#درويش_ودعجبنا
#الحلقة_23
إنت قصدك منعم ايييييييك يااااا
الزول دا اتحكم إعدام قبل شهر تقريباً
بس ما عندي علم اتنفذ ولا لأ
طبعاً كان خبر صادم بالنسبة لي ، رغم اني ما بعرف منعم للدرجة دي بس الفترة البسيطة القعدتها معاهو كانت مهمة بالنسبة لي
طلعت وانا مهموم من القسم برفقة عبد الرحمن
عبد الرحمن كان بهون علي وبقول لي كل شئ لي خير ربنا بيبتليك عشان بحبك .. وانت اصبر بس
: أصبر !!
عبد الرحمن انت بتهظر ولا شنو ؟؟
ياخ لو كنت مكاني كنت حتصبر !!
انت ما شايف انا بحصل معاي شنو ، انا تعبت يا عبد الرحمن تعبت بالجد 🤦🏾♂️
اي حاجة بتحبها بتروح منك وبتتاخد .. لدرجة انك تخاف تتعلق بي حاجة عشان م تروح منك
انا عملت شنو في حياتي عشان اتجازي كدا
قال لي :
انا لو محلك كان جنيت او انتحرت صراحة لكن ربنا عشان كدا م ختاني محلك ختاك انت عشان هو عارف انت قدر الامتحان دااا فاهمني انت صاح
حسن هون عليك والله الدنيا ما مستاهلة
وياسيدي لو علي الحاجات البتحبها وبتمشي بطل تحب بس 😅
: صدقت والله الواحد ما يتعلق بي حاجة تاني بس
واخدت عهد علي نفسي اني ما احب ولا اخلي زول قريب مني عشان ما احس بالقهر لما افقدهم لانو الفقد احساس قاهر🤦🏾♂️
: عبد الرحمن ارح عليك الله انا امدرمان دي خلاص قلبي أباها ...
وصلني لحدي قريب استاد المريخ عشان اركب مواصلات من هناك وياريتو ما وصلني هناك ...
واقف قدام الاحفاد واتذكرت اخر مرة لما جيت وصلت فاطمة .. سريع سريع ركبت لانو م كنت مستحمل اقيف
ركبت بحري المحطة الوسطي عشان من هناك اركب الصينية وامشي لي منتصر الاقيهو ...
وانا راكب اتزكرت حاجة ضايقتني شديد وبقيت كل م اتزكرها بتضايق ☹️
اخر مرة كنت مع فاطمة قلت ليها طالع وجاي وتاني ما جيتها
وبقيت اتخيل نفسي مكانها ، فقدت امها وابوها واخوها طفش خلاها
دي الحاجة الممكن تكون هي انتحرت بي سببها 🤦🏾
او يمكن م انتحرت وربنا رحمها من الشقي والتعب التعبتو
م علينا ، بس الحاجة دي كانت بتضايقني وكل م اتزكر انو السبب فيها عمي بكرهو أكتر
رغم اني عمري م كرهت زول ومن زمان اتعلمت اني ما اكره ، اي ممكن اوقفك حدك وابعد منك ويبقي جواي ليك ماف مشاعر بس اكره زول دي ما حصلت
بس كرهت عمي الريح وكرهت سيرتو وكرهت شكلوا واسرتو وكل شي بشبهو
وصلت بحري وركبت الصينية ووصلت الساحة ودا كلو ما حسيت بالزمن لانو كنت بفكر في الحصل والحايحصل والحاصل
نزلت واتصلت علي منتصر ، وانتظرتو برا جمب ست شاي كداا الزمن كان بدري الوقت داك
الساعة زي 3ظهر
منتصر جاني بعد 40 دقيقة تقريباً وقعدنا واتونسنا وكان زول ظريف صراحة وروحو جميلة
سألني من نفسي ومن اهلي ودنيتي بس م عرفت اجاوب ليهو
كل الوريتو ليهو اني مقطوع من شجرة وابوي خلي لي ورثة حتي ما جبت ليهو سيرة اختي او عمي او غيرو
وقلت ليهو عايش في شقة براي في جبرة وكذبت عليهو وبالنسبة للحصل في مايو قلت ليهو اني كان عندي مشكلة مع ناس بعرفهم وخطفوني وكانوا عاوزين بس يقرصوا اضاني
المهم سألني سؤال :
قدمت وين ؟؟
قمت ضحكت وقلت ليهو
: انا عرفت نتيجتي الليلة وجيت 89.7%
قال لي ماشاء الله وحتقدم وين وكدااا
قلت ليهو :
لالا انا حخلي القراية وعندي بزنس حواصل فيهو
والساعة منتصر انفصم فيني قرب يديني كف
انت حيوان ولا شنو !!
ياخ دي نسبة حلوة وعندك مستقبل م تضيعواا بزنس شنو وبتاع شنووو
وهاج
انا جواي كنت عازروا لانوا م عارف الحاصل لي شنو ؟
تاني انبسط انو رغم معرفتو البسيطة بي الا انو شايل همي وخايف علي مستقبلي
شفت فيهو فاطمة وابوي لانو لو عايشين نفس رد الفعل دي كنت حشوفو منهم 😅
اتكلم معاي كتير وحاول يقنعني بشتي الطرق بس انا كنت مصمم اني خلاص حخلي القراية
قام قال لي :
انا عارف انو الحكيتو داا ما صاح وانو وراك سر كيير بس ما حابي تحكي انا م بهمني وراك شنو
لكن والله الانا شايفوا انوا ربنا لما اداك النسبة دي لسبب في غيرك ما جابها ومتمني يجيبها
م تضيع نفسك وممكن برضو تقرا وتواصل شغلك
المهم انت فكر ...
قلت ليهو خير ان شاء الله ..
وبعدها اتونسنا وحمنا كداا في شارع المطار
حكي لي عنو .
قال لي انو قدم الخرطوم وحاليا قاعد في داخلية وحيقعد فيها لحدي م يخلص جامعة ويرجع البلد لي اسرتو
منتصر كان صاحب واخو جا في زمنوو بالجد
كان ظريف وقدر في فترة بسيطة يخليني اطلع من المود الكنت عايش فيهو
بقيت كل يوم اتصل عليهو واشوفو وين وامشي اهرب ليهو نتونس ونضحك وارجع الشقة انتظر اليوم التاني يجي
وبقيت علي هذا المنوال قريب شهر ، مرات امشي السوق اشوف الحصل مع صبري وحاج الحبوب ومرات مع منتصر
لحدي ما يوم جاني عبد الرحمن شايل ورق
وقال لي نحن قدمنا ليك وشالوك الخرطوم هندسة مدنية ودي رغبة ابوك زي ما صبري بتزكر
طبعاً من دون م يستشيرني ويأخد رأي
انفعلت وهرجت فيهو بس سكتني بكلمة واحدة
والكلمة دي قالها صبري وانا زعلت من روحي شديد
قال لي صبري :
ابوك لو عايش كان اداك كف اول شئ ، بس انا ما ابوك مابقدر اديك كف
قلت ليهم ياجماعة الوضع اتغير انا لازم اقيف علي رجولي
قالوا لي م تشيل هم ..💜
الشغل حيمشي زي السيف انت لما ابوك كان عيان وانت ممتحن الشغل وقف ؟؟
موش كان ماشي
انت انزل جامعتك ومالوا كل م تلقي زمن تعال شوف الشغل ماشي كيف وتابع معانا
هي كلها 5 سنين تخلصهم وتعال امسك شغلك بنفسك
صراحة اكبرتها ليهم جدااا وحسيت انو فعلا ربنا عوضني بي ناس كويسة
عبد الرحمن كمان كان لسة ساكي القضية مع عمي وكان بحاول انو يرجع لي حقي منو مع اني قنعان ورافض بس عبد الرحمن كان مصر
حتي قال لي يوم اجيب حقك بشيلو لي روحي لو انت م عايزوا 😂
كانوا حنينين علي وخايفين علي وصراحة شفت ابوي جوا اي واحد منهم
وقلت جواي .. ابوي الخير الكان بعملوا حي اترد ليهو وهو ميت وخلاص قررت اخش الجامعة
اتصلت علي منتصر وقلت ليهو :
اسمعني انا عاوز اجي اقعد معاكم في الداخلية ، حنزل الخرطوم معاكم
وحظنا السمح الاتنين شالونا الخرطوم انا هندسة ومنتصر إقتصاد
فرح منتصر شديد وقال لي من بكرة تجي انا بسجل ليك باقي اليوم داااا ...
وفعلاً شلت حاجاتي وكديستي ومشيت الداخلية
في الاول كنت متردد من السكن الجماعي لانو انا النفسيات الخشت فيني خلتني ما بحب الازعاج والجوطة والهرجي والداخلية كانت اكبر مكان ممكن يهيجني
الصوت العالي والضحك والكواريك وكدااا
بس قلت انا لازم اواجه الحاجة دي واتعود
دخلت الداخلية ومنتصر دخلني الغرفة حقتهم وراني سريري ودولابي
قام ضحك قال لي جايب معاك كديسة كمان والله اعمل حسابك 😂
ناس الداخلية ديل لو جاعوا بتعشوا بيها
طوالي مسكتها وقلت ليهو اوعي زول يقرب منها بقتلوا الكديسة دي غالية علي شديد💜
وفعلا رتبت حاجاتني في الدولاب ... ونزلت تحت مع منتصر ودفعت رسوم الداخلية وكل شئ بقي تمام
فجاءة جوا داخلين شباب اتنين كدااا منتصر سلم عليهم وبدا يعرفني بيهم
قال ليهم :
شباب دا حسن الحكيت ليكم عنو ود امدرمان المقطعها يعني ود البلد ما حنروح ونفشل روحنا ساي 😂
شكلهم الاتنين أبناء اقاليم
سلمو علي وعرفي بيهم منتصر
: دا احمد اخونا في الغرفة وزميل من الجزيرة قرية ود عجبنا ودا عبدالله من الجزيرة برضو
اول مرة دي كانت اسمع بي ودعجبنا
سلمت عليهم وطلعنا فوق الغرفة ، هم كانوا متعودين علي بعض وانا لسة جديد كنت بسمع في ونستهم بس ما بتكلم
بعد شوية طلعوا الكتشينة ودورو لعب وقالوا لي الا تلعب معانا
لعبنا وسبحان الله عد اليوم داك كلوا سريع
وبدون ما اتزكر حاجة تضايقني
وهنا حسيت فعلاً انو انا ماشي في تحسن ، الشباب ديل طلعوني من الجو الكنت فيهو
ومرت الأيام علي كداا ، مرات اقعد العب معاهم وشوية اتونس
مرات انجدع في سريري والعب مع الكديسة حقت فاطمة
ومرات أسرح براااي بالساعات ، لدرجة ناس الداخلية كانوا شاكين في صحتي النفسية ومفتكرني مجنون ، ولأنو معظم الوقت بقضيهو لعب مع الكديسة حقت فاطمة
اطلقوا علي لقب .. حسن كديس 😅
المهم مع الأيام
وشوية شوية اتحسنت شديد، قدروا يخلوني اقدر اتعامل وارجع زي الاول
ونزلنا الجامعة كلنا كشلة واحدة ...💜
ضراع واحد كلنا
حسن
منتصر
أحمد
عبدالله
ودي كداااا قصة حسن اللي كانت تايهة منكم
قصة شوية مأساوية بس انا متأكد اني احسن من ناس كتير في الدنيا دي ، وكل شي ربنا بكتبوا ليك لي خير😊
اهاا بعد عرفتوا قصتي احفظوا السر جواكم وماتحكو لي زول وبالله عليكم
ما عاوز اشوف نظرة شفقة في عيونكم 💜
موش يمكن ربنا كتب لي دا كلوا عشان في النهاية اجي ود عجبنا واشوف روان واحبها
حتي لو ما اتكتب لينا نصيب مع بعض بس اقلاها
اني اكتشفت انو قلبي دا قادر يحب بعد الحصل لي كلو
علي فكرة روان اهدتني اخلي حاجة
" خلتني احس اني لسة انسان ودي حاجة انا فقدتها زماااااااااان "
م حزعل اذا روان ما بقت من نصيبي لانو انا متعود علي الخسارة واني أخسر الناس البحبهم بس الحاجة المبسوط منها
انو انا ما اذيت روان !!
زي ما اذيت فاطمة ونفسي
روان روان روان
رواااااااااااااااان
لي ما قادر أنسي تفاصيلها
😞😞😞😞😞😞😞
وصحيت مخلووووع وعرقان
صحيت ولقيت نفسي في الداخلية
نمت شديد شكلي كداااا 😅
شفتوا خليتوني احلم قدر شنو. ، دا كلو حلم وانا بحكي ليكم في قصتي
المهم م علينا ونرجع لي احداث قصتنا في الوقت الحالي
.
.
.
يُتبع
#أبوبكر_علي
