#درويش_ودعجبنا
#الحلقة_31
إتحركنا الصباح بدري قاصدين ود عجبنا
في الطريق كنت انا سايق ..
كان جمبي منتصر وورا كان راكب عبدالله
أحمد رفض يركب وقرر انو يجي بالبص براهو
أخد علي خاطروا
الكلام دا تاني يوم طوالي يعني نفس اليوم القررنا اننا فعلاً نسافر فيهو
اصلا الحصل أمس كان امتحان صعب لينا كلنا ، اختبار عظيم لصداقتنا
يمكن كانت غلطتي من البداية اني ما حكيت ليهم قصتي والكان حاصل معاي بس انا معاي حق
انا بعرفهم اكتر من 3 سنين عمرهم ما سألوني عن اهلي او عن الماضي حقي لي هسي يزعلوا كداا
منتصر اكتر واحد ما كان عندو عين يزعل بيها لانو كان عارف انوا وراي قصة بس الزعلوا انو فهم اني بحب عُلا
الاجواء جوا العربية كان كاسيها الصمت لفترة طويلة او يمكن طول الطريق
انا جواي كان في خوف كبير ، خوف من اني اخسرهم
وبرضو جواي احساس بالزعل منهم ، اول مرة ازعل منهم لانو صراحة كونوا يفهوك غلط او ياخدو عنك فكرة سيئة بعد العشرة دي كلها ما حاجة الزول بقدر يستحملها
الاحساس دا لو كان اتملكني صراحة كنت حخسر الشباب ديل
بس مسكت نفسي قلت مخلوعين من الحصل ومعاهم حق واصلا
انا زول غامض وبالنسبة ليهم ماف تفسير تاني
كل واحد كان سرحان وبفكر براهو
لحدي ما وصلت كل واحد منهم قريتو وبي نفس المشهد الصامت بإستثناء كلمة تصل بالسلامة الكانوا بقولوها
وصلتهم واتجهت علي ودعجبنا ، كنت براي في العربية ، لحظتها انا حسيت انو كل شي انتهي
هسي انا حمشي وين
امشي بيت عم ابراهيم واقول ليهو ولدك جاي بالبص شينة وما مقبولة
صراحة زعل احمد وتصرفوا دا كان غلط كبير ، لانو هو عارف اني ماشي كان ع الاقل يعمل لي خاطر اني ماشي اقعد معاهو
احمد احمق جداا والتصرف دا حسسني اني ما عندي قيمة قدامهم وحركتو دي كان فيها احراج شديد لي وزلة
قررت لحظتها اني لما اصل حمشي المسيد واقعد هناك واحمد ما حقعد معاهو خالص
كنت زعلان شديد لاني حسيت حالياً اني بدون سند وبدون ناس تقيف معاي بس انا كان عندي هدف جاي عشانوا
وزعل احمد او رضاهو ما حيأثر فيني ، لحظتها تلفوني ضرب وكانت علا 🤦🏾
رديت عليها من اول جرس وما اديتها فرصة تسلم حتي
وسمعتها ليك العمرها ما سمعتوا ...
- ياخ انتي بت رخيصة جدااا تجري وراا الأولاد زي الكلب العطشان ، ياخ احترمي نفسك واسرتك وابعدي عن طريقي انا ممكن ادخلك في مشاكل انتي ماقدرها
ياخ انتي بسبب تصرفاتك دي دخلتيني في مشاكل فلو عندك زرة زوق او احترام لي نفسك انسيني يابت الناس
ردت لي بكل برود :
- دخلت في مشاكل مع منو م تكون ياحسون مرتبط !!
حتصدمني طبعاً
يالله انا من تفاهة البت دي 🤦🏾
- ياخ انتي دخلك شنو يابت الناس الله يرضي عليك ابعدي عني لو سمحتي
- الا توريني اول انت مرتبط ، عشان لو مرتبط ابعد عنك انا ما النوع البفرق اتنين بحبو بعض
لدقيقة حسيت بي خباثة في كلامها ، بس انا اخلاقي ضاقت منها خلاص
- اي مرتبط ارتحتي يلا احترمي نفسك عشان شكلك بقي شين
- أحلف انك مرتبط
-ياخ والله مرتبط ، وبحبها شديد واحلي منك وتقيلة في روحها ما رخيصة زيك وخفيفة
اها تاني شنو عاوزة تسمعي ، اختيني ياخ
