#درويش_ودعجبنا
#الحلقة_34
وانا مالي حاسس إني زي البشبهك 🤦🏾
مجروح من الناس كم جرح
والدنيا مابية تراضي قلبي المنتهك
هل بشبهك !!
قدامي البحر بي كبرو وعظمتوو ، موجو عالي يشيل ويودي ، يشيل الهم مني ويرجعو تاني
مع كل ضربة موجة كنت زي الزول الضربتو صاقعة او كهرباء كنت برجف بس ما خوف
خلاص انا والخوف ترانا بقينا اخوان ، لكن برجف وجع 😊
مووووووجووووع ياااااخ
كنت في مكاني المفضل ، طالع في الشجرة فوق وبراقب البحر والموج وشوية بعدت من الناس
شوية اشيل تلفوني وافتحو ، اتصل علي روان بس للاسف ماف رد 🤦🏾
اعمل شنو انا هسي ..
رجعت لي وكانت زعلانة شديد
- حسن انا طول عمري بخاف الخيانة
وبعد الحصل دا انا شايفة بي كل مودة
نتفارق وكل زول يشوف طريقو
كدا احسن
وكانت بتبكي
- عليك الريد أكان تقولي كلام غير داا 🤦🏾♂️
الفراق لأ ، الفراق ما بحملو
-ماف حل غيرو ، شايف حل انت !!
- ما شايف بس برضو لأ
قالها زمان أبوي لي أمي لما اتشاكلوا
" الفراق إن جاء ماعندي ليهو فجة "
ودحين يابت انا قلبي إتملي بيك وماعندي مكان في قلبي لي فراق
ويا شتيلة الريد أكان ترضي كان تابي ، انا فتحت قلبي ودخلتك وقفلت خلاص بابي 💜
وبقولها ليك تاني
فراق لأ
قفلت الخط في وشي 🤦🏾♂️
انا اتضايقت اكتر وخفت اكتر
اخر شي طلعت تلفوني وقررت ارسل رسالة لروان ..
كتبت كلام كتيييير وشرحت ليها كل شئ
وقبل ما اضغط زر الارسال غيرت رأي
مسحت الكتبتوو كلو واكتفيت بي اني رسلت ليها
" أستميحك عُزراً يا مُنصفة فما خنتك يا أبنة قلبي
فالأوطان لا تُخان ، أهلكني الشوق فهل تعودين ❤️ "
رسلتها وقررت ارجع البيت ، لانو ناس عم ابراهيم بكونو قلقانين علي جداا
بقالي علي الحال داا يومين ، كل يوم أجي اقعد فوق الشجرة دي من تصبح لامن تمسي البحر لامن زهج مني
أول ما نزلت من فوق وتلبت
ختت رجلي في الارض ورفعت راسي لقيت في وشي الدرويش 😐
فرقو مني خطوة بس ..
اتخلعت شديد وقلت بسم الله
قال لي
حسن كيفك !!
واختفي 🤦🏾
دا شنو ياربي دا حقيقة ولا انا جنيت وبقيت بتخيل حاجات ما طبعية
الموضوع دا بقي صعب علي
قصة الدرويش دا شنووو!؟ 🤦🏾
لحظتها اتزكرت الشيخ من اليوم داك ما مشيت ليهو تاني
وقررت امشي المسيد اسلم علي الشيخ واكلموا نأجل الموضوع لبعد الخميس لحدي ما اصالح روان الزعلانة دي
وقررت اني حمشي اشوف الدرويش في راكوبتو واتأكد انا بحلم ولا حقيقة
وانا في الطريق للمسيد بقيت بفكر ، ياربي قصة الدرويش دا شنوو ولي ماف زول بتكلم عنو في القرية دي
لي ناس ودعجبنا ديل اي موضوع يسمعو بيهو يتحاكوا بيهوو بس قصة الدرويش دي ماف زول بحكيها
وهنا ربطت الحاجة دي بي تحزير الشيخ لي زمان !!
قلت يمكن الشيخ محزرهم ما يتكلموا عنوو
