#درويش_ودعجبنا
#الحلقة_24
" ما فرقتك هدت الحيل
قلبي ما بين ضفتين
ضفة تشتاق ليك كتير
وضفة باقية علي الرحيل
ما بنكر الشوق والحنين
ما بنكر الدمعة البتنزل فجاءة
وأتزكر سنين
انا كنت دايما بلقي في داخلك براح
والف معبر للفرح
والقي كل الشايلو إنزاح
والقي خاطري معاك سرح
لكن خلاص البينا راح
البينا رااااااااااح "
بغني لي روان ، الحب الأول والأخير ...💜
النقطة البيضاء في نص السواد الكاسيني ، روان براح الروح وفسحة الأمل البحتاجها أي انسان وهو في عز ضيقو ومشاكلوا
عارفين المنعني احارب عشان روان شنوو ..!!
اني كنت بخاف اخسر وكنت متأكد اني حأخسر ، انا ما خفت الخسارة
انا خفت إحساسها هي يتكسر زي فاطمة أختي زمان
خفت عليها مني .. البقرب لي بضيع 🤦🏾♂️
مشكلتنا اننا مرات بنحارب وبنكون قايلين انو دي معركتنا بس بعد نخسر بنكتشف اننا حاربنا في معركة غير معركتنا
ماقادر امسح صورة روان من خيالي ، ماقادر أتجاوزها وفي نفس الوقت شايف العملتو صاح
حاسس إني مكتف وماقادر اتحرك 😭
طلعت تلفوني وجبت رقم روان ، قربت أصبعي من زر الإتصال إتصلت عليها ...
ردت روان من أول جرس واول شي قالتوا
-حسن انت كويس!!
حسيت بي الخوف واللهفة في صوتها
حسيت بي شوقها
فضلت ساكت وما رديت عليها 🤦🏾♂️
صوتها خلاني أحس إني طاير من الفرحة كل حرف بتقولوا كان بشبه لي حضن من أمي زمان وضحكة من أبوي في وشي وإبتسامة من فاطمة أختي
حرفياً كنت حاسس إني في بيتي معاها 💜
بقت روان تقول ألو ألو حسن إنت سامعني ..
-حسن انا محتاجاك ما تخليني😭
وحسيت في صوتها بكاء وفعلاً كانت بتبكي
وجعت قلبي شديد وما قدرت أستحمل ....
قفلت الخط في وشها ورقدت في السرير وحضنت التلفون وبقيت ببكي ...🤦🏾♂️
ببكي علي حالي وعلي روان الماقادر أصلها او احارب عشانها او حتي اتجاوزها
روان القايلاني قوي وفي الحقيقة اني كنت ضعيف شديد وخواف شديد وما عندي طاقة احارب بيها
الحاجة الوحيدة الكانت كبيرة حبها جواي كان أكبر مني والله
أكبر من خوفي ومن أي شئ ...💜
حذفت رقمها وقررت إني حنسي اني عرفتها في يوم
ولو لينا نصيب ربنا بكتبوا
العمل شنو ياربي أتصرف كيف ؟؟
اتزكرت ساعتها كلام ابوي شيخ محمد أحمد
عقدت يدي وبقيت أسبح واستغفر لحدي ما غفيت
تاني
وعدت الأيام ....
يوم ورااا يوم وانا في نفس الحال
لحدي ما جا يوم 13 يوم المحكمة ..
اتصل علي عبد الرحمن الصباح بدري وانا اصلا كنت منتظر تلفونو
ما عشان انا بالي في المحكمة انا اصلا من زمان شلت الموضوع دا من دماغي
حقي العند عمي وحق اختي الله يرحمها نلقاهو يوم القيامة ان شاء الله ، بالنسبة لي
القروش وسخ الدنيا واصلا القروش هي سبب الأنا فيهو هسي ، ثروة أبوي هي الوصلت عمي لي كدااا
كنت مبسوط وراضي بي الدكان الفتحناهو في السوق المحلي قبل سنين انا وصبري
والحمد لله رب العالمين اي تعويض ربنا عوضني ليهو كان في الدكان
صبري بي شطارتو وربنا بي توفيقو الدكان كبر وبقي عندنا مخازن وتوزيع ولينا سمعتنا في السوق
صحيح صبري هو الاجتهد وانا ركزت مع الدراسة أكتر بس صبري سبحان الله عمل الما عملوا عمي الريح ولا عمي جمال
وعشان كدااا كنت دايماً بقول انو مرات الغريب بكون أحن عليك من القريب المن دمك
في ناس معدنها أصيل وبتخاف الله 💜
وعشان صبري وقف معاي بقيتو شريك معاي في الدكان هو بالشغل والاجتهاد وانا بي راس المال
وكانت القسمة عادلة بينا هو ليهو التلت وانا التلتين
عن نفسي الكان بطلع من الدكان كان كتير والحمد لله ، بس ما كنت شغال بيهو كتير
بدفع رسومي وبطلع مصاريفي والباقي كان في حساب خاليهو للزمن
صراحة كانت بتحصل ظروف والقروش الفي الحساب هي البتحلها لينا
مرات ظروف الشباب بتعصلج حبة ، حرفياً الشباب كانوا اهلي وناسي عشان كدااا م حصل خليت واحد فيهم يحتاج لي شئ
اهو حاجة بسيطة قصاد البعملو عشاني ....🤦🏾♂️
نرجع لي تلفون عبد الرحمن ..
: ألو حسن كيفك صباح الخير
: صباح النور الحاصل شنووو
: كلو في السليم بس المحكمة إتأجلت حبيت أكلمك
: لي السبب شنوو !!
: والله ياحسن بتحسسني انك ما قاعد في البلد دي
اجلوها عشان الإنتخابات يا استاذ لحدي ما تنتهي علي خير
والغريبة انك بتقراا الخرطوم يعني مفروض تكون علي علم 👈🏾
: والله ياعبد الرحمن انا من يوم جيتني تاني م طلعت قاعد في غرفتي خليها بالنية بس
بعدين ما معروفة ومكشوفة يعني الانتخابات حيفوز المؤتمر الوطني لانو اصلا هم العاملنها وهم اللاعبنها
يعني بالمنطق كدااا زول سايق العربية وقلت ليهو عاوز اسوق وقال ليك نعمل قرعة وخليتو هو اليعمل القرعة😅
اكيد حيفوز نفسوو يا عبد الرحمن
انتو والله تاعبين نفسكم ساي مع السودان دااا والله طول م الكيزان ديل قاعدين السودان م يشوف خير اصلوو
: انا يا حسن م بغيظني الا تشاؤمك دااا يازول السودان دا بتصلح والكيزان ديل صدقني كل م يطغو اكتر كل م اجلهم بقرب أكتر والشعب دا مصيرو يفهم وينتفض
بالمناسبة انت عارف انو عمك مرشح في المجلس الوطني ؟؟
: عمي الريح ؟
: عندك غيرو عم انت غبي 😅
اي عمك الريح وتبع المؤتمر الوطني ، طبعا م احكي ليك الحاصل في حلتكم
مقومها ومقعدها وعامل فيها زول خير وبساعد ناس الحلة عشان يصوتو لي صالحوا
: اصلا عمي شبه الكيزان والكيزان شبهو وياها عماليهم😅
لابسين دقون الزيف ، كلامهم معسول ويوهموك بالجنة والاسلام والقضية الإسلامية وهم بي اختصار عاملين زي الزول اللقي شافع يتيم ومسكو يشحد بيهوو
خلينا منهم والله نحن كرهونا في الجامعة
يا تبقي معاهم يا يضيعوك .. انت نسيت انهم كانو حيفصلونا سنة عشان بس في الكورة غلبناهم لو ما كان مشينا اتمحلسنا ليهم 😅
:اي متزكر في تانية انت وشلتك ، يازول ربك كريم وبهونها
المهم خلي بالك من نفسك ولحدي م يحددو زمن للجلسة بديك خبر
: يلا في أمان الله
