رجعت البيت لسارة طوالي ولا سلمت على امي وابوي.. لقيتها راقده في السرير وماسكة تلفونها وخاتة السماعه ولافة شعرها على اتنين وبتدندن،، مشيت قعدت جمبها لما عاينت لي طلعت السماعهه وقفلت الموسيقى.. قالت لي فطووم قالوا لي جاك واحد حلييوة هنا وشغال معك لي ما حكيتي لي بيهو مش احنا صاحبات😥💔.. ضربتها في كتفها كده على خفيف وقلت ليها ما بكلمك قاعده تكلميني بحاجة انتي حتى خطوبة يسرا ما كلمتيني بيها يخسي عليك.. اسي شكلها زعلانة مني من شافتني في بيت اهل خطيبها قلبت مني وشها وفاتت😥💔.
سارة استغربت من كلامي وقالت لي يسرا شنو ال بتتخطب يا بت انتي نقص الدم ده عامل ليك هلوسة😂💔،، قومي اشربي ليك عصير ونومي يسرا بايرة زي هي صحبتي حتتخطب كيف احنا نحس الاتنين😂،، قلت ليها لا يا سارة انا ما ملهوسة ولا شيء انا مشيت للقاء صحفي واحد كان مسجون في قضية وعنده مصنع بس هو عيان الفترة دي قابلناهو في بيته،، واحنا طالعين منهم لقيت يسرا في وشي.. مع ولدهم الدكتور.. وصحبتك جرت عديل مني والود لحقها..
سارة ختت تلفونها وتعابير وشها بقت ما بتتفسر قالت لي عارفهه ولدهم ده اسمه منو؟!.
قلت ليها اسموو.. دقيقة النسال مؤمن..
سارة مسكت يدي وقالت لي ما وقت نسيانك خالص سريع قولي لي.. لقيت يدها تلج وانا عارفة يد سارة ما بتكون كدهه الا لما تهبط شديد.. قلت ليها اهدي يا بت بسم الله هو حكى لينا عنه بس انا ما قادرة اتذكر اسمه..
قالت لي احمد! اسمه احمد؟! قولي لا يا فاطمة.
قلت ليها ايوااا اي احمد وحتى...
ما كملت كلامي سارة وقفت ومسكت تلفونها وشكلها اتصلت لي يسرا.. بقت تقول لي تلفونها بديني مشغول.. دقيقه ارسل ليها واتس..
بعد ما فتحت الواتس سارة قالت لي حظرتني يسرا لييه!!.
يسرا اتخطبت لأحمد لا ما قادرة اصدق انتي كضابة يا فاطمة.
وقعدت تضحك.. وجات ضربتني في كتفي قالت لي اتوقعت كده بطلوا مقالب يسرا كلمتك اني بحب احمد والفترة دي بحاول اشغل نفسي عشان انساهو وعايزين تعرفوا اني نسيتو ولا لا صح😂💜.. حركاتكم البايخة دي انتي ويسرا ما بتخلوها؟! كدي اتصلي ليها وقولي ليها سارة صدقت المقلب وبتبكي اسي خليها تجيني البيت باليل دهه..
قالت لي كدهه وهي بتضحك وفي دموع في عيونها.. اما انا بقيت ما فاهمة حاجة.. معقولة سارة اختي تتخدع في صاحبتها الوحيدة..
عارفين لما تحسوا بصدمة وخلاص في حاجة كاتمة في نفسك كده احساسي.. قلت ليها اي صح كدي فهميني حكاية احمد ده..
قالت لي لا اكيد دهه تشابهه اسماء واحمد ده غير البحبني ويسرا،، ما كملت كلامها وقعدت تبكي قالت لي وديني لي بيت يسرا اسي بس💔كيف ما ترد علي وتحظر ارقامي..
قلت ليها دقيقة اتصل ليها أنا،،اتصلت اول ما ردت لي كانت لسه ما عملت بلوك،، رجعت ليها. في الواتس رسلت ليها. يسرا كيفك.. قرت الرسالة وبعدها عملت لي بلوك أنا برضو،، وكده اتاكدت أنا..
سارة بقت تحكي لي انه احمد بحبها من الجامعه ومحتفظ ليها بصور كتيرة،، وكل يوم بكتب ليها كلام نفسه يقوله ليها،، وكلمتني انه جا واعترف ليها بس هي اول رفضت الفكرة واحرجتهه بالكلام،، قالت لي..
بس انا يافاطمة الفترة الاخيرة حبيت وجوده💔،، وقلبي مال ليه.. بقيت بفكر فيه وبحبه،، عايزة اشوفه طول اليوم،، واسمع صوته ويسرا عارفهه كده كويس يا فاطمة عارفاني انا بحبه ومنتظراهو بجيني تاني ويقول لي انا حبيتك من سنين ومعاك لحدي ما تغيري رأيك فيني وتحبيني💔،، يسرا كانت عارفة انه اتعذبت لما احمد اتحول من المستشفى،، عارفاني ببكي كل يوم بالليل لانه الزول الوحيد ال بحبني ببساطة من اول موقف اتخلى عني،، ليه يسرا عملت كده فيني😔💔،، ليه سرقت الحاجة الحلوة الحصلت لي وقلت ده تعويض ربنا ليه غشتني وبقت تبشع لي فيه وتخليني عايزة انساه،، انا ما عايزة احمد اسي،، شغلت نفسي الفترة الفاتت واتعودت.. بس انا عايزة يسرا،، عايزة صحبتي الوحيدة💔 وفجأه سارة بقت تبكي قالت عايزة تمشي لي يسرا في بيتهم،، وما مصدقة انه يسرا ممكن تعمل كده.. كان الوقت قريب العصر،، قالت لي ماشة اقول ليها انا ما زعلانة منها بس ما يمشوا الاتنين مني عايزة يسرا💔.
ابوي ما كان حيخلينا نطلع من البيت الا نقول مشيت قلت ليه سارة اتصلوا ليها في الطوارئ وانا ماشة معاها.. لبسنا واتصلت لي مؤمن وقفنا ربع ساعهه في الظلط منتظرين مؤمن،، سارة كانت ساكتة ما اتكلمت.. انا عارفة انه قلبها ما برتاح الا تمشي تواجهه يسرا،، سارة حالياً بتحاول تقنع نفسها انها بتحلم او أي شيء بس يسرا ما تعمل فيها كده..
جاتني قالت لي فاطمة يمكن انتي غلطانة وال شوفتيها دي ما يسرا؟! يسرا صحبتي ما بتعمل كده والله،، يسرا انا بعرفها من سنين حافظاني ومعاها اسراري،، انا ما بتكلم مع زول قدر ما بجري عليها واحكي..
حضنتها وقلت ليها ياريت ياريت يا سارة اختي اطلع غلطانة وال شوفتها دي ما يسرا..
