#درويش_ودعجبنا
#الحلقة_20
فتحت عيوني لقيت نفسي في غرفة مضلمة شديد ..
زنزانة
باردة شديد كانت ، أشبه بي تلاجة الموز
"من سجن لي بيت اشباح"
اتحسست بيدي لحدي م وصلت باب الزنزانة وبقيت بدق ..
افتحوا الباب ، البتعملوا دا حراااام افتحو الباب
بس ماف زول كان بجاوب ولا حتي في زول سامعني اظنو
رجعت وقعدت في زواية وربعت يدي ، وبقيت ببكي
كنت خايف والخوفني اكتر ، ما عندي سند
ما عندي زول يسأل مني ، امي وابوي ماتوا منو الحايجي يسأل مني ..
ياااارب ترحمني برحمتك💜
حتي ما كنت عارف الزمن كم ولا الدنيا ليل ولا صباح ولا شنو
الظاهر الغرفة الانا محبوس فيها دي في بدروم او تحت الارض ما معروف بس حسيت كدا لانو كانت الرطوبة عالية ومافي منفذ للهواء بس كان في تكييف مركزي شغال ومشغل في اعلي درجة
البرد كان شديد وانا بقيت برجف منو ، ماف حاجة تدفيك وكل حتة فجسمك كانت ابرد من اختها
ضميت يدي علي وبقيت بفرك في جسمي عشان ادفي شوية بس كنت ببرد زيادة
رقدت في الارض علي البلاط وضميت علي جسمي كلو بس الارض كانت ابرد بقيت اقوم امشي واجي ولسة بردان وخايف
فضلت علي الحال دا كتير ، كتير شديد
ساعات عدت وانا في الحال دا ، وفجاءة من باب الغرفة سمعت صوت
صوت زول بفتح في الباب جريت عليهو سريع ، بس ما كان دا الباب كان في فتحة في الباب تحت ، زي منفذ اتفتح وفي ايد دخلت حاجة جوا الغرفة
اتحسست بيدي لحدي م لقيت الحاجة
من الصوت كان واضح انو كيس
فجاءة النور ولع ومن شدة الاضاءة كانت عالية انا م قدرت افتح عيوني وفضلت مسافة لحدي ما قدرت افتحهم
الكيس كان فيهو سندوتشات وباقة موية ، كنت جعان شديد
اكلت وشربت موية وفضلت مسافة بحاول استكشف الغرفة دي فيها شنو
كانت فاضية ما فيها شي غيري ، فجأة النور قطع تاني
ورجعت للظلام والخوف
رقدت علي الارض وبقيت احاول انوم عشان يمكن ما احس بي برد
مرت ساعات وانا راقد ونمت فجأة صحاني صوت الباب تاني ، كيس تاني فيهو سندوتشات وموية
النور فتح تاني
البرد بجوع صراحة واكلت تاني بس م شربت ، النور قطع تاني
تاني رقدت بعد مسافة حسيت نفسي اني عاوز اقضي حاجتي وامشي الحمام
مشيت علي الباب وبقيت بدق ، عاوز امشي الحمام
هوووي يا ناس عاوز الحمام
بس ماف زول رد علي
قعدت في الواطة ، اعمل شنو هسي
شلت الباقة القديمة الفاضية وقضيت حاجتي
ورجعت رقدت ونمت 😅
عدت ساعات الباب كركب
ما قمت من محلي النور فتح والباب كمان
دخل علي نفس الشخص القبيل الاستلمني من القسم وقال لي تجي معانا
قمت وقلت ليهو :
حرام عليكم البتعملوا دا انا عملت شنو جريمتي شنو بس عاوز اعرف ؟
قال لي :
انا ما جاي ارغي كتير
عاوز اوريك النظام عشان تكون عارف ، عندك تلاتة وجبات في اليوم مع كل وجبة باقة موية
ولو ما عملت شغب مرات بنجيب ليك عصير بدل الموية
الحمام حيكون مرة في اليوم ، حيجيك زول يسوقك تقضي حاجتك وترجع ، كل اسبوع حيكون عندك يوم فيهو حتمشي تستحم وترجع
وقع ليك النظام ؟؟
قلت ليهو طيب فهمني اول انا عملت شنو ؟؟
طيب عاوز مصلاية للصلاة
قال لي :
صلي في الارض طاهرة واتوضأ بي موية الشراب وحافظ علي وضوك الموية يا تشربها ياتتوضأ بيها
وطلع فات
جاني فرد تاني وداني الحمام قضيت حاجتي وجابني تاني راجع وقفل علي الباب
وقضيت اول يوم لي في المكان داا ، اللي ماعارف انا عملت شنو عشان اصل للمرحلة دي
ياربي خوفي علي اختي وكوني عاوز اواصل مشوار ابوي هو السبب ، ياربي عشان حاولت اكسر الحلقة اتجازي كدااا🤦🏾♂️
هل الصاح العملتوا كان غلط ، 🤦🏾♂️
هل العملتو غلط ؟؟ هل كان مفروض اني اسمع الكلام واشوف الغلط بحصل واسكت عليهو واوافق😭
لي دا كلو ، هل انا اجرمت في حق نفسي للدرجة دي
انا عارف العملتوا صاح وماعملت شئ غلط وحتي لو غلطت ما كنت قاصد اغلط ؟؟
بس انا عاوز افهم عاوز اعرف البحصل دا شنوو !!
مرة يوم واتنين واسبوع اسبوعين ... وانا علي الحال داا
شهر عدا وانا قاعد جوا زنزانة ما بشوف شي ولا بسمع شئ ، قربت اجن ومتأكد جزء كبير مني ضاع وانا جوا الزنزانة دي
عدا الشهر التاني ولسة الحال في حالوا .. لحدي ما قنعت وقلت خلاص حفضل هنا لحدي ما اموت
بقيت بكلم نفسي ومرات بسرح
بسرح بالساعات وبتهيأ حاجات بتحصل قدامي ، كنت بشوف فاطمة بتجيني وتقعد معاي وتتونس معاي وتمشي ...
بشوف امي وبشوف ابوي بنقعد كلنا وناكل في صينية وبعد نخلص بشيلو الصينية وبمشو بخلوني براي😭
شكلي جنيت ولا فقدت عقلي ..💔
مر الشهر التالت وانا بقيت زي الروبوت ، بجيبو الاكل باكل اخر اليوم يودوني الحمام واجي راجع
بصلي مرات ومرات اسرح تفوتني كم صلاة
لدرجة بقيت م بعرف الصبح من العصر من الظهر
ما عارف الواطة صباح ولا ليل
بي صراحة التلاتة شهور دي كسرتني وقصت ضهري واتحولت فيها لي كائن تاني ، بقيت بخاف من الجوطة والصوت العالي .. الاضاءة العالية بتضايقني والضلمة بحبها
وانازجوا نسيت اي شئ ، لدرجة مرات بنسي انا منو ولا ساكن وين حاجة كدا اشبه بي اني رجعت طفل من اول
بقيت بتعامل مع كل شئ بي صمت بسكت ، حتي مرات ما بكون عارف قالوا شنو ولا عملوا شنو
بسكت بس
في الشهر التالت لي في المكان دا وفي يوم من الأيام
باب الزنزانة فتح في غير مواعيدوا ودخل علي الزول الأول داك ، قال لي:
قوم ياحسن علي حيلك
قمت وانا ساكت وخشمي ما فتحتو بقيت دي الكلب البقولو ليهو بعملوا ، لحظتها لو قال لي اخنق نفسك كنت بعملها
جوا فردين وقادوني وطلعوني من الغرفة دي
زي م اتوقعت كنا في بدروم وكان في اكتر من غرفة زي الانا فيها دي
ماشين وماف صوت مسموع غير صوت التكيف المركزي وصوت رجولنا علي الارض
فجأءة وصلنا باب واتفتح وكان بعدو في سلم طالع لي فوق
طلعنا وكانو 10 سلمات
مرقنا وشفت النور حق الشمس لاول مرة من 3 شهور فاتوا ، ضايقني شديد وبقيت بصرخ لا لا النور لا وبحاول ارجع للضلام بس هم مسكوني شديد وجروني جر
انا ما كان عندي طاقة اعافرهم بس بقيت ببكي واصرخ
طلعنا من المكان داا وركبوني نفس البوكس الاترفعت فيهو داك واتحركو بي ، بس علي وين انا ما عارف!!
يمكن اكتر من ساعتين نحن متحركين او يمكن اكتر ، وانا بس مغمض عيوني من النور واضني من صوت العربية والشارع
بعدها وقفو العربية ، ونزلوني
او بالأصح جدعوني جدع ، وقعت علي الارض ووقعت علي يدي لمن اتظلطت
بس انا ما كنت فاهم شي كل الفي بالي اني متضايق من النور والصوت العالي
كأني غريب من كوكب تاني غير كوكبنا داا
قمت واتنفضت لقيت نفسي في شارع ظلط فرعي في حلة ..
من شدة النور اللي زمن منو شفت كل الحاجات لونها واحد الظلط والشجر والناس كلهم بنفس اللون ابيض ناصع ومشع لدرجة مضايقني
بس وين المنطقة دي ما معروف وين!!
اتلفت ولقيت لي شجرة كدا قعدت تحتها وكان فيها ست شاي وناس قاعدة جمبها ، وكانو بعاينو لي ومستغربين ، تقريبا شافوا الفلم كلوا
قعدت في الشجرة وبقيت ببكي وخايف ، بعدها الناس اتلمت فوقي
في شنو ياشاب قول بسم الله !!
واناا ببكي بس وبقول
عاوز ابوي جيبو لي ابوي !!
صراحة في الوقت داك كل العاوزو بس ابوي ، حسيت بالظلم والاهانة والارهاب🤦🏾♂️
عرفت اني عايش في مكان انا اضعف شخص فيهو ، لانو ما عندي سند يدافع عني
ما عندي وجيع ...
الظلم حار وبوجع ياجماعة شديد ، بقسم ضهرك مهما كنت راجل وقوي .. الظلم بنتهي منك
كانوا بقولو انو الراجل بتسند علي ضهرو دايما لكن اكتشفت انو غلط
العندو سند يتسند عليهو دا الراجل فعلاً
اما نحن فمجرد عبيد او فيران تجارب
الناس بدت تهدي فيني وتسألني من اسمي وساكن وين واهلي وين
بس انا ما كنت قادر اجاوب عليهم ببكي بس ، كل ما احاول ارد واوريهم انا منو او حصل لي شنو بدل تطلع كلمات من خشمي
كنت ببكي اكتر😭
ساقوني شباب كدا وودوني بيت م عارف بيت منو
انا ما كنت قادر اعمل اي شي ، قالوا لي نتصل بالشرطة تجي تسوقك لي اهلك ؟؟
قلت ليهم لا لا شرطة لا
هم حسوا انو الشرطة م حتحميني ، قالوا لي طيب عاوز شنو
قلت ليهم عاوز امشي البيت
وصفت ليهم بيتنا والعرفتو بعد داك انو انا الحتة الرموني فيها دي في الخرطوم في منطقة مايو
كانت هدومي وسخانة وانا وسخان وريحتي ما بتنطاق ، بس هم ماقصروا معاي ..
واحد منهم قام جاب لي قميص وبنطلون وقال لي قوم استحم
ودخلوني الحمام واستحميت وغيرت وبعد طلعت لفو لي محل الظلطة بي شاش ، لقيتهم عملوا لي عصير وجابوا لي اكل
اكلت وكنت جعان وشربت العصير ورقت شوية
يمكن هنا يادوب وعيت من الكابوس الكنت عايش فيهو دااك
قلت ليهم عاوز امشي بيتنا
الولد الجاب لي الهدوم داا قال لي انا بوديك ، ومشي معاي
كنت تعبان شديد فقاموا وقفو امجاد وركب معاي عشان يوديني ....
كان بتكلم معاي وبقول لي انت كويس ؟؟
قلت ليهو احسن اي
قال لي حصل شنو :
قلت ليهو ما عارف انا زاتي وماقادر اتكلم
الود دا كان في عمري كدااا وشكلوا زول اصلي
قال لي يازول حمد لله ع السلامة انت بعد تصل ارتاح وان شاء الله بحصل خير
المهم دا رقمي وشال قلم من السواق حق الامجاد وورقة جريدة قطعها سجل لي رقمو
قال لي لو احتجت حاجة بعدين اذا حبيت تفتح بلاغ او عاوزنا نشهد بالشفناهو
قلت ليهو شكرااا ليك 💜
قال لي العفو ..
قلت ليهو معليش تعبتكم معاي وعرفتوا بي نفسي
قلت ليهو انا حسن
قال لي :
إتشرفنا ياحسن انا اخوك منتصر من اولاد الجزيرة ما من البلد ، بس جيت امتحنت هنا وقاعد مع خالي والشباب القبيل ديل اولاد خالي
قلت ليهو انا زاتي ممتحن شهادة دفعة
واتونسنا شوية لحدي ما وصلنا امدرمان ودخلنا حي العرب حلتنا
وصلوني لحدي شارع بيتنا ونزلوني وشكرتهم ومشوا ؟؟
بقيت واقف في شارع بيتنا مسافة وبعاين
شفت الحلة كأنها غريبة وكأنوا اول مرة اشوفها ، زي الكنت مغترب ورجعت بعد سنين
كل همي كان انني اصل البيت واطمن علي فاطمة
وجريت جري علي البيت بس ما كان فيني حيل اجري بقيت ماشي سريع
وصلت بيتنا وبقيت ادق الباب لانو المفتاح حقي وحاجاتي كلها شالوها هنا وما رجعوها لي
ماف زول فتح ...
وقفت في الحيطة وشبيت وطلعت وتلبت في بيتنا
تلبت في الحوش ومشيت علي البرندة بس بيتنا كان مقفل وشكلو مقفل ليهو فترة لانو الحوش كان مغبر ومليان اكياس وورق
طلعت من البيت ومشيت بيت عمي جمال وطلعت شقتو وبقيت ادق وادق وادق بس ماف زول فتح برضو
دقيت لمن الله غفر لي بس ماف زول فتح الباب
الساعة كانت زي 2 ظهر كدااا
طلعت والحلة كانت فاضية ماف زول في الشارع ، مشيت علي بيت ناس عمتي
دقيت الباب
دق دق دق
واقف لسة وبدق ،دق دق ..
فتحت الباب صفاء بت عمتي
اول ما شافتني ... اتصدمت وبقت تعاين لي
وقالت :
سجمي حسن !!
ولاحظت اثار التعب علي جسمي
مالك انت كويس ياود امي خش جواا ..
دخلت وقفلت الباب وراي ، وبقت جاية وراي سانداني من ضهري بي يدها وبتسأل فيني
انت كويس ؟؟ كر علي ياود امي ووبدت تبكي
دخلنا جوااا وكانت عمتي قاعد اول ما شفتني جات جارية علي وقلدتني
حسن ود اخوي انت كويس ياود بشير ...
قعدت وقلت ليهم انا كويس الحمد لله
جابوا لي موية ختيتها في الطربيزة وقلت ليهم :
بيتنا مقفول لي !! ووين فاطمة ما شايفها ؟؟
سكتووو
مساااافة ساكتين وبعاينو لي بعض ، وصفاء عيونها رقرقن وعمتي لمن لون وشها اتغير من الخوف
مالكم ساكتين بسأل فيكم فاطمة وين ؟
وقمت علي حيلي ومشيت علي صفاء
صفاء فاطمة وين مالك ساكتة م تقلقي بي فاطمة وين
سكتت ودموعها جرن ووشها يرجف زي الزول العاوز يبكي بس غالبوا
مشيت لي عمتي ...
عمتي فاطمة اختي وين ، لي ما شايفها ولمن جيت لي ما طلعت
وديتو فاطمة وين وبقيت اكورك واهيج ، وديتو اختي وين طفشتوها مني وين
بسأل فيكم انا اختي فاطمة وين
والله لحظتها انا زي الزول الشايف الموت قدامو وعامل روحو ماشايف ويتغابي فوقو العرفة
بسأل وجواي خوف من الاجابة ...
عمتي قبلت علي ..
حسن ياولدي
الكلام الحا اقولوا ليك دا ما عاوزاك تنفعل وتجوط
عاوزاك تهدي اعصابك وتمسكها
فاطمة ما قاعدة هنا ياولدي
فاطمة بعد انت شردت عمك ساقها وقعدت عندو
: شردت ؟؟
منو القال شردت !! انتو ما عارفين انا حصل لي شنو ولا تعبتوا نفسكم تبحثوا عني
:ياولدي عمك كان بطلع الصباح كل يوم وبجي وبقول ما عرف ليك طريق
: عمي منو !! الريح
لالا عمك جمال !!
وعمي جمال وين هسي ؟
: ما عارفين برضو ... والله دي عين وصابت العيلة دي
وقعدت تبكي وتتشهق
قلت ليها ..
لا ياعمتي دي ما عين دا طمع وجشع وظلم الصابنا .. عم يصل بيهو الطمع وحب المال والدنيا لانو يعمل كدا مع اولاد اخوهو
عارفة الواجعني شنو . انو اخوهو كان شايلو فوق راسو وما أحوجو لي حاجة
ويجي يرد ليهو الجميل كدا في أولادوا ، عمي ظلم نفسوا وظلمنا معاهو
وربنا علي الظالم والمفتري
طلعت من ناس عمتي وانا ماشي بيت عمي عشان اخد فاطمة واذا عمي لقيتو في وشي حقتلوا بدون تردد
عمتي بتكورك لي
ياحسن دقيقة ما تميت ليك كلامي دقيقة ياحسن اصبر انا جاية معاك
وانا مشيت م اشتغلت بيها وخليتها تنضم في نضميها داك
طلعت ...
وقفت قصاد بيت عمي ، وبقيت ادق في الباب بقوة وبي استمرار
فتح الباب محمد ود عمي ، اول ما شافني اتخلع
وبقي مبحلق عيونو فيني
قلت ليهو مالك شفت عفريت ، ابوك وين ؟
وفاطمة وين .. وارجوك يامحمد بدون كلام ونقاش وماف داعي للشر
محمد سكت مسافة وقال لي انت كنت وين !!
قلت ليهو في جهنم الحمراء اسأل ابوك بوريك كنت وين ؟؟
محمد اكسر الشر ونادي فاطمة خليني امشي ..
انا ماعاوز قروش وما عاوز اي شئ انا بس عاوز بيتنا وعاوز فاطمة وعمي مستعد اتنازل ليهو عن كل قرش حورثو من ابوي بس يخليني في حالي انا واختي
فجأءة محمد دمعتو نزلت ولحقتها اختها وبقي يبكي زي الشافع ، اول مرة اشوف محمد ببكي كداا
محمد ما تبكي انا المفروض ابكي من العشتو بس لو سمحت نادي لي فاطمة
يافاطمة يابت
انا جيت ارح نمشي
وبقيت اكورك علي فاطمة وانده عليها ...
لحدي ما مرة عمي طلعت وسمعتني وشافتني
وهي زاتها بقت تبكي
محمد مسكني من يدي وبقي بجرني علي الصالون وبقول لي تعال جواا نتفاهم
انا مسكت يدو وزحيتها مني عشان ما كنت طايق زول من البيت دا يلمسني🤦🏾♂️
وانا بدفر في يدو لاحظت لحاجة غريبة جدااا
محمد كان محنن ويدو فيها اثر حنة لسة ما طلع
عاينت لرجلو برضو كانت محننة
طبعا اتصدمت وخفت من الفي بالي يكون حصل
بقيت سرحان ومافاهم شئ
دخلن معاهو الصالون ، وقعدت بسمع في كلامو
قال لي :
حسن انت زول مؤمن وعارفك حتقدر تستحمل الكلام الحقولو ليك داا لانو لازم تعرفو ..
بعد انت شردت ، ابوي جاب فاطمة تقعد معانا
قلت ليهو بي انفعال
شنو شردت الماسكين فيها كلكم دي ابوك فهمكم كداا صاح ، انتو ماعارفين ابوك عمل فيني شنو
قال لي :
يا حسن دا كلو ما مهم المهم اللي مفروض تعرفو ، انو بعد اختفائك بي تلاتة اسابيع ابوي عقد لينا انا وفاطمة ..
وبعدها بي اسبوعين عملنا عرس وفاطمة بقت مرتي
انا عارف انو انت ما راضي بس ساعتها انا كل همي كان فاطمة لانو كل الناس قالت انك شردت
بالذات بعد م عرفنا انو في ورق وقروش اتشالوا من خزنة ابوك
: قروش شنو الاتشالوا من خزنة ابوي ..؟؟
: ابوي وعمي جمال قالوا انو في 230 مليون مفقودة من خزنة ابوك في الشغل. وفي ورق في خزنة برضو اختفي وانت اختفيت فإتخيلنا انك هربت وشردت من البيت
حتي فاطمة في الاول ما كانت مصدقة بس لما غيبتك طالت فاطمة خشت في حالة نفسية وابوي كان عاوز يوديها المصحة وانا عارف انو ابوي حيهملها هناك ، ما كان قدامي حل غير اني اطلب من ابوي اتزوجها واحاول بقدر الامكان اطلعها من الحالة اللي هي فيها دي🤦🏾♂️
انا انزوجت فاطمة ويشهد الله عشان احميها من ابوي وما لمست يدها ولا دخلت عليها
محمد كان بحكي لي وانا كنت ببكي بس وكل حرف بتقال كان كأنو سكين وبطعنوني بيها في نص قلبي
: حسن انا عارف كلامي دا صعب عليك تسمعوا بس والله كل شي انا عملتوا لمصلحة فاطمة
انا عارف ابوي وخباثتوا لكن دا ابوي ياحسن في النهاية
قلت ليهو :
طيب انا هسي جيت نادي لي فاطمة وحتطلقها وحتشهدوا كلكم علي العملوا عمي معاي وانا م حخلي حقي
نادي لي فاطمة عاوز اشوفها ...
محمد ساكت ودموعوا جاريات مطر
: محمد بتكلم معاك نادي لي فاطمة قوم
: يا حسن يا اخوي فاطمة ماتت قبل اسبوعين 🤦🏾
وبقي ببكي وما قدر يواصل كلامو
صدي كلامو بقي في اضاني وانا صاني ما قادر اتحرك ، صدمة كانت اكبر من تحملي واستيعابي
ماتت كيف يعني ؟؟
فاطمة اختي انا ماتت ،، اختي الماعندي غيرها وما فضل لي شئ في الدنيا دي بس هي
اللي انا للان م انهرت وحاربت وصبرت علي كل شئ عشانها هي بس
انا من يوم ابوي مات لحدي الآن ، كل لحظة كانت بتمر علي بكون بيني وبين الموت او الجنون لحظة بس وبصبر وبقول يا الله لزمني الصبر عشان خاطر فاطمة بس
وهسي تموت ؟؟
تموت كيف ؟؟
تموت لي ؟؟
حورةت بأعلي صوت لي
فااااااااااططمة
وقعت في الارض واغمي علي ....
.
.
يُتبع
إنتظرونا قريبا في الجزء الثالث والأخير 💜
#أبوبكر_علي
