عدت الايام و انا كل ما لي بتعود على الجامعه شوبة شوية 💙 مرات بلمح فنن بس بحاول اتجاهلها..
حبي للرياضيات زاد و عمرو ما نقص و شرح أ. احمد بطريقتو الحلوة بسط علينا فهم الماده💙
.. وبحاول قدر الامكان اني اجتهد و اقسم وقتي ..
الليله تمينا اسبوعين💙
نور جاياني في الجامعه الليله .. صحيت من الصباح مبسوطه بديت اجهز لبست فستان ازرق خفيفه عليه نقش ورود في اخرو.. الفستان ده بحبو شديد لبست معاه طرحه خضراء على زرعي كده على لون صفق الورود💙💙 صبحت على امي و ابوي و استأذنتهم انو فهد جاي هو ونور و حامشي معاهم و وافقو💙 .. دقة علي فهد قال انهم برا
مشيت فتحت الباب سلمت على نور بالاحضان و بكيت معاها لاني مشتاقاها كتيرر💙 نور قالت داخله تسلم على امي و ابوي دخلنا و سلمو عليهم و ابوي قال الا يشربو حاجه و فهد بعد اصرار قعد
فهد: بس عليك الله يا خالتي ما تتعبي نفسك في حاجه
امي: لالا والله لا تعب لا شي قهوة مزبوطه..
فهد: لالا مافي داعي والله امي : خلاص حتسويها جود🌚💙 و بقيت تعاين
لي و انا بقيت بعاين لامي نظام ماما انا لابسه و جاهز حاتوسخ و لا اشتغلت بي دخلت المطبخ جاتني نور
نور و هي بتضحك: لا لا خالتو شكلها قاصده 😂😂 عايزاك تضبطي ليهو القهوة و كده .. احي انا امك دي شكلها شاكه في فهد😂😂
انا : لاا و الله لا شاكه لا شي
و زبطتها سريع سريع و وديتها ليهم
قعدو و شربو قهوتهم و نحن طالعين
ابوي : ابقى عيدها يا ولدي و باذن الله المرة الجايه حاجي اتعرف على الوالد
فهد ابتسم لابوي: ان شاء الله
و مشينا و نحن في الشارع للجامعه
فهد و هو بعاين لي بالمراية: على فكرة قهوتك حلوة شديد عرفتي كيف اني بحب القهوة بالهيل و الجنزبيل💙
رديت عليه بارتباك: امم تسلم .. ما كنت عارفه بس عشان ابوي بحبها كده عملتها زي ما هو بحبها
فهد: ابوك راجل عظيم ربنا يخليه ليكم يا رب
نور : و امها مرة عظيمه برضو و عسل شديد
جود: امينن جمعا
و اتونسنا و اتهابلنا انا و نور كتير و كنت بحاول اتحاشى فهد ما عارفه ليه بس شعوري بقول لي ابعدي
..
وصلنا الجامعه فهد حنك بتاع الامن الفي البوابه و خلى نور تدخل😂
نور : اووو طلعت حناك لكن
فهد: احمم حناك بي فهم
انا : نننني ارح انا جعانه☺
فهد و نور بقو يعاينو لبعض و يعاينو لي
انا: هييي ما تعاينو لي كده مالكم معاي
نور: نفسي افهم انتي بيتكم ده اكلو ما بعجبك هسي ما كنتي فيهو كان تاكلي .. تاكلي اهلك كلهم يااخيي😑
فهد و هو بعاين لي : يعني انا نفسي افهم طولك متر و نص و معصعصه و بتاكلي و ما شاء الله بس شكلو اكلك ده ما ماشي في طولك نهائي
عاينت ليه و هو طويل بالتسبه لي طبعن فاا الا ارفع راسي شوية: انت عملاق اعمل ليك شنو يعني اذا بتقيسني بطولك و بعدين الاكل ده بمشي في المخ و كده ما شايف كومة الذكاء القدامك دي😂💙💙
نور و هي بتضحك: ثقه يختيي😂💙💙
فهد وهو بعاين لينا: الله يعيني الليله براي سويتها في روحي
مشينا و قعدنا في وكده من البينشات دق علة فهد واحد صحبو
فهد: اوو زياد ياخ الشوق والله... والله؟؟.. تشرفناا ياخخ والله ... تعال طوالي ..
نور: ده منو في زول جاي؟
فهد : والله ده واحد صحبي شديد بقرا طيران باقي ليهو سنتين كده
نور: اهاا خيير
انا : ما مشكله بس حتدخلو كيف تاني
فهد: يخخ ما حنك الحراس فيهم واحد بعرفو
انا و نور: اوك
..
قعدنا شوية انا و نور و بعدها جات وهج و مشينا القاعه
وهج: المحاضرة الليله مع منو
انا : ما عارفه لكن اظن انها رياضيات
نور: اوبااا واخيراا حنشوف حضرة الاستاذ
انا بعاين ليها و بضحك معاها .. جا أ.احمد داخل و انا ما لاحظت الا بعد ما وهج لفتتني
نور: اوباا المكان نورر .. شوف شوف ابتسامتك حدها وين يا بت هاا😂
انا بقيت بحمر ليها و وهج تضحك بعدها بقيت مركزه مع الاستاذ بعد انتهى من الشرح و التوضيح سألنا اذا في سؤال قلنا لا بعدها طلع
نور: والله الاستاذ شرحو حلو مع اني ما فهمت شي بس يلا
انا: من يومك فهمك تقيل
وهج: يخواناا انا جعانه اتدردق ليكم هنا
نور: واضح انو جود اثرت عليك ارح زاتوو ماشه امعط فهد
جود: حيكون معاه صاحبو ي هبله انتي
نور: ما علي بيه
مشينا الكافتريا قعدنا و انا مشيت اجيب عصير و انا جاية فنن طقشتني و نص العصير اتكشح فيني و فستاني اتوسخ شديد
رجعت لورا شوية و بقيت بعاين ليها كانت لابسه جامسود جينز ضيقه شديد عاينت ليها من فوق لتحت و كشحت في وشها باقي العصير و بقيت ماشه اتعصبت و زهجت و مزاجي اتعكر نور و وهج و طاطا و فهد و صاحبو جاين علي شكلهم شافو الحصل و انا ماشه سمعت صوت بقول لي هيي اقيفي عندك واصلت مشي و وصلت عند ناس نور
نور: على فكرة هي قاصده تطقشك يطقشها لوري يهرس عظامها بركة المولى يخخ البت دي مالها هي
انا: بري هسي الا ارجع البيت اوفف باقي محاضرتين
طلال: جوود هو البت دي مالها ما حصل سمعت بيها عندك
انا : وحده صايعه ساي
.. ورح خلاص انا ماشه البيت
فهد: ثواني ثواني خليني اوصلك
انا: ما عايزة ماشه بالمواصلات
فهد بقى يعاين لي: ماشه بالمواصلات و انتي مبلولة كده ما عندك مخ ارح امرقي قدامي
انا: طيب و صحبك ما ظريفة اقعد معاه خليني بمشي براي
صاحب فهد: لا والله خليه يمشي ما مشكله يوم تاني بتنعاد
فهد: تسلم ي زياد كلك ذوق .. يلا ارح
..
مشينا و فجأة غير اتجاه البيت
انا : فووود ماشي وين انت
فهد: اسكتي بتعرفي
مشى لحدي ما وصل معرض كده بتاع ملابس
عاينت ليه : ما حانزل لو كسرت رقبتك
فهد: و انا ما طالب منك انا بامر فيك
بزهج : تأمرني بصفتك منو ابوي و لا اخوي يااخ قد من خلقتي خلاص فهمت انو عندك قروش و انو انا بت المزارع لكن اطمنك نحن ما فقراء و لا مساكين امشي شوف ليك ناس غيري .. و نزلت و قفلت وراي الباب و اقرب تكسي ركبتو و مشيت البيت .. ما عارفه ليه قلت لفهد كده بس زهجت و قرفت من انه كل مرة دافع علي قروش و اذا زعل في ستينو يزعل يطق ما لي دخل بيه .. وصلت البيت دخلت قلت لامي المحاضرات اتلغت دخلت غرفتي غيرت الفستان و غسلتو و قعدت اشخبط في الورق دايما لمن اتعصب بعمل كده ما عارفه ليه لمى و فنن خاتني في راسهم ما خايفه منهم لانو ما حيقدرو يعملو شي يأذيني و نمت على كده
.. عند فهد..
فهد بعد انتهى رجع نور بيتهم
نور قبل ما تنزل من العربية: في شنو حاصل صاري وشك السمح ده
فهد : اذا انا حابي بس اساعدها ابقى انا شايفها بت المزارع و انا الولد العندو قروش بالتراب يعني شنو لو انا طبعي كده و بحب اساعد
نور: انت غلطان و هي غلطانه انت غلطان لانك عملت حركه زي دي و هي زهجانه و هي غلطانه لانها اتكلمت و هي زهجانه يلا انا نازله
فهد: خير خير و رجع بيتهم
.... بلسان جود..
بعد عدت ايام من الحصل ده مافي اي تواصل بيني و بين فهد و ده كان احسن شي لاني كنت عايزة ابعد عنه ..
عدت الايام و جا وقت امتحان السمستر☺
...يتبع....
