يسرا قالت لي انه امشي الحوادث عشان سارة بتكون هناك،،بس انا متأكد انه سارة ما بتجامل في الشغل ولا بتحب تتلهي عن الحاجة اللي بتحبها،، بس مشيت على امل اني اكون معاها في نفس المكان على الاقل😔✨،، الحمد لله لقيت كرسي جمبها😂💜،، قعدت وقلت الحمد لله،،،وسلمت عليها كيفك يادكتورة تمام،، لقيت منها رد😎✨،، بقيت بتبسم براي والله😂😂..
بعد شوية المرضى كتروا،، وانشغلت انا زاتي بالعيانين،، كانت بتسالني ومرات بسالها انا وكدهه يعني..
بحس انه قربت شوية😂،،
اليوم خلص والساعة كانت 7 مساء،، مشينا سوا وطلعنا وقعدنا برا،، بدون اي مقدمات سارة بقت تتونس وتحكي لي عن انه كل يوم نفس الموضوع بتكرر تقريباً العيانين بتشابهوا🙄،، قلت ليها لسه قدامك مشوار طوييل وحتتعلقي بالعيانين وتحبي المستشفى،، قالت لي انا عايزة اطلع برا البلد،، نفسي اسافر العالم كله😭💜،، ضحكت وقلت ليها اهاا وتاني نفسك تعملي شنو😂،، قالت لي نفسي اشتري لي عربية،، وامشي رحلة انا واخواتي🙄،،
هاا وتاني؟!..
قالت لي وانت نفسك تعمل شنو!! قلت ليها بي قلبي نفسي اقول بحبك اسي وتعرفي ياخ😔💔..
شافتني سرحت غيرت الموضوع😂،، قلت ليها نفسي اسافر انا كمان..
قلت ليها سارة انتي متذكراني يعني احنا اتقابلنا قبل كدهه؟!،، قالت لي أي،، انت كنت سنيري فالجامعة.. يسرا ذكرتني بيك أول يوم نزلت فيه المستشفى هنا،، قلت ليها بس كده يا سارة!!
سكتت مسافهه💔قلت ليها بس انا بعرفك من كنتي برلومة،، ومتذكرك وما نسيتك..
فجأة سارة نططت عيونها وقالت لي كدي اشرح لي متذكرني من متين!!..
قلت ليها أيوة انا اللي رسلت ليك الصور والرسايل! لاني متأكد انه دهه أول حاجة خطرت على بالها..
أنا بحبك💜.
بحبك من أول يوم شوفتك واول صورة اخدتها ليك،، كنتي حاجة صعبة اني اوصل ليها يا سارة،، فجأة قامت من الكرسي ووقفت وملامحها اتغيرت،، وانا كردة فعل طبيعيه مني وقفت،، قالت لي اوقح سنين قضيتها وانت بتوهم نفسك انك بتحبني والاقبح من كدهه ثقتك الزايدة في نفسك انه انا ممكن اقبل بحاجة زي دي🙂
بقيت مندهش كيف يعني هي قاصدة شنو بكلامها دة😭💔،، قلت ليها براحة يا سارة اهدي!
قالت لي كويس إني عرفت ده من ال بعمل حركات المراهقين وجاري وراي من حتة ل حتة عشان ياخد لي صورة ريحتفظ بيها سنين ويجي،،بكل عين قوية يقول لي بحبك ومنتظر مني رد🙂💔،،، اعتقد انك دكتور واعي وفاهم الحركات دي بتقلل من قيمتك.. انا عن نفسي ما بقبل بحركات بايخة زي دي،، أقل شيء كان تجيني من لما كنت برلومة ما تبقى جبان عشان افهمك من البداية وتشوف حياتك بعيد مني،،
اتنهدت وقلت ليها دي نظرتك انتي للموضوع بجانب واحد هو انه انا كيف اخدت ليك صور واحتفظت بيهم بدون علمك،،مع انه دي ما حاجة بتمس اخلاقك في شيء انا ما اخدت ليك صور عشان ابتزك بيها،، قسماً بالله ماف زول شافها غيري.. صورك وانتي مع صحباتك في الجامعة بت عبدالله وحوا اللي لفتني ليها احترامها،،
قصة اني جبان وما جيتك واعترفت ليك من زمان فاا انا فعلياً جبان.. وخايف اخسرك..
مرّت عليّ سنين وحصلت لي ظروف ماعايز اقول ليك عنها،، بس هي كانت عازل بيني وبينك..
ما حتستوعبي كلامي اسي،، بس ما ترفضيني بالصورة دي..
مشيت منهاا..
ما اتخيلت سارة ممكن تكون بالقسوة دي،، دهه حتى كلامها جارح،، دي ما ال حلمت بيها سنين،، كيف عايزاني اقول ليها بحبك من لما كانت برلومة وانا بشوفها ظاهر عليها بت عز وتصرفاتها بتحكي عنها،، وانا اللي جاي طب منحة عشان طلعت الاول،، وفي السنين الفاتت كنت بشتغل اي شيء قدامي عشان اصرف على اهلي،،
يعني فجأة كدة تلاقي نفسك انت واهلك برا بيتكم،، وابوك متهم بقضية كذب ومحجوز على امواله كلها،، ابوي كان مالك شركة استيراد وتصدير،، وكان زول خلوق وماشي جمب الحيطة،، بس على قول امي اولاد الحرام ما خلوا لاولاد الحلال حاجة،، فاا افقوا ليهو قضية انه تاجر ممنوعات،، واتحجز على الشركة وبيتنا وكل حاجة..
ابوي اتسجن تسعة شهور،، على ما اثبتوا انه مظلوم.. بس الشغل اتدهور والسمعة،، وابوي بقى عيان،، اشتغلت كمساري،، واشتغلت في السوق،، وكتيير لحدي ما الوضع رجع احسن،، بتجي عليّ أيام بكون ممتحن وما عندي خيارات كتيرة يا اما اكل يا اما اشتري شيت واقرا.. فاا كنت بختار اني اشتري شيت،، بقرأ وانا جعان ونايم في السوق،،
لو سارة كانت بتعرفني في الظروف دي حتعاين لي؟!..
لما اخواتي الصغار بيتحرموا من لبسة العيد وبشوف دموعهم وانا جيت بقروش من شغلي بس بتكفي عشان ناكل،،،اخواتي اللي طول عمرهم متعودين على انه طلباتهم مجابة،، بقينا نقول ليهم احنا لاقين ناكل؟!
الدنيا بتدور عشان تعلمنا الصبر وعشان تورينا الدروس انه ماكل حال بيدوم والنعيم اللي بنتباهى بيه دهه في ثانية ممكن يزول،، اتعلمنا الصبر واتعلمنا نقول الحمدلله على الايام الكعبة قبل السمحة،، واتعلمنا انه الدنيا دي اصغر من انه نشيل ليها هم..
صبرنا ونلنا.. والوضع اتحسن والشغل رجع تاني،، الشدة اخدت سنين بس انتهت..
مع كل الظروف دي كنت بشوف انه سارة حلم وانا لازم احققه،، الليلة قلت ليها اني بحبها،، وهي
شايفهه انه حبي ليها كلام فارغ وحركات مراهقين،، انا شايف انه حصاد قلبي طول السنين الفات.. واتوقعت انها تكون مبسوطة لما تعرف.
____________________________________
يعني طلع روميو اللي بيرسل لي الجوابات الفترة الفاتت احمد ههههه🙄،، لا وفاكرني ح اقعد انطط واقول ليه واااو وانا بحبك ويلا نعرس،، أكتر واحد مغرور وشايف نفسه،، يعني على أي اساس ممكن احبو بس؟!..
مامن حق اي زول يتدخل في خصوصيتي بالطريقة دي.. او يفرض نفسهه عليّ،، اي واحدة مكاني كان ضربتو كف ووقفت المهزلة دي،، بس أنا احترمت مكانتي واحترمت انه دكتور،، مع اني عمري ما فكرت في موضوع الارتباط دهه بس حقيقي بالطريقة دي ما عايزة..
اتصلت لي يسرا عشان تجيني ونطلع سوا،،
لما اتكلمت معاها فالموضوع.. ما لومتني أبداً..
=يسرا: ما عارفة والله يا سارة دي حياتك وانتي حرة فيها..
قلت ليها طيب انا قلت ليهو شيء غلط؟!
قالت لي بس دي الحقيقة.. وقفلت الموضوع بانه الليلة اتاخرنا وكدهه كنا طالبين ترحال،، وطول الطريق ما فتحت لي الموضوع وانا قاعدهه سرحانة في ال عملتو.. حاسة انه لهجتي كانت حادهه شوية.
#نتلاقهه.
#الخلاصة
مرات الصدّ بيكون مؤلم وما بنقدر نتقبله،، بجينا احساس انه كيف نترفض بعد الحب واستهلاك المشاعر وكل اللي قدمناه،، مع أنه بنخاطب القلوب وهي المفروض تميل بالإهتمام،، وشوية حنية،، لما تبذل كل طاقتك عشان تحاول بس تقرب للبتحبه وتتبدا ترسم توقعاتك انه خلاص أنا لو قربت مكاني هيكون موجود.. تكتشف فجأة انك بنيت أوهام وياريتك ما قربت.. في الحقيقة بتكون واقف في النصّ ولا قادر تخطو خطوة لقدام ولا بتقدر ترجع..
ربنا ما يوريكم لحظة انك تترفض انت وقلبك والحب الفيهو..
