قبل ما نقول للممرضة خليهو يدخل قاسم جا بنفسه وقفل الباب.. وقف قدامنا بنفس الشكل الزمان نفس الملامح والجبروت.
بقينا مصدومين فجأة الماضي كله جا في بالي اتذكرت لما طردوني انا وعبدالله وبناتي صغار وش الصبح.. لما اتشاكلوا معاي كلهم نص الليل لما قالوا علي انا عيني فاضية وعايزة انهب قروشهم.. لما. بعايروني بي خلفة البنات..
الحصل شنو من سنين؟! ابوي ابو حواء حيلتي وانا وحيدتو.. قاسم وامو اتهموا بالسرقة وسجنوهو.. ابوي كان ماسك ليهم شغل المصنع بعد ما ابو عبدالله مات.. وكان عارف بلاوي وساترهم.. في اليوم نفسه ندموني العيشة في البيت معاهم.. وام عبدالله الحاجة امنة هجتمت علي وضربتني كف.. عمري كله بحاول انسى الظلم الحصل لي بس وقفة قاسم قدامي ذكرتني،، لما خيروا عبدالله يا اما يطلقني ويجدع لي بناتي يا اما يمشي معاي وما يشوف ورثه ولا يشوف وشهم..
انا مستحيل انسى..
احنا ساكتين قاسم اتكلم.. قال لسه يا عبدالله اخوي ما اتغيرت لسه مباري لي حواء كان احسن ليك تسمع كلامنا..على الاقل ما كان اسي انت بتشحد حق عملية بتك.. جابت ليك بنات هم.
عبدالله قال ليهو،، اطلع برا مسك يد قاسم من يده وطلعوا برا غرفة لينة وطلعت معاهو قفلنا الباب عشان لينة ما تصحى..
قال ليهو جاي ليه بعد السنين دي! جايني عشان تقول لي اني بشحد قروش؟! انا اشرف من اني اشحد.. عندي قروشي ال بتكفيني وبتكفي عيلتي قروش تعبي براي من سنين وبالحلال ما جبتها من قتل ولا مخدرات ولا رشوة.. ولا اكلت مال يتيم ولا نصبت.. يعني كل البلاوي ال عملتها انت انا بريء منها،، عارف بناتي ال بتقول عليهم هم ديل؟!.. اصغر واحدة فيهم دي اعقل منك..
بناتي ربيتهم على كل حاجة انت فاقدها.. عملتهن بالقليل بس كل واحدة ناجحة وانت عارف كده كويس.. اتحسر انت على عيالك..
قاسم في اللحظة دي كانه بقى مشلول وقال ليهو لو ربيت بناتك صح ما بتستخدمن عشان تنتقم مني يا عبدالله خليت واحدة بالغصب تجي صحفية عشان تكتب عني وتتشهر بي وراي.. تكتب عن عمها؟! هه دي تربيتك..
انا رديت ليهو.. قلت ليهو انت متخيل انه بناتي عارفين انه عندهم عم؟! ههه فاطمه الصفحية دي ال جهجهتك بدون ما تعرف انك عمها وخلتك تجي جاري وتفتش علينا مستشفى مستشفى عشان تجي ترتاجاها.. ما عارفة انك عمها ولا بهمها انت منو.. عارف ليه؟! عشان اترتب على كلمة الحق وانه تنصف المظلوم.. عكسك تماماً يا قاسم.. امشي امشي استغفر ربنا لذنوبك وخلينا في حالنا لا بينا لا بينك كلام.
قاسم قال لي.. لسه يا حواء ما اتغيرتي فصاحة ولسان طويل.. اهو ده السبب ال طلعك من الجنة زمان!
قلت ليهو جنة؟! جنتك انت وامك واخواتك!! دي اي جنة اللي الام فيها بتفرق بين اولادها واولاد اولادها؟! اي جنة دي ال بتخلي ام تخير ولدها انه يطلق مرتو ويرمي بناتو ولا يشوف وشهم؟! اي ام اللي كل ما اخوك يمشي ليها لحدي اخر شهر في السنة دي وبعد كل شي حصل ورغم الظلم السنين الفاتت دي كلها لسه بمشي ليها يطلب رضاها.. وهي لسه بتقول ليهو وشك ما دايراهو وما تجي تورث مني؟! امك لسه مفتكرة عبدالله كايس رضاها عشان المال.. دي ما جنة والله دي ما جنة..
