29
بعد فهد مشى ابوي و امي قعدو يعاينو لي و انا بعاين ليهم
ابوي جا علي و حضني: كبرتي و بقو يجوك خطاب💛 سبحان الله لسه متذكرك و انا شايلك و فرحتي بيك لمن امك جابتك عشان تنوري دنيتنا 💛
امي: و لسه حتكبر و تكبر و تملا لينا دنيتنا زياده💛
اخدنا حضن جماعي طويل بعدها مشيت غرفتي قعدت افكر انا لسه ما كملت قرايتي و فهد باقي ليه سنه و يتخرج و هو اصلا شغال حاسه كانو الخطوة الحأخدها دي بدري لانو عندي طموح ما حققتو
مشيت لامي في المطبخ و قعدت في الطاولة
امي: خير مالك
عاينت ليه : ماما انا صغيرة لسه على المواضيع دي و لسه عندي طموحات ما حققتهم امي رشتني بموية: لا صغيرة لا شي احنا ما قلنا العقد بكرة يعني الخطوبة حتاخد فترة بعدها العقد و حيكون عمرك 24 للوقت داك اذا ربنا احيانا
ابتسمت ليها و قلت ليها باذن الله و دخلت رقدت و ما عارفه غفيت متين
...
جا يوم الجمعه و شغاله تجهيزات مع امي و دخلة و مرقه و رتبنا البيت بعد انتهيت امي قالت لي امشي اجهز لانهم اتصلو وقالو هم في الشارع
لبست فستان كبدي ساده طويل و محزوز من الخصر بلستك و لفيت طرحه اوف وايت حجاب مشيت لامي لقيتها لبست جلابية استقبال طلعت حلوة عليها شديد الباب دق امي قالت لي امشي و لمن اتصل عليك تعالي
دخلت غرفتي فكيت الحجاب اخدت نفس و طلعتو و خففت من التوتر الفيني بعد زي نص ساعه امي اتصلت لفيت حجابي و رشيت شوية عطر و طلعت
.. بلسان فهد..
كنت متوتر شديد و ما عارف هل الموضوع حيتيسر و لا لا اثناء ما انا مدنقر سمعت خطوتها قريبة شديد رفعت راسي بقيت اعاين ليها سلمت على امي و امي سلمت عليها بطريقه حلوة و ظريفة ارتحت لمن امي سلمت عليها سلام حلو شكلها مبدأيا اتقبلتها لمن جات تسلم علي وقفت ليها و مديت يدي و عيوني ما عايزه تفارقها
.. بلسان جود ..
سلمت عليهم و قعدت كان هو و ابوهو عمو يعقوب و امو ندى و منن و جنات و مبارك اخوه 💛
امي و امو قعدو و انداحو في الونسة انبسطت لانو امو متواضعه و طيبة زيو ابوي و عمو يعقوب برضو بتونسو .. انا كنت بعاين لاظافري و بلعب بيهم اتفاجأت لمن امو قالت: عروستنا الحلوة خجلانه
ابتسمت ليها
منن كانت قاعده جمب فهد قامت و قالت لي تعالي اقعدي هنا مشيت قعدت و انا متوترة كانو ما ده فهد البمعطو اليوم كلو 😂
فهد بصوت واطي شوية: شنو لكن ي مزة ما تعبرينا شوية
حمرت ليه و قعدت العب بظفوري و لا كانو قاعده جمبو
فهد: انا بحب الشعيرية و الرز و الشمام
عاينت ليه : انا ما سألتك
فهد: شفتك ساكته قلت افتح موضوع
.. بعد شربو العصير قمت اجيب الشاي
دخلت المطبخ اخدت نفس و شلت الصينيه قدمت ليهم و كبيت ليهم و ضفيتهم و تاني قعدت جمب فهد حاولت اتونس عشان اخفي التوتر اثناء ما انا بتونس مع منن لاحظت لجنات بتعاين لي نظام عامله فيها فهد ما عاجبك ابتسمت ليها ابتسامه جانبيه و واصلت ونستي و فجأة
عمو يعقوب: الحمدلله انتو عارفين نحن جاين لشنو و جود زي بتي و اكتر في قلبي و يسعدني انكم تناسبونا و نطلب منكم جود لولدي فهد
ابوي: و انتو كمان ناس معروفين و مشكورين و مافيكم كلمه و الشرف لينا و فهد كمان ولدنا و الفيه خير ربنا يكتبو
عمو يعقوب: امين... الفاتحه
قرينا الفاتحه و دعيت ربنا يقدم الخير
.. ودعناهم و هم مارقين فهد اشر لي على التلفون نظام خشي واتسب ابتسمت ليه و مشو ..
بعدها قعدت ارتب في البيت و ادخل العده و المها لمن انتهيت كانت الساعه 11 الا ربع امي و ابوي نامو و بعدها مشيت غرفتي و مسكت تلفوني دخلت لفهد
انا: صاحي؟؟
فهد: ايوة شكلك كنتي مشغولة
انا: اي والله ترتيب و كده
فهد: عارفه ي جود انا كنت ناوي اتقدم ليك قبل كم و كم بس كنت خايف من ردة فعلك و خايف انو الموقف الحيحصل يخليك ما تتكلمي معاي ابدا بس الحمد لله ربنا ألف قلبك علي و حننو على قلبي 💛
انا: الحمد لله ... فهد عليزة اقول ليك شي
فهد: قولي عادي
انا: فهد ما تأمن علي ما تأمن على تصرفاتي انا ممكن احسسك اني ما مهتمه بس انا من جوا مهتمه بكل حركه بتعملها و حافظاها ممكن اظهر ليك انو انا ما حابه اتكلم معاك بس بكون نفسي اتكلم معاك مده طويلة .. ما تأمن علي أمن على قلبي أمن على مشاعري و حبي بس ما على تصرفي
فهد: انا لو ما عارف جودي الحبيتها صح جودي الحلوة جودة الماخده قلبي معاها ما كان جيت لحدي ابوك مع ابوي و اتقدمت انا لو ما بقاسي كل الصعاب بيك و معاك ما كان جيتك
انا: فهد انت اكتر زول حسيت بالامان عنده ربنا يحفظك لي
فهد: و يحفظك لي و يغطيك من عين خلقو💛
.. قفلت التلفون و مسكت دفتري '' اتى ذلك الفهد الى والدي مجددا معاودا زياراته المتكررة لكن معه اسرته .. اجل.. جاء ليأخذني من قصر ابي و حنانه ليسكنني في قصور حبه و دلاله ، لم اظن يوما ان يميل قلبي اليك و ها هو مال بكل ما اوتي من قوة الى قلبك . كنت اظن انك الخطأ و لكن وجدت ان الخطأ بافكاري و عقلي و تصرفاتي و انت الصواب. جئت و جأت معك تباشير العيد ، أيطول العيد ام يقصر في حبك يا ترى؟ أيدوم اللمعان في عينيك الى ان نشيخ معا؟ أ تكون انت الفهد الذي امنت بالحب مجددا معه بعد ان نكرت وجود الحب فيه اتيت انت و غرسته من جديد؟ ..أريد من الله فقط إن جمع بيننا أن لا يطفىء ما اوقده بداخل القلوب و العيون الى الممات💛''
.. ختيت دفتري و رقدت في السرير و انا حاسه بالامان و الراحه من الحصل 💛
...
يتبع💛💛
