34
عديت اسبوعين ما برد على فهد و مرات بقفل الخط في وشو اصلا دي اجازة السنه حاعدي 3 شهور و انزل
...بلسان فهد .
بقيت بفتش و بفتش على الزول الرسل لي و اول شك بدور في بالي هي جنات اختي بس برضو هي اختي و ما حتعمل كده و لسه بقيت افتش في موضوع الرسالة و صاحبي زياد مساعدني في الموضوع ده و كم مرة سألت جنات بي فوق و نكرت .. لحدي ما في يوم لقينا الرقم فاتح زياد اتصل على الرقم و بقى بحاول ياخد زمن في الكلام عشان واحد صاحبنا يحدد المكان و فعلا حددهو و مشينا وراه لحدي ما وصلنا بيت ناس لمى و فعلا شكي جا في محلو قررت انو اقلب اللعبة عليها المرة دي و اخد حق جود و حقي منها
...
طول الفترة دي بتصل على جود و ما بترد و بتقفل الخط في وشي حالتي كانت بالبلا و الليله قررت امشي ليها عديل.
...بلسان جود...
.. الليله تميت 3 اسابيع مافي كلام لي معاه
كنت نايمه العصرية كده جات امي صحتني قالت لي فهد منتظرك برا في الصالون
نطيت من السرير : جا ليه
امي: اجي!! كيف يعني جا ليه كدي هسه امشي ليه و بعدين دايراك
.. غسلت وشي و لبست توب اتخلقن فيني خلقنه بس ما اشتغلت بيه كتير
.. مشيت الصالون دقيت الباب و دخلت لقيتو قاعد في الكنبة لابس اسود في اسود و وشو شاحب و دقنو ما مرتب و شعرو جايط و مفلفل
عاينت ليه مسافه بعدها قعدت جا قعد جمبي
فهد مسك يدي: جود الله يخليك خلاص حبيبي كفاية والله ما صدقت الكلام داك و على فكرة انا عرفت منو العمل كده و اتعقبناه
عاينت ليه و دنقرت في الارض: ما عايزة اعرف الورا الرسالة دي منو و خلاص ي سيدي صدقتك
فهد و هو بعاين لي: يعني خلاص راضيه عني يا قلبي و ننسى الموضوع ده
ابتسمت ليه: راضيه و ننساه
باس يديني و راسي
جريتو من دقنو: الشي دي بقى كتير عامل زي النجيلة و شكلك بقى شيين شكلو حاصرف نظر عنك
فهد قعد يضحك: تصرفي نظر عن منو ي قلبي و لو على شكلي ما تخافي بكره برجع بس عايز يدين شفوعيه و صغار كدا يهتمو بي .. و رجع راسو لورا وعض شفتو التحت و مسك دقنو و قعد يعاين لي..
عاينت ليه و ربعت يديني: ما تعشم في العايزو نحن اتفقنا و خلاص
فهد : يخ الشهرين الفضلو ديل ما بكفوك و بعدين ياخ انا عايز اتلم معاك سريع سريع و عشان الحصل ده تاني ما يتكرر احسن نسرع في موضوع العرس صريت وشي: بس انا لسه صغيرة ما دايرة اعرس هسي
فهد قعد يضحك: صغيرة شنو يا بت عمرك23 و بعدين شنو ما دايرة اعرس هسي دي عايزة تعرسي متين
قلت ليه: المهم ما هسه
... اخدنا وقت نتحاور و نتناقش اخر شي اتفقنا انو العرس بعد 3 شهور طبعا بعد اصرار مني على انها 3 شهور ما شهرين...
بعد فهد مرق مشيت لامي: ماما اتخيلي فهد قال داير يعمل العرس بعد شهرين بس انا اصريت بعد 3 شهور
امي بخلعه: وبعلي كيف يعني بعد 3 شهور هسي بيكفي نعمل شنو و لا شنو
قلت ليها: لمن قلت ليه 4 شهور رفض بعد تعب رضى ب 3 شهور
..قعدنا نتناقش انا و امي في موضوع العرس و ما العرس ..
بالليل كنت بتونس مع فهد قلت ليه: فهد انا ما عايزة زفاف و موضوع و كده
فهد: دقيقه دقيقه ليه ليه ليه ما تلبسي زفاف زيك زي اي بت ناقصه من الزفوهم شنو بالعكس انتي زايدة منهم حلاة و اخلاق و رقي و كل شي
قلت ليه: ما كده بس ياخ هناي
فهد: برا هناي معاك تلبسي زفاف خنفشاري كمان و بعدين يعني ما عايزة تشوفيني بالبدلة و كده و هناي جمبك خايفه اطفيك صح .. و قعد يضحك..
قلت ليه و انا بضحك: قال اطفيك قال يا ولد انت لميت في سماحتي دي وين لمن تطفيني
و قعدنا نضحك و اتونسنا
.....
بعد اسبوع من الكلام ده جونا نبيل و ريمان و علياء
قعدنا و اتونسنا و فرقو لي من قعده البيت سألوني لي ما بتجي و كده قلت ليهم بجيكم
كلمتهم بالعرس
علياء: يا وسخه تعرسي و تخلينا سناقل بائسين لسه قعدت اضحك
نبيل قعد يجضمني: وييي بتيي الصغنن دي حيعرسوها
قلت ليه: محسسني انو عمري 19 يا داب
ريمان قعدت تضحك: غايتوو حيشغلوها ليك لمن الله يغفر ليك
... جيتهم غيرت لي مودي شديد ...
....عدا شهرين و نزلنا الجامعه و باقي شهر على العرس...
في يوم اثناء ما انا في الجامعه و محاضراتي انتهت جاتني منن قالت نمشي السوق انا وهي و ريمان نشتري كم حاجه للشيله لانو خلاص العرس بعد 3 اسابيع و قالو لي اتحبس بعد كده🙊💘
اشترينا اي شي هدوم بيت اسكرتات بلاوز و فساتين و كم توب بي طقمو بعد زن من ريمان
..
بدو موضوع الحبسة و دخان و عروكات طبعا ريمان ما قصرت قاعده معاي💘
يوم اثناء ما امي و ريمان شغالين في المطبخ ريمان غمرت 💔 مشينا المستشفى سريع سريع و وصلنا و دخلناها ركبو ليها درب و عملو ليها موجات صوتيه
جاتنا الممرضة : انتو اهلها؟
امي بخوفه: ايوه مالها عندها شنو
الممرضة ابتسمت: مبرووك حامل في الشهر التاني و كانت مهملة روحها اخر فترة حصل ليها هبوط
امي انبسطت بالخبر ده و قالت لي عقبالك ابتسمت ليها باركنا لريمان
و تاني جا نبيل و رجعو لبيتهم
...كبعا بمشي الجامعه منقبة و ارجع في يوم قلت اخلع فهد
مشيت ليه و غيرت صوتي: اتدعو للفساد يا عدو الله؟ اتدعو للمعصية يا عدو الله؟ اتدعو للكبائر يا عدو الله؟
فهد اتربك و بقى شغال: لاااا اله الااا الله .. لا معبووود الا الله
رفعت النقاب و قعدت اضحك لمن يطني وجعتني احساس قايلني من داعش و حعمل ليه بووووممم😂😂💔 غايتو نبزني نبز اليوم داك
.
.
عدت الايام و الاسابيع و الليلة حنتي ياخوانااا😭💜 ما كنت عايزة اعمل حنه لكن اصرو علي فهد رسل لي '' ما تنسي الصور'' رسلت ليه ابيت و قفلت التلفون
لبست فستان دهبي كمو نص و مخنصر و مفرور و مع الركبه رقصنا و هيصنا و انبسطنا و من التعب غيرت و نمت و ما فتحت تلفوني ...الصباح صحيت مسكت تلفوني دقيت على فهد
فهد بزهج: لا بالله فضيتي هسه
قلت ليه: ياخ كنت تعبانه نومت طوالي
فهد :ما حارضى الا ترسلي لي صور الحنه
قلت ليه :تمام
و قفلت منه ... طبعا الليلة حنتو و انا اموت و امشي احضرها بس ما بقدر و وصيت منن تصور لي الحفله كلها و فعلا صورتها لي كان ببشر و بضحك لاصحابو و برقص معاهم و الفرحه واضحه في كل تفاصيل حركاتو💘....
الليله اليوم الجميل 8.8 يوم لم الشمل بين قلوبنا الجمعها ربنا في حب عفيف اخرو الحلال الحيتم الليله 💘 الصباح ده مميز لانو حتى تاريخو مميز ده نفس اليوم الفهد اعترف لي فيه و هو قرر انو يعملو اليوم لزواجنا عشان يكون ذكرى ابدية ما ننساها💘
....يتبع.....
و معليشش البارت قصير المرة دي لكن الجاي باذن الله طوييييل💘
