...

25

#درويش_ودعجبنا
#الحلقة_25

فتحت الرسالة وكانت بخط يدها ...
ومرفقة مع الرسالة رسالتي الأديتها ليها لما كنت في ودعجبنا
كتبت روان
"في حاجات حلوة في الدنيا دي ، زي ضحكة اماتنا وزي ريحة الاطفال وصوت ضحكتهم ، حاجات حلوة زي الامان البنحسوو وسط اهلنا وأصحابنا
رحة اول نجاح وفرحة تحقيق حلم ليهو سنين عالق في الذهن
فعلا الدنيا دي فيها حاجات جميلة جدا
كنت انت ياحسن الحاجة الحلوة الظهرت في وقتها ،عارفة انو م لحقنا نعرف بعض اكتر بس انا متأكدة انك الحاجة الحلوة البتجي للزول في نص خنقتو وضيقو
نقطة ضوء وسط الظلمة
بس ماف حلو بكمل ، وكل شئ قسمة ونصيب
انا يمكن ماعارفة اتصرف كيف مع غيابك بس المهون علي انك عملت كدااا عشاني
عشان م تدخلني في مشكلة
يمكن دا السبب الخلاني احبك اكتر من الاول
لانك الوحيد العمل الحاجة الصاح عشاني حتي لو كانت ضد رغبتو ويمكن دي عقدتي في الدنيا
انا حأحكي ليك عشان م معروف حنتقابل تاني ولا لأ
اللقا نصيب ياحسن
عارف يعني شنو تتولد وتقوم تلقي انو أهلك واقرب الناس ليك هم الإختارو ليك كل شئ
دا طبيعي لمن تكون صغير بس لما تكبر يبقي إسمو شنو ؟؟
انا اتولدت ، لقيت ابوي اختار لي اني اوقف قراية لحدي الثانوي
عشان القراية للبت ما بتنفعها مع اني كنت اولة المدرسة
لقيتو اختار لي مؤتمن من ونحن صغار وكأنوا مؤتمن دا هو الوحيد الحايسعدني
حتي ما حصل يوم إستشارني او اخد رأي
لما ظهرت انت وشفتك اول مرة في بيت ناس عمي ابراهيم ما حبيتك طوالي بس جربت إني أختار اعمل حاجة. انا عاوزاها
وانت ياحسن كنت اول شئ اختار اعملوا براي دون م يختارو لي او اخد راي زول فيهو
لما كنت بحس انك عاوز تعرفني وتتكلم معاي ، كنت موافقة م عشان معجبة بيك لا
عشان حاسة اني عاوزة اعمل حاجة بي إختياري سواء غلط او صاح
واتحمل نتيجتها وهدا بتحمل في النتيجة ولسة حتحمل بس م عليك م تشغل بالك
عارف حبيتك متين !!
لما كنا راجعين من المسيد سوا ، اول واخر لقاء لينا
حبيتك لما قلت ليك خلاص انت امشي وانت فضلت ماشي وراي لحدي م اتطمنت اني وصلت
حسيت انو في زول مهتم لي بجد💜
ورسالتك الكتبتها حسيت انها طالعة من جواك
بس هسي انا رجعتها ليك لانو ما ينفع احتفظ بيها
ما ينفع ...
كان نفسي البينا يكبر واعرف كل شي عنك ، انا عارفة انو انت وراك حمول شايلها
انا كان نفسي بس اشيلها معاك واهون عليك زي ما انت هونت علي
مع السلامة يا حسن 💜

روان "

طبعاً انا كالعادة بكيت ، انا مالي دمعتي بقت قريبة كدااا 😅
رسالة روان دي زعلتني شديد من نفسي وندمت اني مشيت خليتها بس ما كان في حل
هي بتتكلم بس ماعارفة انا شنو والكان حاصل لي شنوو
مرات في ناس بشوفوك من برااا وعلي اساس الحاجة دي بتخيلوا جواك في شنوو ، ولما تفتح ليهم صدرك وقلبك بتخلعواا
اللوم والعتب ماعليهم ، عليك انت وعلي قلبك المليان أحزان ، قلبك البشبه الزول الوقع في طين واتوسخ
هو ما كان قصدو يقع في الطين بس برضو ما ينفع يقابل الناس كداا والناس لو شافتوا حتقول علي وسخان 😅😅
اها انا كدااا ، انا بعد الحصل لي اتحولت لشخص تاني
كنت حظلم روان شديد واحتمال كنت حشيلها زنب الحصل لي زمان كلو واطلعوا فيها هي حتي لو ما عندها زنب لسبب ☹️
اني الجواي دااا كتمتو لحدي ما ملي قلبي ، وما ينفع قلبي يشيل روان ويشيل الجواي
كنت حطلعوا كلو فيها هي
اذا فرضنا استحملت وصبرت لحدي ما الجواي يطلع وارجع طبيعي ، انا كدا حكون ظلمتها شديد كمان
انا انسان ما مكتوب ليهو يفرح شديد ، وراضي
بس الما حقدر استحملوا انو قلبي المكسور داا ومجروح ، افتحو تاني لي زول وارجع تاني اتكسر
عرفتوا انو انا لما سبت روان كان لي مصلحتها 😊
صدقوني ...