دلوقتي هنتكلم عن رغدة وحاتم، وبدايةً من الملخص ده الملخصين الجايين مش هيبقي عن شخصية واحدة زي ما عملنا قبل كده، لا الملخص هيضم أكتر من شخصية مع بعض توفيراً للجهد والطاقة
نتكلم عن رغدة بقي، "من شخصياتي المفضلة ♥"
رغدة طالبة في الجامعة الأمريكية من عيلة كويسة ونقدر نقول غنية، أول ظهور ليها كان في أول يوم للونا... ساعتها لما شافتها وحسيتها تايهة أتعرفت عليها وصاحبتها.
رغدة طول الوقت كانت بتحذر لونا من حاتم، كان زميلهم في الدفعة وكان معروف عنه إنه بتاع بنات.
ومع كل التحذيرات دي كانت لونا بتتجاوب مع حاتم عادي ومكانتش بتقتنع بكلام رغدة، وده عمل مشكلة بسيطة بينهم.
رغدة علاقتها بحاتم كانت متوترة طول سنين الجامعة واتوترت أكتر بعد ظهور لونا، لأن حاتم كان مع لونا طول الوقت فبالتالي كان لازم يحتك برغدة، والإحتكاك ده كان دايماً بيخلص بخناقة
زي ما حصلت في مرة، وساعتها حاتم قال حاجة لرغدة ضايقتها... الحقيقة أنا مش متذكرة هو قال إيه بس هي اتضايقت وخلاص وبقيت تتجنبه
وفي فترة حاتم اختفي ولونا قالتلها إن والده تعبان، وفي الواقع رغدة مقتنعتش بالكلام ده وأفتكرت إن دي زي حيلة من حاتم عشان يكسب تعاطف لونا.
ولكنها اتأكدت من إن باباه تعبان فعلا لما شافته في خطوبة أخو لونا، نظراً لأنها عزمتهم عشان هي مش معاها حد
وقتها حسيت إن حاتم شبه أتغير شوية ولكن ده ممنعش إنهم كانوا بيضايقوا بعض.
في اخر الحفلة أضطر حاتم إنه يوصل رغدة ووقتها باباه تعب اكتر ودخل المستشفى، وقتها رغدة تعاملت مع الموضوع بلطف شوية تقديراً للظرف اللي هو فيه.
بعدها العلاقة بينهم ابتدت تتحسن، خصوصاً إن بعد ما رجع حاتم للجامعة صرحلها إنه مش في نيته حاجة وحشة وحابب يفتح صفحة جديدة وانهم يبقوا أصحاب.
وده حصل فعلاً وبقيت رغدة وحاتم ولونا وهبة شلة واحدة، علي الرغم من إن ساعات رغدة كانت بتشك في حاتم ولكن العلاقة بينهم بقيت تمام
نظراً لأن أحداث رغدة مرتبطة مع حاتم فبالتالي مش هنحتاج إننا نعمل ملخص لحاتم لوحده لأنها نفس الأحداث، ولكننا هنتكلم عن كام نقطة بخصوصه هنا بحيث الشخصيات دول يكونوا واضحين.
بالنسبة لحاتم فهو كان مشهور في الجامعة جدا وكان ليه علاقات وصداقات كتير، وطبعاً زي ما قولنا في الأول هو كان بيحاول إنه يوقع لونا ولكن بعد أما والده تعب نظرت للونا أتغيرت.
لأنها تقريباً الوحيدة اللي اهتمت بالموضوع ده وكانت بتكلمه من حين لآخر عشان تطمن علي حالته وحالة باباه وده خلاه يشيل فكرة إنه يوقعها من دماغه لسببين أولهم إن حالة والده أثرت فيه وخليته يفقد اهتماماته أساساً والتاني إنه لاحظ إن لونا هي الوحيدة اللي اهتمت، ما بين مثلاً صحابه اللي بقالهم معاه أكتر من سنة مهتموش بالموضوع أو وقفوا جنبه.
وساعة اما باباه دخل المستشفي ورغدة راحت معاه بعد خطوبة آسر، لقي إن رغدة موقفها كان كويس معاه وده خلاه يعدل عن رأيه من ناحيتها، والباقي إحنا ذكرناه فوق لما أتكلمنا عن رغدة.
ده يعتبر كل اللي حصل بالنسبالهم، لأن زي ما أنتم شايفين هما أحداثهم مش كتيرة، ولكن الشخصيتين دول مهمين فكان لازم أتكلم عنهم
الملخص الجاي هيبقي فيه 4 شخصيات مع بعض (هبة وحمزة وليث وميرال) نظراً لأن مفيش حاجات كتيرة حصلت بالنسبالهم ولكن مهم نفتكرهم لأنهم هيظهروا معانا طول الرواية تقريبا.
أنت تقرأ
رواية حب من نوع آخر
Romanceكان وحيدا ابويه .. عاني من تفكك أسري لا ذنب له فيه و رغم وحدته التي فرضت عليه بل و وجود أب حاضر غائب الا انه اعتاد الأمر .. حتي جاء والده أخيرا ملقيا علي عاتقه مسئولية فتاة لا يعلم عنها شيئا سوي انها شقيقته !! شقيقته ! هذا ما لم يعتاده ابدا ... و...
