المجهول 💗 ( روايات ليبية ) مكتملة

المجهول 2 ح 10

المجهول 2الحلقة 10
.
.
#قبل 7 سنوات
.
.
(وئام بنت شاطرة و ديما تحب تكون متفوقة وتحب التحدي مجنونة بحاجة اسمها ورد 🌹🌸🌼🌷🌺 وفي الكلية في حديقة صغيرونة في فيها ورد كانت كل ما تطلع من المحاضرة تمشي للوردات واتشمهن)
وئام : انااا حنجيبها الاولى على الدفعة
شدى (صاحبتها ): ويمكن سامر
وئام : الشخص هضا انااا كررهههتهه معش اتقولي اسمه قدامي
شدى : وكان خداها الاول حتى هو شاطر واصلا واضح انه ميحبش بنت تغلبه
وئام : وانا حنغلبه 😌 (وكاين سامر واقف هو وصحابه ) ، شوفي شوفي حتى وقفته بغرور متكبر ممن يحسابب روحه
شدى : اهدي يا وئام
وئام : اصبري شوية و جاياتك (وناضت اتجهت وين ما واقف سامر ) ، ساامر (الشلة كلها اتجهتلها وهي تحشمت بس جمعت قوتها وقالت ) : مهما تحديتني حنكون الاولى على الدفعة حط هالشيء في رأسك كويس
سامر : هه تم وانتي حطي في رأسك كويس ان سامر ميقدرش شيء يعوقه ، هههه وحاجة ثانية لو محستيش روحك اضعف مني راه مجيتينيش (والتفت لصحابه وقال ): هي نتلاقوا (ومشى وهي قريب تلحقه وتخنقه هههه مشت لصاحبتها وهيا تعارك وشايطة فيها النار )
شدى : تستاهلي ما يجيك
.
اما عند سامر :
سامر : ااااه يا وئام شن درتي فياا بسس ،هي كارهتني و الشيء هضا واضح من عيونها مفيش الا عمر (صاحبه) يساعدني (واتصل بيه وحكاله كل شيء لعند العركة )
عمر : جتننيي الفكرة
سامر : شننن
عمر : في مكتبة اسمها ... كل مرة خودلها  وردة و اكتب معاها رسالة و في الاخير اكتب من #المجهول و اعطي المكتبة توصل
سامر : 😂😂فكككرة ياخطير المهم هي وجك
عمر : وخبرني اول بأول اه راك تنسى
سامر : تممم (مشى سامر و تكى على محل الورد و قاللهم نبي باقة تكون لطيفة و قاللهم نبيها بكرا الساعة 9 و حجز فيها وهو مروح يفكر في الرسالة يلي بيحطها معاها وقعد يفكر لين وصل اذكر جملة قبل قاريها : انا قلبي لحب الورد ميال ❤ (خش للحوش )
سامر : السلام عليكم
امه : وعليكم السلام ، شن سر هالابتسامة اليوم
سامر : هههههه حسستيني اول مرة نضحك
امه : و الله يا وليدي انت بدات ضحكتك من العيد للعيد
سامر : اممم خلاص اهو اليوم عيد
امه : هههه ربي يدوم (ويخشن سدين وتالين من المدرسة و تالين تبكي )
فاطمة : كننهاا اختك تبكي
سدين : مش عارفة
تالين بصوت متقطع : ه ه هر ب ن ع ل يا هي و نه ى (هربن عليا هي و نهى )
سامر : هههههه (تالين ، سدين شافنله طول مش من عادته يضحك ) ، احم عارف ضحكتي حلوة 😎 (وركب لداره هو و سراج و امتد على السرير و قعد يقول : الله يا وئام شن درتي فيااا بس )
ثاني يوم اتجه سامر للمكتبة و لقاهم كيف فاتحين عطاعم الورد و الورقة وقاللهم على اسمها و الكلية و القسم و الساعة كم يجيبوها و اتجه للكلية و هو كله سعادة و طاقة و اول ما وصل لقاها في المكان يلي اعتاد انه يوشفها فيه كل صبح في الحديقة الصغيرة كأنها تستمد طاقتها منها عشان تكمل باقي يومها طلعوا من المحاضرة وقعمزت مع شذى على الكرسي تراجي في بوها يروح بيها فجأ يوقف عليها شخص و ماسك باقة :
الراجل : السلام عليكم
شذى ، وئام : وعليكم السلام
الراجل : نبي وئام ...
وئام تفضل !!
الراجل : تفضلي هذي ليك
وئام : نعم !! اناا
الراجل : اها ليك من شخص #مجهول
وئام ؛ من هو ؟؟
الراجل : سر الشغل و ممكن تاخديها لان طولت
وئام : أ أ أسف (وخدتها وقعدت اتشم في ريحة الورد و هضا كله تحت انظار سامر وقعد كل يوم يدزلها في ورد ومعاه رسالة و #المجهول )
بعد شهرين :
وئام : بنمووت نعرف من #المجهول هضاا مش معقولة شهرين وانا منعرفاش من !؟؟
شذى : حتى انااا ركبني الفضول
وئام : المهم غيري الموضوع قالوا بعد اسبوع النتيجة
شذى : اكيد هما ديما هك واليوم آخر امتحان
وئام : ربي يستر ، هي بابا جاء بنروح
شذى : تمام نتلاقوا
وئام : ان شاء الله ،(وهي ماشية لقت سامر واقف بروحه تمتمت بكلمات و فاتت وهو قعد يضحك )
بعد اسبوع :
وئام : خاايفة
شذى : اسس غادي معلقينها ، هيي وئام سامر يضحك اكيد ..(وقبل لا تكمل لقت وئام سابقتها واتشوف في رقم قيدها وين لين لقاته لقت هي و سامر نفس المعدل يعني هما الاوائل شافتله لقاته يضحك
وئام : شن في يضحك
سامر : حسه في وحدة قبل شهور اتقول بنجيبها الاولى على الدفعة نسيت اسمها 😂😂😂
وئام : المهم انت مش اعلى مني
سامر : ولا انتي اعلى مني 😌
شذى : اتقول صغار يتعاركوا
سامر : هي سلام ياا(في قلبه يا وردتي بس قال ) شاطرة
وئام بعصبية : مستفزززززز
شذى : وئام راك 4 كلية خلاص مش صغيرة ثلاثة سنين و اتخرجي (وئام فاتتها و مشت قعمزت وتفكر كيف تنتقم من سامر )
بعد 3 سنوات (في هالثلاث سنوات كل يوم توصل وردة لوئام ومعاها رسالة الا يوم التخرج يلي سامر قرر يعطيها ليها هو ) يوم التخرج :
سامر مدلها الوردة : مبروك التخرج دكتورتنا ❤
وئام بصدمة : أ أ أنت
سامر : اها انا #المجهول 🌹
وئام بإبتسامة مقدرتش تخفيها: شكرا دكتورنا ❤ شكرا لانك خليتني نروح فرحانة ، بس كيف عرفت اني نحب الورد ؟
سامر : انا نعرف كل شيء عليك
وئام : ك كيف
سامر : هههه كيف هذي مش حتفهميها لين تبادليني نفس الشيء
وئام : اممم يعني نقعد نعطيك ورد كل يوم لمدة 3 سنوات ؟؟
سامر : ههههههههههه عبيطة و الله
(ومن هضك اليوم سامر و وئام قعدوا على تواصل و وئام بادلاته نفس الشيء لين جاء اليوم و سامر ناض الصبح بيشوف تصبيحت وئام يلي عوداته كل يوم تصبيحة غير وهضك اليوم اكيد غير لقى : سامر آسفة على يلي بنقوله و آسفة على يلي بيصير بابا اصر عليا ناخد ولد عمي و لو مخديتاش حيغضب عليا وانا كل شيء الا غضب الوالدين نتمنى تلقى البنت الحلال يلي تحبك زي ما حبيتك و اتصونك ❤ زميلتك وئام
.
.
سامر من هضك اليوم رد نفس قبل الضحكة بالسيف و نكدي و عصبي و معش فكر لا في الزواج ولا علاقة وقرر يلهي روحه في الشغل قدر الامكان 💔
.
.
إياك ودفن نفسك في الحياة إياك ودفن إبتسامتك صوتك وإياك والتقصير في حق الله و نفسك فالله مثلما احزنك سوف يفرحك فقط ثق بالله ❤
#كتاباتي
#يتبع
حلقة اليوم خاصة بالماضي لان الحلقات الجاية النهائية ❤
#رواية_المجهول_2
#rwayat_br0o