لونا شابة في العشرينات، مصرية ولكن عاشت معظم حياتها برا وكانت بتنزل مصر بين كل فترة والتانية.
أول حاجة حصلت للونا هي إن ولدتها أتوفت، وجه سالم والدها قالها إنها عندها أخ في مصر ولازم ينزلوا عشان يشوفوه.
دي كانت مفاجأة بالنسبة للونا لأن سالم عمره ما جاب سيرة عنه، غير إنها مكانتش عايزة تنزل مصر أساساً ولكن باباها أصر علي كده فمقدرتش تمانع.
أول ما نزلوا قعدوا في أوتيل كده لحد ما باباها يظبط الأوراق والحاجة عشان لما تروح تقعد عند آسر تكون كل حاجة خلصانة.
وبعدها راحت الجامعة الأمريكية وأتعرفت علي مجموعة هناك.
أول مقابلة للونا مع آسر أخوها الكبير كانت سيئة جدا ومسكوا في خناق بعض
علي الرغم من إن لونا كانت ملتمسة العذر لآسر إلا أنها مكانتش بتحب طريقته في الكلام سواء معاها أو مع باباهم.
الفترة الأولي مع آسر كانت رتيبة شوية بعدها حصلت الأحداث اللي أتكلمنا عنها قبل كده، زي المشكلة اللي حصلت بين آسر وديما والكلام ده كله.
بحكم علاقة الصداقة اللي كانت بتجمع آسر ورامي المعيد بتاعها، أتقربت لونا من رامي بسرعة، خصوصاً إنها كانت في مرة طلبت مساعدته عشان تصالح ديما وآسر.
مع مرور الأحداث لونا ابتدت تتقرب من آسر خصوصاً إنها كانت بتحاول توضحله إن وضعها مع باباهم مش أحسن منه بالمرة.
لونا كانت شاكة من البداية إن سالم علي علاقة بواحدة، وشبه اتأكدت لما لمحت اسمها علي موبايله في مرة، ولكنها متوقعتش إن سالم هيعلن عن خطوبته من الست دي في يوم خطوبة آسر، وده ضايقها جدا لكذا سبب، أولهم إنها حست بعدم إهتمام سالم بآسر أو إنه إختار وقت غلط ومش مناسب عشان يعلن عن حاجة زي دي.
والتاني هو إن مامتها كانت متوفية بس من كام شهر، فتوقعت إنه علي الأقل يقدر ده ولكنه خيب أملها في الأخر، غير إنها صرحت إنها مش مرتاحة لناني أو ميان... وبسبب كده آسر قالها إنها هتفضل عايشة معاه حتي بعد جوازه من ديما.
من الأحداث المهمة برده إنها اتعرفت علي شاب اسمه (ليث) وده في خطوبة أخوها، ليث ده ابن صاحب باباها.
حصل كذا موقف بينها وبين ليث ده قدر فيهم إنه يأثر عليها، خصوصاً إن كلامه كان معسول وجذاب لدرجة العذاب والكلام ده...
واخر حاجة حصلت بالنسبة لموضوع ليث ده إنه قالها أنها هتشتغل معاه بعد التخرج، وإنها بدأت تحس بمشاعر مختلفة ناحيته.
والجدير بالذكر برده إنها بتعز رامي جدا ولما عرفت في مرة إن مامته مرشحاله عروسة اتضايقت، "موقفها مايع ومش محدد"
فبالنسبة بقي لهي معجبة بليث ولا رامي فده هنعرفه الفصول الجاية
بالنسبة لعلاقات لونا في الجامعة فهي شله محدودة، يدوبك تعرف كام حد كده
والكام حد دول هما (رغدة،حاتم وهبة) ودول هنتكلم عنهم أكتر في الملخصات الجاية.
ولكن المهم اننا نفتكره دلوقتي إنها قدرت تكون شلة بسيطة مع التلاتة دول.
أخر حاجة مهمة حصلت هي المشكلة بتاعة رامي اللي حكينا عنها المرة اللي فاتت، المشكلة دي طالتها بشكل أو بآخر بسبب إنها كانت ساعات بتقف مع رامي وده خلي بعض الناس يشكوا إن في بينهم حاجة زائد إن في حد نشر إشاعات عنها وقال إنها كانت علي علاقة بكذا شاب والكلام ده.
ولحد دلوقتي هو مش باين أصل المشكلة بتاعة رامي ولا باين مين اللي نشر عنها الكلام ده.
ولكن عموماً إحنا قربنا جداً نعرف أصل الموضوع ده في خلال الفصلين او التلاتة الجايين
كده تقريباً قولت أهم الأحداث، اتمني إن ميكونش في حاجة وقعت مني نظراً لأن ذاكرتي ذاكرة سمكة.
استنوا الملخص الجاي عن رغدة وحاتم مع بعض ♥
أنت تقرأ
رواية حب من نوع آخر
Romansaكان وحيدا ابويه .. عاني من تفكك أسري لا ذنب له فيه و رغم وحدته التي فرضت عليه بل و وجود أب حاضر غائب الا انه اعتاد الأمر .. حتي جاء والده أخيرا ملقيا علي عاتقه مسئولية فتاة لا يعلم عنها شيئا سوي انها شقيقته !! شقيقته ! هذا ما لم يعتاده ابدا ... و...
