بعد اكتر من 8 ساعات الدكاترة طلعوا من العملية..جرينا عليهم كلنا..بقينا نسال فيهم وبنحبس في الدموع..وكلهم بعاينوا لي بعض ماف واحد راضي يتكلم نص كلمة..واحد من الدكاترة قال ل سارة تعالي يا سارة..
مشى بعيد اتكلم معاها بحكم انها دكتورة وحتقدر تتفهم..احنا بنراقب في سارة وهي بتبكي مع كل كلمة..وبتخت يدها في خشمها ومرة في راسها..امي جرت عليها..قالت ليهم ما تمشوا مني بعيد وتوشوشوا قولي لي اختك مالا ياسارة اختك عايشة؟! اتكلمي يا بت انطقي..الدكتور مشى وسارة بتبكي..وامي متوترة وخلاص حتقع في الارض..سارة مسكتها وقالت ليها يا امي لينة كويسة ما تخافي..بس الحادث صعب شديد..ولينة احتمال تتعرض لشلل في الرجلين..ده لو الدماغ كان سليم بعد العملية الجاية..
انا كلمتك بالحقيقة يا امي عشان تدعي ليها حتقرر ليها عملية بكرا..
امي دفرت سارة بعيد وقالت ليها ده شنو الكلام ده شلل شنو ودماغ شنو السليم.
اكتر من 8ساعات لينة جوة العملية في الفترة دي حسيت الدنيا دي قدر شنو تافهة مهما خلتك تضحك وتفرح ولو شوية حيجي يوم وتاخد حقها منك تالت ومتلت..لما تجي توريك قمية نفسك وانك قدر شنو ضعيف بتحاول تاخد منك اعز حاجة..دايماً الناس القريبين لينا هم بكونوا اصعب اختباراتنا..لحظات الانتظار ووألف حوار جواك..ياربي حتموت ياربي حتعيش؟!..كل الزمن بكون ضددك في الفترة دي..
انا حرفياً الفترة دي ما بتمنى اي حاجة من الدنيا غير انه لينة تكون كويسة ونرجع بنات حواء زي ما كنا ما فادقدين نفر..
كنت ضعيفة شديد لدرجة محتاجة احس انه في زول معاي اي زول يواسيني ويقول لي انا هنا جمبك.. كان نفسي امشي لاصحابي والقربين لي نفر نفر واقول ليهم تعالوا خليكم جمبي وطمنوني الفترة دي..كنت ضعيفة لدرجة اني عايزة امشي ليهم واطلبهم وقفتهم معاي اشحدهم قربهم وسؤالهم اتصالتهم وكل حاجة..بس ما احس اني براي كده.
الاختبار الحقيقي لي ناسنا لما زول قريب مننا يحصل ليهو مكروه..يمكن ده احقر اختبار للعلاقات بقدر ما هو مؤلم وحار..بس حقيقي..لما زول عزيز مننا يحصل ليه مكروه..الناس الحقيقين بظهروا الناس بتلقاهم معاك وكل شوية جمبك..حتى لو المسافات بعيدة ما بخلوك لحظة بالدعاء والاتصالات ..الاحقر انك تكتشف رغم كل السنين الفاتت دي ما حصدت ليك ناس تلقاهم وقت الشدة..وكل الناس ال حصدتهم عُمر كامل كانوا معاك وقت كنت مبسوط وفرحان وبتضحك..
منو البستحمل النكد والبكا والضيق وقلقك على احبابك؟! حتطلع في النهاية ممل..
انا معالي اكتشفت في حادث لينة اختي انه اخواتي بس هم السند بس يسندوني اسي كيف؟! وكلنا محتاجين الطبطبة في الوقت ده..اكتشفت اني وحيدة بالمعنى الحرفي..عارفين الفترة دي محتاجين سند وزول يطبطب علينا نبكي معاه وقت الشدة ونشكي ونحكي..
احساس ممكن يجيك إنه اختياراتك في البشر كلها غلط وتكتشف ده في أصعب وقت في وقت انت ما مفروض تفكر في اي شيء غير الزول القريب ليك اللي في اي لحظة ممكن تفقده..حاجة غريبة انك في اللحظات الفيها اقرب الناس ليك بعاني من مرض ولا حادث تفكر في منو الوقف جمبك ومنو الخلاك..بس اهو درس غصباً عننا بنمر بيه مهما كرهنا..بنتعلم انه الناس مواقف..وانه في ناس بتكون مبسوطة بأحزانا مع انهم كانو في يوم جمبنا لما كنا بنضحك.
..
لاول مرة انا حزينة كده ما معالي البتضحك وتهظر وكانه الدنيا اخر همها انا ما قوية انا أضعف مخلوقة على الارض..اعز ناسي المرض اتمكن منهم..
كنت محتاجة الدنيا كلها تدعي الدنيا كلها تجيني وتحضني وتحسسني بالامان وتهديني شوية..
بس بدون أمل..
الأصعب من حادث لينة هو الكلام بعد العملية..مسألة انه لينة احتمال تطلع من العملية مشلولة دي هزتنا كلنا وكسرت ضهرنا وقطعت قلبنا..المصائب ما بتجي الا مرة واحدة..ما ح اقول انه بكينا بقدر ما بقينا ساكتين حتى الدموع جفت وما استوعبنا الحصل..
لينة ما ح تقدر تمشي وتجري وتحقق احلامها.. كل ما اغمض عيوني اشوفها وهي بتجري وقلبي بوجعني عليها..
بتذكر كل حاجة ليها لما بدت تمشي واول خطواتها.. وفستانها الزهري.. وجريها في الحوش.. واول يوم تمشي المدرسة.. واول أحلامها.. لسه بجيني صوتها وهي بتقول انا ح اطلع الاولى في الامتحانات وح ابقى دكتورة زي سارة..
