بنات حواء

٢٩

شكلي نمت الصبح في الكرسي جنب لينة.. وما مشيت لي عبدالله تاني.. صحيت مخلوعة.. جريت على الغرفة حقتو.. لقيت مؤمن صاحي..
قال لي عمي كويس صحى واتكلم معاي.. بس نايم اسي شكله مرهق ممكن يطلع الليلة ما تخافي امشي انتي نومي وخليني معاهو لحدي ما سارة تجي..
قلت ليهو كتر خيرك يا مؤمن من امس ما نمت امشي بيتكم ارتاح سارة اسي بتجي..

قال لا لا كيفن يعني لازم واحد مننا يكون هنا وواحد مع لينة.. خالتي الله يخليك امشي لي لينة اسي ما تقلقي انا بمشي البيت تجي سارة بس.

ما عرفت اقول شنو مؤمن اعند مني  سمعت كلامو ومشيت.
بعد ساعة سارة جاات بتسال من ابوها ابيت اقول ليها حاجة بخصوص عمها قلت ليها تعب شوية وادوهو محاليل..
والدكتورة قالت انه لينة ممكن تطلع البيت في اي وقت وتكمل علاج طبيعي.. كم شهر وحترجع تمشي..

الفرحة بقت ما سايعاني مشيت صليت وسجدت شكرت ربنا.. اليوم ال طالعين فيه من المستشفى ده كان اطول يوم،، كلنا تعبنا منه المكان ده..
المساء طلعنا من المستشفى وعبدالله اتحسن والهم انزاح منه بعد ما عرف انه خلاص قاسم اتسجن..
وصلنا بيتنا الله ما يفرقنا من القعدة دي..
شوفت بناتي كلهن قدامي ما ناقصات نفر الحمد لله.. وعبدالله معاهن،، حواء ما دايرة شيء من الدنيا تاني غير اللمة دي.

الضيوف بسلموا علينا والجيران♥️،، بعد خلاص بدوا يخفوا مشيت ارتاح لقيت فاطمة قاعدة والدموع في عيونها قشقشتن وحاولت تمشي من قدامي. ناديتها..
حكيت ليها بي جية عمها وانه اعترف واتسجن وتقدر بعد كده ترجع تكتب وانه عنده حقد علينا عشان كده حاول يقتل لينة.. وهي ما ليها ذنب..

حضنتني وقعدت تبكي بس المرة دي دموع فرح وعدتها كل شيء حيتحسن..
،،،،،،،
امي قالت لي خلاص انه قاسم اتسجن وكلمتني بكل الحاصل.. حسيت في هم وانزاح واخواتي في امان.. وحرجع اكتب عنه من تاني لحدي ما يلاقي جزاءه.. اول زول فكرت اكلمو مؤمن.. جريت على تلفوني واتصلت ليهو.. اول ما رد لي قلت ليهو انا مبسوطة😭♥️وسكتت.. قال لي اهاا.. مش قلتي مبسوطة ليه طيب العبرة دي شنو عايزة تبكي؟!..
قلت ليهو عرفت كيف انت شايفني؟! قال لي لا انتي البقيتي معاي في كل الاماكن انا شايفك حافظك وعارف صوتك حافظ كلامك قبل ما تقوليه وعارفك مبسوطة ليه..
وانا مبسوط اكتر منك..

يلا خليني انوم عشان انا نعساااان😂♥️قلت ليهو اااهااا طيب طيب لبعدين وقفلت.
مشيت للبنات لقيتهم متجمعين.. معالي استلمتني كنتي وووين تعالي احكي ليكم.. أمجـد قال بحبني اعترف ليي😭✨وبترقص وبقينا نصرخ كلنا وفرحانين حتى لينة😂♥️..
امي جات جارية قالت لينا يا بنات مالكن المات منوو بتكوركن.. معالي حمرت لاي واحدة نظام اسكتي.. اسمهان قالت لي امي فرحانين بي لينة يا امي.. لينة هزت راسها يعني صح😂.. وسارة قالت لي امي حصصل يا ماما🤷‍♀️♥️..
امي ما عرفت تقول شنو اتفقنا عليها😂 مشت..