولين نفسو بسرعة وكل ماياخد كم لفة حولين نفسووو ويقاصدني فجأءة بقيف وبعاين لي
ببتسم لي وبرجع تاني يلف ويزكر ازكاروا دي
كان كل شوية بحس انو بقرب لي ولا انا البقرب ليهو ما عارف
وانا خايف منو وفي نفس الوقت عاوز اقرب شديد
جواي انو احساس بقول لي الدرويش دا حكون سبب في تغير حياتك
الدرويش دااا هو السبب الخلاك تجي ود عجبناا من الاساس ، ما احمد ولا عم ابراهيم وشيخ محمد احمد ولا حتي روان كانت اسباب
السبب هو الدرويش دااااا 🤦🏾
وفي لحظة لقيتو قريب مني وقف وعاين لي مسافة وفي النهاية ابتسم
قلت ليهو انت منو ؟؟
رد وقال لي
انا درويش انا درويش علي باب الله ، وماشي بي نور الله وطريقي لي الله ... الخ
برجع أسألوا تاني
انت منووو وقصتك شنوو ..!؟؟
ببتسم لي وبعيد نفس الاجابة
انا درويش انا درويش علي باب الله ..الخ
رجع شوية شوية يبعد ويبعد
وصوتو بداا يختفي ويتلاشي ، بقيت انا بكورك وبصرخ عليهو
لا ما تمشي اقيف اقيف .
كل ما اصرخ اكتر كان بختفي وبتلاشي اسرع وفجأة في ضوء بدا يظهر وجهرني شديد
وكأني كنت في غرفة مظلمة وفجأة طلعت للنور 🤦🏾♂️
لحدي م صحيت من الحلم داااا
ولقيت الشمس طلعت وباقة في وشي ، حاولت ارجع احلم تاني بيهو واسألوا واعرف سروو بس م قدرت
كل الفي راسي كلماتو القالها
قمت سريع لقيت الساعة ماشة لي 9 صباحاً
لقيت منتصر وعبدالله في الديوان قاعدين شربوا الشاي وكانوا بتونسوا ومعاهم عم ابراهيم
خشيت صبحت عليهم وسألتهم من احمد
قالوا لي احمد وخالتي كوثر والبنات مرقوا بدري الخرطوم واحمد ما حب يصحيك لانك كنت نايم وشكلك كنت تعبان شديد امس
- اي والله كنت تعبان
خشيت شلت تلفوني من الشاحن فتحتواا
لقيت تلاتة مكالمات واحدة من روان واتنين من عُلا
م اشتغلت بعلا كتير رغم اني زهجت
ياخ البت دي ما بتفتر ولا قصتها شنو
في اللحظة ديك كان في راسي حاجتين مهمات ولازم اعملهم
اول حاجة امشي لروان واديها الهدية حقتها وامشي لي بيت حاج موسي الحكي لي عنوو احمد وأسألوا عشان يحكي لي قصة الدرويش دي
