بعد رجعنا مؤمن أصر انه لازم اخد فترة علاج يومين تلاتة.. وبكدهه اتأجلت زيارتنا لي سالم،، بس انا ما كنت مرتاحهه وعايزة مقالي ينزل كتبت انه قاسم تاج الدين وكتار زيه واقفين قدام القضاء بجرائم وفساد والقضاء بتفرج.. ناس بتدمر البلد بكل أنواع التجارات الممنوعة والقتل وباقي الفساد.. الموضوع دهه حقيقي كان لازم اتكلم عنه خصوصاً انه في ناس متضررة تخيل بس زول عندهه قروش وسلطة يأذي الناس القريبين ليك وما تقدر تثبت عليه أي حاجة لانه بسساطة في بلدنا ال بدفع أكتر أموره بتمشي والغلبان يموت تحت رجلين القادرين.
يعني المقال كان دسم نوعاً ما بس ناقص كلام سالم.. وقلت انه لسه عندي حقائق في مقال تاني،، لما اتصلت لمؤمن عشان يراجع لي المقال.
رفض اني أنزلهه،، قلت ليهو لا لازم اول الناس تتابع قصة قاسم دهه عشان لما كلام سالم عنه ينزل الناس تكون على نور وكل الحقائق وضحت..
مؤمن قال لي شوفي يا فاطمة.. فكرتك غلط،، أولاً هتأذي سالم المسكين دهه.. وهو لسه ما اتكلم،، اول لازم نمشي ليه وناخد منه اللي بيثبت جرائم قاسم معاه ونعرف علاقتهه شنو بقاسم،، وبعدين ما هتذكري أسماء عشان ما يحصل العكس،،وارتاحي كدهه وحنمشي لسالم.. اقتنعت بالفكرة وقفلت على كده.
قعدت تلاتة يوم فالبيت اصلاً خلصت ال كم تست فالجامعة وكسلت امشي المحاضرات.
في اليومين ال قعدتهم ديل بقيت بشوف سارة اختي طولت ما شوفتها واتكلمنا.. بس كان مزاجها كعب شديد.
قلت ليها سارة.. احكي لي حبيبتي مالك الأيام دي مزاجك على طول متعكر وما رايقة لأي زول.. في شنو؟!.
قالت لي،، ماف حاجة يا فاطمة انا بس راجعت حساباتي ولقيت نفسي غلط في تفكيري الفترة الأخيرة وبصراحة الحاجة دي زعلتني.
(قالت لي كدهه وكانت بتبتسم ابتسامة صفراء كدهه عشان تخليني امشي الموضوع،، وكانت بتعاين في الارض ما عايزة تواجهني).
كانت قاعدة شلت يدها ورقدت ليها في رجليها قلت ليها تتذكري يا سارة لما كنا صغار كنت برقد ليك في رجليك كدهه وبحكي ليك كل المشاكل في مدرستي،، احنا كنا صاحبات وما محتاجين أي صاحبة تانية برا كنتي بتقولي لينا أنا مكتفية بيكم وما عايزة صاحبة تانية.. بس اتغيرنا احنا بنات حواء اتغيرنا شديد بقينا ندس من بعض بعد كبرنا وبنحكي للغريب،، إنتي عارفة يا سارة الفرق بين إني أصاحب أختي وبين أي صحبة تانية شنو؟!
سارة مسحت دموعها ومسحت لي جبهتي عشان الدموع نزلت فيها،، وقالت لي اها الفرق شنو يا بت حواء..
قمت من رجليها وقعدت قصادها وقلت ليها الفرق اني لما بحكي ليك بكون متأكدة إنك عايزة لي الخير ما بكون عندي أي شك في كدهه،، بحكي ليك كل الجواي وما بعمل حساب انك ممكن تقولي علي شنو.. ومتأكدة إني بلقاك في الوقت ال كل الناس بتبعد مني،، مستحيل أجيك يا أختي وما ألاقي عندك حل لو ما حليتي لي مشكلة بتشيلي مني الهم.
حتى لو اتفرقنا والزمن دهه بقينا بعيدين هتفضلس صاحبتنا وأختنا الكبيرة.. ما تسافري وتخلينا بنات حواء بدون ولا حاجة.
سارة حضنتني وقالت لي لسة انا اختكم.. بس انا عايزة اسافر عشان أحقق أحلامي وأكمل النفسي فيه..وانا لسه صاحبتكم.. بس بقى عندي صاحبة معاكم زيادة يسرا😂💜.. يسرا دي مستحملاني زيكم.. حرفياً ح افقدها لو سافرت زيها زيكم..
وماف حاجة انا كويسة يا فاطمة.
قلت ليها يا سارة انا عارفة انك ما على بعضك لو مهما حاولتي تتهربي مني،، عارفة انه عندك هموم ما عايزة تشاركيني بيها..
