ابوي ما عايز السيرة دي تتفتح،، وانا بحاول اعرف اكتر فضول اني اعرف شنو الحاصل جوة بيتنا ومع امي وابوي اول مرة احس بالفضول ده،، احنا اتربينا على انه ما ندس حاجة على بعض،، بيتنا لاول مرة بقى غريب علي،، امي وابوي والاسرار.
ما قدرت انوم.. مشيت لامي تاني ولقيتها برضو صاحية.. وقاعدة في الحوش.. بتخيط في ملابس ما ظنيت محتاجة لاي خياطة بس بتشغل في نفسها..قعدت جمبها وقلت ليها امي بعيداً عن اي حاجة انا عايزة أسألك وتديني اجوبة لكل الفي بالي وما تقولي لي اعمامك عذبونا واعمامك ظالمين وريني الحصل شنو بالضبط كده وليه ابوي متضايق،، لما اخوهو اخد منه كل حاجة ومن سنين طرده من البيت ليه اسي ما عايز يشوفو وهو مسجون وبتعاقب على جريمة علمها؟!،، ليه ابوي زعلان مني؟! وانتي مبسوطة انا اول مرة اشوفكم مختلفين في المشاعر،، اول مرة حواء تكون مبسوطة وعبدالله زعلان! اول مرة تخلي ابوي في همومه وانتي تكوني قاعدة برا بتخيطي.. في شنو يا امي!!
امي طلعت النظارة وختتها عل جنب وقالت لي تعالي اقعدي جمبي،، والله يا فاطمة ما اتوقعت يحصل معاي كده! السر الوحيد ال عشت عمري كله بضاريهو انا وعبدالله منكن الليلة تجي تنبشيهو وتذكريني بيه.
قاسم تاج الدين ظالم مستبد ممكن يعمل اي حاجة عشان مصلحته.. وكل اعمامك التانين ماشين على نهجه،، الا ابوك ما حصل اخد حق زول ولا نصب ماشي بالحلال،، بس مشكلته انه جدك كان بفضله على باقي اولاده.. ودي المشكلة.. ومشكلتي اني لما كنت صغيرة قبل ما تكبرن كنت ما برضى زول يتكلم في ابوك ولا يمس لي بكلمة واعمامك وعماتك وحبوتك ما قصروا في اي مناسبة ليهم بذلوني ذلة الكلاب وبسمعوني ابشع كلام،، اتهموني اني بت حرام وانا يشهد الله اتربيت في بيت الدنيا كلها بتحلف باخلاق ابوي وامي،، اساءو لي كتير.. وقالوا عايزة اسرق مال ابوك واني عشان ابوي فقير عيني ما مليانة.. ده البتذكره.. والباقي مات مع الزمن،، انا مبسوطة عشان ربنا نصرني بعد صبر سنين عشان انا حافظت على ابوك وعلى تربيتكن لحدي ما اي واحدة استلمت شغلها،، صبرت مع ابوك على الجوع والفقر مع انه اهله بياكلوا في صحون من دهب بس عمري ما فكرت اقارن بين عشتنا واقول ليهو امشي اتذل لاهلك.. ضوقت المر،، اتغربت واشتغلت في البيوت عشان اربيكن بالحلال واساعد ابوك،، انا فرحانة عشان الدنيا دوارة وحقي رجع لي الليلة💜🙏بحمد ربنا انك كبرتي وقررتي تبقي صحفية،، اما ابوك زعلان عشان الضفر عمره ما بطلع من اللحم،، عشان ابوك طول السنين دي بمشي لي حبوبتك اللهي امه كل اسبوع بمشي يشوفها ويطلب رضاها،، وبجي راجع مكسور الخاطر وبتدعي عليهو وعلي وعلى بناتي،، بتقول ليهو امشي الله لا يبارك فيك ولا في ولادة الهم بناتك،، بتدعي تموتن،،
امي بتحكي لي وبتبكي💔وانا قعدت ابكي قلت ليها مستحيل يا امي تكون في ام بالقسوة دي ابوي عمل ليها شنو عشان تفرقه منها؟! قالت لي في كتير اعمامك وعماتك بتكلموا ليها كتير،، وهي بتسمع منهم.. هي فاكرة انه ابوك حياخد مال اعمامك واني انا بحرضه علي اخوانه،، فاا قالت تكسر الشر وتطردنا بدل ما نعملها احنا. ونطردها.. مع انه مستحيل كان يحصل كده وانا ابوي الاتنين ما بنحسب الحياة بالماديات..
قالت لي خلي الحكاوي دي هنا اخواتك ما يسمعن بيها،، انا عارفة انك يا فاطمة عاقلة وبتعرفي انه في ناس ما بيدهم،، الشيطان دخل بين ابوك واخوانه،، الزمن كفيل يرجع العلاقات،، ما تكرهي اهل ابوك ولا حبوتك،، والباقي خليهو للزمن.. امشي نومي اسي وانسي.. الله يبعد عنك قاسم والشر الفيهو يا فاطمة..
بقيت خايفة حرفياً على ابوي واخواتي خايفة عمي اللي هو عمي اخو ابوي يأذينا حسب كلام ابوي🙆♀️💔،، مشيت لفيت على اخواتي.. اسمهان ولينة فتحت غرفتهم لقيت لينة نايمة وغرقانة نوم،، واسمهان بتذاكر قعدت معاها حبة،، وبقيت احكي ليها انه مهما حصل في الايام الجاية ما تستلم لظروف وتخليها قوية وتحافظ على قرايتها.. قلت ليها اوعك تأمني للصحبات يا اسمهان اوعك تصدقي الكلام وانه لازم تعيشي حياتك،، حافظي على نفسك شديد يا اسوم.. اسمهان لانها حنينة شديد بقت شفت القلق في عيونها وقالت لي فاطمة اختي في شنو ليه بتقولي كده هو في حاجة حتحصل؟!.. قلت ليها لا يا اسمهان ما معروف الظروف شنو انا بقول ليك كلامي ده عشان انا اختك الكبيرة وانتي خلاص كبرتي حتواجهي مشاكل وهموم اكبر بكتير من خوفك انه الدرجة حقتك في الرياضيات تنقص ولا نتيجتك تطلع كعبة،، الدنيا أكبر من احلامك الصغيرة دي بس اوعك توقفي احلام أحلمي قدر السماء والأرض أحلمي بأي شيء خلي طموحك أكبر من حب وفترة المراهقة دي عارفاها كيف بتكون.. بس أقري فيها وأنجزي،، وخلي بالك من لينة.. وصاحبيها وبطلوا مناقرات.. وادعي الدنيا ما تفرقنا..
بعدين حسيت انه اسمهان بقت خايفة من كلام وانا زاتي من خوفي فجاة جيت وبقيت اوصي فيها زي وصايا المودع ولا الضامن موته.. قلبت الموضوع هظار وقلت ليها انا بوصي فيك عشان انا اتفصلت من الجامعة وناس امي ما عارفين وخايفة امي تقتلقني وتضبحني😂،، قعدت تضحك.. بعد حكيت ليها بكدا واتطمنت شوية..
