كنت بتمنى انه كل الحصل ده يكون حلم ويجي زول يصحيني يقول لي يا سارة قومي كفاية نوم،، كنت بدعي انه يكون تهيآت ووهم مني،، ال يااارب بتطلع من روحي وانا بقول ياااارب أكون بحلم ويسرا تكون لسه صحبتي💔.
اليوم الأول.. أول خيبة لي من واحدة اعتبرتها اختي الخامسة،، تؤام لي يسرا دي ما كنت بحسها الا أخت،، ما بلوم عليها كلامها عني أنا فعلاً كعبة وإنطوائية وسيئة.. كل زول فينا عنده صفات بس ما بتطلع الا للناس القريبين.. انا عمري ما فكرت اكرهه زول قدم لي معروف في يوم رغم اني سيئة بس مستحيل تجي في بالي فكرة انه اخون صاحبتي واخليها في نص الطريق بأبشع الاساليب.. ما وجعتني حاجة قدر الكلام ال قالته لي يسرا،، وانها من زمان بتكرهني..
اليوم الأول ده حرفياً زي اللي في زول قريب لي مات،، الطعنة الجاتني من يسرا كأنها سكين حقيقية واتغرست في قلبي..
ما قدرت ابكي ما عرفت.. دموعي ما بتنزل بس هنا جوة قلبي مليانة وجع وبكا عايزة اصرخ عايزة ابكي عشان ارتاح عايزة الوجع ال جوة قلبي ينتهي كلما مرة بتذكر ضحكنا انا ويسرا مستحيل صاحبتي الراهنت عليها وقلت دي صاحبة بالدنيا والصحاب ما بكترهم بإخلاصهم حتى لو كان واحد تخذلني،، كنت فاكرة انه وجع الحب وفراق الحبيب ماف حاجة اصعب منها بس لقيت انه فراق صاحبتك الوحيدة ده موت للروح.
صليت وقريت قرآن لحدي صلاة الصبح حتى قدرت ابكي بكيت لما لقيت نفسي بدعي في السجود انه ربنا ينتقم لي منها ويهون علي ويعوضني خير،، بكيت لاني أول مرة من سنين ادعي على يسرا،، أول مرة أطلب من ربنا يأذي صاحبتي ال طلعت بيها من الدنيا،، بكيت لاني موجوعة وما عايزاها تتاذى،، استغفرت وقلت الله يسامحها ويكتب ليها الخير وين ما كانت،، لقيت نفسي برجع بدعي ليها،، قمت على سريري و مسكت تلفوني لانه ما جايني نوم..
فتحت الواتس لقيت يسرا شالت الحظر ورسلت لي كمية رسايل،، برا الرسالة ظاهر صور..
قبل ما افتحها دعيت ربنا انه تكون راجعت نفسها وبتعتذر لي،، فتحتها لقيت مرسلة لي..
عشان خاطر العشرة الكانت بينا انا رسلت ليك اسي حاجات لازم تعرفيها عشان ما بكون عندك لسه عشم فيني وفي احمد،، احمد ما بحبك بالمرة،، بس كان حاسي نفسه عنده ليك شوية ميول لو حابة تسميهو أي شيء غير الحب،، طبعاً لما احرجتيهو انتي جاني انا،، ما عشان بحبني لا عشان اصلح الوضع وافهمك انه بحبك،، بس انا طبعاً عملت الواجب..
دي اسكرينات من احمد بعد ما بقى خلاص يكرهك.. خصوصًا بعد عرف منو السبب ورا مشاكل ابوهو💁♀️..
خلي اختك الفالحة فاطمة تفرح بالكف الادتني ليهو وشوية الكلام المؤثر حقها ده.. وخليني انا افرح اني اتخلصت منك للابد واني كسبت احمد..
باي يا حلوة ورجعت حظرتني.
......
بعد كلامها ده الدنيا بقت في عيني اسود من السواد،، اسلوبها الرخيص وقلبها المريض،، وكلامها الجارح.. يمكن يسرا بتتصرف كده عشان بتحب احمد،، عشان حبته بالجد وفضلت الحب على صاحبتها،، ما بلومها لانه القلب لما يحب بتعمي بتصرف اي تصرف في سبيل انه يحافظ على الحب ده،، وهي للاسف لقت حرب حبها الوحيد ضدد صاحبتها الوحيدة،، انا متاكدة تماماً انه يسرا خايفة انه احمد يخليها بعد ما خلتني عشانه،، وخايفة من اني اسدد ليها نفس الضربة وارجع لاحمد،، هي عارفة كويس اني لو قررت اعمل حاجة زي دي بعملها،، بس حب بالطريقة دي انا ما بجري وراه،، حب جبان ما انا اللي بتمسك بيه،، يسرا وموقفها حيكون ملازمني ايام وشهور ويمكن سنين بقدر ما كنتهه بعتبرها ملجأي الوحيد حتفرق معاي،، كل ضحكة ح افقدها عشان بتشاركني بيها،، حتى الوجع الحاسة بيهو انا حالياً ده محتاجاها تقيف معاي فيهو،، محتاجاها تواسيني،، بس انا ح اتعافى منها،، حا اعتبرها درس في حياتي وعقاب لاني حرمت نفسي ما اوثق في غيرها،،لاني خليتها الوحيدة ال بتشاركني كل هم،، وكل حلم..
